Tshimenga tshiashila pa mukuna

YEZU wakambila bayidi bende mu Muyuki wende muende lumu wa pa Mukuna ne: “Nuenu nudi butoke bua bena panu. Tshimenga tshiasa kulu kua mukuna kabena mua kutshisokoka.”​—Matayo 5:14, MMM.

Bimenga bia bungi bia mu Yudaya ne mu Galela bivua pa mikuna, kadi ki mmu bibandabanda nansha. Bualu bua kumpala buvuabu basunguila bua kuasa pa mitu pa mikuna buvua bua kuikala bakubibue. Pa kumbusha biluilu bia baluishi bivua mua kubuela mu ditunga, kuvua kabidi banyengianganyi ba bintu bavule bavua ne tshibidilu tshia kulua kunyangakaja miaba ivua bena Isalele basombele. (2 Bakelenge 5:2; 24:2) Bena musoko ba dikima bavua mua kulua kakuyi lutatu bua kukuba nzubu ivua kaba kamue pa mukuna kupita tshimenga tshivua mu tshibatabata, tshivua tshilomba lumbu lule menemene bua kutshikuba bimpe.

Bu muvua bimanu bia nzubu ya bena Yuda misangu ya bungi bikale bifita lupembe lutoke, nzubu yonso mitoke eyi ivua kaba kamue pa mukuna ivua mua kumuenekela bimpe pa bule. (Bienzedi 23:3) Pavua munya utema mu Palestine, bimenga ebi bia pa mikuna bivua bikenka bibalakana bu muinda muasa ku dikunji dile, anu mutshidi bimenga bia ku Mbuu wa Mediterane bikenkamu too ne mu matuku etu aa.

Yezu wakangata muanda eu uvua bantu bamanye bimpe mu misoko ya Galela ne ya Yudaya bua kulongesha bayidi bende mudimu udi nawu muena Kristo mulelela. Wakabambila ne: “Ke mudi butoke buenu ne bua kutokesha ku mesu a bantu bonso, bua bamone malu enu mempe, batumbishe Tatu wenu udi mu diulu.” (Matayo 5:16, MMM) Nansha mudi bena Kristo kabayi benza malu mimpe bua bantu babatumbishe, kadi bantu kabena bapanga kumona ngikadilu wabu muimpe.​—Matayo 6:1.

Ngikadilu muimpe wa mushindu’eu udi nangananga umueneka mu Mpungila ya Distrike ya Bantemu ba Yehowa. Tshimue tshikandakanda tshia mu ditunga dia Espagne tshiakamba bua Mpungilu udi muenzeke matuku mashale aa ne: “Nansha mudi disankidila malu a Nzambi dienda dikepa mu bitendelelu bikuabu, kabiena nanku to bua Bantemu ba Yehowa. Badi batumikila Dîyi dia Nzambi bualu ki mbasue bua Bible ajimije mushinga wende nansha.”

Thomas, mulami wa tshipalu tshia ndundu tshidi ku Nord-Ouest kua ditunga dia Espagne muaba utu Bantemu batamba kuenzela Mpungilu yabu, wakasanka bua kuikala munkatshi mua bantu badi batumikila Dîyi dia Nzambi. Wakindila mbingu ya bungi bua kuangata pansio wende bua yeye kuanji kubuela mu mpungilu wa distrike wa Bantemu ba Yehowa. Mpungilu ujika, bantu ba bungi bavuamu pamue ne bana bakalua kudiye bua kumuela tuasakidila bua muvuaye mubambuluishe munkatshi mua bidimu bia bungi ne bua kumujingila malu malenga pangataye pansio wende. Wakabanga kupuekesha binsonji, e kuambaye ne: “Dimanyangana nenu didi dikale bumue bua ku malu matambe buimpe a mu nsombelu wanyi.”

Tshimenga tshidi pa mukuna tshidi tshikoka ntema ya bantu bualu tshidi tshimueneka bu tshidi tshituangane ne diulu ne bualu nzubu yonso mutoke udimu udi ukenka padi nsese ya dîba ituaku. Bia muomumue, bena Kristo balelela mbamanyike bimpe bualu badi badienzeja bua kutumikila mikenji milenga ya mu Mukanda wa Nzambi idi ilomba bua kuamba bulelela, bua kuikala ne bikadilu bilenga ne bua kulejangana luse.

Kabidi, bena Kristo badi bakenkesha butoke bua bulelela padibu bayisha. Mupostolo Paulo wakamba bua bena Kristo ba kumpala ne: ‘Tuetu bamane kupeta [mudimu] eu ku luse lua [Nzambi], katuena tuteketa to. Kadi pa kuleja  bulelela, tudi tupeta lumu kudi muntu yonso wa nsongo ku mêsu a [Nzambi].’ (2 Kolinto 4:1, 2, MMM) Nansha muvua bantu babaluisha miaba yonso ivuabu bayisha, Yehowa wakabenesha mudimu wabu, ne bu mu tshidimu tshia 60 B.B. nanku, Paulo wakafunda wamba ne: lumu luimpe ‘luakambibua munkatshi mua bifukibua bionso muinshi mua diulu.’​—Kolosai 1:23.

Lelu, Bantemu ba Yehowa badi pabu bangata mudimu wabu wa kulekela ‘butoke buabu butokesha ku mêsu kua bantu bonso’ ne mushinga wa bungi, anu muvua Yezu muambe. Ku mêyi abu ne mikanda idibu bapatula, Bantemu ba Yehowa badi batangalaja lumu luimpe lua Bukalenge mu matunga 235 pa buloba bujima. Bua butoke bua mu Bible kufikabu kudi bantu ba bungi menemene, mbapatule mikanda yabu mu miakulu mitue ku 370.​—Matayo 24:14; Buakabuluibua 14:6, 7.

Miaba ya bungi, Bantemu ba Yehowa mbaditatshishe bua kulonga miakulu ya bena tshimuanyi badi bafumine mu matunga mudibu anyi muvuabu bakandike mudimu wa buambi. Tshilejilu, mu bimenga binene bia bungi bia mu Amerike wa ku Nord mudi bantu ba bungi badi bafumine mu ditunga dia Chine ne dia Russie. Bantemu ba muaba eu mbadienzeje bua kumanya tshiena-Chine ne tshiena-Russie, ne miakulu mikuabu bua kumona mua kuyisha benyi aba lumu luimpe. Nunku, mbenze tulasa bua kulongesha bantu miakulu eyi mu matuku makese bua kumona mua kuyisha bakuabu lumu luimpe patshidi madimi ‘matoke bua kunowa’ apa.​—Yone 4:35.

Muprofete Yeshaya wakamanyisha ne: ‘Mu matuku atshidi alua mukuna wa nzubu wa Yehowa neujadikibue bu mukuna mupite mikuabu bule, neubandishibue pa mutu pa mikuna mikese; ne ba mu bisamba bionso nebabuelemu.’ Ku ngikadilu wabu ne ku diyisha diabu, Bantemu ba Yehowa badi bambuluisha bantu ba miaba yonso bua kuluabu ku ‘mukuna wa nzubu wa Yehowa’ bua kulongabu bienzedi bia Nzambi ne bua kumanyabu mua kuenda mu njila yende. (Yeshaya 2:2, 3) Tshipeta tshilenga tshia muanda eu tshidi anu muakamba Yezu ne: bonso pamue badi ‘batumbisha Tatu wabu udi mu diulu’ Yehowa Nzambi.​—Matayo 5:16; 1 Petelo 2:12.