Tutantamenayi “dieba mu mubidi”

“Bulengele buanyi mbukuakanyine.”​—2 KOLINTO 12:9, MMM.

1, 2. (a) Bua tshinyi katuena ne bua kusamisha mutu bua mateta ne ntatu bidi bitukuata? (b) Bua tshinyi tudi ne bua kuikala ne muoyo mukole patudi mu ntatu?

 “BONSO badi basue kuikala ne nsombelu mulenga bualu bua Kristo nebabakengeshe.” (2 Timote 3:12, MMM) Bua tshinyi bidi nanku? Bualu Satana udi wamba ne: bantu badi basadila Nzambi anu bua kupeta masanka, ne mmusue kujadika mêyi ende aa. Umue musangu Yezu wakadimuija bapostolo bende ba lulamatu ne: “Satana wakalomba mua kunuangata bualu bua kunusengeye bu ntete.” (Luka 22:31) Yezu uvua mumanye bimpe ne: Nzambi mmulekele Satana bua kututetaye ne ntatu mikole. Kadi abi kabiena bisua kumvuija ne: lutatu luonso lutudi tupeta ludi lufumina buludiludi kudi Satana anyi kudi ba-demon bende nansha. (Muambi 9:11) Tshidibi, Satana udi ukeba muende muonso bua kutekesha lulamatu luetu ne tshionso tshidiye upeta.

² Bible udi utuambila ne: katuena ne bua kusamisha mutu bua ntatu itudi tupeta to. Nansha bualu kayi buobu butukuate, ki mbualu buenyi peshi budi kabuyi butekemena to. (1 Petelo 4:12) Bushuwa, “bana [betu] badi batangalake pa buloba badi bakenga muomumue.” (1 Petelo 5:9, MMM) Lelu, Satana udi ukebela musadidi yonso wa Nzambi ntatu mipite bukole. Diabolo mmusue kutumona tukengakana ne ntatu mivule idi bu meba. Nunku bua kukumbajaye dijinga diende edi, udi uludika malu a mu tshikondo etshi ne tshipatshila tshia kuvudija anyi kukolesha ‘meba [onso] adi mu mubidi wetu.’ (2 Kolinto 12:7) Nansha nanku, malu adi Satana utukebela kaena ne bua kunyanga lulamatu luetu to. Bu mutu Yehowa ‘utuenzela njila wa kupandukila’ bua tuetu kutantamena diteta, neenze bia muomumue patudi tupeta ntatu idi bu meba mu mubidi wetu.​—1 Kolinto 10:13.

Mushindu wa kutantamena dieba

3. Ndiandamuna kayi divua Yehowa mupeshe Paulo pakamulombaye bua kumbusha dieba divua mu mubidi wende?

³ Mupostolo Paulo wakalomba Nzambi bua umbushe dieba divua mu mubidi wende. “Pa bualu ebu, meme kulomba kudi Mfumu misangu isatu bua dikenga edi dinshile muaba.” Ndiandamuna kayi divua Yehowa mupeshe Paulo bua bualu ebu buakalombaye ne muoyo mujima? “Bulengele buanyi mbukuakanyine, bualu bukole buanyi budi bumueneka padi butekete.”  (2 Kolinto 12:8, 9 MMM) Tukonkononayi diandamuna edi ne tumonayi mushindu udidi mua kutuambuluisha bua kutantamena ntatu yonso idi itutatshisha bu meba.

4. Mmasanka kayi akapetela Paulo ku bulenga bua Yehowa buvuaye kayi muakanyine?

⁴ Tangila ne: Nzambi wakambila Paulo bua kuanyishaye bulenga buvuaye kayi muakanyine bukavuaye mumuleje ku butuangaji bua Kristo. Bulelela, Paulo uvua mupete mabenesha a bungi. Ne dinanga, Yehowa wakamupesha diakalenga dia kulua muyidi nansha muvuaye kumpala muluishi munene wa bayidi ba Yezu. (Bienzedi 7:58; 8:3; 9:1-4) Panyima apu Yehowa wakapesha Paulo midimu milenga mivule. Tudi tumona patoke dilongesha ditudi mua kupeta mu muanda eu. Nansha mu bikondo bipite bukole, tudi anu ne mabenesha a bungi atudi mua kulejila dianyisha. Ntatu yetu kayena ne bua kutusaka bua kupua muoyo malu malenga mapite bungi adi Yehowa mutuenzele nansha.​—Musambu 31:19.

