Yehowa ntshilejilu tshitambe bunene tshia buimpe
Yehowa ntshilejilu tshitambe bunene tshia buimpe
‘Sakidilayi Yehowa wa misumba, bualu bua Yehowa udi muimpe.’—YELEMIYA 33:11.
1. Bua tshinyi tudi ne bua kutumbisha Nzambi bua buimpe buende?
YEHOWA NZAMBI udi muimpe wa kayi kadiwu. Muprofete Zekâya wakakema e kuambaye ne: ‘Monayi mudi buimpe buende bupite bunene!’ (Zekâya 9:17) Bushuwa, buimpe budi bumuenekela mu malu onso akenza Nzambi bua kulongolola buloba bua disanka dietu. (Genese 1:31) Katuena mua kufika ku diumvua mikenji yonso mikole ya kapanda mutu eyi yakajadika Nzambi pakafukaye bukua-bintu to. (Muambi 3:11; 8:17) Kadi malu makese atudi bamanye adi atusaka bua kutumbisha Nzambi bua buimpe buende.
2. Buimpe ntshinyi?
2 Buimpe ntshinyi? Nngikadilu mulenga anyi malu malenga. Kadi buimpe kabuena anu bumvuija kubenga kuenza malu mabi nkayaku to. Bu mudi buimpe buikale dimue dia ku mamuma a nyuma, nanku tudi mua kuamba ne: buimpe ngikadilu mulenga utudi tulejila ku malu kampanda. (Galatia 5:22, 23) Tudi tuleja buimpe patudi tuenzela bantu malu mimpe adi abakuatshisha. Mu tshikondo etshi, malu adi bamue bantu bangata bu mimpe badi mua kuamona mabi kudi bakuabu. Nenku bituikala basue kuikala ne ditalala ne disanka, kudi mushindu umue wa buimpe. Kadi nnganyi udi ne bukenji bua kujadika bilenga mushindu wa buimpe eu?
3. Ntshinyi tshidi Genese 2:16, 17 uleja pa bidi bitangila buimpe?
3 Nzambi ke udi ujadika mushindu wa buimpe eu. Ku ntuadijilu, Yehowa ke wakelela muntu wa kumpala mukenji ne: “Udi mua kudia mamuma a mitshi yonso ya mu budimi, bu mûdi musue; kadi mamuma a mutshi wa lungenyi lua kujingulula malu mimpe ne malu mabi kuadi nansha; bualu bua mu dituku diudi wadia wewe neufue bulelela.” (Genese 2:16, 17) Bulelela, bantu badi ne bua kuya kudi Wakabafuka bua kupeta dimanya dia malu adi mimpe ne adi mabi.
Dituleja buimpe ditudi katuyi nansha bakanyine
4. Ntshinyi tshidi Nzambi muenzele bantu katshia Adama wenza mpekatu?
4 Ditekemena dia bantu dia kupeta disanka dia tshiendelele mu bupuangane diakanyanguka pakenza Adama mpekatu ne kubengaye bua kuitaba bukenji budi nabu Nzambi bua kujadika malu adi aleja buimpe. (Genese 3:1-6) Kadi kumpala kua ndelanganyi ya Adama kuledibua ne kupiana mpekatu ne lufu, Nzambi wakamanyisha dilua dia Dimiinu dipuangane. Yehowa wakambila Satana Diabolo, “nyoka au wa kale” ne: ‘Nenteke lukuna pankatshi pebe ne mukaji, ne pankatshi pa [dimiinu] diebe ne [dimiinu] diende, [dimiinu] dia mukaji neakukume ku mutu kuebe, ne wewe neumusume ku tshikankanyi tshiende.’ (Buakabuluibua 12:9; Genese 3:15) Tshipatshila tshia Yehowa tshivua tshia kupikula bantu bena mpekatu. Wakenzela bantu buimpe buvuabu kabayi nansha bakanyine pakalongololaye njila wa lupandu bua aba badi bitabuja mulambu uvua Muanende munanga mufile bua kupikula nawu bantu.—Matayo 20:18; Lomo 5:8, 12.
