Bua tshinyi kutambula batismo?

‘Yayi bienu, nuvuije ba bisamba bionso bayidi, nubabatize.’​—MATAYO 28:19.

1, 2. (a) Mmushindu kayi uvua bamue bantu bafike ku ditambula? (b) Nnkonko kayi idi ijuka pa bidi bitangila batismo?

 MUKALENGE wa ba-Franc Charlemagne wakenzeja ba-Saxon bavuaye mutshimune bua kutambulabu bonso pamue mu 775-777 B.B. Mumanyi wa malu a kale John Lord wakafunda ne: “Wakabenzeja ku bukole bua kubuelabu mu Buena-Kristo bua ku dîna.” Bia muomumue, pavua Vladimir I (mfumu wa tshimue tshitupa tshia buloba bua ditunga dia Russie) musele muana wa mukalenge muena mu ekeleziya wa Ortodokse wa bena Grèce mu 987, wakangata dipangadika dia se: bantu bende balue pabu bantu bavuabu babikila bu bena Kristo. Wakela mukenji bua bantu bende kutambulabu bisumbu bisumbu, ukana bua kushipa aba bavua kabayi basue kutambula.

² Batismo ya mushindu’eu ivua miakane anyi? Idi ne dimvuija dia dilelela anyi? Mmuntu yonso tshianana udi ne bua kutambula anyi?

Mmushindu kayi udibu batambuisha muntu?

3, 4. Bua tshinyi dimiamina anyi diela mâyi pa mitu ya bantu ki mbatismo udi mukumbanyine bena Kristo?

³ Pavua Charlemagne ne Vladimir I batambuishishe bantu ku bukole, bamfumu aba kabavua balonde tshidi Dîyi dia Nzambi diamba to. Bushuwa, kakuena diambuluisha nansha dikese padibu bamiamina anyi bapongoluela bantu mâyi pa mutu bua kubatambuisha, peshi padibu batambuisha bantu badibu kabayi balongeshe bulelela bua mu Bible nansha.

⁴ Tangila tshiakenzeka pakaya Yezu wa mu Nazaleta kudi Yone Mubatiji mu 29 B.B. Yone uvua ubatiza bantu mu Musulu wa Yadene. Bantu bavua badiluilua nkayabu kudiye bua abatambuishe. Uvuaku ubambila bua kuimana patupu mu Musulu wa Yadene bua yeye kubela ndambu wa mâyi pa mitu anyi kubamiaminawu anyi? Ntshinyi tshiakenzeka pavua Yone mubatize Yezu? Matayo udi wamba ne: kunyima kua bamane kubatiza Yezu, “wakapatuka [peshi kujuka] mu mayi.” (Matayo 3:16, MML) Uvua muinshi mua mâyi, bualu bavua bamuine mu Musulu wa Yadene. Bia muomumue, bakatambuisha muntu mutungula wa mu Atiopa uvua musue malu a Nzambi mu ‘mâyi.’ Bavua dijinga ne mâyi a buena aa bualu pakatambuishabu  Yezu nansha bayidi bende, bavua bine mibidi yabu mijima mu mâyi.​—Bienzedi 8:36.

5. Mmunyi muvua bena Kristo ba kumpala babatiza bantu?

⁵ Miaku ya mu tshiena-Gelika idibu bakudimune ne: “kubatiza” ne “batismo” peshi mikuabu idi yumvuija kuina, anyi kutua peshi kubueja muinshi mua mâyi. Nkonga-miaku mukuabu udi wamba ne: “Batismo udi umvuija bimpe mu bulelela ne: kuina muntu mu mâyi.” (Smith’s Bible Dictionary) Mu imue Bible batu babikila “Yone Mubatiji” ne: “Yone Muinyanganyi.” (Matayo 3:1, Rotherham; Diaglott Interlinear) Mukanda mukuabu wa Augustus Neander udi wamba ne: “Ku ntuadijilu bavua bina bantu mu mâyi pavuabu bababatiza.” (History of the Christian Religion and Church, During the Three First Centuries) Nkonga-miaku mukuabu muende lumu wa mu Mfualansa udi wamba ne: “Bua bena Kristo ba kumpala kuangatabu batismo bavua babina mu mâyi miaba yonso ivuawu apeteka.” (Larousse du XXe siècle [Paris, 1928]) Tshibungu tshikuabu tshidi tshiamba ne: “Mbia bulelela bua se: mu Ekeleziya wa kumpala bavua bina bantu mu mâyi bua kubatambuisha.” (New Catholic Encyclopedia, 1967, Volume II, dibeji 56) Nunku lelu, batismo bu mudi wa mu Bantemu ba Yehowa mbualu budi yonso wa kudibu uditabila ku budisuile bua kumuinabu yeye mujima mu mâyi.