5, 6. (a) Mmunyi muvua Yehowa mulongeshe Paulo ne: bukole bua Nzambi “budi bumueneka padi butekete”? (b) Mmunyi muakajadika tshilejilu tshia Paulo ne: Satana mmuena mashimi?

⁵ Bulenga bua Yehowa butudi katuyi bakanyine budi bumueneka bukumbane mu mushindu mukuabu kabidi. Bukole bua Nzambi mbukumbane bua kutuambuluisha mu ntatu yetu. (Efeso 3:20) Yehowa wakalongesha Paulo ne: bukole bua Nzambi budi “bumueneka padi butekete.” Mmushindu kayi? Ne dinanga dionso, wakapesha Paulo bukole buvuaye nabu dijinga bua kumona mua kutantamena lutatu luende. Panyima, ditantamana dia Paulo ne dieyemena Yehowa ne muoyo mujima biakaleja bena Kristo bonso ne: bukole bua Nzambi buvua buenda butshimuna mu lutatu luvua nalu Paulo, muntu muena butekete ne muena mpekatu. Mpindieu tangila tshidi bualu ebu buenzele Diabolo, udi wamba ne: bantu badi basadila Nzambi anu padibu ne nsombelu muimpe ne kayi ne ntatu. Lulamatu lua Paulo luvua anu bu dipi ditapa mushiminyinyanganyi wa malu eu ku ditama.

⁶ Paulo uvua kumpala ku luseke lua Satana mu mvita yende idiye uluisha Nzambi, wakakengesha bena Kristo ne tshikisu tshikole, uvua Mufalese wa lukunukunu, ne kakuyi mpata, uvua kumpala ne bintu bia bungi bualu uvua muledibue mu dîku dia babanji. Mpindieu Paulo uvua usadila Yehowa ne Kristo bu ‘muntu mutambe kupuekela munkatshi mua bapostolo.’ (1 Kolinto 15:9) Nunku, wakakokela ne budipuekeshi bukokeshi bua kasumbu kaludiki ka bena Kristo ba mu bidimu lukama bia kumpala. Ne wakatantamena dieba divua mu mubidi wende ne lulamatu luonso. Tshiakatamba kubungamija Satana bikole ntshia se: ntatu yakapeta Paulo kayakatekesha lukunukunu luende to. Paulo mene kakapua muoyo ditekemena diende dia kukokesha pamue ne Kristo mu Bukalenge bua mu diulu nansha. (2 Timote 2:12; 4:18) Dieba nansha badiamba disama mushindu kayi kadivua mua kukepesha lukunukunu luende to. Lukunukunu luetu palu lutungunuke ne kukola! Padi Yehowa utukuatshisha mu ntatu, udi utuambika bunême ne diakalenga bua tuetu kujadika ne: Satana mmuena mashimi.​—Nsumuinu 27:11.

Bintu bidi Yehowa utupesha bidi ne mushinga wa bungi

7, 8. (a) Mbinganyi bidi Yehowa ukolesha nabi basadidi bende lelu? (b) Bua tshinyi dibala ne dilonga Bible dituku dionso bidi bituambuluisha bikole bua kutantamena dieba mu mubidi wetu?

⁷ Lelu, Yehowa udi upesha bena Kristo ba lulamatu bukole ku diambuluisha dia nyuma muimpe, Dîyi diende ne bana betu bena Kristo. Anu bu mupostolo Paulo, tudi mua kupuila Yehowa majitu etu mu masambila. (Musambu 55:22) Nansha mudi Nzambi kayi mua kumbusha ntatu yetu, udi mua kutupesha meji a mushindu wa kuyitantamena, nansha yoyi mikale mikole menemene. Yehowa udi mua kutupesha kabidi makanda anyi “[bukole] bua pa buabu” bua kutuambuluisha bua kutantamena ntatu.​—2 Kolinto 4:7, MML.

