Bakakankamija balongeshi ba Dîyi dia Nzambi bua kukumbaja mudimu wabu

BALONGESHI ba Dîyi dia Nzambi nkama ya binunu bakadisangisha bua kulonga mu ngondo mishale eyi. Kubangila ku ngondo muitanu wa tshidimu tshishale, bakadisangisha nkama mivule mu Mpungilu ya Distrike ya Bantemu ba Yehowa ya “Balongeshi ba Dîyi dia Nzambi” yakenzeka pa buloba. Bakakankamija bantu bonso bavua babuela mu Mpungilu ayi bua kuanjibu kudilongesha buobu nkayabu, bua kuluabu bakumbane bimpe menemene, ne pashishe bua kumonabu mua kukumbaja mudimu wabu wa balongeshi.

Uvuaku mu umue wa ku mpungilu eyi anyi? Bikalabi nanku, uvua muanyishe tshia bushuwa biakudia bilenga bia mu nyuma bivuabu bafile mu bisangilu ebi bienza bua kutendelela Yehowa Nzambi mulelela. Mpindieu tudi tukulomba bua tukonkonone tshiapamue malu atuvua balonge mu mpungilu eu.

Dituku dia kumpala: Malu mafundisha ku nyuma wa Nzambi adi atuambuluisha bua kulongesha

Mulombodi wa mpungilu wakajingila bonso bavua babuelamu difika dilenga mu muyuki uvua ne tshiena-bualu tshia se: “Balongeshi ba Dîyi dia Nzambi, ikalayi ne dimanya.” Yezu Kristo wakalua Mulongeshi Munene bualu bavua bamulongeshe kudi Yehowa “Muyishi [Munene].” (Yeshaya 30:20; Matayo 19:16) Tuetu basue kulua balongeshi ba Dîyi dia Nzambi bapiluke, mbimpe bua Yehowa ikale utulongesha petu.

Muyuki wakalonda uvua ne: “Kulongesha bantu malu a Bukalenge kudi kupatula bipeta bilenga.”  Nkonko yakelabu balongeshi bapiluke ba Dîyi dia Nzambi yakaleja masanka ne mabenesha adi afumina ku mudimu wa divuija bantu bayidi.

Panyima kuakalua muyuki mulenga uvua wamba ne: “‘Malu manene a Nzambi’ adi atusaka bua kumuenzela mudimu.” Mu bidimu lukama bia kumpala, ‘malu manene a Nzambi’ avua atangila Bukalenge bua Nzambi akasaka bantu bua kuenza bualu kampanda. (Bienzedi 2:11) Tuetu petu tudi mua kusaka bantu ku dienza bualu kampanda bu tuetu mua kubamanyisha “malu manene a Nzambi” adi mikale malongesha a mu Mukanda wa Nzambi adi atangila mulambu udi upikula bantu, dibika ku lufu ne tshipungidi tshipiatshipia.

Muyuki uvua ulonda wakakankamija bantu bonso wamba ne: “Tusankayi bua buakane bua Yehowa.” (Musambu 35:27) Bakatuleja ne: bua kulonda buakane tudi ne bua kulonga mua kunanga malu adi makane ne kukina aa adi mabi, ne bua kuenzekabi nanku tudi ne bua kulonga Bible, kukandamena malu adi mua kutuenzela bibi mu nyuma ne kudienzeja bua kuikala ne budipuekeshi. Malu aa neatukube ku malunda mabi, neatukube ku lungenyi lua zukuzuku lua kupeta mabanji lua bena panu, ne ku manaya mabi ne ku malu a tshikisu.

Muyuki wa nshindamenu uvua wuowu ne tshiena-bualu tshia se: “Balongolola tshishiki bua kuikala balongeshi ba Dîyi dia Nzambi” wakatuvuluija ne: Yehowa udi utuvuija basadidi bende bakumbane ku diambuluisha dia Dîyi diende, nyuma muimpe wende ne bulongolodi buende bua pa buloba. Pa bidi bitangila dienza mudimu ne Dîyi dia Nzambi, ngamba-malu wakatubela e kuamba ne: “Tshipatshila tshietu ntshia kuangata mukenji wa mu Bible ne kuubueja mu mitshima ya badi batuteleja.”

