Bakatantamena dieba mu mubidi wabu

‘Ngakapebua tshintu bu dieba mu mubidi wanyi bu muanjelu wa Satana bua kunkengeshakengesha.’​—2 KOLINTO 12:7.

1. Ng’imue ntatu kayi idi bantu bapeta lelu?

 UDIKU ne lutatu kampanda ludi kaluyi lujika anyi? Biwikala nalu, kuena nkayebe to. Mu tshikondo tshia “malu makole” etshi, bena Kristo ba lulamatu badi batantamena buluishi bukole, ntatu ya mu dîku, masama, ntatu ya mua kupeta mfranga, tunyinganyinga, lufu lua bantu batudi banange, ne makenga makuabu. (2 Timote 3:1-5) Mu amue matunga, biyole bia nzala ne mvita bidi biteka mioyo ya bantu ba bungi mu njiwu.

2, 3. Mmeji mabi kayi adi mua kulua bua ntatu idi bu dieba itudi tupeta, ne adi mua kuikala ne njiwu kayi?

² Ntatu ya mushindu’eu idi mua kufikisha muntu ku didimona mushikile, nangananga padi ntatu eyi imukuata ya bungi musangu umue. Tangila tshidi Nsumuinu 24:10 wamba: ‘Biwateketa palua dituku dia dikenga, bukole buebe budi bukepa.’ Bushuwa, diteketa mu maboko bua ntatu itudi tupeta didi mua kutupangisha bukole butudi nabu dijinga menemene ne didi mua kutekesha dipangadika dietu dia kutantamena ntatu too ne ku ndekelu. Bua tshinyi tudi tuamba nunku?

³ Diteketa mu maboko didi mua kutupangisha bua kumona malu mudibi bikengela kuamona. Tshilejilu, bidi mua kulua bipepele bua tuetu kubanga kuamba mudi yetu ntatu mipite bungi ne tudi mua kushala anu babungame. Bamue badi mene mua kudila bamba ne: “Nzambi wanyi, bua tshinyi udi mulekele malu a mushindu’eu angenzekela?” Meji mabi a mushindu’eu wowu mele miji mu mutshima wa muntu, adi mua kumupangisha disanka ne muoyo mukole. Musadidi wa Nzambi udi mua kuteketa mu maboko bikole ne kulekela ‘diluangana mvita mimpe ya ditabuja.’​—1 Timote 6:12.

4, 5. Mmunyi mutu Satana ubuelela mu imue ntatu itudi tupeta, kadi mbualu kayi butudi ne bua kuikala bajadike?

⁴ Bulelela, ki n’Yehowa Nzambi udi utukebela ntatu to. (Yakobo 1:13) Amue mateta adi atukuata anu bualu tudi tudienzeja bua kushala bamulamate. Tumanye se: bantu bonso badi basadila Yehowa badi babatua mutu kudi muluishi munene wa Yehowa: Satana Diabolo. Mu lupolo luipi ludi lumushadile, “nzambi [eu mubi] wa tshikondo etshi” udi ukeba bua kufikisha muntu yonso udi munange Yehowa ku dilekela kuenza disua Diende. (2 Kolinto 4:4) Satana udi ukebela bana betu bonso badi pa buloba makenga mavule matambe. (1 Petelo 5:9) Bushuwa, Satana katu utukebela buludiludi ntatu yonso itudi tupeta nansha, kadi udi mua kubuelela mu ntatu eyi bua kututekesha bikole.

⁵ Kadi nansha Satana yeye ne bia-mvita bia bukole kayi, tudi mua kumutshimuna! Bua tshinyi tudi tushindika muanda eu? Mbualu Yehowa Nzambi udi utuluila mvita eyi. Mmuenze bua basadidi bende kabikadi bapange mayele a Satana to. (2 Kolinto 2:11) Bushuwa, Dîyi dia Nzambi didi dituambila malu a bungi bua ntatu idi ikuata bena Kristo balelela. Bible udi ubikila lutatu luakapeta mupostolo Paulo ne: “dieba mu mubidi.” Bua tshinyi? Tumonayi mushindu udi Dîyi dia Nzambi diumvuija tshiambilu etshi. Pashishe netumone ne: katuena nkayetu badi dijinga ne diambuluisha dia Yehowa bua kutshimuna ntatu nansha.