Tshipatshila tshipiatshipia tshia batismo

6, 7. (a) Yone uvua ubatiza bantu ne kipatshila kayi? (b) Mbualu kayi buvua bupiabupia mu batismo wa bayidi ba Yezu?

⁶ Tshipatshila tshia batismo wa Yone tshivua tshishilangane ne tshia batismo wa bayidi ba Yezu. (Yone 4:1, 2) Yone uvua ubatiza bantu bua kuleja dinyingalala diabu patoke bua mpekatu ivuabu benze mu dishipa Mikenji ya Mose. * (Luka 3:3) Kadi kuvua bualu kampanda bupiabupia mu batismo wa bayidi ba Yezu. Mu Pentekoste wa 33 B.B., mupostolo Petelo wakabela bantu ne: ‘Kudimunayi mitshima yenu, nubatijibue buonso buenu mu dîna dia Yezu Kristo bua [kunubuikidilabu] mibi yenu.’ (Bienzedi 2:37-41) Nansha muvua bantu bavua Petelo ubela aba bikale bena Yuda ne benyi bavua balonda malongesha a Buena-Yuda, Petelo kavua wakula bua batismo uvua uleja dinyingalala diabu bua mpekatu ivuabu benze mu dishipa Mikenji ya Mose to; peshi kavua usua kuamba ne: kubatijibua mu dîna dia Yezu kuvua kumvuija diumbusha dia mpekatu nansha.​—Bienzedi 2:10.

⁷ Dituku adi, Petelo wakenza mudimu ne “nsapi [ya kumpala] ya bukalenge.” Bua kuenza nayi tshinyi? Bua kupetesha bantu bavua bamuteleja dimanya dia mushindu uvuabu mua kubuela mu Bukalenge bua mu diulu. (Matayo 16:19, Mukanda wa Mvidi Mukulu [Katolike, MMM]) Bu muvua bena Yuda babenge kuitaba ne: Yezu uvua Masiya, kunyingalala ne kumuitabuja kuvua bualu bupiabupia buvua bukengedibua bua Nzambi kubafuilaye luse. Bavua mua kuleja ditabuja edi patoke pavuabu babina mu mâyi mu dîna dia Yezu Kristo. Mushindu’au ke uvuabu mua kuleja ne: bavua badilambule kudi Nzambi ku butuangaji bua Kristo. Bonso badi bajinga bua Nzambi kubanyishaye lelu badi ne bua kuikala ne ditabuja dia muomumue, badi ne bua kudilambula kudi Yehowa Nzambi, ne kuangata batismo wa bena Kristo bua kuleja ne: mbadilambule ne muoyo mujima kudi Nzambi Mutambe Bunene.

Dimanya dijalame didi ne mushinga

8. Bua tshinyi ki muntu yonso tshianana tshianana udi ne bua kuangata batismo wa bena Kristo?

⁸ Batismo wa bena Kristo kabatu bamuangata kudi muntu yonso tshianana tshianana to. Yezu wakatumina bayidi bende dîyi ne: ‘Yayi bienu, nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe; nubayishe mua kuenza malu onso angakanuambila.’ (Matayo 28:19, 20) Kumpala kua bantu kutambula, badi ne bua ‘kubalongesha mua kuenza malu onso avua Yezu muambile bayidi bende.’ Ke bualu kayi batismo ya ku bukole ya bantu badi kabayi ne ditabuja dishindamene pa dimanya dijalame dia Dîyi dia Nzambi kayena ne mushinga to ne kayena ipetangana ne mudimu uvua Yezu mupeshe bayidi bende balelela nansha.​—Ebelu 11:6.