Muyuki wa kumpala wa bitupa bisatu wa mpungilu eu uvua wamba ne: “Tudi tudilongesha patudi tulongesha bakuabu.” Tshitupa tshia ntuadijilu tshiakaleja ne: tudi ne bua kutumikila petu mikenji milenga ya bena Kristo ya muomumue eyi idi yakula bua bikadilu bimpe bitudi tulongesha bakuabu. Tshitupa tshiakalonda tshiakatubela bua ‘kuludikila bantu njila mululame mu dîyi dia Nzambi dia bushuwa.’ (2 Timote 2:15) Bua tuetu kudilongesha, tudi ne bua kuikala ne tshibidilu tshia kudilongela Bible ne tshisumi, nansha tuetu tukadi benzele Nzambi mudimu bidimu bungi kayi. Tshitupa tshia ndekelu tshia muyuki eu wa bitupa bisatu tshiakaleja ne: Diabolo mmututangile, ukeba ngikadilu bu mudi: lutambishi, dijinga dia kuikala badikadile, didimona ne mushinga kupita bakuabu, mukawu, lubabu, tshiji, dilaminangana malu munda ne ditalulangana bilema. Kadi  tuetu bakandamene Diabolo ne muoyo mujima, yeye neatunyeme. Nenku bua kukandamena Diabolo, tudi ne bua kusemena pabuipi ne Nzambi.​—Yakobo 4:7, 8.

Muyuki wakalua pa dîba diawu wa se: “Nyemayi tshipupu tshia dibandila bimfuanyi bia bantu kabayi bilamba [anyi pornografi]” wakatuleja mushindu wa kutshimuna tshilele etshi tshibi tshidi mua kutujiwula mu nyuma. Muprofete Habakuka wakamba bua Yehowa ne: ‘Wewe udi ne mêsu adi mapite buakane adi kayi mua kutangila malu mabi, ne kuena mua kutangila bienzedi biabu bibi tshianana.’ (Habakuka 1:13) Tudi ne bua ‘kukina malu adi mabi.’ (Lomo 12:9) Bakabela baledi bua kuikala kulondolola bua kumanya bintu bidi bana babu babandila ku Internet ne ku televizion. Ngamba-malu wakaleja ne: aba bakadi bumvua muoyo ubasaka anu kubasaka bua kuikala kubandila anyi kubala malu a bantu kabayi bilamba ta pornografi aa badi ne bua kulomba mibelu kudi mulunda kampanda mupie mu nyuma. Nebibambuluishe bu buobu mua kuelangana meji ne kukuata ku muoyo imue mvese ya mu Bible bu mudi Musambu 97:10; Matayo 5:28; 1 Kolinto 9:27; Efeso 5:3, 12; Kolosai 3:5; ne 1 Tesalonike 4:4, 5.

Mukuabu muyuki wakalua panyima apu wa: “Ditalala dia Nzambi dikukube,” wakatushindikila se: padi bujitu bua tunyinganyinga bututshiokeshe, tudi mua kubupuila Yehowa. (Musambu 55:22) Tuetu basambile Yehowa ne bamuambile yetu yonso idi munda, yeye neatupeshe “ditalala dia Nzambi,” bupole bua mu mutshima budi bufumina ku malanda mimpe atudi badie nende.​—Filipoi 4:6, 7.

Dituku dia kumpala adi diakajika ne muyuki muimpe wa tshikuma wa ne: “Yehowa udi ulengeja bantu bende ne butoke.” Muyuki eu wakumvuija mushindu udi nshapita wa 60 wa mukanda wa Yeshaya ukumbana. Mu mîdima ya mu nyuma idiku lelu pa buloba apa, “bantu ba mu bisamba bia bende,” mumue ne: bantu ba mu musumba munene (udi wenda umueneka) badi bafuane mikoko badi mu butoke bua Yehowa pamue ne bena Kristo bela manyi. Ngamba-malu wakakula bua mvese wa 19 ne wa 20, idi ileja ne: “Yehowa ‘kakupueka’ bu dîba anyi ‘kubuela’ bu ngondo to. Neatungunuke ne kulengeja bantu bende, ubakenkesha ne butoke buende. Nditushindikila malu dilenga kayipu bua tuetu aba badi ne muoyo mu matuku a nshindikilu wa bukua-panu ebu budi mu mîdima!” Bua kuoya muyuki eu, ngamba-malu wakamanyisha dipatuka dia mukanda muibidi wa La prophétie d’Isaïe lumière pour tous les humains. Ukadi mujikije dibala mukanda mupiamupia eu anyi?