⁸ Mmushindu kayi utudi tupeta diambuluisha edi? Tudi ne bua kuikala tulonga Dîyi dia Nzambi ne tshisumi, bualu munda muadi ke mutuapeta busambi buende bua bushuwa. (Musambu 94:19) Mu Bible mudi mêyi adi alenga ku muoyo a basadidi ba Nzambi pavuabu bamulomba diambuluisha. Mandamuna a Yehowa, atu misangu mivule ne mêyi a busambi, mbiakudia bitudi ne bua kuelanganapu meji. Dilonga neditukoleshe bua se: ‘[bukole] ebu bua pa buabu [buikale bua Nzambi] ne kabuyi buetu to.’ Bu mututu  dijinga ne biakudia dituku dionso bua kupeta bukole bua mubidi, ke mutudi ne bua kuikala kabidi tudia Dîyi dia Nzambi. Tutu tuenza nanku anyi? Tuetu tuenza nanku netumone ne: dipeta “[bukole] bua pa buabu” didi dituambuluisha bua kutantamena meba onso a mu tshimfuanyi adi mua kuikala atutatshisha mpindieu.

9. Mmunyi mudi bakulu mua kukuatshisha aba badi ne ntatu?

⁹ Bakulu bena Kristo badi batshina Nzambi badi mua kuikala ‘bu tshisokomenu ku tshipepele’ tshia dikenga, bu ‘tshinyemenu tshia ku tshipupu’ tshia ntatu. Bakulu badi basue kukumbaja mêyi aa mafundisha ku nyuma wa Nzambi badi balomba Yehowa ne budipuekeshi ne muoyo mujima bua abapeshe “ludimi lua badi bayila” bua bamanye mua kuandamuna bantu badi mu dikenga ne mêyi adi makane. Mbimpe mêyi a mukulu ikale bu mudi mvula mukese wa yebeyebe udi utupesha tshitalele ne utukankamika mu tshikondo tshia ntatu. Padi bakulu ‘bakolesha badi ne mitshima yamba kupanga,’ badi batamba kukuatshisha bana babu ba mu nyuma badi mua kuikala bapungile anyi batekete mu maboko bua dieba kampanda didibu nadi mu mubidi.​—Yeshaya 32:2; 50:4; 1 Tesalonike 5:14.

10, 11. Mmunyi mudi basadidi ba Nzambi mua kukankamija bakuabu badi mu mateta makole?

¹⁰ Basadidi bonso ba Yehowa badi mu dîku diende dia bena Kristo badi mu buobumue. Bushuwa, ‘tudi tuikalangana bu bitupa bia bakuabu,’ nanku ‘butudi nabu mbua kunangangana.’ (Lomo 12:5; 1 Yone 4:11) Mmunyi mutudi tukumbaja bualu ebu? Bilondeshile 1 Petelo 3:8 (MMM), mpatudi ‘tuambuluishangana, bikale ne muoyo wa dinangangana [ne] wa luse’ bua bonso badi bana betu mu ditabuja. Bua badi batata ne dieba didi dibasama bikole menemene mu mubidi wabu, nansha buobu bikale bansonga anyi bantu bakole, tuetu bonso tudi mua kuditeka pa muaba wabu mu mushindu wa pa buawu. Mmunyi?

¹¹ Tudi ne bua kudienzeja bua kubumvuila luse bua dikenga diabu. Tuetu katuyi tubatshiuka, tubamona bu katuena babamone, peshi tulengulula lutatu luabu, tudi mua kukolesha dikenga diabu katuyi bamanye to. Dikala bamanye ntatu yabu didi ne bua kutusaka bua kudimukila bitudi tuamba, mushindu utudi tubiamba ne utudi tuenza malu. Tuetu bikale ne mêyi malenga adi akankamija bidi mua kutuyisha ndambu wa lutatu lua dieba dionso didi dibatatshisha. Mushindu’au ke utudi mua kuleja ne: tudi basambi kudibu.​—Kolosai 4:11.

