Nkuepi kutudi mua kupetela bulombodi buimpe?

BIBLE udi wamba ne: ‘Nzubu yonso udi muibakibue kudi [muntu], kadi wakibaka bintu bionso n’Nzambi.’ (Ebelu 3:4; Buakabuluibua 4:11) Bu mudi Yehowa Nzambi mulelela muikale Mufuki wetu, udi “mumanye buntu buetu.” (Musambu 103:14) Mmumanye mikalu yetu ne majinga etu bimpe bitambe. Bu mudiye kabidi Nzambi wa dinanga, mmusue kutukumbajila majinga aa. (Misambu 145:16; 1 Yone 4:8) Ne kêna upua muoyo bua dijinga ditudi nadi dia bulombodi anyi buludiki buimpe nansha.

Yehowa wakamanyisha mukana mua muprofete Yeshaya ne: ‘Monayi, ngakamusungula bu mumanyi wanyi kudi bantu, bu [mulombodi] wabu ne kapitene ka bantu.’ (Yeshaya 55:4) Bidi bikengela kumanya Muludiki eu udibu bateke kudi Wa-Bukole-Buonso nkayende ne kuitaba bulombodi buende bua kushisha kufika ku bipeta bimpe. Kadi Mulombodi ne Kapitene uvuabu badianjile kumanyisha eu nnganyi? Mmalu kayi adi aleja ne: udi Mulombodi mukumbane? Neatulombole penyi? Ntshinyi tshitudi ne bua kuenza bua buludiki buende kutuambuluisha?

Mulombodi uvuabu balaye udi ufika

Kukadi bidimu bu 2 500 mpindieu katshia muanjelu Gabaliele wamuenekela muprofete Danyele ne wamuambila ne: ‘Umanye, ujingulule  ne: dîba diakapatuka mukenji ne: Bapingaje bantu mu Yelushalema ne base musoko tshiakabidi, too ne ku difika dia muntu muedibue manyi pa mutu, mukokeshi [anyi Masiya Mulombodi] mene, mbingu muanda-mutekete neyipite. Pashishe, mu mbingu makumi asambombo ne ibidi, nebase musoko tshiakabidi, muikale ne muaba munene bu wa tshisalu ne misesu; tshikondo etshi netshikale tshia ntatu mene.’​—Danyele 9:25.

Apa muanjelu eu uvua umanyisha Danyele tshikondo menemene tshivua Mulombodi musungula kudi Yehowa ne bua kulua. “Masiya Mulombodi” uvua ne bua kulua ku ndekelu kua mbingu 69, peshi bidimu 483 bibala kutuadijila mu 455 K.B.B. pakafilabu dîyi dia kuasulula Yelushalema. * (Nehemiya 2:1-8) Ntshinyi tshiakenzeka ku ndekelu kua tshikondo atshi? Luka udi wamba mu Evanjeliyo wende ne: ‘Mu tshidimu tshia dikumi ne tshitanu tshia bumfumu bua Tibelio Kaisa, pakadi Ponto Pilato ngovena wa Yudaya, ne pakadi Helode mulopo wa Galela [mu 29 B.B.]. Dîyi dia Nzambi diakalua kudi Yone, muana wa Zakâya, mu tshipela. Yeye wakalua mu luseke luonso luakadi pabuipi ne Yadene, wenda wambila bantu bualu bua dibatiza dia kukudimuna kua mitshima bua mibi yabu ijimijibue.’ Tshikondo atshi, bantu ‘bakadi batekemena’ Masiya Mulombodi. (Luka 3:1-3, 15) Nansha muakalua bantu kudi Yone, yeye kavua Mulombodi au to.

Bu mu ngondo wa Kasuamansense wa tshidimu tshia 29 B.B. nanku, Yezu wa mu Nazaleta wakalua kudi Yone bua kutambula. Kabidi Yone wakajadika wamba ne: ‘Ngakumona nyuma upueka mu diulu bu nyunyu wa nkutshi, wakumuikila. Tshiakumumanya; kadi wakantuma bua kubatiza bantu mu mâyi wakungambila ne: Muntu uwatangila nyuma upuekela pambidi pende, mumuikile, yeye nguabatiza bantu mu nyuma muimpe. Ngakumona bualu ebu, ne ngakumanyisha bantu ne: Eu udi muana wa Nzambi.’ (Yone 1:32-34) Pakatambula Yezu, wakalua Mulombodi muela manyi, tuambe ne: Masiya peshi Kristo.

Bushuwa, “mulombodi ne kapitene ka bantu” uvuabu balaye au uvua Yezu Kristo. Nansha patudi tukonkonona ngikadilu idiye nayi ya bulombodi, tudi tumona diakamue ne: yeye ke mulombodi udi kule ne kule mupite bakuabu bonso badibu bangata lelu bu badi bakumbaje malu malomba bua kuikala balombodi bajalame.