Dituku dibidi: Bakumbane bua kulongesha bakuabu

Kunyima kua dikonkonona mvese wa ku dituku, tuakateleja ne ntema muyuki muibidi wa bitupa bisatu mu mpungilu eu, muyuki au uvua ne tshiena-bualu tshia se: “Benji ba mudimu udi uvuija bakuabu bena kuitabuja.” Bangamba-malu bakenza muyuki eu wa bitupa bisatu bakumvuija tshionso tshia ku bidia bisatu bidi bikengela kuela bua kuambuluisha bantu bua kumonabu mua kulua bena kuitabuja: kutangalaja mukenji wa Bukalenge, kukolesha dijinga dia kumanya bivule ditudi tusangana kudi bantu, ne kubalongesha mua kuenza malu akamba Kristo. Nkonko yakelabu bamue bana betu ne manaya avua aleja muvua malu menzeke biakatuleja mushindu musunguluke utudi mua kulongesha bakuabu bua kuluabu bayidi.

Muyuki wakalonda uvua wamba ne: “Sakidila dilamata  dia Nzambi ku dinanukila diebe.” Ngamba-malu wakaleja ne: tshidi ne mushinga menemene ‘nkunanukila too ne ku nshikidilu.’ (Matayo 24:13) Tudi ne bua kuenza mudimu ne bintu bionso bidi Nzambi mutupeshe bu mudi: disambila, didilongela, bisangilu ne mudimu wa buambi bua kuikala ne dilamata dia Nzambi. Katulekedi majinga ne malu makuabu a panu bitekesha ne binyanga dilamata dietu kudi Nzambi to.

Mmunyi mudi bantu badi batata ne bazengele mua kupeta dikisha lelu? Muyuki wa se: “Tuambulayi mutshi wa tshikokedi wa Kristo bua kupeta dikisha” wakandamuna lukonko alu. Yezu wakambila bayidi bende bua kuambulabu tshikokedi tshiende ne bua kuyilabu malu kudiye. (Matayo 11:28-30) Tudi tuambula tshikokedi tshia Yezu patudi tulonda tshilejilu tshiende tshia kuikala ne nsombelu mupepele ne nkatshinkatshi mu bitudi tuenza. Bakapatula malu manene a mu muyuki eu ne nkonko yakelabu aba badi bavuije nsombelu wabu mupepele.

Bumue bua ku malu manene a mu bisangilu binene bia Bantemu ba Yehowa mbatismo wa bantu badi bafume ku didilambula kudi Nzambi. Muanetu uvua ne muyuki wa “Batismo udi ufikisha bantu ku midimu mitambe bunene ya dilongeshangana” wakajingila aba bavua ne bua kutambula difika dilenga ne muoyo mujima, ne wakabalomba bua kuenzabu midimu mitambe bunene. Balongeshi aba ba Dîyi dia Nzambi bavua bafuma ku ditambula bavua bakumbaje ngikadilu idi Mukanda wa Nzambi ulomba aba badi mua kupeta majitu mashilashilangane mu tshisumbu.

Muyuki wa ntuadijilu mu mapingaja uvua ne: “Tuidikijayi Mulongeshi Munene.” Munkatshi mua mutantshi mule menemene muvuaye mu diulu, Yezu wakatangila mushindu uvua Tatuende wenza malu ne wakamuidikija, nenku kuluaye Mulongeshi Munene. Pavuaye pa buloba, uvua ne ndongeshilu milenga ivuaye wenza nayi mudimu, bu mudi nkonko ivua yeleshisha bantu meji ne mifuanu mipepele ivua ilenga bantu ku muoyo. Yezu wakangatshila malongesha ende mu Dîyi dia Nzambi ne uvua wakula ne musangelu, ne muoyo mujima, kayi ne dielakana. Kabivuaku bitukankamija bua kuidikija Mulongeshi Munene eu anyi?