5. Nansha mutudi bapiane meji mabi mu mutshima wetu, bua tshinyi tudi mua kulejaku ndambu wa buimpe?
5 Bua mpekatu wa Adama ke patudi bapiane meji mabi mu mutshima wetu. (Genese 8:21) Diakalenga, Yehowa udi utuambuluisha bua kulejaku ndambu wa buimpe. Ditungunuka ne kuenza malu atudi balonge mu mifundu yende minsantu ya mushinga mukole didi ‘dituvuija bena meji too ne ku lupandu’ ne ‘ditulongolola tshishiki bua midimu yonso mimpe’ ne kabidi dituambuluisha bua kuenza malu adi mimpe ku mêsu kuende. (2 Timote 3:14-17) Kadi bua malu atudi tulonga mu Bible kutuambuluishawu ne bua tuetu kuleja buimpe, tudi ne bua kuikala ne meji a buena a mufundi wa Misambu wakimba ne: “Wewe [Yehowa] udi muimpe, utu wenza bimpe; unyishe mikenji yebe mifunda.”—Musambu 119:68.
Badi batumbisha buimpe bua Yehowa
6. Kunyima kua Mukalenge Davidi mumane kuamba bua balue ne mushete wa tshipungidi mu Yelushalema, bena Lewi bakimba musambu uvua ne mêyi kayi?
6 Davidi Mukalenge wa Isalele wa kale wakitaba buimpe bua Nzambi ne kukebaye bulombodi Buende. Davidi wakamba ne: ‘Yehowa udi muimpe ne muakane; nunku udi uyisha bantu babi njila wa buobu kuendela.’ (Musambu 25:8) Munkatshi mua malu akalongesha Nzambi bena Isalele muvua mikenji dikumi ya mushinga mibikila ne: Mikenji Dikumi, ivua mifunda pa mabue abidi akalamabu mu mushete wa tshijila uvuabu babikila ne: mushete wa tshipungidi. Kunyima kua Davidi mumane kuamba bua balue ne Mushete eu mu Yelushalema (tshimenga tshikulu tshia Isalele), bena Lewi bakimba musambu uvua ne mêyi aa: ‘Nusakidile Yehowa, bualu bua yeye udi muimpe; bua luse luende ludi lujalame tshiendelele!’ (1 Kulondolola 16:34, 37-41) Bivua ne bua kuikala bisankishe bantu bikole bua kumvua mêyi aa apatuka mukana mua bena Lewi bimbi ba misambu, ki mmomu anyi?
7. Ntshinyi tshiakenzeka pakabuejabu Mushete mu muaba Mutambe Bunsantu ne kunyima kua disambila dia Solomo dia dibanjija nadi ntempelo?
7 Bakamba kabidi mêyi a buena aa pavuabu babanjija ntempelo wa Yehowa uvua Solomo muana wa Davidi muibake. Kunyima kua bamane kuteka mushete wa tshipungidi mu muaba Mutambe Bunsantu wa ntempelo mupiamupia uvuabu bibake, bena Lewi bakabanga kutumbisha Yehowa ne: ‘Yeye udi muimpe, bualu bua luse luende ludi lujalame tshiendelele.’ Musangu au, ntempelo wakuula mu tshishima ne ditutu divua dileja ne: Yehowa uvua muaba au mu butumbi buende. (2 Kulondolola 5:13, 14) Kunyima kua disambila dia Solomo dia dibanjija nadi ntempelo, ‘kapia kakapona mu diulu, kakosha milambu ya kuosha ne milambu mikuabu.’ Pakamonabu bualu ebu, ‘bena Isalele bonso bakakukuila panshi, bakatendelela, bakasakidila Yehowa, bamba ne: Yeye udi muimpe, bualu bua luse luende ludi lujalame tshiendelele.’ (2 Kulondolola 7:1-3) Kunyima kua difesto diakenza matuku 14, bena Isalele bakapingana ku nzubu yabu ‘ne disanka dinene mu mitshima yabu, bua buimpe buakaleja Yehowa Davidi ne Solomo ne bena Isalele, bantu bende.’—2 Kulondolola 7:10.
8, 9. (a) Nansha muakatumbisha bena Isalele Yehowa bua buimpe buende, nnjila kayi wakaluabu kulonda? (b) Ntshinyi tshivuabu bamanyishe bua Yelushalema mukana mua Yelemiya, ne mmunyi muakakumbana mulayi au?
