Mmunyi muudi mua kupanduka ku nshikidilu wa bukua-panu ebu?

BIBLE udi umvuija muenzeka nshikidilu wa malu a tshikondo etshi wamba ne: dituku adi nedikale “dituku dia tshiji, dia dikenga ne kanyinganyinga, dia tshinyangu ne kabutu, dia midima ne mufitu, dia mavuba ne midima mikole.” (Sefanya 1:15, MMM) Bua kuamba bulelela, edi ki ndituku diudi mua kushala muindile ne disanka to! Kadi mupostolo Petelo wakabela bena Kristo nende bua ‘kutekemena ne [kulama mu lungenyi] dituku dia [Yehowa]. Bua bualu buadi diulu nedikuate kapia ne nedijimine ne bintu bidimu nebienguluke ne kapia kakole. Kadi bu mudi mulayi wende tudi tutekemena diulu dipiadipia ne buloba bupiabupia mudi buakane buikalemu.’​—2 Petelo 3:12, 13.

Muaba eu Petelo kavua wakula bua dibutuka dia diulu ne buloba bietu bitudi tumona ebi to. “Diulu” ne “buloba” bidi Petelo muambe mu mvese eyi bidi bileja makalenge mabi a bantu ne bantu badi kabayi batshina Nzambi. ‘Dituku dia Yehowa’ kadiakubutula buloba ebu to, kadi nedikale “dia kubutula bantu babi.” (Yeshaya 13:9) Bua aba badi ‘bapumuna muoyo ne badi badila bualu bua malu a bundu’ adibu benza kudi bantu babi lelu, buabu buobu dituku dia Yehowa nedikale dituku dia lupandu.​—Yehezekele 9:4.

Kadi mmunyi mudi muntu mua kupanduka mu “dituku adi dinene dia Yehowa, didi dikuatshisha bantu buowa”? ‘Dîyi dia Yehowa’ diakambilaye umue wa ku baprofete bende didi ditupesha diandamuna dia lukonko elu ne: “Muntu yonso watela dina dia Yehowa neasungidibue.” (Yoele 1:1; 2:31, 32) Bantemu ba Yehowa nebikale ne disanka dia kukuambuluisha bua wewe kumanya tshidi kutela dîna dia Yehowa kumvuija.