9. Kutambula ‘mu dîna dia Tatu’ kudi kumvuija tshinyi?

⁹ Kutambula ‘mu dîna dia Tatu’ kudi kumvuija tshinyi? Kudi kumvuija ne: muntu udi utambula mmuitabe muanzu ne bukokeshi bidi nabi Tatu wetu wa mu diulu. Udi witaba ne: Yehowa Nzambi  udi Mufuki wetu, ‘Mutambe Bunene wa pa mutu pa buloba bujima’ ne Mukalenge Mutambe Bunene.​—Musambu 83:18; Yeshaya 40:28; Bienzedi 4:24.

10. Kutambula ‘mu dîna dia Muana’ kudi kumvuija tshinyi?

¹⁰ Kutambula ‘mu dîna dia Muana’ kudi kumvuija kuitaba muanzu ne bukokeshi bidi nabi Yezu bu Muana umuepele mulela wa Nzambi. (1 Yone 4:9) Bantu badi bakumbaje malu malomba bua kutambula badi bitaba Yezu bu muntu udi Nzambi mutume bua kufilaye ‘muoyo wende bua kupikula nawu bantu ba bungi.’ (Matayo 20:28; 1 Timote 2:5, 6) Bantu badi bajinga kutambula badi ne bua kuitaba kabidi ne: ‘Nzambi mmumubandishe kulu kule.’​—Filipoi 2:8-11; Buakabuluibua 19:16.

11. Kutambula ‘mu dîna dia nyuma muimpe’ kudi kumvuija tshinyi?

¹¹ Kutambula ‘mu dîna dia nyuma muimpe’ kudi kumvuija tshinyi? Ebi bidi bileja ne: bantu badi batambula badi bitaba ne: nyuma muimpe mbukole buenzeji bua Yehowa budiye ukuata nabu mudimu mu mishindu ya bungi bua kukumbaja disua diende. (Genese 1:2; 2 Samuele 23:1, 2; 2 Petelo 1:21) Aba badi bakumbaja malu malomba bua kutambula badi bitaba ne: nyuma muimpe udi ubambuluisha bua kumvua “malu male a Nzambi,” bua kuenza mudimu wa diyisha Bukalenge, ne bua kuleja mamuma a nyuma adi mikale “dinanga, disanka, ditalala, lutulu, bulenga, buimpe, ditabuja, bupuekele, didikanda.”​—1 Kolinto 2:10; Galatia 5:22, 23, NW; Yoele 2:28, 29.

Mushinga udi nawu dinyingalala ne dikudimuna mutshima

12. Ndiumvuangana kayi didi pankatshi pa batismo wa bena Kristo ne dinyingalala?

¹² Pa kumbusha batismo wa Yezu uvua kayi ne mpekatu, batismo mbualu budi Nzambi wanyisha budi buleja dinyingalala dia muntu. Patudi tunyingalala nunku tudi tuleja ne: tudi ne dibungama dia bungi bua bualu kampanda butudi benze anyi butudi bapangile bua kuenza. Bena Yuda ba mu bidimu lukama bia kumpala bavua basue kusankisha Nzambi bavua ne bua kunyingalala bua mpekatu ivuabu benzele Kristo. (Bienzedi 3:11-19) Bamue bena Kristo ba bisamba bia bende ba mu Kolinto bakanyingalala bua masandi, ditendelela mpingu, buivi ne bua mpekatu mikuabu minene ivuabu benze. Bua dinyingalala diabu, ‘bakavuwibua’ mu mashi a Yezu; ‘bakajidibua’ anyi kutekibua pa bule bua kusadila Nzambi; ne ‘bakabingishibua’ mu dîna dia Kristo ne mu nyuma wa Nzambi. (1 Kolinto 6:9-11) Dinyingalala ntshidia tshia mushinga mukole tshidi tshifikisha muntu ku dipeta kuondo ka muoyo kimpe ne disulakana dia kudi Nzambi bua dipila dia mpekatu.​—1 Petelo 3:21.