Masiya ke Mulombodi mujalame

Mulombodi mulenga utu ufila buludiki bumueneke ne wambuluisha bantu bende bua kuikala ne makanda ne kumanya mua kujikija ntatu yabu bipepele. Mukanda mukuabu udi wamba ne: ‘Ebu ke bualu bua mushinga budi muludiki wa nsongo wa mu lukama lua bidimu lua 21 ne bua kukumbaja.’ (21st Century Leadership: Dialogues With 100 Top Leaders.) Bulelela, Yezu uvua mumanye mua kulongesha bantu biakane bua muvuabu mua kupita ne malu a ku dituku ne ku dituku! Anji tangila anu muyiki wende muende lumu: Muyiki wa pa Mukuna. Mêyi adi mu Matayo nshapita 5 too ne wa 7 adi muwule tente ne mibelu ya mushinga.

Tshilejilu, tangilabi mubelu wakafila Yezu pa mushindu wa bantu kujikija bilumbu. Wakamba ne: ‘Pautshidi ufila kupa kuebe ku tshishipelu ne biwavuluka ne: Muanetu udi nanyi bualu, ushiye kupa kuebe kumpala kua tshishipelu, uye biebe, ulengeje nende; pashishe ulue, ufile kupa kuebe.’ (Matayo 5:23, 24) Kudianjila kukeba ditalala ne bakuebe kudi kuangata muaba wa kumpala mu malu onso kupita mene ne dienza dia mudimu kampanda mu tshitendelelu, bu muvua difila dia milambu pa tshioshelu tshia mu ntempelo mu Yelushalema divuabu balombe mu Mikenji ya Mose. Tuetu katuyi bikale tuenza nanku, Nzambi kakuanyisha bitudi tuenza mu ntendelelu wende to. Nansha mukadi bidimu nkama ne nkama bimane kupita, mubelu wa Yezu eu utshidi anu ne mushinga lelu.

Yezu wakambuluisha kabidi bantu bua kuepuka tshiendenda. Wakabadimuija ne: ‘Nuakumvua dîyi diakambabu ne: Kuendi masandi; kadi meme ndi nnuambila ne: muntu yonso udi utangila mukaji ne lukuka lua masandi wakumana kuenda nende masandi mu mutshima wende.’ (Matayo 5:27, 28) Didimuija edi kadivua dikumbanyine anyi? Bua tshinyi kulama meji mabi mu mitu yetu kudi mua kutufikisha ku dienda masandi? Yezu wakamba ne: masandi ne tshiendenda bidi bifumina mu mutshima. (Matayo 15:18, 19)  Mbitambe buimpe bua tuetu kukuba mutshima wetu.​—Nsumuinu 4:23.

Muyiki wa pa Mukuna udi kabidi ne mubelu mutambe buimpe wa kunanga bena lukuna betu, kuambuluishangana ne bintu, kuikala ne mmuenenu muakane bua bintu bia mubidi ne bia mu nyuma, ne bua malu makuabu. (Matayo 5:43-47; 6:1-4, 19-21, 24-34) Yezu wakalongesha bantu too ne mushindu wa kusambilabu bua kulomba Nzambi diambuluisha. (Matayo 6:9-13) Masiya Mulombodi udi ukolesha balongi bende ne ubalongolola bua kumanyabu mua kupita ne ntatu idi ikuatakuata bantu bonso.

Misangu isambombo mijima mu Muyiki wa pa Mukuna, Yezu udi ubanga ne mêyi a se: ‘Nuenu nuakumvua dîyi diakambabu ne,’ peshi ‘bakamba kabidi ne,’ kadi ulua kufila kabidi lungenyi lukuabu wamba ne: ‘Kadi meme ndi nnuambila ne.’ (Matayo 5:21, 22, 27, 28, 31-34, 38, 39, 43, 44) Abi bidi bileja ne: bantu bavuaye ulongesha abu bavua ne tshilele tshia kuenza malu munga mushindu, balonda malongesha a mukana a bilele bia Bafalese. Kadi dîba adi Yezu uvua ubaleja mushindu mukuabu wa kuenza malu uvua upetangana mu bulelela ne tshivua Mikenji ya Mose yamba. Mushindu au ke wakatuadijaye kushintulula malu; wakenza nanku mu mushindu mupepele uvua balongi bende mua kuitaba malu aa kakuyi lutatu. Bulelela, Yezu wakasaka bantu bua kushintulukabu bikole mu nsombelu, mu nyuma ne kabidi kubasaka bua kushintulula bikadilu biabu. Etshi ntshimue tshimanyinu tshia mulombodi wa bushuwa.

