Bena Kristo balelela bonso mbamanyishi ba evanjeliyo

‘Nuimbile Yehowa musambu, nuvudijile dîna diende disanka; nuambile bantu lumu [luimpe] lua lupandu luende ku dituku ku dituku.’​—MUSAMBU 96:2.

1. Ndumu luimpe kayi ludi bantu basue kuteleja, ne mmunyi mudi Bantemu ba Yehowa bafila tshilejilu mu ditangalaja lumu elu?

 PATUDI tumona mudi bipupu bienzeka lelu pa buloba dituku dionso, bidi bitamba kutukolesha ku muoyo bua kumanya ne: bilondeshile Bible, mvita, bilumbu, nzala ne dikengeshangana bikadi pa kujika mu katupa kîpi emu. (Musambu 46:9; 72:3, 7, 8, 12, 16) Elu ki ndumu luimpe ludi muntu yonso musue kuteleja anyi? Ke tshidi Bantemu ba Yehowa bamona. Mbamanyike miaba yonso bu bantu batu bayisha ‘lumu luimpe.’ (Yeshaya 52:7) Bulelela, mbakengeshe Bantemu bavule, bionso ebi anu bualu mbadisuike bua kuambila bantu lumu luimpe. Badi benza nanku bua diakalenga dia bantu. Bantemu batu bamanyike bikole bua lukunukunu ne dinanukila diabu!

2. Mbua bualu kayi bumue budi Bantemu ba Yehowa bikadile ne lukunukunu?

² Lukunukunu ludi nalu Bantemu ba Yehowa lelu ludi lufuanangana ne lua bena Kristo ba mu bidimu lukama bia kumpala. Tshikandakanda tshikuabu tshia bena Katolike tshiakambilamu bua bualu buabu ne: “Bena Kristo ba kumpala, pavuabu anu batambula, diakamue bavua badimona ne dibanza dia kutangalaja Evanjeliyo. Bapika bavua bamanyisha Evanjeliyo ku dîyi dia mukana.” (L’Osservatore Romano) Bua tshinyi Bantemu ba Yehowa batu ne lukunukunu lua bungi anu bu muvua bena Kristo ba kumpala? Tshia kumpala: bualu lumu luimpe ludibu bamanyisha ndua kudi Yehowa Nzambi nkayende. Bualu ebu ke budi butamba kubasaka bua kuikala ne lukunukunu. Badi bayisha bua kutumikila mêyi a mufundi wa Misambu a se: ‘Nuimbile Yehowa musambu, nuvudijile dîna diende disanka; nuambile bantu lumu [luimpe] lua lupandu luende ku dituku ku dituku.’​—Musambu 96:2.

3. (a) Mbualu buibidi kayi budi Bantemu ba Yehowa balejila lukunukunu? (b) ‘Lupandu lua [Nzambi]’ ludi lukonga malu kayi?

³ Mêyi a mufundi wa Misambu adi atuvuluija bualu buibidi budi Bantemu ba Yehowa bikadile ne lukunukunu. Mukenji wabu ngua lupandu. Bamue bantu batu benza mudimu mu malu a luondapu, a nsombelu wa bantu, a mpetu ne malu makuabu bua kulengeja nsombelu udi nende bantu, ne mbakanyine kalumbandi bua malu aa. Kadi kakuena bualu nansha bumue budi muntu mua kuenzela mukuabu budi mua kuikala mumue ne ‘lupandu [lua Nzambi]’ to. Ku diambuluisha dia Yezu Kristo, Yehowa neapikule bena bupuekele ku mpekatu, ku masama ne ku lufu. Nenku bantu bapikulaye nebapete muoyo wa tshiendelele! (Yone 3:16, 36; Buakabuluibua 21:3, 4) Lupandu elu ludi munkatshi mua “malu a kukema” adi bena Kristo balondela bantu bua kutumikila mêyi a se: ‘Nuambile ba munkatshi mua bantu ba bende butumbi buende, numanyishe ba munkatshi mua bantu bonso malu a kukema akenzaye. Bualu bua Yehowa udi munene, budiye nabu mbua kutumbishibua bikole; budiye nabu mbua kunemeshibua pa mutu pa nzambi yonso ya patupu.’​—Musambu 96:3, 4.