8 Diakabi, bena Isalele kabakatungunuka ne kuikala ne nsombelu uvua upetangana ne mêyi a mu misambu yabu yakatumbishabu nayi Nzambi ayi to. Mu bule bua matuku, bantu ba mu Yuda ‘bavua batumbisha Yehowa ne mishiku yabu [patupu].’ (Yeshaya 29:13) Pamutu pa buobu kutumikila mushindu wa buimpe uvua Nzambi mujadike, bakatuadija kuenza malu mabi. Kadi mmalu mabi kayi avuabu benza? Mona tshilumbu, bakabanga kutendelela mpingu, kuditua mu buendenda, kukengesha bakengi ne kuenza mpekatu mikuabu minene! Bua malu onso aa, Yelushalema wakabutudibua ne kuyabu ne bantu ba mu Yuda mu bupika mu Babulona mu tshidimu tshia 607 K.B.B.
9 Ke muakanyoka Nzambi bantu bende nunku. Kadi wakamanyisha mukana mua muprofete Yelemiya ne: bavua mua kulua kumvua mêyi a bantu mu Yelushalema bamba ne: ‘Sakidilayi Yehowa wa misumba, bualu bua Yehowa udi muimpe, bua luse luende ludi lujalame tshiendelele.’ (Yelemiya 33:10, 11) Ne ke muakenzekabi nanku. Kunyima kua bidimu 70 biakashala ditunga edi munda mutupu, mu tshidimu tshia 517 K.B.B. bashadile bena Yuda bakapingana mu Yelushalema. (Yelemiya 25:11; Danyele 9:1, 2) Bakibakulula tshioshelu muaba uvua ntempelo pa Mukuna wa Moliya ne buobu kutuadija kufilapu milambu. Bakasa bishimikidi bia ntempelo mu tshidimu tshibidi tshia dipingana diabu. Atshi katshivua tshikondo tshia disanka anyi? Ezela wakamba ne: ‘Pakajadika bibaki bishimikidi bia ntempelo wa Yehowa, bakuidi baluate bilulu biabu bakalua ne mpungi, ne bena Lewi, bana balume ba Asafa, bakalua ne makasa bua kutumbishabu Yehowa bu muakadi dîyi dijadika kudi Davidi, mukalenge wa Isalele. Bakimba misambu, bakuabu batuma, bakuabu bapunguluja, bakasakidila Yehowa bamba ne: Yeye udi muimpe, bualu bua luse luende ludi lujalame tshiendelele kudi bena Isalele.’—Ezela 3:1-11.
10. Musambu wa 118 udi utuadija ne ujika ne mêyi kayi a mushinga?
10 Mêyi a ditumbisha nawu Yehowa bua buimpe buende a buena aa adi mu Misambu ya bungi. Umue wa kudiyi ngudi mu Misambu 118, wakimbabu kudi mêku a bena Isalele bua kujikija musekelelu wa Pasaka. Musambu eu udi utuadija ne ujika ne mêyi aa: ‘Sakidilayi Yehowa, bualu bua yeye udi muimpe; bua luse luende ludi lujalame tshiendelele!’ (Musambu 118:1, 29) Aa ke avua mua kuikala mêyi a ndekelu akimba Yezu Kristo ne bapostolo bende ba lulamatu butuku bua muladilu wa lufu luende mu tshidimu tshia 33 B.B.—Matayo 26:30.
‘Ndi nkusengelela ne: undeje butumbi buebe’
11, 12. Pakapeta Mose lungenyi lua tshidi butumbi bua Nzambi, mmêyi kayi akumvuaye?
11 Bakaleja bua musangu wa kumpala diumvuangana didi pankatshi pa buimpe bua Yehowa ne luse luende lujalame bidimu bia bungi kumpala kua tshikondo tshia Ezela. Matuku makese kunyima kua bena Isalele bamane kutendelela kana ka ngombe kenza ne or mu tshipela ne kunyima kua bamane kubutula benji ba malu mabi, Mose wakalomba Yehowa ne: ‘Ndi nkusengelela ne: undeje butumbi buebe.’ Bu muvua Yehowa mumanye bimpe ne: Mose kavua mua kumona mpala Wende ne kushala ne muoyo, wakamba ne: ‘Nengendeshe buimpe buanyi buonso ku mêsu kuebe.’—Ekesode 33:13-20.