13. Pa bidi bitangila batismo, dikudimuna mutshima didi diumvuija tshinyi?

¹³ Kumpala kua tuetu kutambula ne kulua Bantemu ba Yehowa, tudi ne bua kuanji kukudimuna mutshima wetu. Dikudimuna mutshima mbualu budi muntu udi muangate dipangadika ne muoyo mujima bua kulonda Kristo Yezu udienzela ku budisuile. Bantu badi benza nunku badi balekela bikadilu biabu bibi bia kale ne bapangadika bua kuenza malu adi mimpe ku mêsu kua Nzambi. Mu Mukanda wa Nzambi, miaku ya pa muanda ya mu tshiena-Ebelu ne tshiena-Gelika idi diumvuija diayi dipetangana ne dikudimuna dia mutshima idi yumvuija kupingana, kukudimuka. Bidi biumvuija kumbuka ku malu mabi kupingana kudi Nzambi. (1 Bakelenge 8:33, 34) Dishintuluka edi didi ditulomba bua ‘kuenza malu adi makanangane ne dikudimuna dia mutshima.’ (Bienzedi 26:20) Didi ditulomba bua kulekela ntendelelu wa dishima, kutumikila mikenji ya Nzambi ne kutendelela anu Yehowa yeye nkayende. (Dutelonome 30:2, 8-10; 1 Samuele 7:3) Dikudimuna mutshima didi ditufikisha ku dishintulula meji etu, bipatshila bietu ne bumuntu buetu. (Yehezekele 18:31) Tudi ‘tuandamuka’ patudi tulekela ngikadilu mibi ne tuvuala bumuntu bupiabupia.​—Bienzedi 3:19; Efeso 4:20-24; Kolosai 3:5-14.

Didilambula kudi Nzambi ne muoyo mujima didi ne mushinga wa bungi

14. Didilambula dia bayidi ba Yezu didi diumvuija tshinyi?

¹⁴ Kumpala kua bayidi ba Yezu kutambulabu bavua kabidi ne bua kuanji kudilambula kudi Nzambi ne muoyo wabu mujima. Didilambula didi diumvuija diditeka pa bule bua kukumbaja bualu kampanda bua tshijila. Tshidia etshi tshidi ne mushinga wa bungi, ke bualu kayi tudi ne bua kuambila Yehowa mu disambila ne: tudi bangate dipangadika dia kumutendelela amu yeye nkayende tshiendelele. (Dutelonome 5:9) Bushuwa, katuena badilambule ku mudimu anyi kudi muntu kampanda to, kadi tudi badilambule kudi Nzambi nkayende.

15. Bua tshinyi batu bina aba badi batambula mu mâyi?

 ¹⁵ Patudi tudilambula kudi Nzambi mu dîna dia Kristo, tudi tuleja dipangadika dietu dia kuenza disua dia Nzambi mu matuku etu onso a muoyo anu mudi Bible wamba. Bantu badi basue kutambula badi baleja didilambula edi padibu babina mu mâyi anu muvuabu batambuishe Yezu mu Musulu wa Yadene bua kuleja ne: uvua mudifile kudi Nzambi. (Matayo 3:13) Ke bualu kayi Yezu uvua usambila mu tshikondo tshia mushinga mukole atshi.​—Luka 3:21, 22.

16. Mmunyi mutudi mua kuleja disanka dietu mu mushindu muakanyine patudi tumona bantu batambula?

¹⁶ Batismo wa Yezu uvua muanda wa disanka, kadi kauvua muanda wa bilele to. Ke mudi batismo wa bena Kristo lelu kabidi nenku. Patudi tumona bantu baleja patoke didilambula diabu kudi Nzambi, tudi mua kuleja disanka dietu patudi kukuma bikashi ne kanemu ne tubela kalumbandi ne musangelu wonso. Kadi tudi ne bua kuepuka diela mbila ne diela tushiba anyi malu makuabu a buena aa bua kuleja ne: tudi tunemeka dijikula dia ditabuja edi ne tudi tudiangata bu muanda wa tshijila. Nunku tudi tuleja disanka dietu ne bunême buonso.

17, 18. Ntshinyi tshidi tshiambuluisha bua kujadika ne: bantu kampanda mbakumbaje malu malomba bua kutambula?

¹⁷ Bantemu ba Yehowa kabatu benzeja muntu bua kutambulaye bu mudibu benza kudi aba badi bamiamina bana ba tutoto mâyi anyi badi benzeja misumba ya bantu badi kabayi ne dimanya dia mu Bible bua kutambulabu nansha. Kabidi kabatu babatiza bantu badi kabayi bakumbaje malu malomba a mu nyuma to. Kumpala kua muntu kulua nansha muyishi wa lumu luimpe udi kayi muanji kutambula, bakulu bena Kristo badi banji kujadika bikalaye mumanye malongesha a nshindamenu a mu Bible, bikalaye watumikila ne bikalaye witaba “eyowa” padibu bamuela lukonko lua se: “Udi ne dijinga menemene dia kulua Ntemu wa Yehowa anyi?”