Tshidi mateta mikadile bu mêba

6. Ntshinyi tshivua Paulo umvuija pakambaye ne: uvua ne “dieba mu mubidi,” ne dieba adi divua mua kuikala tshinyi?

⁶ Bua bukole bua ntatu ivua Paulo mupete,  nyuma muimpe wakamusaka bua kufunda ne: ‘Ngakapebua tshintu bu dieba mu mubidi wanyi bu muanjelu wa Satana bua kunkengeshakengesha, bua meme tshitambi [kudibandisha].’ (2 Kolinto 12:7) Dieba edi divua mu mubidi wa Paulo divua tshinyi? Bushuwa, dieba dibuele bikole mu mubidi divua mua kuikala disama bikole be. Nunku tshimfuanyi etshi tshidi tshileja tshintu tshivua tshisama Paulo bikole, pamu’apa ku mubidi, mu lungenyi peshi bionso bibidi musangu umue. Paulo uvua mua kuikala usama mêsu anyi tshintu tshikuabu tshia ku mubidi. Peshi dieba edi divua mua kuikala bantu bavua babenga bupostolo bua Paulo ne bavua belesha diyisha ne dilongesha diende mpata. (2 Kolinto 10:10-12; 11:5, 6, 13) Nansha bikala dieba edi ni divua tshinyi, diakashala kudi Paulo ne kavua mua kudiumbusha to.

7, 8. (a) Muaku ‘kukengeshakengesha’ udi umvuija tshinyi? (b) Bua tshinyi bidi ne mushinga wa bungi bua tuetu kutantamena meba onso adi atukengesha mpindieu?

⁷ Tangila ne: dieba adi divua dikengeshakengesha Paulo. Muaku wa mu tshiena-Gelika udibu bangate muaba eu mmufumine ku muaku udi umvuija “binkonyi.” Mbangate muaku eu mu ngumvuilu wawu mulelela mu Matayo 26:67 ne mu ngumvuilu wa mu tshimfuanyi mu 1 Kolinto 4:11. Mu mvese eyi, udi ufila lungenyi lua kukuma muntu mbata. Bu mudi Satana mukine Yehowa ne basadidi Bende bikole, tudi bajadike ne: Diabolo uvua ne disanka bua muvua dieba adi ditungunuke ne kukengesha Paulo. Lelu, Satana udi usanka bia muomumue padibu batutatshisha kudi dieba mu mubidi.

⁸ Nunku anu bu muakenza Paulo, tudi ne bua kumanya mua kutantamena meba a mushindu’eu. Ditantamena meba aa didi mua kutupetesha muoyo! Vuluka ne: Yehowa mmusue kulepesha muoyo wetu bua kashidi mu bukua-panu bupiabupia muikala ntatu idi bu meba kayitshiyi itutatshisha kabidi to. Bua kutuambuluisha bua kupeta difutu dilenga edi, Nzambi mmutupeshe bilejilu bivule mu Dîyi diende dinsantu, bituleja ne: basadidi bende ba lulamatu bakakokesha bua kutantamena meba avua mu mubidi wabu. Kabavua bantu ba pa buabu to, bavua bapange bupuangane anu bu mutudi emu. Tuetu bakonkonone malu a bamue ba mu ‘tshisumbu tshinene tshia [bantemu]’ etshi bidi mua kutuambuluisha bua ‘[kunyema] ne ditantamana lubilu ludi lutekibue kumpala kuetu.’ (Ebelu 12:1) Dielangana meji bua malu akatantamenabu didi mua kukolesha dishindika dietu dia se: tudi mua kutantamena meba onso adi Satana mua kutukengesha nawu.