Tshilejilu tshia Mfumuetu

4-6. (a) Mbualu buisatu kayi budi Bantemu ba Yehowa bikadile ne lukunukunu? (b) Mmunyi muakaleja Yezu lukunukunu mu mudimu wa diyisha lumu luimpe?

⁴ Kudi bualu buisatu budi busaka Bantemu ba Yehowa bua kuikala ne lukunukunu. Badi balonda tshilejilu tshia Yezu Kristo. (1 Petelo 2:21) Muntu mupuangane au wakitaba ne muoyo mujima mudimu wa “kuambila [bena bupuekele] lumu luimpe.” (Yeshaya 61:1; Luka 4:17-21) Nunku wakalua mumanyishi wa evanjeliyo, mbuena kuamba ne: muambi wa lumu luimpe. Wakendakana mu  Galela ne mu Yudaya, wenda ‘wambila [bantu] lumu luimpe lua bukalenge.’ (Matayo 4:23) Bu muvua Yezu mumanye ne: bantu ba bungi bavua ne bua kuitaba lumu luimpe alu, wakambila bayidi bende ne: “Bia kunowa mbivule, kadi banowi mbakese. Lombayi Mfumu wa budimi, atume bena mudimu mu budimi buende.”​—Matayo 9:37, 38, MMM.

⁵ Mu diumvuangana ne disambila diende edi, wakalongesha bakuabu bua kuikalabu bamanyishi ba evanjeliyo. Kunyima kua matuku, wakatuma bapostolo bende nkayabu ne kubambilaye ne: ‘Panuaya mu njila, nulongeshe dîyi nuambe ne: Bukalenge [bua mu diulu] buakusemena pabuipi.’ Bivuaku mua kuikala bimpe bua buobu kulongolola malu a mushindu wa kukepesha makenga a bantu avuaku dîba adi anyi? Peshi bavuaku mua kubuela mu tshididi bua kuluisha malu mabi avuaku mu tshikondo atshi? Tòo, ki muomu to. Kadi Yezu mmuleje tshidi bena Kristo bonso bamanyishi ba evanjeliyo ne bua kuenza pakambilaye bayidi bende ne: “Panuaya mu njila, nulongeshe.”​—Matayo 10:5-7, Muanda Mulenga Lelu.

⁶ Kunyima, Yezu wakatuma tshisumbu tshikuabu tshia bayidi bua kumanyishabu ne: ‘Bukalenge bua Nzambi buakulua pabuipi.’ Yezu wakasanka bikole pakapinganabu bua kumulubuila muvuabu bende bimpe mu luendu luabu lua dimanyisha evanjeliyo. Wakasambila ne: ‘Tatu wanyi, Mukalenge wa diulu ne wa buloba, ndi nkusakidila bua wewe wakusokoka bena meji ne bena budimu malu aa, wakuasokolola kudi bana bakese.’ (Luka 10:1, 8, 9, 21) Bayidi ba Yezu, aba bavua kumpala balobi ba dilambu, bidime ne benji ba midimu mikuabu, bavua bu bana bakese pa kubafuanyikija ne balombodi ba bitendelelu bavua ku mutu kua ditunga ne bavua balonge bikole. Kadi Yezu yeye uvua mulongeshe bayidi bua kumanyishabu lumu luimpe luvua lutambe ngumu yonso.

7. Kunyima kua dibanda dia Yezu mu diulu, mbanganyi bavua bayidi bende bayishe lumu luimpe kumpala?

⁷ Yezu mumane kubanda mu diulu, bayidi bende bakatungunuka ne kutangalaja lumu luimpe lua lupandu. (Bienzedi 2:21, 38-40) Mbanganyi bakayishabu kumpala? Bakaya kudi bisamba bivua kabiyi bimanye Nzambi anyi? Tòo, budimi buabu bua kumpala buakenzelabu mudimu buvua Isalele, tshisamba tshikavua tshimanye Yehowa munkatshi mua bidimu bipite pa 1 500 bijima. Bavuaku ne bukenji bua kuyisha mu ditunga mukavua bantu batendelele Yehowa anyi? Eyowa. Yezu ukavua mubambile ne: ‘Nenuikale bamanyi banyi mu Yelushalema ne mu Yudaya yonso ne Samalea ne ku mfudilu kua buloba.’ (Bienzedi 1:8) Bena Isalele bavua dijinga ne lumu luimpe bikole kupita tshisamba tshikuabu tshionso.