Muyuki mukuabu mulenga wa se: “Utuku ne muoyo wa kukuatshila bakuabu mudimu anyi?” wakatukankamija pawu bua kulonda tshilejilu tshia Yezu ne kuitaba bua kusadila bantu bakuabu. (Yone 13:12-15) Ngamba-malu wakabela buludiludi bana betu ba balume bapie mu nyuma bua kufuanabu Timote, mu dikeba mishindu ya kuambuluishabu bakuabu. (Filipoi 2:20, 21) Bakakankamija baledi bua kuidikija Elekana ne Hana pa kuambuluisha bana babu bua kuenza mudimu wa ku dîba ne ku dîba. Ne bakabela bansonga bua kulonda tshilejilu tshia Yezu Kristo ne tshia nsonga Timote pa kuitaba bua kukuatshila bakuabu mudimu kabayi babenzeja ku bukole. (1 Petelo 2:21) Mêyi a aba bakakuatshila bakuabu mudimu akatukankamija kabidi bikole.

Tshiena-bualu tshia muyuki muisatu wa bitupa bisatu tshivua ne: “Dilongesha dia Nzambi dikuambuluishe bikole menemene.” Mu tshitupa tshia kumpala tshia muyuki eu ngamba-malu wakaleja mushinga wa kulepesha mutantshi utudi tushala ne ntema. Bua kukumbaja tshipatshila etshi, tudi mua kubanga kudilongela munkatshi mua minite mikese ne pashishe kuenda kuyivudija. Wakakankamija kabidi bateleji bua kuikala kukeba mvese mu Bible padi ngamba-malu ulomba ne kuangata note ya bidibu bamba mu bisangilu. Ngamba-malu muibidi yeye wakatubela bua tuetu kulamata bikole ku ‘tshidikijilu tshia mêyi malenga.’ (2 Timote 1:13, 14) Bua tuetu kudikuba ku malu mabi a tshiendenda adibu baleja ku tudiomba anyi mu bikandakanda, ku nkindi ya bantu, ku malu a bedi ba Bible mpata ne ku malongesha a batontolodi, tudi ne bua kudisumbila dîba dia kuikala kudilongela ne kubuela mu bisangilu. (Efeso 5:15, 16) Muanetu wakenza tshitupa tshia ndekelu tshia muyuki eu wa bitupa bisatu wakaleja ne: tudi ne bua kutumikila bitudi tulonga bua dilongesha dia Nzambi kutuambuluishadi menemene.​—Filipoi 4:9.

Tuvua ne disanka divule dia kuteleja muyuki uvua ne tshiena-bualu tshia se: “Bintu bipiabipia bua dikola dietu dia mu nyuma.” Tuakasanka patuakumvua ne: mukanda mupiamupia wa: Kalasa  ka Mudimu wa Teokrasi kadi katuambuluisha neupatuke matuku makese kumpala eku. Dijinga dietu buonso divua dia kupeta mukanda au pavua ngamba-malu wenda umvuija mu tshikoso malu adimu. Pa bidi bitangila tshitupa tshia mukanda eu tshidi ne ndambu wa malu a mu kabeji ka mibelu, ngamba-malu wakamba ne: “Mukanda mupiamupia eu kawena ulongesha malu aa 53 adi atangila dimanya mua kubala, ngakuilu ne ndongeshilu mulenga bu mutu mikanda mikuabu ya tulasa ibilongesha to, kadi eu wowu udi ulongesha malu aa bilondeshile mêyi adi mu Bible.” Mukanda eu neuleje mushindu uvua baprofete, Yezu ne bayidi bende baleje ndongeshilu mimpe. Bushuwa, mukanda eu ne malu mapiamapia a Kalasa ka Mudimu wa Teokrasi nebituambuluishe bua tuetu kulua balongeshi ba Dîyi dia Nzambi bimpe.

