Udi muvuluke anyi?

Uvuaku muanyishe dibala dia nimero ya ndekelu ya Tshibumba tshia Nsentedi anyi? Nanku, anji tetabi bua kuandamuna nkonko idi ilonda eyi:

• Kabadi ka Malu a Mikenji ka mu Allemagne kakambuluisha bua kupeta ditshimuna kayi mu malu a ntendelelu?

Kabadi aku kakashipa dipangadika dia kabadi kakuabu kavua kangate dipangadika dibi bua Bantemu ba Yehowa ne bua dimanyika diabu bu tshisumbu tshia bantu tshianyisha kudi mikenji. Dipangadika edi dia ditshimuna diakaleja ne: bua budikadidi bua ntendelelu, muntu udi mua ‘kutumikila malongesha a tshitendelelu tshiende’ kupita mudiye ulonda malu adi Mbulamatadi ulomba.​—15/8, dibeji 8.

• Yobo wakakenga tshikondo bule munyi?

Mukanda wa Yobo kawena uleja ne: wakakenga bidimu bia bungi to. Makenga a Yobo ne dijika diawu bivua mua kuikala bienze ngondo mikese, pamu’apa kayiyi ikumbana tshidimu tshijima to.​—15/8, dibeji 31.

• Bua tshinyi tudi bajadike ne: Diabolo ki mmuntu mufuikakaja mu lungenyi to?

Yezu Kristo uvua mumanye bimpe ne: Diabolo mmuntu mulelela. Yezu wakatetshibua kudi muntu mulelela, ki nkudi bubi kampanda buvua munda muende to. (Matayo 4:1-11; Yone 8:44; 14:30)​—1/9, dibeji 5-6.

• Nsumuinu 10:15 udi wamba ne: ‘Biuma bia mubanji bidi musoko wende wa ngumbu; bupele bua bantu bapele budi kubutuka kuabu.’ Ntshinyi tshidi tshileja ne: mêyi aa mmalelela?

Bubanji budi mua kukuba muntu ku imue mpukapuka ya mu nsombelu, anu mudi tshimenga tshidi ne ngumbu tshikale tshikuba badi basombelamu. Kadi bupele budi mua kuikala kabutu dîba didiku kumueneka malu avua muntu kayi mutekemene.​—15/9, dibeji 24.

• Mmu mushindu kayi muakatuadijabu ‘kubikila dîna dia Yehowa’ mu matuku a Enosha? (Genese 4:26)

Katshia ku tshibangidilu bantu bavua babikila dîna dia Nzambi; nunku muanda wakatuadija mu tshikondo tshia Enosha kauvua dibikila dia Yehowa ne ditabuja to. Bantu bavua mua kuikala bapepeje dîna dia Nzambi pavuabu badipeshadi anyi badipesha bantu bakuabu bavuabu bamona ne: bavua babambuluisha bua kutendelela Nzambi.​—15/9, dibeji 29.

• Muaku “diyisha” udi mu Bible udi umvuija tshinyi?

Muaku eu kawena umvuija kunyanga anyi kukengesha muntu mu mushindu kampanda to. (Nsumuinu 4:13; 22:15) Muaku wa tshiena-Gelika udibu bakudimune ne: “diyisha” udi nangananga umvuija: dilongesha, dilulamija, ne imue misangu dinyoka ne dîsu dikole kadi mu dinanga. Mushindu muimpe udi baledi mua kuidikija Yehowa nkudienzeja bua kuikala kuyikila ne bana babu. (Ebelu 12:7-10)​—1/10, dibeji 8, 10.)

• Mmunyi mudi bena Kristo balelela baleja lelu ne: mbalamate bukokeshi bua Nzambi?

Padi Bantemu ba Yehowa babingisha Bukalenge bua Nzambi, kabatu babuelakana mu malu a tshididi ta batombokela mbulamatadi nansha mu matunga mudibu babakandike to. (Tito 3:1) Badi buobu bambuluisha bantu mushindu uvua Yezu ne bayidi bende ba kumpala benze, ne badi badienzeja bua kuambuluisha bantu bua kulondabu malu a mushinga a mu Bible bu mudi: kuamba bulelela, kuikala ne bikadilu bilenga ne ngikadilu mimpe ku mudimu.​—15/10, dibeji 6.

• Mmushindu kayi udi mâyi a muoyo apueka mu Mikuna ya Andes?

Bantemu ba Yehowa ba mu tshitupa etshi badi badienzeja bua kutuadila bantu bulelela bua mu Bible, babayisha nansha too ne mu miakulu ibidi idibu bakulamu: wa tshiena-Quecha ne tshiena-Aymara. Bantemu batu baya kuyisha ne bantu ba mu bidiila bia Dijiba dia Titicaca, kabidi ne mu tshidiila “tshilelame” tshiashila pa bibumba bienza ne bituta bitu bitoloka mu mâyi a dijiba edi.​—15/10, dibeji 8-10.

• Ntshinyi tshidi Nzambi mutupeshe bua kutulombola tshitudi mua kufuanyikija ne ordinatere itu ilombola ndeke lelu?

Nzambi mmupeshe bantu tshintu tshidi munda muabu tshidi mua kubambuluisha bua kumanya malu adi mimpe ne adi mabi. Tshintu atshi nkondo ketu ka muoyo katudi baledibue naku. (Lomo 2:14, 15)​—1/11, dibeji 3-4.

• Bua tshinyi lufu lua Yezu ludi ne mushinga mutambe bunene?

Pakenza Adama (uvua muntu mupuangane) mpekatu, wakajimija muoyo buende yeye ne bua ndelanganyi yende. (Lomo 5:12) Bu muvua Yezu muntu mupuangane, wakalambula muoyo wende wa bumuntu, kufilaye mulambu wa kupikula nawu bantu udi unzuluila bena lulamatu njila wa kupeta muoyo wa kashidi.​—15/11, dibeji 5-6.

• Bena Sekutia badibu batele mu Kolosai 3:11 bavua banganyi?

Bena Sekutia bavua tshisamba tshia bantu bavua batambakana mu mpata ya ku Mputu ne ya ku Asia, bavua ne bukole ne lumu kubangila bu mu 700 too ne mu 300 K.B.B. Bavua babandi ba pa tubalu ne bena mvita bavua bakemesha. Kolosai 3:11 kêna mua kuikala wakula bua tshisamba kampanda tshisunguluke to, kadi udi wakula bua bantu bashadile bikole.​—15/11, dibeji 24-25.

• Bua tshinyi tudi mua kuamba ne: Dîyi dia mushinga mukole ndilongesha ditudi ne bua kuikala tulonda pa tshibidilu?

Dîyi edi dia mushindu wa kusomba bimpe badi badiumvuija mu Buena-Yuda, Buena-Buddha, mu nkindi ya bena Gelika ne mu Buena-Confucius. Kadi muanda wakamba Yezu mu Muyuki wende wa pa Mukuna udi ulomba bua kuenza malu malenga, ne udi utangila nsombelu wa bantu ba miaba yonso ne ba milongo yonso. (Matayo 7:12)​—1/12, dibeji 3.