8. Mmunyi mudi Bantemu ba Yehowa bidikija bena Kristo ba mu bidimu lukama bia kumpala lelu?

 ⁸ Bia muomumue, lelu Bantemu ba Yehowa badi bayisha pa buloba bujima. Badi benza mudimu eu pamue ne muanjelu uvua Yone mumone ‘ne lumu luimpe lua tshiendelele lua kuambilaye badi bikala pa buloba, ne kudi ditunga dionso ne tshisamba tshionso ne muaku wonso ne bantu bonso.’ (Buakabuluibua 14:6) Mu tshidimu tshia 2001, bavua benze mudimu ne tshisumi mu matunga ne teritware 235, kusangisha ne amue matunga atubu bangata bu a bena Kristo. Mbibi bua Bantemu ba Yehowa kuyisha miaba ikadi Bukua-buena-Kristo buase ekeleziya yabu anyi? Bamue badi bamba ne: mbibi, ne badi mene bamona diyisha evanjeliyo dia mushindu’eu bu “kuiba mikoko ya bende.” Kadi Bantemu ba Yehowa badi bavuluka mêyi akamba Yezu bua bena Yuda bena bupuekele ba mu tshikondo tshiende. Nansha mukavuabu ne buakuidi, Yezu kakelakana bua kubambila lumu luimpe to. ‘Wakadi nabu luse, bualu bua buobu bakadi batata, bakadi bamuangalake bu mikoko idi kayiyi ne mulami.’ (Matayo 9:36) Padi Bantemu ba Yehowa bapeta bantu badipuekeshi badi kabayi bamanye malu a Yehowa ne a Bukalenge buende, badiku ne bua kubenga bua kuambila bantu aba lumu luimpe anu bualu kudi tshitendelelu tshidi tshiamba mudi bantu aba bikale batshi anyi? Tshilejilu tshia bapostolo ba Yezu tshidi tshitusaka bua kuandamuna ne: kabiena nanku to. Tudi ne bua kuyisha “bisamba bionso” lumu luimpe katuyi tusunguluja to.​—Mâko 13:10.

Bena Kristo ba kumpala bonso bavua bamanyisha evanjeliyo

9. Mbanganyi bavua benza mudimu wa buambi mu tshisumbu tshia bena Kristo mu bidimu lukama bia kumpala?

⁹ Mbanganyi bakenza mudimu wa kuyisha mu bidimu lukama bia kumpala? Malu adi aleja ne: bena Kristo bonso bavua bamanyishi ba evanjeliyo. Mufundi Samuel Williams udi wamba ne: “Badi bajadika miaba ya bungi ne: bena Kristo bonso ba mu Ekeleziya wa kumpala . . . bakayisha evanjeliyo.” Bible udi wamba bua malu akenzeka dituku dia Pentekoste wa mu 33 B.B. ne: ‘Buonso buabu [balume ne bakaji] bakadi bûle tente ne nyuma muimpe, bakabanga kuakula miaku mikuabu bu muakabapa nyuma dîyi dia kuambabu.’ Pashishe kuakalua balume ne bakaji, bansonga ne bantu bakole, bapika ne badikadile munkatshi mua bamanyishi ba evanjeliyo. (Bienzedi 1:14; 2:1, 4, 17, 18; Yoele 2:28, 29; Galatia 3:28) Pakanyema bena Kristo ba bungi mu Yelushalema pavuabu babakengeshamu, ‘bakadi batangadike bakendakana bamba dîyi dia lumu luimpe.’ (Bienzedi 8:4) Bonso “bakadi batangadike” bakamanyisha evanjeliyo, ki ng’anu bantu bakese bavuabu basungule nansha.