12 Buimpe bua Yehowa buakapita kumpala kua Mose pa Mukuna wa Sinai dituku diakalonda. Mu tshikondo atshi, Mose wakapeta lungenyi lua tshidi butumbi bua Nzambi ne kumvuaye mêyi aa: ‘Yehowa, Yehowa, Nzambi wa luse ne [muoyo muimpe], kêna ukuata tshiji lubilu, udi mûle tente ne luse lujalame ne bushuwa, udi uleja binunu bia bantu luse lujalame, udi ubuikidila bantu mapanga abu ne kusambuka kuabu kua mikenji ne malu mabi abu; kadi kêna ubingisha muntu udi upila; udi utumina bana ba tshikondo tshisatu anyi tshinayi [dinyoka bua] mibi ya batatuabu.’ (Ekesode 34:6, 7) Mêyi aa adi aleja ne: buimpe bua Yehowa budi bupetangana ne luse luende lujalame ne ngikadilu mikuabu ya bumuntu buende. Tuetu bakonkonone ngikadilu eyi nebituambuluishe bua kuleja buimpe. Tshia kumpala, tukonkononayi ngikadilu udibu batele misangu ibidi mijima mu mêyi aa adi akula bua buimpe bua Nzambi.
‘Nzambi udi mûle tente ne luse lujalame’
13. Nngikadilu kayi udibu batele misangu ibidi mu mêyi adi akula bua buimpe bua Nzambi, ne bua tshinyi mbikumbane nunku?
13 ‘Yehowa [udi] Nzambi udi mûle tente ne luse lujalame, udi uleja binunu bia bantu luse lujalame.’ Muaku wa mu tshiena-Ebelu udibu bakudimune ne: “luse lujalame” udi kabidi umvuija “dinanga dia lulamatu.” Ke ngikadilu umuepele udibu batele misangu ibidi mu mêyi a Nzambi akambilaye Mose. Mbikumbane nunku menemene, bualu ngikadilu munene wa Yehowa n’dinanga. (1 Yone 4:8) Mêyi mamanyike bimpe a ditumbisha nawu Yehowa a se: ‘bualu bua yeye udi muimpe, bua luse luende ludi lujalame tshiendelele’ adi aleja ngikadilu wa dinanga eu.
14. Mbanganyi nangananga badi Nzambi uleja buimpe ne luse luende lujalame?
14 Bualu bumue budi buleja buimpe bua Yehowa budi se: udi “mûle tente ne luse lujalame.” Luse elu ludi nangananga lumuenekela ku mushindu udiye ulama bimpe basadidi bende ba lulamatu badi badilambule kudiye. (1 Petelo 5:6, 7) Anu mudi Bantemu ba Yehowa mua kujadika bualu ebu, Yehowa udi ‘uleja luse lujalame’ kudi badi bamunange ne bamusadila. (Ekesode 20:6) Bena Isalele wa ku mubidi kabakatungunuka ne kupeta luse lujalame anyi dinanga dia lulamatu dia Yehowa nansha, bionso ebi bualu bakabenga Muanende. Kadi buimpe ne dinanga dia lulamatu bia Nzambi bidiye uleja bena Kristo ba lulamatu ba mu matunga onso biobi nebishale kashidi ne tshiendelele.—Yone 3:36.
Yehowa udi Nzambi wa luse ne muoyo muimpe
15. (a) Mêyi akumvua Mose pa Mukuna wa Sinai akatuadija ne miaku kayi? (b) Luse ludi lumvuija tshinyi?
15 Mêyi akumvua Mose pa Mukuna wa Sinai akatuadija ne miaku eyi: “Yehowa, Yehowa, Nzambi wa luse ne [muoyo muimpe].” Muaku wa mu tshiena-Ebelu udibu bakudimune ne: “luse” udi mua kuikala uleja “mala a munda” ne udi upetangana bikole ne muaku “lukutu.” Nunku luse ludi lumvuija meji a muntu a muoyo muimpe wa diditeka pa muaba wa mukuabu adi munda muende. Kadi luse kaluena anu luimanyina pa kuikala ne muoyo wa luse nkayaku to. Ludi ne bua kutusaka bua kuenza bualu kampanda bua kupepeja dikenga dia bakuabu. Tshilejilu, bakulu bena Kristo ba dinanga mbamanye ne: badi ne bua kumvuila bena Kristo nabu luse, ‘babaleja luse ne disanka’ padibi bikengela nanku.—Lomo 12:8; Yakobo 2:13; Yuda 22, 23.
