Tshisokomenu ku tshipepele

KUULU ku nsongo kua mikuna ya Alpes ku Mputu, kutu bikunyibua bidibu babikila ne: bilongo bia roze bia mu Alpes. Bitu bitoloka misangu ya bungi mu bisumbu bisumbu binene bikuate bikole mua kujila mu buloba bua kudikuba ku mpepele mikole ya ku mikuna. Tshipepele tshikole tshitu tshitatshisha bikunyibua ebi bualu tshitu tshivudija mashika, tshiumisha kapepa ne buloba ne tshitakula too ne miji ya mitshi.

Kadi misangu mivule, tshipepele katshitu tshinyanga bilongo ebi to, bualu bitu bitoloka mu mitanta ya mabue. Mitanta eyi itu ibikuba ku mpepele ne ibipetesha mâyi nansha mutuyi ne buloba bukese. Bilongo ebi bitu bisokoma tshidimu tshijima pa kumbusha anu mu muvu wa été mutubi bilua kupatuka pa mutu biele bilongo biabi bikunze.

Muprofete Yeshaya wakamba ne: Nzambi uvua ne bua kuteka “bakokeshi” bua yonso wa kudibu ikale bu ‘tshisokomenu ku tshipepele.’ (Yeshaya 32:1, 2) Ku bulombodi bua Mukalenge Yezu Kristo, bakokeshi ta batangidi ba mu malu a Nzambi aba bavua ne bua kufuanangana ne mabue adi mabuele mu buloba bimpe, mashindame mu tshikondo tshia kanyinganyinga anyi tshia dikenga. Bavua ne bua kuikala bu tshisokomenu kudi bantu badi ne dijinga dia kulama mâyi a mu nyuma a mu Dîyi dia Nzambi mu tshikondo tshia ntatu.

Ntatu idi mienze bu mpepele (idi ifumina ku dibakengesha, diteketa mu mikolo, anyi masama) idi mua kututa muena Kristo bikole, kufubisha ditabuja diende bikalaye kayi mu bukubi to. Bua kuambuluisha muena Kristo eu, bidi bikengela bakulu bamuteleje bimpe bua kumanya tshilumbu tshiende, bamupeshe mibelu miangatshila mu Bible, ne bamukoleshe mu mikolo ta bamuambuluishe biakane. Bakulu badi bidikija Mukalenge wabu Yezu Kristo; mbasue kuambuluisha bantu badi “bamuangalake.” (Matayo 9:36) Mbasue kukuatshisha kabidi aba badibu batekeshe kudi tshipepele tshia malongesha a dishima. (Efeso 4:14) Diambuluisha dia nunku didi ne mushinga mukole padibu badifila pa dîba diadi.

Tshilejilu, nsongakaji mukuabu, diende Miriame, udi wamba ne: “Ngakabungama bikole mu tshikondo tshivua balunda banyi ba pa muoyo bumbuke mu Bantemu, eku Papa pende mutuadije kusama, mashi amupatuka mu buongo. Nenku, bua kujikija dibungama dianyi edi, ngakabanga kusesela nsongalume kampanda uvua kayi Ntemu to. Mu katupa kakese, meji mabi kumvuila bua kulekela bulelela, ki meme kuambila bakulu dipangadika dianyi dia kumbuka mu tshisumbu, bualu mvua muikale mujadike ne: Yehowa kavua kabidi mua kunnanga to.

“Mu tshikondo tshikole etshi, mukulu muena muoyo wa luse kulua kumvuluija bidimu bimvua mupitshishe mu mudimu wa bumpanda-njila bua pa tshibidilu. Wakangambila ne: uvua usanka bikole bua mumvua ne lulamatu, e kundombaye ne bulenga buonso bua ngitabe bakulu balue kunjadikila mudi Yehowa munnange. Dinanga divuabu bandeje mu tshikondo tshikole atshi divua bu ‘tshisokomenu’ mu matuku a ntatu ya mu nyuma imvua mupete. Ngakakosa malanda ne nsongalume au mu ngondo umuepele patupu, meme kutungunuka ne kuenda mu njila wa bulelela.”

Bakulu batu bumvua bimpe patubu bamona bantu badibu bambuluisha baya kumpala mu nyuma. Miaba ya “tshisokomenu” eyi anyi bakulu aba badi batulabuisha ku mpindieu nsombelu mulenga wa mu nyuma utuikala nende mu Bukokeshi bua Kristo bua Bidimu Tshinunu.