Bamanyishi ba Bukalenge badi balonda

“Mvua musue kusadila Nzambi”

‘BANTU banyi, nulopoke munkatshi muende.’ Elu ndubila luakela muanjelu luvua mupostolo Yone mumvue mu bidimu lukama bia kumpala B.B. Matuku etu aa, bantu badi basue malu malelela miliyo mivule mbateleje lubila elu, mbapatuke mu “Babulona munene” udi muikale nsangilu wa bitendelelu bia dishima bia buloba bujima. (Buakabuluibua 18:1-4) Munkatshi mua bantu aba mudi Wilner (wa mu ditunga dia Haïti) udi utulondela muyuki wende udi ulonda eu.

“Ndi muledibue mu dîku dia bena Katolike ba dilambu mu tshimenga tshikese tshia Saint Marc mu ditunga dia Haïti, mu tshidimu tshia 1956. Bena mu dîku dietu bakasanka bikole pakansungulabu meme ne bantu bakuabu babidi ba mu tshimenga tshietu bua kuya kalonga tulasa tua seminere mu Saint Michel de l’Atalaye, anu mu Haïti. Pashishe, mu tshidimu tshia 1980, bakatutuma ku Stavelot (mu ditunga dia Belgique) bua tuetu kutungunuka ne malonga makuabu. Tuakalongamu kabidi mu iniversite wa bena Katolike.

“Kumpala mvua ne dijinga dikole dia kubuela mu mudimu wa budiambike. Dimue dituku mu nzubu wa tshidiilu, nsaserdose uvua utangila tshisumbu tshietu wakangambila bua meme kushala kakese, bualu uvua ne muanda uvuaye musue kungambila. Biakambungamija bikole pakangambilaye patoke ne: pavuaye ummona uvua umvua muoyo wa kuenda nanyi masandi! Ngakabenga bualu ebu, kabidi biakantekesha mu mikolo bikole. Meme kufundila bena mu dîku dietu bualu ebu, ne pakapita ngondo mikese, meme kupatuka mu seminere nansha muvuabu kabayi basue bua meme kumbuka. Ngakapeta nzubu wa kusombela mu musoko ne meme kutungunuka ne tulasa tukuabu tua midimu ya tshianana.

“Pangakapingana ku Saint Marc, tshivua kabidi musue bualu bua Ekeleziya wa bena Katolike to. Mvua anu musue kusadila Nzambi, kadi tshivua mumanye tshia kuenza to. Ngakabuela mu ekeleziya wa ba-Advantiste, kubuela mu wa bena Ebenezer ne wa ba-Mormon. Bushuwa, mvua mujimine mu nyuma.

“Pashishe meme kuvuluka ne: pantshivua ndonga mu seminere ku Belgique, mvua ne tshibidilu tshia kubala Bible wa Crampon. Mu Bible au mvua mupetamu ne: Nzambi udi ne dîna. Nunku, ngakasambila ne muoyo mujima ntela dîna edi, ndomba Nzambi bua angambuluishe bua kupeta tshitendelelu tshilelela.

“Matuku makese kunyima, Bantemu ba Yehowa babidi ba bakaji bakalua kusombela pamue ne muaba umvua. Bavua bantu ba ditalala, ba kanemu ne ba bunême. Nsombelu wabu uvua unkemesha. Dimue dituku, umue wa ku Bantemu babidi aba wakambikila bua kubuela mu Tshivulukilu tshia ku tshidimu ku tshidimu tshia lufu lua Kristo. Ngakanyisha tshisangilu atshi bikole menemene, meme kuitaba bua kutuadija kulonga Bible pa tshibidilu ne Bantemu. Kunyima kua ngondo bu isambombo, ngakatuishibua ne: mvua mupete mushindu muakane wa kusadila Nzambi. Ngakalambula Yehowa muoyo wanyi ne meme kutambula mu dia 20 Kasuabanga 1988.”

Panyima pa matuku, Wilner wakatuadija mudimu wa ku dîba ne ku dîba. Lelu’eu udi mukulu mu tshisumbu. Yeye ne mukajende ne bana babu babidi badi basadila Nzambi mu tshisumbu ne disanka.

[Tshimfuanyi mu dibeji 9]

Pavua Wilner ubala Bible ke pakamanyaye ne: dîna dia Nzambi n’Yehowa