16. Bua tshinyi tudi mua kuamba ne: Yehowa udi ne muoyo muimpe?
16 Buimpe bua Nzambi budi bumuenekela kabidi ku muoyo muimpe udiye nawu. Muntu udi ne muoyo muimpe udi umueneka umvua bidi mukuabu umvua ne udi wenzela nangananga bantu ba milongo mipuekele malu malenga. Yehowa ntshilejilu tshitambe bulenga tshia muoyo muimpe mu malu adiye wenzela basadidi bende ba lulamatu. Tshilejilu, ku diambuluisha dia banjelu ne bua muoyo wende muimpe Nzambi wakakolesha muprofete Danyele ukavua mukulakaje, wakamanyisha nsongakaji Mariya patshivuaye kamama bua diakalenga divuaye ne bua kupeta dia kulela Yezu. (Danyele 10:19; Luka 1:26-38) Tuetu bantu ba Yehowa tudi ne dianyisha dia bungi bua mushindu udiye utuleja muoyo muimpe ne malu malenga adi mu Bible. Tudi tumutumbisha bua buimpe budiye utuleja ne kabidi tuetu petu tudi tukeba bua kuikala ne muoyo muimpe mu malu atudi tuenzela bakuetu. Padi bantu badi bakumbaje malu-malomba a mu nyuma balulamija muena Kristo nabu “mu bitulu,” badi badienzeja bua kuikala bena malu malenga anyi bena muoyo muimpe.—Galatia 6:1, NW.
Nzambi udi kayi ukuata tshiji lubilu
17. Bua tshinyi tudi ne dianyisha bua mudi Yehowa ‘kayi ukuata tshiji lubilu’?
17 ‘Nzambi udi kayi ukuata tshiji lubilu.’ Mêyi aa adi atuleja ngikadilu mukuabu udi uleja buimpe bua Yehowa. Nzambi udi udikanda ne lutulu luonso bua kutupesha manyoka bua mapanga etu ne utupesha dîba dia tuetu kulekela bilema bietu binene bitudi nabi ne kabidi utupesha dîba dia kudiunda mu nyuma. (Ebelu 5:12–6:3; Yakobo 5:14, 15) Lutulu lua Nzambi ludi kabidi luambuluisha aba badi kabayi banji kulua batendeledi bende. Dîba ditshidiku didibu mua kuitaba mukenji wa Bukalenge ne kudilengeja. (Lomo 2:4) Kadi nansha mudi Yehowa muikale ne lutulu, buimpe buende butu minga misangu bumusaka bua kuleja tshiji, anu muakenzaye pakatendelela bena Isalele kana ka ngombe ka or ku Mukuna wa Sinai. Nzambi nealeje tshiji tshiende mu mushindu mutambe bunene pajikijaye malu onso a tshikondo etshi tshibi tshia Satana.—Yehezekele 38:19, 21-23.
18. Pa bidi bitangila bushuwa, ndishilangana kayi didi pankatshi pa Yehowa ne bamfumu ba panu?
18 ‘Yehowa [udi] mûle tente ne bushuwa.’ Yehowa mmushilangane bikole ne bamfumu ba panu badi balaya bantu malu manene kadi bapangila bua kuakumbaja. Basadidi ba Yehowa buobu badi mua kueyemena bualu buonso budiye muambe mu Dîyi diende. Bu mudiye mûle tente ne bushuwa, tudi ne bua kueyemena malaya ende misangu yonso. Bua buimpe buende, Tatu wetu wa mu diulu udi wandamuna masambila atudi tuenza bua kupeta bushuwa anyi bulelela bua mu nyuma budiye utupesha bungi tshianana.—Musambu 43:3; 65:2.
