Kuondo ka muoyo katoke kadi ne mushinga kayi?

“MBULAMATADI mmutume dîyi bua kuangata R$20 000 [makuta a mu Brésil].” Tshiena-bualu etshi tshia pa buatshi tshiakapatuka matuku mashale aa mu tshikandakanda tshia Correio do Povo tshia mu ditunga dia Brésil. Tshiena-bualu etshi tshivua tshilonda bualu bua Luiz Alvo de Araújo, muena mudimu wa ku poste uvua musumbishe mbulamatadi tshitupa tshia lupangu luende. Yeye mumane kujikijangana ne mbulamatadi bua lupangu elu, Luiz wakapapuka pakasanganaye ne: bavua bapitshishe makuta R$20 000 (dolare mitue ku 8 000) pa mushinga uvuabu bumvuangane!

Kabivua bipepele bua kupingaja makuta a pa mutu aa nansha. Kunyima kua yeye mumane kutua njila ne njila ku biro bia mbulamatadi bua kupingaja makuta aa kabayi bitaba, bakapesha Luiz lungenyi bua kuangata muntu uvua mua kumulumbuluila bua kukosa tshilumbu etshi ku kabadi. Nzuji eu wakenzeja mbulamatadi bua kuangata makuta aa ne kufuta mfranga ya balumbuluishi ne bionso bivua bituka bua tshilumbu etshi wakamba ne: “Bidi bimueneka se: muntu kampanda uvua mutupakane, ne bua dilepesha dia malu dia bena mbulamatadi, kakuvua muntu uvua mumanye mushindu wa kujikija tshilumbu etshi to. Etshi ntshilumbu tshia kumpala tshia watshi mushindu tshintu tshiyi muanji kumona to.”

Luiz (udi Ntemu wa Yehowa) udi wamba ne: “Kuondo kanyi ka muoyo kalongesha kudi Bible kakavua mua kundekela ndama tshintu tshivua katshiyi tshianyi nansha. Mvua ne bua kuenza muanyi muonso bua kupingaja makuta aa.”

Ngikadilu eu udi ukemesha ne mene unyungulula bantu ba bungi mutu bikole. Kadi Dîyi dia Nzambi didi dileja ne: bena Kristo balelela badi bangata dikala ne kuondo ka muoyo kimpe ne mushinga wa bungi mu malu abu ne bamfumu ba mbulamatadi. (Lomo 13:5) Bantemu ba Yehowa mbapangadike bua kushala ne ‘[kuondo ka muoyo] kimpe ne [kabidi] mbasue kuenda bimpe mu malu onso.’​—Ebelu 13:18.