Mushindu udi bamue bafike ku ditantamena ntatu bimpe

12-14. (a) Ntshinyi tshiakenza muanetu mukuabu wa bakaji bua kutantamenaye ntatu ya disama dia kansere? (b) Mmushindu kayi uvua bana babu ba mu nyuma bamukuatshishe ne bamukankamije?

¹² Bu mutudi tusemena pabuipi ne ndekelu wa matuku a ku nshikidilu aa, “kanyinganyinga” kadi kenda kavula ku dituku ne ku dituku. (Matayo 24:8) Ke bualu kayi ntatu idi pamu’apa mua kukuata muntu yonso pa buloba, nangananga basadidi ba Yehowa ba lulamatu badi bakeba bua kuenza disua diende. Angata tshilejilu  tshia muanetu wa bakaji mukuabu uvua mumanyishi wa lumu luimpe wa ku dîba ne ku dîba. Bakamukuata ne disama dia kansere ne bavua ne bua kumupanda bua kumbusha tubulu tua mukana tutu tupatula mata (glandes salivaires) ne tutu tupatula luayiyi (glandes lymphatiques). Pakamanyabu ne: uvua ne disama edi, yeye ne bayende bakaditua diakamue mu disambila Yehowa mutantshi mule. Muanetu wa bakaji eu wakamba pashishe ne: bakapeta ditalala dia katshia ne katshia. Nunku, wakatantamena ntatu ya bungi nangananga ya manga avuaye wangata.

¹³ Bua kumanya tshia kuenza mu lutatu elu, muanetu wa bakaji eu wakadienzeja bua kumanya malu a bungi adi atangila kansere. Wakamonangana ne baminganga. Wakabala Tshibumba tshia Nsentedi ne Réveillez-vous!, ne mikanda yetu mikuabu, ne yeye kupetamu miyuki ya mu nsombelu ivua ileja muvua bantu batantamene disama edi. Wakabala kabidi malu makuabu a mushinga ne mvese ya mu Bible idi ileja bukole budi nabu Yehowa bua kukuatshisha bantu bende mu ntatu.

¹⁴ Tshimue tshiena-bualu tshivua tshiakula bua mushindu wa kutshimuna diteketa mu maboko tshiakatela mêyi a meji aa: ‘Udi udipandulula kudi banga bantu udi ukeba anu bualu budiye musue.’ (Nsumuinu 18:1) Pashishe tshiena-bualu etshi tshiakafila mubelu eu ne: “Epuka diditapulula kudi banga.” * Muanetu wa bakaji eu udi ulonda ne: “Ba bungi bakangambila ne: bavua bangenzela masambila; bakuabu bakangela nshinga. Bakulu babidi bavua balua pa tshibidilu bua kumanya mumvua mubike. Bawetu bakantumina bilongo ne tuarte tufunda mêyi a busambi bungi tshianana. Bamue bakandambila ne biakudia. Bavule bakitaba too ne bua kuikala kungambula kuya nanyi ku buanga.”

15-17. (a) Ntshinyi tshiakambuluisha muanetu mukuabu wa bakaji bua kutantamena ntatu yakafumina ku njiwu ya mashinyi? (b) Mmunyi muakamukuatshishabu kudi bawetu ba mu tshisumbu tshiende?