19. Mbualu kayi bua pa buabu budi buleja buimpe bua Yehowa budiye muleje bena mpekatu badi badilengeja?
19 ‘Yehowa [udi] Nzambi udi ubuikidila bantu mapanga abu ne kusambuka kuabu kua mikenji ne malu mabi abu.’ Bua buimpe buende, Yehowa udi pabuipi bua kufuila bena mpekatu badi badilengeja luse. Tudi ne dianyisha dia bungi bua mudi Tatu wetu wa dinanga eu mulongolole mushindu wa kubuikidila bantu mpekatu mu mulambu wa Yezu. (1 Yone 2:1, 2) Eyowa, tudi ne disanka bua mudi bonso badi bitabuja mulambu udi upikula eu bikale ne mushindu wa kudia malanda mimpe ne Yehowa, bikale ne ditekemena dia kupeta muoyo kauyi ndekelu mu bukua-panu bupiabupia budiye mulaye. Aa mmalu a pa buawu adi ne bua kutusaka bua kutumbisha Yehowa bua mudiye muleje bantu buimpe.—2 Petelo 3:13.
20. Ntshinyi tshidi tshituleja ne: Nzambi kêna ubuikila mêsu pa malu mabi?
20 ‘[Yehowa] kêna ubingisha muntu udi upila.’ Ebu ke bualu bukuabu budi ne bua kutusaka bua kutumbisha Yehowa bua buimpe buende. Bua tshinyi bidi nanku? Bualu bulenga bua buimpe budi se: buimpe kabutu bubuikila mêsu pa malu mabi nansha bia munyi. Kabidi, ‘ku dibuluibua dia Mukalenge Yezu paluaye mu diulu ne banjelu [bende] ba bukole,’ neadisombuele ‘kudi bantu badi kabayi bamanye Nzambi ne kudi badi kabayi batumikila lumu luimpe.’ Bantu abu ‘nebapete dikenga, dibutuka dia tshiendelele.’ (2 Tesalonike 1:6-9) Nunku batendeledi ba Yehowa bapanduka nebapete muoyo, kabayi babatatshisha kabidi kudi bantu babi, badi ‘kabayi basue malu mimpe’ to.—2 Timote 3:1-3.
Tuidikijayi buimpe bua Yehowa
21. Bua tshinyi tudi ne bua kuleja buimpe?
21 Kakuyi mpata, tudi ne malu a bungi a kutumbishila Yehowa ne kumuelela tuasakidila bua buimpe buende. Bu mutudi basadidi bende, katuenaku ne bua kuenza muetu muonso bua kuleja ngikadilu eu anyi? Eyowa, ke tshitudi mua kuenza bualu mupostolo Paulo wakabela bena Kristo nende ne: ‘Nuidikije kuenza mudi Nzambi wenza, bu bana bende bananga.’ (Efeso 5:1) Tatu wetu wa mu diulu utu uleja buimpe misangu yonso, ne ke tshitudi petu ne bua kuikala tuenza.
22. Ntshinyi tshituamona mu tshiena-bualu tshidi tshilonda?
22 Bituikala badilambule ne muoyo mujima kudi Yehowa, kakuyi mpata netujinge bua kuidikija buimpe buende. Bu mutudi ndelanganyi ya Adama muena mpekatu, ki mbipepele bua kumuidikija to. Kadi mu tshiena-bualu tshidi tshilonda, netumone bua tshinyi kudi mushindu wa tuetu kuleja buimpe. Netumone kabidi mishindu kabukabu itudi ne bua kuidikija Yehowa, tshilejilu tshietu tshitambe bunene tshia buimpe tshia kulonda.
Newandamune munyi?
• Buimpe ntshinyi?
• Mmêyi kayi a mu Mukanda wa Nzambi adi akula bua buimpe bua Nzambi?
• Ng’amue malu kayi adi aleja buimpe bua Yehowa?
• Bua tshinyi tudi ne bua kuidikija tshilejilu tshia Yehowa tshia buimpe buende?
[Nkonko ya dilonga]
[Tshimfuanyi mu dibeji 12]
Yehowa wakapesha bantu bende ba kale manyoka bualu bakabenga kuikala ne nsombelu mumvuangane ne mêyi avuabu bamutumbishe nawu
[Tshimfuanyi mu dibeji 12]
Bashadile ba lulamatu bakapingana mu Yelushalema
[Tshimfuanyi mu dibeji 13]
Mose wakumvua mêyi malenga a buimpe bua Nzambi
[Tshimfuanyi mu dibeji 15]
Buimpe bua Nzambi budi bumuenekela ku mushindu udiye utuleja muoyo muimpe ne malu malenga adi mu Bible