Meba avua akengesha Mefibosheta

9, 10. (a) Mmunyi muakafika Mefibosheta ku dikala ne dieba mu mubidi wende? (b) Mmalu malenga kayi avua Davidi muenzele Mefibosheta, ne mmunyi mutudi mua kuidikija Davidi?

⁹ Angata tshilejilu tshia Mefibosheta, muana wa Yonatana mulunda wa Davidi. Pavua Mefibosheta ne bidimu bitanu, lumu luakalua ne: bavua bashipe tatuende Yonatana ne kakuende Mukalenge Shaula. Mulami wende wakumvua buôwa. ‘Wakamuambula ku lubese, pakadiye unyema nunku, muana wakadishinda, nunku wakalua mulema.’ (2 Samuele 4:4) Bulema ebu buvua ne bua kuikala kudi Mefibosheta anu bu dieba divuaye ne bua kutantamena pavuaye wenda ukola.

¹⁰ Kunyima kua bidimu ndambu, Mukalenge Davidi wakenzela Mefibosheta malu malenga bualu uvua munange Yonatana bikole. Davidi wakamupesha buloba buonso bua Shaula ne kutekaye Siba musadidi wa Shaula bua kuikalaye mulami wa buloba ebu. Davidi wakambila kabidi Mefibosheta ne: ‘Neudie bidia ku mêsa anyi tshiendelele.’ (2 Samuele 9:6-10) Kakuyi mpata, luse lujalame luvua nalu Davidi luakasamba Mefibosheta ne luakamuambuluisha bua kukepesha kanyinganyinga bua bulema buende. Ndilongesha kayipu dilenga! Tuetu petu tudi ne bua kuenzela bantu badi baluangana ne dieba mu mubidi malu mimpe.

11. Ntshinyi tshiakamba Siba bua Mefibosheta, kadi mmunyi mutudi bajadike ne: bualu ebu buvua bua dishima? (Bala diumvuija kuinshi kua dibeji)

¹¹ Pashishe, Mefibosheta wakapeta dieba dikuabu mu mubidi wende dia kuluangana nadi. Musadidi wende Siba wakamushiminyina bualu kudi Mukalenge Davidi, pavuaye unyema mu Yelushalema bua buntomboji bua muanende Abashaloma. Siba wakamba ne: Mefibosheta uvua mushale  mu Yelushalema bua kuangataye bukalenge. * Davidi wakitaba mafi a Siba ne kupeshaye muena mashimi eu buloba buonso bua Mefibosheta!​—2 Samuele 16:1-4.

12. Ntshinyi tshiakenza Mefibosheta bua bualu buvua bumufikile, ne ntshilejilu tshilenga kayi tshidiye mutushile?

¹² Kadi, pakalua Mefibosheta kumonangana ne Davidi, wakamuambila tshivua tshienzeke mu bulelela. Mefibosheta uvua udilongolola bua kulonda Davidi, ke Siba kumushimakaja umuambila bua yeye aye pa mutu pa Mefibosheta. Davidi wakalongolola bualu ebu anyi? Wakabulongolola tshitupa. Wakakosa buloba abu mu bitupa bibidi ne kubabanyinaye eu tshiende eu tshiende. Bualu ebu buvua kabidi ne bua kulua bu dieba dikuabu mu mubidi wa Mefibosheta. Wakateketa mu maboko bikole anyi? Wakabengaku dipangadika dia Davidi, kuambaye muvuadi dibi anyi? Tòo, wakitaba tshivua disua dia mukalenge ne budipuekeshi buonso. Wakasanka bua muvua mukalenge wa Isalele uvuabu bateke mupingane mujima kakuyi bualu. Bushuwa, Mefibosheta mmushiye tshilejilu bua muvuaye mutantamene bulema, dimushiminyina malu ne diteketa mu maboko.​—2 Samuele 19:24-30.

Nehemiya wakatantamena ntatu yakapetaye

13, 14. Mmeba kayi avua Nehemiya mutantamene pakapinganaye bua kuibakulula lumbu lua Yelushalema?