¹⁵ Munga muntu mukaji musadidi wa Yehowa wa kale wa mu provense wa Nouveau-Mexique (mu États-Unis) wakapetangana ne njiwu pavua mashinyi abidi matutakane. Wakatshibuka nshingu ne makaya, bualu ebu kukoleshabu lutatu luvuaye nalu lua manungu a mifuba uwula, lukavuaye muenze nalu bidimu bipite pa 25. Muanetu wa bakaji eu udi ulonda ne: “Mvua ntata bikole bua kuimanyika mutu wanyi ne bua kuambula tshintu tshionso tshivua ne bujitu bupite bua kilo 2. Kadi kusambila Yehowa ne muoyo mujima nkungambuluishe bikole. Biena-bualu bia mu Tshibumba tshia Nsentedi bitudi balonge mbingambuluishe pabi. Tshimue tshiena-bualu tshiakumvuija Mika 6:8, tshiamba ne: kuikala bapuekele patudi tuenda ne Yehowa kudi kumvuija kumanya mikalu yetu. Bualu ebu buakangambuluisha bua kujingulula ne: nansha mumvua ne lutatu, tshiena ne bua kuteketa mu maboko to, nansha muvua mêba amvua ngenza mu buambi mikale mashadile ku amvua musue. Kusadila Yehowa ne bipatshila bimpe ke kudi nangananga ne mushinga.”

¹⁶ Muanetu wa bakaji eu udi wamba kabidi ne: “Bakulu bavua misangu yonso bangela kalumbandi bua didikolesha dianyi bua kubuela mu bisangilu ne kupatuka mu buambi. Bua kungela muoyo, bansonga bavua bangupukila. Bampanda-njila bavua nanyi lutulu be, ne misangu mivule bavua bashintulula ndongamu wabu matuku amvua tshiyi bimpe menemene to. Pavua kulu kakuyi kuimpe to, bavua bangangata tuya kumona bantu bavuabu bayikile nabu peshi bavuabu balonga nabu Bible. Ne bu mumvua tshiyi mua kuambula tshibuta tshia mikanda, bamanyishi bakuabu bavua bela mikanda yanyi mu tshibuta tshiabu pamvua mpatuka nabu mu buambi.”

¹⁷ Tangila mushindu uvua bakulu ba tshisumbu ne bena Kristo bakuabu bambuluishe bana betu ba bakaji aba bua kutantamena bulema buabu buvua bu dieba. Bakabambuluisha bua kukumbaja majinga masunguluke a ku mubidi, a mu nyuma ne malu makuabu kabidi. Bualu ebu kabuenaku bukukankamija bua kuambuluisha bana benu bakuabu badi bapeta ntatu anyi? Nuenu bansonga nudi penu mua kuambuluisha bantu ba mu tshisumbu tshienu badi baluangana ne meba mu mubidi.​—Nsumuinu 20:29.

18. Ndikankamija kayi ditudi mua kupeta mu miyuki ya malu a mu nsombelu itu ipatuka mu Réveillez-vous! ne mu Tshibumba tshia Nsentedi?

¹⁸ Mu tshibejibeji tshia Tshibumba tshia  Nsentedi ne tshia Réveillez-vous! mutu mupatuke biena-bualu bivule bia malu a mu nsombelu ne malu malonda kudi Bantemu badi batantamene anyi batshidi batantamena ntatu. Wewe ubala biena-bualu ebi pa tshibidilu, neumone ne: bana benu ba mu nyuma ba bungi badi pa buloba bujima mbatantamene ntatu ya mushindu wa kupeta mfranga, difuisha bananga babu mu bipupu ne ntatu mikole ya mu bikondo bia mvita. Bakuabu mbatekesha kudi masama makole. Bavule kabena mua kuenza amue a ku malu mapepele adi bantu badi ne bukole bua mubidi bamona bu a tshianana nansha. Masama abu adi abela mu diteta dikole menemene, nangananga padibu kabayi mua kuenza midimu ya bena Kristo mushindu udibu basue. Badi banyisha bikole diambuluisha ne dikuatshisha bidi bifumina kudi bana babu ba balume ne ba bakaji, bansonga ne bantu bakole.