Dituku disatu: Ikalayi balongeshi pa kumona tshikondo tshitukadi

Panyima pa dikonkonona mvese wa ku dituku bua dituku dia ndekelu, tuetu bonso tuakalonda ne ntema muyuki wa ndekelu wa bitupa bisatu mu mpungilu au, uvua ne tshiena-bualu tshia se: “Mulayi wa Malaki udi utulongolola bua Dituku dia Yehowa.” Malaki wakamanyisha mulayi wende bidimu bitue ku lukama kunyima kua difuma dia bena Yuda mu bupika mu Babulona. Bakaditua kabidi mu butontolodi, mu dienza malu mabi, mu dipetula dîna dia Yehowa pavuabu babenga bua kulonda mikenji yende miakane ne pavuabu bafila milambu ya nyama mifue mêsu, milema ne isama. Bualu bukuabu, bavua bashipa mabaka ne bakaji babu ba ku bunsonga, pamu’apa bua kusela bakaji ba bisamba bia bende.

Nshapita wa kumpala wa mulayi wa Malaki udi utujadikila ne: Yehowa mmunange bantu bende. Nshapita eu udi uleja mushinga wa kuikala ne ditshina dia Nzambi dia kanemu ne wa kuikala kabidi ne dianyisha bua bintu bia mu nyuma. Yehowa mmuindile bua tuetu kumupesha bietu bionso bitudi nabi bia bitambe buimpe, bua kumutendelela kabiyi bualu tudi tukeba bua kupeta bintu kudiye. Mudimu wetu wa tshijila kawena ne bua kuikala wa tshidingishilu patupu, ne tudi bena dibanza kudi Nzambi.

Ngamba-malu wa tshitupa tshibidi tshia muyuki eu wa bitupa bisatu wakaleja mudi malu a mu nshapita muibidi wa mukanda wa Malaki akumbanyina tshikondo tshietu etshi pakakonkaye ne: “Yonso wa kutudi kenaku wepuka bua ‘mêyi mabi kaapatuki mukana muetu’ anyi?” (Malaki 2:6) Bana betu badi balongesha badi ne bua kuikala bajadike ne: bionso bidibu balongesha mbiangatshila mu Dîyi dia Nzambi. Tudi ne bua kuepuka malu a ditungilangana bitungu bu mudi dishipa dia dibaka didi kadiyi dianyishibue to.​—Malaki 2:14-16.

Ngamba-malu wa ndekelu wakatuambuluisha bua tuetu kudilongolola bua dituku dia Yehowa pavuaye umvuija tshiena-bualu tshia se: “Nnganyi wapanduka palua dituku dia Yehowa?” Ngamba-malu wakaleja ne: “Kabienaku bikolesha basadidi  ba Yehowa ku muoyo padibu bamanya ne: Malaki nshapita 3 mvese wa 17 udi ubakumbanyina buobu mu mushindu munene anyi? Mvese eu udi wamba ne: ‘Yehowa wa misumba udi wamba ne: Bobu nebikale banyi, mu dituku dindi ngenza malu aa, nebikale bantu banyi nkayanyi mene; meme nembafuile luse bu mudi muntu ufuila muanende mulume udi umukuatshila mudimu luse.’”

Muanda mukuabu wa tshikuma mu mpungilu eu ndrama wa bantu bavuale bilamba bia bena kale uvua ne tshiena-bualu tshia se: “Tunemekayi bukokeshi bua Yehowa.” Drama eu uvua wakula bua bana ba Kola. Bana aba bakashala balamate Yehowa ne baleji-mpala bende nansha muvua tatuabu yeye mutombokele Mose ne Alona. Nansha muakafua Kola ne dingumba diende, bana bende buobu bakapanduka. Muyuki wakalonda wa ne: “Tukokelayi bukokeshi bua Nzambi ne lulamatu” wakaleja mushindu udi malu a mu drama eu atangila yonso wa kutudi. Ngamba-malu wakatudimuija bua malu asambombo avua Kola ne bena diende bapangile bua kuenza: bakabenga kushala balamate ku bukokeshi bua Yehowa; bakalekela lutambishi, dijinga dia kupeta bumfumu ne mukawu bibakokesha; bavua bimanyina anu pa mapanga a bantu bavua Yehowa muteke; bavua ne midiabakenu; kabavua basue kabidi midimu ivuabu babapeshe to; ne bavua bangata malunda ne malela abu ne mushinga kumpala kua lulamatu kudi Yehowa.

