Nkonko ya babadi

Dipanga bupuangane dia nsonga Mariya patshivuaye kamama diakambulukila Yezu pakimitshibuaye anyi?

Pa bidi bitangila ‘Kuledibua kua Yezu,’ muyuki mufundisha ku nyuma wa Nzambi udi wamba ne: ‘Pakadi baba wende Mariya mubangila kudi Yosefe, diambedi kabayi banji kulua popamue, bakamusangana muimitshisha difu kudi nyuma muimpe.’ (Matayo 1:18) Bulelela, nyuma wa Nzambi wakakuata mudimu munene bua difu dia Mariya.

Kadi netuambe tshinyi bua Mariya? Diyi diende dia bukaji diakambuluisha bua yeye kuimitaye anyi? Bilondeshile malu avua Nzambi mulaye bankambua ba Mariya (Abalahama, Isaka, Yakoba, Yuda ne Mukalenge Davidi), muana uvua ne bua kuledibua uvua ne bua kuikala ndelanganyi wabu mulelela. (Genese 22:18; 26:24; 28:10-14; 49:10; 2 Samuele 7:16) Mmushindu mukuabu kayi uvua muana mulela kudi Mariya mua kuikala mupianyi mulelela wa malaya a Nzambi au? Tshivuabi, uvua ne bua kuikala muana mulelela wa Mariya.​—Luka 3:23-34.

Muanjelu wa Yehowa ukavua mumuenekele nsonga Mariya patshivuaye kamama, ne kumuambilaye ne: ‘Mariya, kutshinyi; wewe wakusangana luse kudi Nzambi. Mona, wewe newimite difu, neulele muana mulume, neumuidike ne: Yezu.’ (Luka 1:30, 31) Bua mukaji kuimita bitu bilomba bua diyi diende dia munda disangile ne lutete lua mâyi a mulume. Bidi bimueneka ne: Yehowa Nzambi wakenza bua diyi dia munda mua Mariya dimite pakumbushaye muoyo wa Muanende umuepele mulela mu diulu ne kuutumaye pa buloba.​—Galatia 4:4.

Muana uvua muimitshibue mushindu’eu kudi mukaji mupange bupuangane uvuaku mua kuikala mupuangane ne kayi ne mpekatu mu mubidi wende anyi? Mmunyi mutu mikenji ya dipiana ngikadilu yenza mudimu padiku disangila dia tshidi tshipuangane ne tshidi tshipange bupuangane? Ikala mumanye ne: nyuma muimpe ke uvua Nzambi muenze nende mudimu bua kutentemuna bukole bua muoyo mupuangane wa Muana wa Nzambi ne kuimitshisha Mariya difu. Nyuma eu wakumbusha dipanga bupuangane dionso divua mu diyi dia munda mua Mariya, ne kupatulaye tshintu tshipuangane kubangila anu ku ntuadijilu kua diyi adi.

Nansha biobi bikale munyi, tudi ne bua kuikala batuishibue ne: bukole bua nyuma muimpe wa Nzambi mu tshikondo atshi buakenza bua se: tshivua Nzambi mulongolole tshikumbana bimpe menemene. Muanjelu Gabaliele ukavua mumvuije Mariya ne: ‘Nyuma muimpe nealue kuudi, ne bukole bua udi Mutambe Bunene wa mu diulu nebukubuikile bu ditutu; nebidike muana wa tshijila uwalela ne: Muana wa Nzambi.’ (Luka 1:35) Bushuwa, nyuma wa Nzambi wakenza anu bu uvua muibake tshimanu bua se: dipanga bupuangane anyi tshintu tshibi katshinyangi dikola dia muana eu munda mua mamuende to.

Kakuyi mpata, muoyo mupuangane wa Yezu wa bumuntu uvua mufumine kudi Tatuende wa mu diulu, ki nkudi muntu to. Yehowa ‘wakamulongoluela mubidi,’ ne kubangila anu ku dimitshibua diende, Yezu ‘kavua mubipe [to], [uvua] mutapuluke kudi bantu babi.’​—Ebelu 7:26; 10:5.

[Tshimfuanyi mu dibeji 19]

“Wewe newimite difu, neulele muana mulume”