Kutantamena ntatu kudi kutupetesha masanka

19. Ntshinyi tshiakambuluisha Paulo bua kusanka nansha pavuaye ne ntatu ne butekete bivua bu dieba?

¹⁹ Paulo wakasanka pakamonaye ne: Nzambi uvua mumupeshe bukole. Wakamba ne: “Ne muoyo wanyi mujima, nenditumbishe nangananga bua butekete buanyi, bua bukole bua Kristo bushindame mu muoyo wanyi. Ke pandi nsanka mu butekete buanyi, mu bipendu, mu makenga, mu malu makole ne mu ntatu indi ngumvua bualu bua Kristo; bualu pandi ne butekete ke pandi ne bukole.” (2 Kolinto 12:9, 10, MMM) Bua malu avua mamufikile, Paulo wakamba ne dishindika ne: “Ki ndikenga didi dingakuisha nanku; ntu mumanye mua kudikolela mu bualu buonso. Ndi mumanye mua kudikanda ne mua kusanka pandi ne biuma. Diba dionso ne miaba yonso, ndi muibidile diukuta ne nzala, biuma ne bupele. Ndi mua kuenza bionso ebi mu dina dia Kristo udi umpesha bukole.”​—Filipoi 4:11-13, MMM.

20, 21. (a) Bua tshinyi tudi mua kupeta disanka tuetu bikale tuelangana meji bua bintu “bidi kabiyi bimueneka”? (b) Mbimue bintu kayi “bidi kabiyi bimueneka” biudi muindile bua kumona mu buloba bukudimuna Mparadizu?

²⁰ Nenku tuetu batantamene dieba dionso dia mu tshimfuanyi didi mu mubidi wetu, tudi mua kupeta disanka dinene dia kuleja bantu bonso ne: bukole bua Yehowa budi bumueneka mu butekete buetu. Paulo wakafunda ne: “Katuena tuteketa. . . . Muoyo wetu wa munda udi wowo wenda wandamuka mupiamupia ku dituku ku dituku. Bualu, dikenga dikese dia tshitupa [tshîpi] didi ditulongoluela lumu luvule ne lua kashidi, luye ne mua patupu. Ke patudi . . . tutangila . . . amu bidi kabiyi bimueneka; bualu bidi . . . kabiyi bimueneka bidi bia kashidi.”​—2 Kolinto 4:16-18, MMM.

²¹ Lelu, bavule ba munkatshi mua bantu ba Yehowa badi ne ditekemena dia kuikala ne muoyo pa buloba bukudimuna Mparadizu ne kupeta mabenesha adiye mulaye. Lelu tudi mua kuangata mabenesha aa bu bintu “bidi kabiyi bimueneka.” Kadi tshikondo tshidi tshienda tshisemena ne lukasa tshituikala mua kumona mabenesha aa ne mêsu etu abidi ne tshituikala mua kutshionkomoka nawu bua kashidi ne tshiendelele. Dimue dia ku mabenesha aa nedikale dibenga kuikala kabidi ne ntatu idi mienze bu meba! Muana wa Nzambi ‘neabutule midimu ya Diabolo’ ne ‘neavuije tshianana [eu] udi ne bukole bua [kukebesha] lufu.’​—1 Yone 3:8; Ebelu 2:14.

22. Ndishindika ne dipangadika kayi bitudi ne bua kuikala nabi?

²² Nunku, nansha tuetu bikale ne dieba dia mushindu kayi ditutatshisha mu mubidi wetu lelu, tutungunukayi ne kuditantamena. Anu bu Paulo, Yehowa neatupe bukole bua kuditantamena, bualu yeye udi utupesha bukole ne kalolo konso. Patuikala ne muoyo mu buloba bukudimuna Mparadizu, netutumbishe Yehowa Nzambi wetu dituku dionso bua malu malenga onso adiye mutuenzele.​—Musambu 103:2.

[Mêyi adi kuinshi]

Newandamune munyi?

• Bua tshinyi ne mmunyi mudi Diabolo ukeba bua kunyanga lulamatu luetu lua bena Kristo balelela?

• Mmunyi mudi bukole bua Yehowa “bumueneka mu butekete”?

• Mmunyi mudi bakulu ne bawetu bakuabu mua kukankamija aba badi baluangana ne ntatu?

[Nkonko ya dilonga]

[Tshimfuanyi mu dibeji 18]

Misangu isatu Paulo wakalomba Nzambi bua umbushe dieba divua mu mubidi wende