‘Luayi kundi, meme nennupe dikisha’

Bisangilu bidi bisakangana ku dinanga ne ku midimu milenga

KUMBUKILA ku tshimenga tshia Toronto too ne ku tshia Tokyo, ku tshia Moscou too ne ku tshia Montevideo, Bantemu ba Yehowa ne balunda babu batu misangu ya bungi ku lumingu luonso basangila mu miaba yabu ya ntendelelu. Mu bantu abu mutu ba-tatu ba mêku badi benza midimu mikole ne balukila bapungile bikole panyima pa mudimu wa dituku dijima; ba-mamu ba nzubu bakuatshi ba mudimu mukole ne bana babu batekete; bansonga batshidi ne makanda a mubidi bafumina mu tulasa; bakulakaje batshienda bitulu bakadi mibidi yabu mitekete ne masama kabukabu; bakaji bakamba ne bana ba nshiya ne bawetu bakuabu badi ne ntatu mibatshiokeshe bakeba wa kubakoleshaku ku muoyo.

Bantemu ba Yehowa aba badi, aba benza ngendu ku tuwulu tua mbilu mikole, bakuabu pa nyama ya mpunda, aba ku tuwulu tudi tuendela mu njila ya muinshi mua buloba, bakuabu pabu ku mashinyi a biambula mabuki. Bamue batu basabuka misulu idi ne ngandu tente, eku bakuabu pabu batantamena ntatu ya mashinyi ya mu bimenga binene. Bua tshinyi bantu bonso aba badi baditatshisha mushindu’eu?

Badi benza nanku tshia kumpala bualu kubuela ne kuandamuna mu bisangilu bia bena Kristo ng’umue mushindu munene wa kutendelela Yehowa Nzambi. (Ebelu 13:15) Mupostolo Paulo wakaleja bualu bukuabu pakafundaye ne: ‘Tudielelangane meji muntu ne muntu bua kuenzejangana ku dinanga ne ku dienza dia bienzedi bimpe, katuyi tulekela bietu disangisha dietu pamue, kadi tukoleshangana mitshima, tutamba kuenza nunku bualu bua nudi numona dituku dia Mukalenge disemena pabuipi.’ (Ebelu 10:24, 25) Muaba eu Paulo uvua wambulula mêyi a kangimba Davidi wakimba ne: ‘Nakadi ne disanka pakungambilabu ne: tuye mu nzubu wa Yehowa.’​—Musambu 122:1.

Bua tshinyi bena Kristo badi bumvua disanka dia bungi padibu mu bisangilu biabu? Bualu bonso badimu ki mbabandidi ba patupu to. Kadi, bisangilu bidi bibapesha mushindu wa kumanyanganabu ne bana babu bimpe. Bisangilu ebi bidi nangananga bibapetesha kabidi mushindu wa kuambuluishabu bakuabu pamutu pa kuindila anu bua bakuabu kubambuluisha, ne wa kusakangana ku dinanga ne midimu milenga. Malu aa adi enza bua bisangilu bikale tshikondo tshia kukoleshangana mu nyuma. Kabidi bisangilu bia bena Kristo ng’umue mushindu udi Yezu ukumbajila dilaya diende dia ne: ‘Luayi kundi, meme nennupe dikisha.’​—Matayo 11:28.

 Muaba mulenga wa busambi ne ditabalela dia bakuetu

Bantemu ba Yehowa badi ne tshidibu bangatshila bisangilu biabu bu bikondo bidi bibakankamija. Bualu bumue budi se: batu bafila mu bisangilu ebi biakudia bia mu nyuma pa dîba diakanyine kudi ‘mupika wa lulamatu ne wa budimu.’ (Matayo 24:45, NW) Bisangilu bidi kabidi bipesha basadidi ba Yehowa dimanya ne bibambuluisha bua kuikala balongeshi ba Dîyi dia Nzambi ba tshisumi. Kabidi, ku Nzubu wa Bukalenge, muntu udi mua kupetangana ne balunda ba dinanga badi baditatshisha bua binabu, ne ba malu mimpe badi ne muoyo wa kuambuluisha ne kusamba bantu nabu ku budisuile mu bikondo bia ntatu.​—2 Kolinto 7:5-7.

Ke bualu buakamona mamu mukuabu diende Phillis wakafuisha bayende ne kushala udikoleshila bana ba bakaji babidi, umue wa bidimu bitanu ne mukuabu bidimu muanda-mukulu. Bua kumvuija mushindu uvua bisangilu bia bena Kristo bibakoleshe ku muoyo yeye ne bana bende batekete abu, mamu eu wakamba ne: “Bivua bitukolesha ku muoyo bua kuya ku Nzubu wa Bukalenge bualu bana betu bavua batulejaku dinanga ne baditatshisha bua bualu buetu, batuela mu tshitupa, batukankamija ne ngenyi milenga ya mu Mukanda wa Nzambi anyi batuela muoyo wa ku tshianza ne disanka dionso. Mmuaba umvua musue kuikala misangu yonso.”​—1 Tesalonika 5:14.

