Nkonko ya babadi

Tshiambilu tshidi mu Ebelu 12:4 (MMM) tshia ne: “kanuena banji kuluangana too ne padi mashi apueka” tshidi tshiumvuija tshinyi?

Tshiambilu etshi tshia ne: “kuluangana too ne padi mashi apueka” tshidi tshiumvuija kufika too ne ku lufu, anyi kabidi ku muaku ku muaku tshidi tshiumvuija ne: kuela mashi atu alama muntu ne muoyo panshi.

Mupostolo Paulo uvua mumanye ne: bua ditabuja diabu, bamue bena Kristo bena Ebelu bakavua ‘batantamane mu diluangana dikole dia mu makenga.’ (Ebelu 10:32, 33) Bidi bimueneka se: pavua Paulo wakula muaba eu meji ende avua kudi bena Gelika benayi ba manaya a ditembangana. Kuvua dinaya dia lubilu lua ku makasa, dia kuelangana bibula, dia ditutangana dia makofi, dinaya dia kukupa kua bintu bia bujitu ne mafuma. Ke bualu kayi mu Ebelu 12:1 (NW), mupostolo Paulo udi ukankamija bena Kristo nende ne: “Tumbushayi petu bujitu buonso ne mpekatu udi utujingakaja bipepele, ne tunyemayi ne ditantamana lubilu ludi lututekela kumpala.”

Kunyima kua mvese isatu mu Ebelu 12:4, bumue Paulo udi mua kuikala mulekele diakula bua dinyema dia lubilu lua ku makasa ne mubange kuakula mpindieu bua dikumangana dia mbata. (Bilejilu bionso bibidi bidi mu 1 Kolinto 9:26.) Batutshianganyi ba mbata ba mu bikondo bia kale bavua basuika mionji ya biseba bia nyama ku bianza ne mu ntulanganyi ya bianza. Bavua mua kusuikila tshiamu tshia “plomb, ne tshiamu tshifike, anyi tshiamu tshikuabu ku mionji eyi bua kuyinemesha bujitu bua kumona mua kutapa udibu baluangana nende mputa minene pa mbidi.” Diluangana dia tshikisu dia mushindu’eu divua mua kutudishangana mashi ne imue misangu dikebesha nansha ne lufu.

Bena Kristo bena Ebelu bavua ne bilejilu bikumbane bia lulamatu bia basadidi ba Nzambi bavuabu bakengeshe ne benzele malu a tshikisu, bavuabu bafikisha too ne ku lufu, mbuena kuamba ne: “too ne padi mashi apueka.” Tangila malu adi Paulo wamba bua kuleja bivua bifikile bena Kristo ba lulamatu kale.

‘Bakakumibua mabue, bakakoshibua pankatshi ne nsele, bakateyibua, bakashipibua ne muele wa nvita, bakendakana baluate biseba bia mikoko ne biseba bia mbuji, bakengela bintu, bakengeshibua, benjibue bibi.’ Pashishe Paulo wakakula bua Yezu, Mushikiji wa ditabuja dietu, wamba ne: ‘Wakakankamana pakakengaye ku [mutshi], wakalengulula bundu, ne wakashikama ku tshianza tshikole tshia nkuasa wa butumbi wa Nzambi.’​—Ebelu 11:37; 12:2.

Eyowa, ba bungi ‘bakaluangana too ne pakapueka mashi,’ mmumue ne: bakafika too ne ku lufu. Pa kumbusha mvita ivuabu nayi ya munda munda ya diluisha mpekatu wa dipanga ditabuja, bavua baluangana mvita mikuabu. Kadi, bakashala balamate Nzambi nansha muvuaku malu a tshikisu tshikole, bakashala ne lulamatu too ne ku lufu.

Pamu’apa bapiabapia bavua babuele mu tshisumbu tshia mu Yelushalema bakalua bena Kristo panyima pa ntatu minene mimane kukepela, ne kabayi banji kupeta ntatu mikole menemene ya nunku to. (Bienzedi 7:54-60; 12:1, 2; Ebelu 13:7) Kadi buabu buobu, too ne tu-ntatu tukese tuvuabu bapeta tuakatekesha bamue bua kutungunuka ne kuluangana mvita eyi; bakavua ‘bapungila ne bikale bateketa mu mitshima yabu.’ (Ebelu 12:3) Tshidibi bavua ne bua kukola kuya kumpala mu nyuma. Dikola edi divua mua kubambuluisha bua kutungunukabu anu ne kunanukila nansha bu bualu kayi mua kubavuila, kunanukila too ne ku lufu.​—Ebelu 6:1; 12:7-11.

Bena Kristo ba bungi ba mu matuku etu aa ‘bakaluangana too ne padi mashi apueka,’ kubashipabu bualu bua kabavua basue kulekela Buena-Kristo nansha. Pamutu pa tuetu kumvua buôwa bua miaku ya Paulo idi mu Ebelu 12:4, tudi ne bua kuyangata bu mushindu muimpe udi mua kutuambuluisha bua kumanya kutudi mua kushikidila ne ditabuja dietu kudi Nzambi. Pashishe, anu mu mukanda umue umue eu, Paulo udi ufunda ne: ‘Tuikale bietu ne disakidila, ditudi bamanye mua kukuatshila Nzambi udi unusankisha mudimu ne kunemekela ne ditshina.’​—Ebelu 12:28.