¹⁸ Misangu mivule, patu bantu benza mudimu wa kuyisha Bukalenge bikole baleja dijinga dia kutambula, bakulu bena Kristo batu bayikila nabu bua kujadika ne: mbantu badi ne ditabuja bakadi badilambule kudi Yehowa ne bakumbaje malu malomba bua kutambulabu. (Bienzedi 4:4; 18:8) Mandamuna adi yonso wa kudibu ufila a nkonko mipite pa 100 ya malongesha a mu Bible adi ambuluisha bakulu bua kujadika bikala bantu badi bayandamuna bakumbaje malu malomba bua kubinabu mu mâyi. Bamue kabatu bakumbaja malu malomba ne kabatu babanyishila bua kutambula bua kulua bena Kristo to.

Kudiku bualu budi bukukanda anyi?

19. Bilondeshile Yone 6:44, mbanganyi bapiana Bukalenge pamue ne Yezu?

¹⁹ Badi mua kuikala bambile bantu ba bungi badibu batambuisha ku bukole ne: pafuabu nebaye mu diulu. Kadi Yezu wakamba bua bantu badi balonda dikasa diende ne: ‘Kakuena muntu udi mumanye mua kudivuila kundi, bikala Tatu wakuntuma kayi mumukoke.’ (Yone 6:44) Yehowa mmukokele Kristo bantu 144 000 bapiana Bukalenge bua mu diulu ne Yezu. Kadi batismo ya ku bukole kayitu mianji kujidila muntu bua kupetaye muaba wa butumbi wa buena eu mu bukalenge budi Nzambi mulongolole ebu nansha.​—Lomo 8:14-17; 2 Tesalonike 2:13; Buakabuluibua 14:1.

20. Ntshinyi tshidi mua kuambuluisha bamue badi kabayi banji kutambula?

²⁰ Kubangila nangananga munkatshi mua bidimu bia 1930, bantu bisumbu ne bisumbu bikale ne ditekemena dia kupanduka ku “dikenga dinene” ne kupeta muoyo wa tshiendelele pa buloba mbabuele mu tshisumbu tshia “mikoko mikuabo” ya Yezu. (Buakabuluibua 7:9, 14; Yone 10:16) Mbakumbaje malu malomba bua kutambula bualu mbashintulule nsombelu wabu bilondeshile tshidi Dîyi dia Nzambi diamba, ne mbanange Nzambi ne ‘mutshima wabu wonso ne muoyo wonso ne bukole buabu buonso ne lungenyi luabu luonso.’ (Luka 10:25-28) Nansha mudi bamue  bantu bajingulule ne: Bantemu ba Yehowa badi ‘batendelela Nzambi mu nyuma ne mu bulelela,’ kabena banji kulonda tshilejilu tshia Yezu ne batambule bua kuleja patoke ne: mbanange Yehowa tshia bushuwa ne bamutendelela amu yeye nkayende nansha. (Yone 4:23, 24; Dutelonome 4:24; Mâko 1:9-11) Disambila disunguluke dienza ne muoyo mujima bua tshidia etshi tshia mushinga mukole didi mua kubasaka ne kubapesha dikima dia kutumikila Dîyi dia Nzambi bimpe menemene, bua kudilambula kudi Yehowa Nzambi ne muoyo mujima ne pashishe kutambula.

21, 22. Mbua malu kayi budi bamue babengela bua kudilambula kudi Nzambi ne kutambula?

²¹ Bamue badi babenga bua kudilambula ne kutambula bualu mbaditue ne kasuki mu malu a panu anyi mu dikeba dia biuma, ne kabena ne dîba dia bungi dia kuenza malu a mu nyuma to. (Matayo 13:22; 1 Yone 2:15-17) Buobu bashintulule mushindu udibu bamona malu ne bipatshila biabu badi mua kupeta disanka dia bungi. Disemena pabuipi ne Yehowa didi mua kubavuija babanji mu nyuma, kukepesha tunyinganyinga tuabu ne kubapetesha ditalala ne disanka bidi bifumina ku dienza disua dia Nzambi.​—Musambu 16:11; 40:8; Nsumuinu 10:22; Filipoi 4:6, 7.