¹³ Elabi meji bua meba a mu tshimfuanyi avua Nehemiya mutantamene pakapinganaye mu tshimenga tshia Yelushalema tshivua katshiyi ne lumbu, mu bidimu bia 400 K.B.B. Wakasangana tshimenga katshiyi ne tshintu tshivua mua kutshikuba nansha tshimue, ne bena Yuda bavua bapingane kabavua badilongolole to, bavua batekete mu maboko ne kabavua badilengeje ku mêsu kua Yehowa to. Nansha muvua mukalenge Atashasete mumuanyishile bua kuibakulula lumbu lua Yelushalema, Nehemiya wakumvua diakamue ne: bangovena ba mu matunga avua pabuipi apu kabavua basue bua yeye kuenza mudimu eu to. Pavua ‘muntu ulua bua kukuatshishaye bena Isalele, mitshima yabu [ivua] inyingalala.’​—Nehemiya 2:10.

¹⁴ Baluishi ba mu matunga makuabu abu bakenza muabu muonso bua kuimanyika mudimu wa Nehemiya. Malu avuabu bakana bua kuenza, mashimi abu, malu avuabu bamutshingisha nawu, ne batentekedi bavuabu batume bua kumutekesha mu maboko, bionso ebi bivua ne bua kuikala bu meba avua anu mu mubidi wende. Wakakuatshika mu mateyi a baluishi abu anyi? Tòo! Wakeyemena Nzambi ne muoyo wende mujima, ne kakateketa nansha. Nunku ndekelu wa bionso pakibakululabu lumbu lua Yelushalema, bakajadika bualu budi bushale too ne lelu bua se: Yehowa wakakuatshisha Nehemiya ne dinanga dionso.​—Nehemiya 4:1-12; 6:1-19.

15. Mmalu kayi avua munkatshi mua bena Yuda akatonda Nehemiya bikole?

¹⁵ Bu muvuaye ngovena, Nehemiya uvua  kabidi ne bua kulongolola malu a bungi avua munkatshi mua bantu ba Nzambi. Ntatu eyi ivua bu meba avua amutua bikole bualu ivua ilenga malanda a bantu ne Yehowa. Babanji bavua balomba tshia-kasombela tshipite bunene, ne bana babu bavua bapele bavua beyeka maloba abu ne basumbisha mene bana babu balela mu bupika bua kumona mua kufuta mabanza ne bua kufuta bitadi bia bena Pelasa. (Nehemiya 5:1-10) Bena Yuda ba bungi bavua bashipa mukenji wa Nsabatu ne kabavua bafila bintu bua kuambuluisha bena Lewi ne mudimu wa ku ntempelo nansha. Ne bamue bavua basele ‘bakaji bena Ashedodo ne bena Amona ne bena Moaba.’ Malu aa akanyingalaja Nehemiya bikole be! Kadi nansha dimue dia ku meba aa kadiakamufikisha ku diteketa mu mikolo. Wakadienzeja njila ne njila bua kumueneka muntu uvua mutambe kulamata mikenji miakane ya Nzambi. Anu bu Nehemiya, katulekedi ngikadilu mupange lulamatu wa bakuabu utufikisha ku dilekela kusadila Yehowa ne lulamatu.​—Nehemiya 13:10-13, 23-27.

Bena lulamatu bakuabu ba bungi bakatantamena meba mu mubidi

16-18. Mmunyi muvua tshimvundu tshia mu dîku tshibungamije Isaka ne Lebeka, Hana, Davidi ne Hoshea?