Pakapandabu Marie, munganga uvua umuondopa wakamba ne: neumvue bimpe kunyima kua mbingu nansha isambombo. Mu mbingu ya ntuadijilu pakabangaye kumvuaku bimpe, Marie kavua mua kubuela mu bisangilu to. Munganga au e kulua kumona kabidi ne: Marie katshivua kabidi ne musangelu bu uvuaye nawu kumpala nansha. Pakamanyaye ne: katshivua kabidi ubuela mu bisangilu, munganga e kumukankamija bua kutuadijaye kuyamu. Marie kumuambila ne: bu mudi bayanyi kayi Ntemu wa Yehowa, kakuitaba bua meme kuya mu bisangilu ne mubidi luyowayowa nunku to. Munganga kuenzela Marie mukanda wa kutuadijaye kuya mu bisangilu ku Nzubu wa Bukalenge bua kupetangana ne balunda bavua mua kumukankamija ne kumukolesha ku muoyo. Bua kujikija, Marie udi wamba ne: “Panyima pa tshisangilu tshimue tshingakabuela, ngakumvua bilenga bia dikema. Ngakabanga kudia, kulala butuku bujima, tshivua kabidi nnua manga misangu ne misangu bua kutuyisha bivua binsama to, ne ngakabanga kutua kabidi mimuemue!”​—Nsumuinu 16:24.

Nsombelu udi mu bisangilu bia bena Kristo udi ukoka ntema ya bantu bakuabu badi kabayi Bantemu padibu batumona. Mulongi mukuabu wa mu iniversite wakasungula bua kutentekela Bantemu ba Yehowa bua kumona mudibu benza malu bua yeye kuafunda mu mukanda wende wa makebulula a njikijilu wa tulasa tuende tua malu adi atangila bikadilu bia bantu. Pakamonaye nsombelu uvua nende Bantemu mu bisangilu, wakafunda ne: “Mushindu uvuabu bangakidilamu ne musangelu . . . [uvua] munkemeshe bikole. . . . Ngikadilu munene uvua nende Bantemu ba Yehowa nngikadilu wa bulunda ne ke ungakamona bu tshintu tshia mushinga mukole mu bisangilu [biabu].”​—1 Kolinto 14:25.

Bua pa buloba budi ne ntatu ebu, bisangilu bia bena Kristo ke muaba mulenga wa mu nyuma wa kunyemena. Mmuaba wa ditalala ne dinanga. Paudi mu bisangilu, udi mua kudimuena ne ebe abidi bulelela bua mêyi a kangimba aa: “Monayi mudibio bilenga, mudibio disanka, bua kusomba bonso pamue, bu bana ba muntu.”​—Musambu 133:1, MMM.

[Kazubu/​Tshimfuanyi mu dibeji 25]

DIKUMBAJA DIA DIJINGA DIA PA BUADI

Mmunyi mudi bisangilu bia bena Kristo mua kuambuluisha tumama ne bena matshi adi mapate? Pa buloba bujima, Bantemu ba Yehowa badi benda benza bisumbu bia muakulu wa tumama. Mu bidimu 13 biashadi ebi, mbenze bisumbu 27 bia muakulu wa tumama ne tusumbu tukese 43 mu ditunga dia États-Unis nkayadi. Mu matunga makuabu matue ku 40, mudi bisumbu biamba kufika ku 140 bia muakulu wa tumama. Mbalongolole mikanda ya Bantemu ba Yehowa mu bande ya video mu miakulu ya tumama 13.

Tshisumbu tshia bena Kristo tshidi tshiambuluisha bawetu badi bafue matshi ne tumama bua kutumbishabu pabu Yehowa. Odile uvua muena Katolike uvua ne tunyinganyinga tua bungi ne uvua ukeba dîba dionso bua kudishipa. Lelu’eu udi ne dianyisha dia bungi bua dilongesha dia mu Bible didiye mupete mu bisangilu bia bena Kristo. Udi wamba ne: “Ngakapetulula makanda anyi a mubidi ne disanka dia kuikala anu ne muoyo. Kadi tshidi ne mushinga wa bungi, mbulelela bundi mupete. Mpindieu, muoyo udi ne mushinga wa bungi ku mêsu kuanyi.”