Shalayi batabale, batangile anu kumpala ne dikima!

Luapolo lua bisangilu bia pa buabi

NGANYI udi mua kuela mpata ne: katuena mu “matuku makole”? Tuetu Bantemu ba Yehowa ki mbatutue tshisalu bua kubenga kupeta nsombelu mikole ya mu “matuku a nshikidilu” aa to. (2 Timote 3:1-5, MMM) