Kristo udi ulombola tshisumbu tshiende

‘Monayi, ndi nenu matuku onso too ne ku nshikidilu kua tshikondo etshi.’​—MATAYO 28:20.

1, 2. (a) Pakatumina Yezu bayidi bende mukenji wa kuvuija bantu bayidi kunyima kua dibika diende ku lufu, ntshinyi tshiakabalayaye? (b) Mmunyi muakaludika Yezu tshisumbu tshia bena Kristo ba kumpala bimpe?

 KUMPALA kua Yezu Kristo Mulombodi wetu uvua mubike ku lufu kubanda mu diulu, wakamuenekela bayidi bende e kubambila ne: ‘Bakumana kumpa bukokeshi buonso mu diulu ne pa buloba. Bualu bua meme ndi ne bukokeshi ebu, yayi bienu, nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe; nubayishe mua kuenza malu onso angakanuambila; ne monayi, ndi nenu matuku onso too ne ku nshikidilu kua tshikondo etshi.’​—Matayo 23:10, MMM; 28:18-20.

² Yezu kavua anu mupeshe bayidi bende mudimu udi usungila mioyo ya bantu wa kubavuija pabu bayidi, kadi wakabalaya kabidi ne: neyikale nabu. Muyuki wa bena Kristo ba kumpala udi mu mukanda wa mu Bible wa Bienzedi udi uleja bimpe ne: Yezu wakenza mudimu ne bukokeshi buvuabu bamupeshe bua kuludika tshisumbu tshitshivua tshifuma ku diashibua. Wakatuma “musambi” anyi nyuma muimpe uvuaye mulaye bua kukolesha bayidi bende ne kubalombola mu mudimu wabu mukole. (Yone 16:7; Bienzedi 2:4, 33; 13:2-4; 16:6-10) Pakabika Yezu ku lufu, wakakuata mudimu ne banjelu badi ku bukokeshi buende bua kukuatshisha bayidi bende. (Bienzedi 5:19; 8:26; 10:3-8, 22; 12:7-11; 27:23, 24; 1 Petelo 3:22) Kabidi, Mulombodi wetu eu wakalombola tshisumbu tshiende ku diambuluisha dia kasumbu ka balume bakumbane bavuaye muenze bua bikale baludika bu kasumbu kaludiki.​—Bienzedi 1:20, 24-26; 6:1-6; 8:5, 14-17.

3. Nkonko kayi ituakonkonona mu tshiena-bualu etshi?

³ Kadi netuambe tshinyi bua matuku etu a ku ‘nshikidilu wa tshikondo etshi’ aa? Mmunyi mudi Yezu Kristo ulombola tshisumbu tshia bena  Kristo lelu? Ne mmunyi mutudi mua kuleja ne: tudi bitabe buludiki ebu?

Mfumu udi ne mupika wa lulamatu

4. (a) Mbanganyi badi mu kasumbu ka “mupika wa lulamatu ne wa budimu”? (b) Ntshinyi tshidi Mfumu mupeshe mupika bua kutangila?

⁴ Pavua Yezu ufila mulayi uvua utangila tshimanyinu tshia dikalaku diende, wakamba ne: “Nnganyi bushuwa udi mupika wa lulamatu ne wa budimu udi mfumuende muteke ku mutu kua bena mudimu bende, bua kubapesha biakudia biabu mu tshikondo tshiakanyine? Wa diakalenga mmupika au pikala mfumuende mu difika umusangana wenza nunku. Bulelela ndi nnuambila ne: neamuteke ku mutu kua bintu biende bionso.” (Matayo 24:45-47, NW) ‘Mfumu’ eu m’Muludiki wetu Yezu Kristo, ne mmuteke kasumbu ka “mupika wa lulamatu ne wa budimu” kadi kenza ne bena Kristo bela manyi badi pa buloba bua kutangila malu ende onso a pa buloba.

5, 6. (a) Mu tshikena-kumona tshiakapeta mupostolo Yone, ‘bitekelu bia minda bia ngolo muanda-muteke’ ne ‘mitoto muanda-mutekete’ bidi biumvuija tshinyi? (b) Dikala dia ‘mitoto muanda-mutekete’ mu tshianza tshia balume tshia Yezu didi dileja tshinyi?

⁵ Mukanda wa mu Bible wa Buakabuluibua udi uleja ne: Yezu Kristo udi ulombola mupika wa lulamatu ne wa budimu buludiludi. Mu tshikena-kumona tshia ‘Dituku dia Mukalenge,’ mupostolo Yone wakamona ‘bitekelu bia minda muanda-mutekete; ne munkatshi mua bitekelu bia minda mukuabu mufuane muana wa muntu wakadi ne mitoto muanda-mutekete mu tshianza tshiende tshia balume.’ Yezu wakumvuija Yone tshikena-kumona etshi ne: ‘[Ebu] mbualu busokoka bua mitoto muanda-mutekete iwakatangila mu tshianza tshianyi tshia balume, ne bua bitekelu bia minda ya ngolo muanda-mutekete. Mitoto muanda-mutekete idi banjelu ba [bisumbu] muanda-mutekete, ne bitekelu bia minda muanda-mutekete bidi [bisumbu] muanda-mutekete.’​—Buakabuluibua 1:1, 10-20.

⁶ ‘Bitekelu bia minda ya ngolo muanda-mutekete’ bidi bileja bisumbu bionso bia bena Kristo balelela bivua ne bua kuikalaku mu ‘dituku dia Mukalenge’ diakatuadija mu 1914. Kadi ‘mitoto muanda-mutekete’? Tshia kumpala, idi tshimfuanyi tshia batangidi bonso balela ku nyuma anyi bela manyi bavua batangila bisumbu bia mu bidimu lukama bia kumpala. * Batangidi bavua mu tshianza tshia balume tshia Yezu, mbuena kuamba ne: uvua ubalombola. Bulelela, Yezu Kristo wakaludika kasumbu ka mupika aka. Kadi mpindieu batangidi bela manyi kabena ba bungi kabidi to. Mmunyi mudi Kristo ufika ku diludika bisumbu bipite pa 93 000 mu buloba bujima?

7. (a) Mmunyi mudi Yezu wenza mudimu ne Kasumbu Kaludiki bua kuludika bisumbu pa buloba bujima? (b) Bua tshinyi tudi mua kuamba ne: bakulu bena Kristo mbateka ku nyuma muimpe?

⁷ Anu bu mu bidimu lukama bia kumpala, kasumbu kakese ka balume bakumbane ba munkatshi mua batangidi bela manyi badi basadila lelu bu Kasumbu Kaludiki, baleja mpala wa kasumbu ka mupika wa lulamatu ne wa budimu. Muludiki wetu udi ukuata mudimu ne Kasumbu Kaludiki aka bua kuteka balume bakumbane (nansha bikale anyi kabayi bela manyi a nyuma) bakulu mu bisumbu. Mu muanda eu, nyuma muimpe udi Yehowa mupeshe Yezu bua kukuata nende mudimu udi wambuluisha bikole bitambe. (Bienzedi 2:32, 33) Tshia kumpala, batangidi aba badi ne bua kukumbaja malu malomba adi munda mua Dîyi dia Nzambi difundisha ku nyuma wende muimpe. (1 Timote 3:1-7; Tito 1:5-9; 2 Petelo 1:20, 21) Badi basungula ne bateka bantu bakulu kunyima kua bamane kusambila ne ku bulombodi bua nyuma muimpe. Kabidi, bantu badibu bateka badi ne mamuma a nyuma muimpe. (Galatia 5:22, 23) Nunku Paulo udi ubela bia muomumue bakulu bonso, nansha bikale anyi kabayi bela manyi ne: ‘Nuditangile bienu bimpe, ne tshisumbu tshionso tshiakanutekelabu batangidi kudi nyuma muimpe.’ (Bienzedi 20:28) Balume badibu bateke aba badi bapetela bulombodi kudi Kasumbu Kaludiki ne badi balama mikoko idi mu tshisumbu ku budisuile. Mu mushindu’eu ke mudi Kristo netu mpindieu, ne mmudiye ulombola tshisumbu bimpe menemene.

8. Mmunyi mudi Kristo wenza mudimu ne banjelu bua kuludika bayidi bende?

⁸ Yezu udi kabidi ukuata mudimu ne banjelu bena dîna bua kuludika bayidi bende lelu. Bilondeshile mufuanu wa lupele ne mponda, tshikondo tshia kunowa tshivua ne bua kulua ku ‘nshikidilu wa tshikondo etshi.’ Nganyi uvua Mfumu ne bua kukuata nende mudimu wa dinowa? Yezu wakamba ne: ‘Banowi mbanjelu.’ Wakamba kabidi ne: ‘Muana wa muntu neatume banjelu bende, nebasungulule mu bukalenge buende benji ba malu mabi ne bintu bionso bidi bilenduisha bantu.’ (Matayo 13:37-41) Kabidi, anu muvua muanjelu mulombole Filipo bua kupeta muntu mutungula wa mu Atiopa, tudi ne bijadiki bivule lelu’eu bidi bileja se: Kristo udi wenza mudimu ne banjelu bua kulombola mudimu wa bena Kristo balelela bua kubafikisha muaba udi bantu badi basue bulelela.​—Bienzedi 8:26, 27; Buakabuluibua 14:6.

9. (a) Nku ndiambuluisha dia tshinyi kudi Kristo ulombola tshisumbu tshia bena Kristo lelu? (b) Ndukonko kayi lutudi ne bua kukonkonona bituikala basue bua buludiki bua Kristo kutuambuluisha?

 ⁹ Bushuwa, tudi tukola mu maboko patudi tumvua ne: Yezu Kristo udi ulombola bayidi bende lelu ku diambuluisha dia Kasumbu Kaludiki, dia nyuma muimpe, ne dia banjelo! Nansha dikengesha anyi ntatu mikuabu ya muomumue bia tshitupa tshîpi bipangishe bamue batendeledi ba Yehowa bua kupeta buludiki bua Kasumbu Kaludiki, Kristo udi anu mua kubaludika kabidi ku diambuluisha dia nyuma muimpe ne dia banjelu. Kadi buludiki buende budi butuambuluisha anu patudi tubuitaba. Mmunyi mutudi mua kuleja ne: tudi tuitaba buludiki bua Kristo?

‘Nutumikile, nukokele’

10. Mmunyi mutudi mua kuleja kanemu kudi bakulu badibu bateke mu tshisumbu?

¹⁰ Muludiki wetu mmupeshe bisumbu “mapa mikale bantu,” mbuena kuamba ne: “bakuabu bu bamanyishi ba Evanjeliyo, bakuabu bu balami ne balongeshi.” (Efeso 4:8, 11, 12, NW) Mushindu utudi tuangata bantu aba ne utudi tubenzela malu ke udi uleja patoke mutudi basue anyi babenge buludiki bua Kristo. Mbitambe buimpe bua ‘tuetu kuikala ne muoyo wa dianyisha’ bua bantu bakumbane ba mu nyuma badi Kristo mufile aba. (Kolosai 3:15, MMM) Tudi kabidi ne bua kubanemeka. Mupostolo Paulo wakafunda ne: ‘Bakulu badi [baludika] bimpe babadibue pabu bakanangane ne bua [kunemekibua] tshiakabidi.’ (1 Timote 5:17) Mmunyi mutudi mua kuleja dianyisha dietu ne kanemu bitudi nabi bua bakulu anyi batangidi mu tshisumbu? Paulo udi wandamuna ne: ‘Nutumikile badi [banulombola], nubakokele.’ (Ebelu 13:17) Bulelela, tudi ne bua kubatumikila ne kubakokela ne kubumvuila.

11. Bua tshinyi kunemeka bakulu kudi munga mushindu wa nsombelu udi umvuangana ne batismo wetu?

¹¹ Muludiki wetu udi mupuangane. Kadi bantu badiye mufile bu mapa aba ki mbapuangane to. Imue misangu badi mua kuenza bilema. Kadi bidi bia mushinga bua tuetu kushala balamate ku malu a Kristo bu mudiye mualongolole. Bushuwa, kuikala ne nsombelu udi uleja ne: tudi badilambule ne batambule kudi kuleja ne: tudi tuitaba bukokeshi bua kulombola tshisumbu budi nabu badibu batekamu kudi nyuma ne tudi kabidi basue kubukokela. Batismo utudi tuangata ‘mu dîna dia nyuma muimpe’ udi dijikula dietu patoke dia se: tudi bamanye tshidi nyuma muimpe ne tudi tuanyisha mudimu udiye ukuata mu malu atu Yehowa ulongolola bua kuenza. (Matayo 28:19) Batismo eu udi uleja ne: tudi tukuatshishangana ne nyuma muimpe, katuena tuenza malu adi mua  kumunyemesha kule ne bayidi ba Kristo to. Bu mudi nyuma muimpe ukuata mudimu munene mu disungula ne diteka dia bakulu, tudi mua kuamba ne: tudi ne lulamatu ku didilambula dietu patudi tupanga kumvuangana ne bakulu badi mu tshisumbu anyi?

12. Mbilejilu kayi bia dibenga kunemeka bulombodi bidi Yuda utela, ne bidi bitulongesha tshinyi?

¹² Mu Mukanda wa Nzambi mudi bilejilu bidi bitulongesha mushinga udi nawu butumike ne dikokela. Muyidi Yuda wakatela bilejilu bisatu bijima bia didimuija wakula bua bantu bavua bapetula balume bavuabu bateke mu tshisumbu, e kuambaye ne: ‘Mulawu wikale kudibu; bualu bua bakaya mu njila wa Kana, bakadiela lukasa mu dipambuka dia Belama bua difutu, bakajimina mu ditomboka dia Kola.’ (Yuda 11) Kana wakalengulula mubelu wakamupesha Yehowa ne dinanga dionso ne kusankaye bua kulama lukinu luvuaye nalu luakamufikisha too ne ku dishipangana. (Genese 4:4-8) Nansha muakadimuijabu Belama misangu ne misangu, wakakeba bua kuela bantu ba Nzambi mulawu bua kumupeshabu difutu. (Nomba 22:5-28, 32-34; Dutelenome 23:5) Kola uvua ne muaba munene mu Isalele, kadi muaba au kauvua umusankisha to. Wakatombokela Mose musadidi wa Nzambi, muntu uvua mutambe bantu bonso ba pa buloba ku bupuekele. (Nomba 12:3; 16:1-3, 32, 33) Kana, Belama ne Kola bakapeta diakabi. Bilejilu ebi bidi bitulongesha bimpe ne: tudi ne bua kuteleja mibelu ya badi Yehowa muteke bua kulombola ne kubanemeka.

13. Mmabenesha kayi avua Yeshaya mumanyishe bua badi bakokela bakulu?

¹³ Nnganyi udi mua kubenga diambuluisha didi difumina ku ndongoluelu munene wa butangidi udi Muludiki wetu muteke mu tshisumbu tshia bena Kristo? Muprofete Yeshaya wakamanyisha mabenesha adi ndongoluelu eu ufila ne: ‘Monayi, mukalenge neakokeshe mu buakane, ne bakokeshi nebakokeshe mu kulumbulula kuakane. Muntu [yonso] neikale bu tshisokomenu ku tshipepele, ne tshinyemenu tshia ku tshipupu, neikale bu misulu ya mâyi mu muaba muume, bu  dileji dia dibue dinene mu buloba budi butondesha bantu.’ (Yeshaya 32:1, 2) Mukulu yonso udi ne bua kuikala “muaba” wa tshisokomenu ne bukubi nunku. Nansha dikokela bantu badi balombola dikale bualu bukole kutudi, tuenzayi muetu muonso bua kuikala tutumikila ne tukokela bulombodi budi Nzambi muteke mu tshisumbu.

Mushindu udi bakulu bakokela bulombodi bua Kristo

14, 15. Mmunyi mudi aba badi balombola mu tshisumbu baleja ne: badi bakokela buludiki bua Kristo?

¹⁴ Bena Kristo bonso, nangananga bakulu badi ne bua kulonda buludiki bua Kristo. Batangidi anyi bakulu badiku ne ndambu wa bukokeshi mu tshisumbu. Kadi kabatu bajinga bua kuikala ‘bakokeshi ba ditabuja dia bena Kristo nabu,’ bakeba bua kulondolola nsombelu wabu yonso to. (2 Kolinto 1:24) Bakulu batu batumikila mêyi a Yezu aa: ‘Nudi bamanye ne: bamfumu ba bisamba badi babitumina dîyi dia bumfumu ne bantu banene badi babaleja bukokeshi buabu. Kadi bualu ebu kabuena ne bua kuenzeka nunku munkatshi muenu.’ (Matayo 20:25-27) Padi bakulu bakumbaja mudimu wabu, badi badienzeja bua kusadila bakuabu ne muoyo umue.