²² Banga bantu batu bamba ne: mbanange Yehowa kadi kabena badilambula kudiye ne batambula bualu badi bela meji ne: buobu babenge kutambula nanku kabakuikala bena dibanza kudi Nzambi. Pabi yonso wa kutudi udi ne bua kulubuila Nzambi malu. Patukadi anu bamane kumvua dîyi dia Yehowa tukadi bena dibanza kumpala kuende. (Yehezekele 33:7-9; Lomo 14:12) Bu muvua bena Isalele ba kale bikale ‘bantu basungula,’ bavua baledibue mu tshisamba tshivua tshidilambule kudi Yehowa, nunku bavua ne dibanza dia kumusadila ne lulamatu luonso mu diumvuangana ne mêyi ende. (Dutelonome 7:6, 11) Lelu kakuena muntu nansha umue udi muledibue mushindu’eu to, kadi bituikala balonge malu malelela a mu Mukanda wa Nzambi, tudi ne bua kuatumikila ne ditabuja.

23, 24. Mmalu kayi adi bantu kabayi ne bua kudikuatshisha nawu buôwa bua kutambula?

²³ Bamue badi babenga bua kutambula bualu badi bela meji ne: kabena ne dimanya dikumbane to. Pabi, tuetu buonso tudi ne malu a bungi a kulonga bualu ‘bantu kabena bamanye mua kujingulula mudimu wa Nzambi wakenzaye ku tshibangidilu tshia buloba too ne ku nshikidilu kuabu.’ (Muambi 3:11) Angata tshilejilu tshia muntu mutungula wa mu Atiopa. Bu muvuaye ulonda malongesha a Buena-Yuda, uvua ne ndambu wa dimanya dia Mukanda wa Nzambi, kadi kavua ne  mandamuna a nkonko yonso ivua itangila malu avua Nzambi mulongolole bua kukumbaja to. Kadi pakamanya muntu mutungula eu tshivua Yehowa muenze bua kupesha bantu lupandu ku butuangaji bua mulambu wa Yezu, wakatambula diakamue mu mâyi.​—Bienzedi 8:26-28.

²⁴ Bamue badi belakana bua kudilambula kudi Nzambi bualu badi batshina bua se: kabakukokesha bua kukumbaja mutshipu wabu. Monique, nsongakaji wa bidimu 17, udi wamba ne: “Mvua mbenga bua kutambula bualu mvua ntshina bua tshilu kupangila bua kukumbaja tshimvua mudilambuile kudi Nzambi.” Kadi tuetu beyemene Yehowa ne mutshima wetu wonso, ‘neatululamijile njila yetu.’ Neatuambuluishe bua kutungunuka ne ‘kuenda mu bulelela’ bu basadidi bende ba lulamatu badi badilambule kudiye.​—Nsumuinu 3:5, 6; 3 Yone 4.

25. Ndukonko kayi ludi luakanyine tuetu kulukonkonona mpindieu?

²⁵ Bua dieyemena Yehowa ne dimunanga ne muoyo mujima, tshidimu tshionso bantu binunu ne binunu batu bapeta dijinga dia kudilambula kudiye ne kutambula. Tudi bajadike ne: basadidi bonso ba Nzambi badi badilambule kudiye mbasue kuikala ne lulamatu kudiye. Kadi tudi mu tshikondo tshia malu makole, ne tudi tupeta mateta kabukabu a ditabuja dietu. (2 Timote 3:1-5) Ntshinyi tshitudi mua kuenza bua kukumbaja tshitudi badilambuile kudi Yehowa? Netumone bualu ebu mu tshiena-bualu tshidi tshilonda.

[Mêyi adi kuinshi]

Udi muvuluke anyi?

• Mmushindu kayi utu batismo wa bena Kristo wenzeka?

• Ndimanya kayi didi muntu udi ujinga kutambula ne bua kuikala nadi?

• Mbidia kayi bidi bifikisha muntu ku batismo wa bena Kristo balelela?

• Bua tshinyi bamue batu babenga bua kutambula, kadi mmunyi mutudi mua kubambuluisha?

[Nkonko ya dilonga]

[Bimfuanyi mu dibeji 14]

Udiku mumanye tshidi kutambula ‘mu dîna dia Tatu, dia Muana ne dia nyuma muimpe’ kumvuija anyi?