¹⁶ Mu Bible mudi bilejilu bikuabu bia bungi bia bantu bakatantamena ntatu ivua bu meba. Tshimue tshintu tshivua tshikebela bantu ba bungi ntatu ivua bu meba tshivua malu a mu dîku. Bakaji babidi ba Esau ‘bakanyingalaja mutshima wa Isaka ne wa Lebeka,’ baledi ba Esau. Lebeka wakafika mene ne ku diamba ne: bakaji bende bavua batondeshe muoyo wende. (Genese 26:34, 35; 27:46) Elabi kabidi meji bua Hana ne mushindu uvua mukenende Penina ‘utamba kumutatshisha ne kumunyingalaja’ bualu kavua mulele. Pamu’apa bualu ebu buvua butonda Hana misangu mivule pavuaye nkayende kuende. Penina uvua umutatshisha kabidi pa bantu (nansha kumpala kua balela ne balunda babu) pavua bena mu dîku edi baya mu difesto ku Shilo. Bualu ebu buvua anu bu kubueja dieba bikole mu mubidi wa Hana.​—1 Samuele 1:4-7.

¹⁷ Ela meji bua malu akatantamena Davidi bua mukawu wa bupale uvua nawu tatuende muenu, Mukalenge Shaula. Bua Davidi kupandisha muoyo wende, uvua ne bua kuya kusombela mu mbuebue mu tshipela tshia Ene-gedi, muvuaye ubanda mu bipokopoko bia mbuebue bivua ne njiwu ya bungi. Dimukengesha patupu nunku divua ne bua kuikala dimubungamije bikole, bualu kavua muenzele Shaula bualu bubi nansha bumue to. Kadi Davidi wakenza bidimu bia bungi unyemakana anu kunyemakana, bionso ebi anu bua mukawu wa Shaula.​—1 Samuele 24:14, 15; Nsumuinu 27:4.

¹⁸ Ela meji bua tshimvundu tshia mu dîku tshiakabungamija muprofete Hoshea. Mukajende wakalua ndumba. Bundumba buende buvua ne bua kuikala bulue bu meba avua atua Hoshea ku mutshima. Ne uvua ne bua kuikala mupete kanyinganyinga kakole pakalela mukaji eu bana babidi ba mu bundumba buende abu!​—Hoshea 1:2-9.

19. Ndikenga kayi diakapeta muprofete Mikaya?

¹⁹ Dikengeshibua ndieba dikuabu mu mubidi. Angata tshilejilu tshia muprofete Mikaya. Kumona Mukalenge mubi Ahaba munyunguluka kudi  baprofete ba dishima, ne Ahaba muikale witaba mashimi abu a patoke kuvua ne bua kuikala kutatshishe bikole mutshima wa Mikaya uvua muntu muakane. Pashishe, pakambila Mikaya Ahaba ne: baprofete bonso abu bavua bakula ne “nyuma wa kudinga,” ntshinyi tshiakenza mfumu wa bena mashimi aba? Monayi anu bualu, ‘wakatapa Mikaya dipi ku ditama’! Tshivua tshipite bubi menemene mbualu buakenza Ahaba pakamudimuija Yehowa ne: bavua ne bua kumutshimuna mu mvita ivuaye ne bua kuluangana bua kunyenga Lamota-gilada. Ahaba wakatuma dîyi bua kuelabu Mikaya mu buloko ne kuikalabu bamupesha biakudia bikese. (1 Bakelenge 22:6, 9, 15-17, 23-28) Vuluka kabidi Yelemiya ne mushindu wakamukengeshabu kudi bantu bavua bakeba kumushipa.​—Yelemiya 20:1-9.

20. Mmeba kayi avua Naomi mutantamene, ne mmunyi muakamubeneshabu?

²⁰ Difuisha bantu batudi banange didi kabidi lutatu lukuabu ludi mua kuikala bu dieba mu mubidi. Naomi uvua ne bua kutantamena kanyinganyinga ka lufu lua bayende ne lua bana bende ba balume babidi. Bu mutshivuaye umvua muoyo umutakanyika bikole bua malu aa, wakapingana ku Beteleheme. Wakambila balunda bende bua kabamubikidi ne: Naomi to, kadi bamubikile ne: Mala, dîna divua diumvuija kanyinganyinga ka malu avua mamufikile. Kadi ku ndekelu, bua ditantamana diende Yehowa wakamupesha muikulu wakalua umue wa ku bankambua ba Masiya.​—Luta 1:3-5, 19-21; 4:13-17; Matayo 1:1, 5.