Mukanda mukuabu udi wakula bua malu a buludiki udi uleja mudibi bikole bua kushintulula malu mushindu’eu. Udi wamba ne: “Bidi bikengela bua [Mulombodi] udi ushintuluisha malu ikale ne muoyo wa muena mudimu udi wambuluisha bantu, ne busunguluji bu bua mulongi wa malu adi mu ngenyi ya bantu, ikale ne muoyo mukole bu wa munyemi wa lubilu, dinanukila bu dia mbua wa tshilembi, mudikolele bu tshiasa-nkaya, ne muikale ne lutulu lua buena lua munsantu. Kadi, nansha muntu muikale ne ngikadilu yonso eyi, mbikole bua kushintuluisha malu.”

Tshiena-bualu tshia mu mukanda mukuabu tshia se: “Ngikadilu idi ne mushinga bua kumona mua kulombola anyi?” tshiakamba ne: “Balombodi badi ne bua kuikala ne bikadilu bidibu basue bua bantu badi babalonda kuikala nabi.” Mu bulelela, mulombodi mulenga udi wenza bidiye ulongesha. Ke muvua Yezu Kristo wenza anyi? Eyowa! Wakalongesha bantu bavua nende bua bikale ne budipuekeshi, kubalejaye ne mu bienzedi muvuabu mua kutumikila dilongesha adi pakaboweshaye mâyi ku makasa. (Yone 13:5-15) Wakatuma balongi bende bua kuyisha lumu luimpe lua Bukalenge bua Nzambi; nunku yeye muine kudifila kabidi ne bukole buende buonso mu mudimu eu. (Matayo 4:18-25; Luka 8:1-3; 9:1-6; 10:1-24; Yone 10:40-42) Yezu uvua kabidi tshilejilu mu malu a dikokela bulombodi. Wakadiamba ne: ‘Muana kêna mumanye mua kudienzela bualu, utu wenza anu budiye umona Tatu wende wenza.’​—Yone 5:19.

Malu avua Yezu muambe ne muenze atudi bamone aa adi aleja patoke se: yeye ke Mulombodi umuepele udi mukumbane. Bushuwa, ngikadilu yende mmipite ngikadilu yonso idi bantu mua kuikala nayi bua kuikala balombodi bimpe. Yezu mmuntu mupuangane. Katshia wapeta bukole bua dibenga kufua panyima pa lufu ne dibika diende, mpindieu udi ne muoyo wa kashidi. (1 Petelo 3:18; Buakabuluibua 1:13-18) Mmulombodi kayi wa bantu udi mua kukumbaja ngikadilu eyi?

Tshia tuetu kuenza ntshinyi?

Bu mudi “Masiya Mulombodi” muikale Mukalenge udi ukokesha mpindieu mu Bukalenge bua Nzambi, neabeneshe bantu bena butumike bonso ne masanka mavule. Mukanda wa Nzambi mmulaye bua bualu ebu ne: ‘Buloba nebuikale buwule tente ne kumanya kua Yehowa, bu mudi mâyi a mu mâyi manene abuikila miaba yawu yonso.’ (Yeshaya 11:9) ‘Badi ne mitshima mipuekele nebapiane buloba, mioyo yabu neyisanke mu ditalala dikumbane.’ (Misambu 37:11) ‘Nebashikame, muntu ne muntu, muinshi mua muonji wende wa tumuma tua nvinyo ne muinshi mua mutshi wende wa nfigi; kakuena muntu wabakuatshisha buôwa.’ (Mika 4:4) ‘Nzambi muine neikale nabu, neikale Nzambi wabu. Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’​—Buakabuluibua 21:3, 4.

 Mbikole bua kupeta mulombodi muimpe pa buloba lelu’eu. Kadi Yezu Kristo udi ulombola bantu bena bupuekele bua kubabueja mu buloba bupiabupia bua ditalala muikala bantu bena butumike mua kusangishibua mu buobumue mu ntendelelu wa Yehowa Nzambi ne kuya batangile ku bupuangane. Nunku bidi ne mushinga wa bungi bua tuetu kudikebela dîba dia kupeta dimanya dia Nzambi mulelela ne Mulombodi wende udiye muteke ne kutumikila dimanya edi!​—Yone 17:3.

Mushindu mutambe buimpe wa kuleja ne: tudi tuanyisha bienzedi bia muntu, nkumuidikija. Nunku katuenaku petu ne bua kuidikija Yezu Kristo Mulombodi mutambe bunene mu malu a miyuki ya bantu anyi? Mmunyi mutudi mua kuenza nanku? Patudi tuitaba bulombodi buende, nsombelu wetu nealue mushindu kayi? Netukonkonone nkonko eyi ne mikuabu mu biena-bualu bibidi bidi bilonda.

[Mêyi adi kuinshi]

[Tshimfuanyi mu dibeji 4]

Danyele wakadianjila kumanyisha dilua dia Mulombodi uvua Nzambi musungule

[Bimfuanyi mu dibeji 7]

Malongesha a Yezu akalongolola bantu bua kumanya mua kupita ne ntatu

[Tshimfuanyi mu dibeji 7]

Yezu nealombole bantu bena butumike mu buloba bupiabupia bua ditalala