10. Mmudimu kayi wa bitupa bibidi wakenzabu kumpala kua kabutu kakakuata bena Yuda?

¹⁰ Ke tshiakenzeka mu bidimu abi bia kumpala. Yezu wakamanyisha ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’ (Matayo 24:14) Pakakumbana mêyi aa mu bidimu lukama bia kumpala, bakavua bayishe lumu luimpe miaba ya bungi kumpala kua biluilu bia bena Lomo kubutulabi malu a ntendelelu ne a tshididi a bena Yuda. (Kolosai 1:23) Kabidi, bayidi bonso ba Yezu bakatumikila dîyi diende edi: ‘Yayi bienu, nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe; nubayishe mua kuenza malu onso angakanuambila.’ (Matayo 28:19, 20) Bena Kristo ba kumpala kabavua bambile  bena bupuekele bua kuitabuja Yezu ne pashishe kubalekela batendelela Nzambi mu wabu mushindu anu mudi bamue bayishi ba lelu benza nansha. Kadi, bavua babalongesha bua kulua bayidi ba Yezu, babateka mu bisumbu ne babalongesha bua buobu pabu kuyisha lumu luimpe ne kuvuija bantu bayidi. (Bienzedi 14:21-23) Tshilejilu atshi ke tshidi Bantemu ba Yehowa balonda lelu.

11. Mbanganyi lelu badi bamanyisha bantu lumu luimpe ludi lupite ngumu yonso?

¹¹ Bantemu ba Yehowa ba bungi mbalonde tshilejilu tshia Paulo, Bânaba ne bakuabu bena Kristo ba mu bidimu lukama bia kumpala padibu baya kuenza bu-misionere mu matunga a ku-ba-bende. Mudimu wabu mmukuatshishe bantu bikole, bualu ki mbabuele mu malu a tshididi peshi mu malu makuabu, balekele mudimu wa kuyisha lumu luimpe nansha. Buobu mbatumikile dîyi dia Yezu dia se: “Panuaya mu njila, nulongeshe.” Bushuwa, Bantemu ba Yehowa ba bungi kabatu ba-misionere mu matunga a ku-ba-bende to. Ba bungi ba kudibu badi benza mudimu wa bianza bua kupeta tshiakudia, ne bakuabu batshidi balonga kalasa. Bamue badi ne bana badibu bakolesha. Kadi tumanye ne: Bantemu bonso badi bayisha bakuabu lumu luimpe ludibu balonge. Bansonga ne bantu bakole, balume ne bakaji badi batumikila ne disanka dionso mubelu wa mu Bible wa se: ‘Ambila bantu dîyi dia Nzambi mene, nanukila kubambila misangu miakane ne misangu idi kayiyi miakane.’ (2 Timote 4:2) Anu bu aba bavua babadianjidile mu bidimu lukama bia kumpala, Bantemu badi batungunuka ‘kabayi balekela kuyisha bantu ne kubambila ne: Yezu udi Kristo.’ (Bienzedi 5:42) Badi bamanyisha bantu lumu luimpe lupite ngumu yonso.

Badi bitabijija bantu malu anyi badi bamanyisha evanjeliyo?

12. Mmunyi mudi bantu bamona kuitabijija bantu malu lelu?

¹² Lelu bamue bantu batu bamba ne: kuitabijija muntu malu nkubi. Mukanda mupatula kudi Tshipangu tshia Ekeleziya ya Buloba bujima udi mene wakula bua “mpekatu wa ditabijija muntu malu.” Bua tshinyi? Tshimue tshikandakanda tshia bena Katolike tshidi tshiamba ne: “Bua didiabakena didi kadiyi dijika didi mu Ekeleziya wa bena Ortodokse, ‘ditabijija bantu’ ndilue kuikala mumue ne dikudimuisha bantu mitshima ku bukole.”​—Catholic World Report.