¹⁵ Badi babela bena Kristo ne: ‘Nuvuluke [badi banulombola], nuela meji a nshikidilu wa tshikadilu tshimpe tshia mioyo yabu, nuidikje ditabuja diabu.’ (Ebelu 13:7) Kabena bamba bua kuidikija bakulu bualu badi balombola to. Yezu wakamba ne: “Wenu Muludiki udi anu umue, ke Kristo.” (Matayo 23:10, MMM) Ditabuja dia bakulu ke didi bena Kristo ne bua kuidikija, bualu badi bidikiji ba Mulombodi wetu mulelela, Kristo. (1 Kolinto 11:1) Tangila imue mishindu idi bakulu badienzeja bua kuidikija Kristo mu malanda abu ne bakuabu mu tshisumbu.

16. Nansha muvua Yezu ne bukokeshi, mmunyi muvuaye usomba ne bayidi bende?

¹⁶ Nansha muvua Yezu ku mutu kua bantu bapange bupuangane mu mishindu yonso ne muikale ne bukokeshi kabuyi kuelekeja bua kudi Tatuende, uvua wenzela bayidi bende malu ne bupuekele buonso. Kakatondesha bavua bamuteleja ne mêyi a kubakemesha nawu bua kubaleja dimanya divuaye nadi to. Yezu uvua umvuila bayidi bende ne ubafua luse, wangata majinga abu a ku mubidi ne mushinga. (Matayo 15:32; 26:40, 41; Mâko 6:31) Kavua wambila bayidi bende bua kuenza malu mapitshidile pa avuabu mua kuenza, anyi ubalomba malu avuabu kabayi mua kukumbaja nansha. (Yone 16:12) Yezu uvua “mupole malu ne muena bupuekele mu muoyo.” Nunku kabiena bikemesha bua muvua bantu ba bungi bamuangata bu muntu uvua ubapesha dikisha nansha.​—Matayo 11:28-30, MMM.

17. Mmunyi mudi bakulu mua kuleja bupuekele bua Kristo mu nsombelu wabu ne bakuabu mu tshisumbu?

¹⁷ Bikala Kristo Muludiki muenze malu ne bupuekele, aba badi balombola mu tshisumbu kabena ne bua kutamba kuikala ne bupuekele anyi? Bulelela, badi ne bua kuenza muabu muonso bua kubenga kunyanga ngenzelu wabu wa mudimu wa bulombodi udibu babapeshe. Ne kabena ‘balua ne miaku ya budiambi’ bakeba bua kukemesha bantu to. (1 Kolinto 2:1, 2, MMM) Kadi badi benza muabu muonso bua kupatula mêyi mapepele a bulelela a mu Mukanda wa Nzambi mudibi bikengela. Bakulu badi kabidi badienzeja bua kubenga kuikala ne dîsu dipite bukole mu malu adibu bajinga bua bakuabu benze ne bua kuangata majinga abu ne mushinga. (Filipoi 4:5) Bu mudi bakulu bamanye bimpe ne: bantu bonso batu ne bilema, batu bumvuila bana babu bena Kristo, babaleja dinanga. (1 Petelo 4:8) Nenku tuambe ne: bakulu badi bapole malu ne bena bupuekele kabenaku batupesha dikisha anyi? Menemene.

18. Mushindu uvua Yezu usomba ne bana udi mua kulongesha bakulu tshinyi?

¹⁸ Yezu uvua muntu uvuabu bakuatshila bualu  nansha kudi bantu bashadile. Tangila tshiakambaye pakatandisha bayidi bende bantu bavua “balua ne bana bakese kudiye.” Yezu wakamba ne: ‘Nuitabuje bua bana bakese kulua kundi, kanubakandi.’ Pashishe ‘yeye wakabambula mu maboko ende, wakabasankisha, wakabalenga bianza.’ (Mâko 10:13-16) Yezu uvua muntu wa musangelu ne muena bulenga, bantu bavua basanka bua kuya kudiye. Bantu kabavua batshina Yezu to. Too ne bana bavua badiumvua bimpe pavuabu nende. Bakulu badi kabidi bantu ba kukuatshila bualu, ne bobu bikale bantu ba musangelu wa dinanga ne malu malenga, bakuabu, nansha bana, badi badiumvua bimpe padibu nabu.