21, 22. Mmunyi muvua dijimija dia bana ne bintu ditatshishe Yobo bikole, ne ntshinyi tshiakenzaye?

²¹ Elabi meji bua mushindu uvua Yobo ne bua kuikala mubungame pakumvuaye bua lufu lua tshikoso lua bana bende bananga dikumi, ne dijimina dia bimuna biende bionso ne basadidi bende. Diakamue, wakamona biende bionso bibutuka! Pashishe, pavua Yobo wenda upatata ne makenga aa, Satana wakamutua disama dikole. Yobo uvua mua kuikala muele meji ne: disama dikole edi divua ne bua kumushipa. Bua bukole bua dikenga divuaye nadi, wakafika ne ku dijinga lufu bua kuikishaye.​—Yobo 1:13-20; 2:7, 8.

²² Bienze anu bu se: bionso ebi kabivua bikumbane, mukajende, bua kanyinganyinga kavuaye naku, wakalua kudi Yobo ne kumuambila ne: “Diula Nzambi ne fuaku biebe!” Bualu ebu buvua bu dieba mu mubidi wende uvua usama bikole! Pashishe, balunda basatu ba Yobo bakalua, kadi pamutu pa kumusamba, buobu kumutatshisha ne mêyi a budimu, bamuamba muvuaye muenze mpekatu mu musokoko, ne mpekatu eyi ke ivua mimukebele makenga avuaye nawu. Malu a mafi akambabu avua menze anu bu avua enda abueja meba bikole mu mubidi wende. Vuluka kabidi ne: Yobo kavua mumanye tshivua ntatu mikole eyi mimukuatshile to; ne kavua mumanye nansha ne: muoyo wende uvua ne bua kupanduka to. Nansha nanku, “mu malu au onso Yobo kakenza bibi, kakabanda Nzambi ne, Udi wenza bibi.” (Yobo 1:22; 2:9, 10; 3:3; 14:13; 30:17) Nansha muvuaye mutatshisha kudi meba mavule musangu umue, kakalekela lulamatu luende nansha. Bualu ebu budi butukankamija be!

23. Ntshinyi tshiakambuluisha bena lulamatu batudi bamone bua kutantamenabu meba mashilashilangane mu mubidi wabu?

²³ Pa kumbusha bilejilu bitudi batele ebi, bikuabu bidiku bipite bungi. Bidi bungi tshianana mu Bible. Basadidi bonso ba lulamatu aba bakaluangana ne meba abu a mu tshimfuanyi. Ne bakapeta ntatu ya mishindu ne mishindu. Nansha nanku, bavua bafuanangane ku bualu bumue. Kakuena nansha umue wa kudibu wakalekela kusadila Yehowa to. Nansha muakapetabu mateta onso aa avua abungamija, bakatshimuna Satana bua bukole buvua Yehowa mubapeshe. Mmushindu kayi? Tshiena-bualu tshidi tshilonda netshiandamune lukonko elu ne netshituleje mushindu utudi petu mua kutantamena bualu buonso budi bu dieba mu mubidi wetu.

[Mêyi adi kuinshi]

Newandamune munyi?

• Bua tshinyi tudi mua kufuanyikija ntatu itudi tupeta ne meba mu mubidi?

• Ng’amue meba kayi avua Mefibosheta ne Nehemiya batantamene?

• Mu bilejilu bia mu Bible bia balume ne bakaji bakatantamena meba kabukabu mu mubidi, ntshilejilu kayi tshiudi mumone tshitamba kukulenga ku muoyo, ne bua tshinyi?

[Nkonko ya dilonga]

[Bimfuanyi mu dibeji 15]

Mefibosheta wakatantamena bulema, bualu buvuabu bamushiminyine ne diteketa mu maboko

[Tshimfuanyi mu dibeji 16]

Nehemiya wakananukila nansha muvuabu bamuluisha