13. Fila bimue bilejilu bia ditabijija bantu malu dibi.

¹³ Ditabijija bantu malu ndibi anyi? Didi mua kuikala dibi imue misangu. Yezu wakamba ne: ditabijija bantu malu dia bafundi ne Bafalese divua dienzela bantu bavuabu bakudimuishe mitshima bibi. (Matayo 23:15) Bushuwa, “dikudimuisha bantu mitshima ku bukole” ndibi. Tshilejilu, bilondeshile Josèphe mufundi wa miyuki ya malu a kale, pavua muena Makabeye Jean Hyrcan mukokeshe bena Edome, “wakabanyishila bua kushalabu mutantshi mule mu ditunga diabu anu pavuabu baditenguisha ne bitaba bua kutumikila mikenji ya bena Yuda.” Bena Edome bavua ne bua kulonda ntendelelu wa bena Yuda bua kushishabu kusomba mu bukokeshi bua bena Yuda. Bafundi ba miyuki ya malu a kale badi batuambila ne: mu lukama lua bidimu lua muanda-mukulu B.B., mukalenge Charlemagne wakakokesha matunga a ba-Saxon bavua kabayi bena Kristo ba ku Mputu wa ku Nord ne kubakudimuishaye mitshima ne tshikisu. * Tudiku mua kuamba ne: bena Edome peshi ba-Saxon bavua bakudimune mitshima bulelela anyi? Tshilejilu, dilamata dia Mukalenge Helode muena Edome (wakakeba bua kushipa  Yezu pavuaye muana) ku Mikenji ya Mose mifundisha ku nyuma wa Nzambi divua dilelela anyi?​—Matayo 2:1-18.

14. Mmunyi mudi bamue ba-misionere ba mu Bukua-buena-Kristo benzeja bantu ku bukole bua kukudimunabu mitshima?

¹⁴ Lelu kudiku bamue bantu badibu bakudimuisha mitshima ku bukole anyi? Eyowa. Batu bambe ne: bamue ba-misionere ba mu Bukua-buena-Kristo batu bapesha bantu ba mu matunga menyi badibu basue kukudimuisha mitshima mishindu idibu mua kulonga tulasa bua kupeta mamanya mabandile. Peshi badi mua kuanji kusombesha muena tshimuangi udi ne nzala panshi bua ateleje diyisha bua kushishabu kumupesha tshiakudia. Bilondeshile mêyi akambabu mu tshidimu tshia 1992 mu tshipangu tshia Bansaserdose bena Ortodokse, “ditabijija bantu ditu imue misangu dimuenekela ku dibalobesha ne bintu ne misangu mikuabu ku mishindu kabukabu ya tshinyangu.”

15. Bantemu ba Yehowa badi bitabijija bantu malu mushindu udibu bumvuija bualu ebu lelu anyi? Umvuija.

¹⁵ Kuenzeja bantu ku bukole bua kushintulula ntendelelu wabu ki nkuimpe to. Bantemu ba Yehowa kabatu benzeja bantu malu ku bukole to. * Nunku, kabena bitabijija bantu mushindu udi bantu bumvuija bualu ebu lelu to. Kadi, anu bu bena Kristo ba mu bidimu lukama bia kumpala, badi bayisha muntu yonso lumu luimpe. Bantu bonso badi bitaba ku budisuile badi babalomba bua kupetabu dimanya divule ku diambuluisha dia dilonga dia Bible. Bantu badi basankidila bulelela nunku badi balonga mua kuikala ne ditabuja dikole (dishindamene bikole pa dimanya dijalame dia mu Bible) kudi Nzambi ne mu malu adiye mulongolole bua kuenza. Ke bualu kayi badi babila dîna dia Nzambi: Yehowa, bua kupetabu lupandu. (Lomo 10:13, 14, 17) Muntu nkayende ke udi usungula bua kuitaba anyi kubenga kuitaba lumu luimpe. Kabena benzeja bantu malu ku bukole to. Bu buobu bitabijija bantu malu ku bukole, dikudimuna mutshima kadivua mua kuikala ne mushinga to. Nzambi udi wanyisha anu ntendelelu udi ufumina mu mutshima wa muntu.​—Dutelonome 6:4, 5; 10:12.

