“Mpindieu, bidi mua kukusama”

KUTUKU muanji kumvua mêyi aa anyi? Imue misangu doktere anyi munganga kampanda wakaamba kumpala kua kukupesha buanga buvuabu bakufundile.

Pamu’apa, kuakabenga bua kuangata buanga abu anu bualu buvua mua kulua kukutatshisha to. Kadi, wakakolesha muoyo nansha muvuabi mua kukusama, bionso ebi anu bualu uvua musue kupeta makanda mimpe a mubidi mu matuku atshivua alua. Padi disama dikola menemene, kuitaba anyi kubenga buanga kampanda budi bumueneka bubi kudi mua kuikala tshilumbu tshia lufu anyi tshia muoyo.

Nansha mudibi kabiyi mua kuikala bilomba misangu yonso diambuluisha dia doktere, bu mutudi tuetu bonso bantu bapange bupuangane, tudi dijinga ne diyisha anyi mibelu, nansha biobi imue misangu mua kuanji kututonda. (Yelemiya 10:23) Bible udi utamba kuleja mushinga wa bualu ebu kudi bana, wamba ne: ‘Bupote budi busuikibue mu mutshima wa muana; kadi lukodi nelubumushe kudiye.’​—Nsumuinu 22:15.

Muaba eu lukodi ludi luleja bumfumu bua baledi. Mbulelela bua se: anu bana bakese tshianana ke batu basue diyisha. Pamu’apa badi mua kudikina padidi dikale ne dinyoka kampanda. Kadi, baledi ba meji ne ba dinanga kabena bimanyina pa mushindu wikalabi mua kutatshisha anyi kusama muana to, lungenyi luabu ndutume ku disanka didiye mua kulua kupeta panyima. Baledi bena Kristo ba dinanga mbamanye ne: Dîyi dia Nzambi kadiena dishima padidi diamba ne: “Diba didibo banyoka muntu, dinyoka didi dimueneka bu bualu bua dibungama, kabuyi bua disanka. Kadi pashishe, didi dipetesha bavua badipete tshimuma tshia bupole [mmumue ne:] buakane.”​—Ebelu 12:11, MMM; Nsumuinu 13:24.

Bushuwa, ki ng’anu bana nkayabu batu dijinga ne dilongesha anyi diyisha to. Nansha bantu bakole batu pabu nadi dijinga. Bible udi wambila bantu bakole padiye wamba ne: “Kuata diyisha bikole, kudilekedi nansha; udilame, bualu bua didi muoyo webe.” (Nsumuinu 4:13) Eyowa, bantu ba meji (bana ne bakole) nebanange diyisha dia mu Mukanda wa Nzambi, bualu kudianyisha nekubambuluishe bua kulama muoyo wabu mu matuku atshilualua.