19. Kuikala ne ‘meji a Kristo’ kudi kumvuija tshinyi, ne bidi bilomba kuenza tshinyi?

¹⁹ Bakulu badi mua kuidikija Yezu Kristo bilondeshile mushindu udibu bamumanye. Paulo wakakonka ne: ‘Mmuntu kayi udi mumanye meji a Mukalenge bua kumuyisha yeye?’ Kusakidilaye ne: ‘Kadi tuetu tudi ne meji a Kristo.’ (1 Kolinto 2:16) Kuikala ne meji a Kristo kudi kumvuija kumanya ngelelu wende wa meji ne bitupa bionso bia bumuntu buende bua tuetu kumanya tshivuaye mua kuenza mu nsombelu kampanda anyi kansanga. Kumanya Muludiki wetu bimpe menemene ki mbualu bua mushinga mukole anyi? Bulelela, bua kumumanya nunku, tudi ne bua kuteya ntema mikole ku malu adi malonda mu Evanjeliyo ne kuikala ne tshibidilu tshia kuuja meji etu ne dimanya dia malu a nsombelu wa Yezu ne tshilejilu tshiende. Padi bakulu badienzeja bua kulonda buludiki bua Kristo mushindu’eu, bakuabu badi mu tshisumbu badi balua kupeta dijinga dikole dia kuidikija ditabuja diabu. Nunku bakulu badi basanka padibu bamona bakuabu benda mu makasa a Mulombodi wabu ne disanka.

Tutungunukayi ne kukokela bulombodi bua Kristo

20, 21. Bu mutudi batangile ku bulongolodi bupiabupia budibu batulaye, tudi ne bua kuikala ne dipangadika kayi?

²⁰ Bidi bikengela bua tuetu bonso kutungunuka ne kukokela buludiki bua Kristo. Bu mutudi tuenda tusemena ku nshikidilu wa tshikondo etshi, tudi anu bu bena Isalele pavuabu mu Mpata ya Moaba mu 1473 K.B.B. Bakavua bamba kubuela mu Buloba Bulaya; ke Nzambi kuamba mukana mua muprofete Mose ne: ‘Wewe [Yoshua] uyaya ne bantu aba mu buloba buakalaya Yehowa batatu babu bua kubapabu.’ (Dutelonome 31:7, 8) Yoshua uvua muludiki uvuabu bateke. Bua bena Isalele kubuela mu Buloba Bulaya, bavua ne bua kukokela buludiki bua Yoshua.

²¹ Bible udi utuambila ne: “Mulombodi udi anu umue, ke Kristo.” Anu Kristo ke watulombola too ne mu bulongolodi bupiabupia muikale buakane ne bua kujalama. (2 Petelo 3:13) Nunku tuikale badisuike bua kukokela bulombodi buende mu malu onso.

[Mêyi adi kuinshi]

Udi muvuluke anyi?

• Mmunyi muvua Kristo mulombole tshisumbu tshia kumpala?

• Mmunyi mudi Kristo ulombola tshisumbu tshiende lelu?

• Bua tshinyi tudi ne bua kukokela badi balombola tshisumbu?

• Mmu mishindu kayi mudi bakulu mua kuleja ne: Kristo udi Mulombodi wabu?

[Nkonko ya dilonga]

[Tshimfuanyi mu dibeji 15]

Kristo udi ulombola tshisumbu tshiende ne batangidi badi mu tshianza tshiende tshia balume

[Bimfuanyi mu dibeji 16]

‘Nutumikile badi banulombola, nubakokele’

[Tshimfuanyi mu dibeji 18]

Yezu uvua muntu wa musangelu ne wa kukuatshila bualu. Bakulu bena Kristo badi badienzeja bua kumuidikija