Dimanyisha evanjeliyo matuku etu aa

16. Mmunyi mudi mudimu wa Bantemu ba Yehowa wa dimanyisha evanjeliyo muvulangane matuku etu aa?

¹⁶ Mu matuku etu aa, Bantemu ba Yehowa mbayishe lumu luimpe lua Bukalenge bua kukumbaja mêyi a mu Matayo 24:14 mu mushindu mualabale. Tshibumba tshia Nsentedi * ke tshibejibeji tshiende lumu tshidibu benze natshi mudimu eu wa dimanyisha evanjeliyo. Mu tshidimu tshia 1879, pakapatulabu nimero ya kumpala ya Tshibumba tshia Nsentedi, bakabanya bibejibeji ebi bitue ku 6 000 mu muakulu umue. Kadi mu tshidimu tshia 2001, tuambe ne: bidimu bipite pa 122 kunyima, bungi bua bibejibeji ebi bidibu babanye mbufike ku 23 042 000 mu miakulu 141. Pa kumbusha divula dia bibejibeji bidibu babanye, kudi kabidi divulangana mu malu makuabu mu mudimu wa dimanyisha evanjeliyo udi Bantemu ba Yehowa benza. Fuanyikija binunu bikese bia mêba adibu benze tshidimu tshionso mu mudimu wa dimanyisha evanjeliyo mu lukama lua bidimu lua 19 ne mêba 1 169 082 225 adibu benze mu mudimu wa buambi mu tshidimu tshia 2001. Tangila kabidi bantu 4 921 702 badi bitabe dilonga dia Bible kakuyi  difuta mfranga mu tshidimu tshine etshi. Mmudimu mulenga bungi kayipu nunku udibu benze! Mudimu wonso eu uvua muenza kudi bayishi ba Bukalenge ba tshisumi 6 117 666.

17. (a) Nnzambi ya dishima kayi idi bantu batendelela lelu? (b) Ntshinyi tshidi muntu yonso ne bua kumanya nansha yeye wakula muakulu kayi, anyi wa mu ditunga kayi, peshi muikale ne nsombelu kayi?

¹⁷ Mufundi wa Misambu udi wamba ne: ‘Nzambi yonso ya bantu ba bende idi bintu bia patupu; kadi Yehowa wakafuka bia mu diulu.’ (Musambu 96:5) Lelu mu malu adi kaayi a bitendelelu, bantu mbavuije ditunga diabu, mabendele a matunga abu, banene ba mu matunga abu, biuma ne bubanji bu bintu bia kutendelela. (Matayo 6:24; Efeso 5:5; Kolosai 3:5) Umue musangu Mohandas Gandhi wakamba ne: “Ndi ngamba njadika bimpe ne: . . . Lelu bena ku Mputu mbena Kristo ba ku dîna patupu. Badi batendelela Mamona abu [mabanji].” Kadi tshia kumanya ntshia se: bantu ba miaba yonso badi ne bua kumvua lumu luimpe. Muntu yonso, nansha yeye wakula muakulu kayi, peshi muikale wa mu ditunga kayi, ta muikale ne nsombelu kayi, udi ne bua kumanya malu a Yehowa ne majinga ende. Tudi basue bua bantu bonso batumikile mêyi a mufundi wa Misambu a se: ‘Nuambike Yehowa butumbi ne bukole. Nuambike Yehowa butumbi budi buakanangane ne dîna diende.’ (Musambu 96:7, 8) Bantemu ba Yehowa badi bambuluisha bantu bua kulonga malu a Yehowa bua bafike ku dimuambika butumbi mu mushindu muimpe. Ne bantu badi bitaba diambuluisha edi badi bapeta masanka mavule. Mmasanka kayi adibu bapeta? Netuamone mu tshiena-bualu tshidi tshilonda.

[Mêyi adi kuinshi]

Udi mua kumvuija anyi?

• Bua tshinyi Bantemu ba Yehowa batu bamanyisha evanjeliyo ne lukunukunu?

• Bua tshinyi Bantemu ba Yehowa batu bayisha nansha miaba idi Bukua-buena-Kristo buase ekeleziya yabu?

• Bua tshinyi Bantemu ba Yehowa kabena bitabijija bantu malu mushindu udibu bumvuija bualu ebu lelu?

• Umvuija mudi mudimu wa Bantemu ba Yehowa wa dimanyisha evanjeliyo muvule lelu.

[Nkonko ya dilonga]

[Tshimfuanyi mu dibeji 9]

Yezu wakamanyisha evanjeliyo ne lukunukunu ne wakalongesha bakuabu bua kuenzabu mudimu eu

[Tshimfuanyi mu dibeji 10]

Bonso bavua mu tshisumbu mu bidimu lukama bia kumpala bavua bamanyisha evanjeliyo

[Tshimfuanyi mu dibeji 11]

Kuenzeja bantu ku bukole bua kushintululabu ntendelelu wabu ki nkuimpe to