Muyuki wa patoke uvua ne tshiena-bualu tshia se: “Mbanganyi badi balongesha bulelela mu matunga onso?” Bulelela buakumvuijabu mu muyuki eu kabuvua bulelela buonso tshianana to, kadi buvua bulelela budi butangila malu adi Yehowa mulongolole bua kuenza akamanyisha Yezu Kristo. Ngamba-malu wakakula bua bulelela budi butangila mayisha, bulelela budi butangila mushindu wa kutendelela ne ebu budi butangila tshikadilu tshidi muntu ne muntu ne bua kuikala natshi. Mu dileja difuanangana pankatshi pa bena Kristo ba mu bidimu lukama bia kumpala ne Bantemu ba Yehowa lelu, ngamba-malu wakakolesha dishindika dietu dia se: ‘Nzambi udi munkatshi muetu.’​—1 Kolinto 14:25.

Panyima pa tshikepeshilu tshia dilonga dia Tshibumba tshia Nsentedi dia lumingu alu, balongeshi bonso ba Dîyi dia Nzambi bavuapu dîba adi bakabakankamija kudi muyuki wa ndekelu uvua wamba ne: “Tukumbajayi mudimu wetu wa dilongesha ne mitalu.” Diambulula mu tshikoso malu a mu mpungilu eu diakaleja mushinga wa kuenza mudimu ne Mukanda wa Nzambi patudi tulongesha, mushindu utudi mua kulua balongeshi bakumbane, ne mushinga wa kueyemena bulelela butudi tuyisha bakuabu. Ngamba-malu wakatubela bua ‘kudiunda kuetu kumueneke kudi bonso’ ne bua ‘tuikale badimuke ku malu etu ne ku diyisha dietu.’​—1 Timote 4:15, 16.

Ndifesto kayipu dia mu nyuma dituakenza mu Mpungilu wetu wa Distrike wa “Balongeshi ba Dîyi dia Nzambi”! Tuidikijayi Muyishi wetu Munene Yehowa ne Mulongeshi wetu Munene Yezu Kristo patudi tulongesha bakuabu dîyi dia Nzambi.

[Kazubu/​Bimfuanyi mu dibeji 28]

Mikanda mipiamipia bua kukumbaja majinga a pa buawu

Bantu bavua babuele mu Mpungilu wa Distrike wa “Balongeshi ba Dîyi dia Nzambi” bakapeta ne disanka mikanda ibidi yambuluisha bikole mu mudimu wa dilongesha bantu ba imue miaba bulelela bua mu Mukanda wa Nzambi. Trakte wa Muntu utu ne nyuma udi kayi ufua anyi? neambuluishe bua kutuadija miyuki ne bantu badi basombele miaba idi miakulu kayiyi ileja dishilangana pankatshi pa “anyima” ne “nyuma.” Trakte mupiamupia eu udi uleja patoke ne: nyuma mbukole budi bushilangane ne tshifukibua tshia mu nyuma, kabidi ne: bantu kabatu balua bifukibua bia mu nyuma padibu bafue.

Bakapatula broshire wa Une vie pleinement satisfaisante: comment? ku ndekelu kua dituku dibidi dia mpungilu eu. Broshire eu mmuenza bua kutuadija nende malonga a Bible ne bantu badi kabayi bitaba ne: kudi Mufuki udi muikale ne yende ngikadilu, ne badi kabayi bitaba ne: kudi mukanda kampanda mufundisha ku nyuma wa Nzambi. Udiku mumanye mua kuenza mudimu ne mikanda mipiamipia eyi mu buambi anyi?

[Bimfuanyi mu dibeji 26]

Bantu nkama mivule bakatambula mu Milan (mu ditunga dia Italie) ne mu mpungilu mikuabu yakenzeka pa buloba bujima

[Tshimfuanyi mu dibeji 29]

Drama wa ne: “Tunemekayi bukokeshi bua Yehowa” wakalenga bateleji ku muoyo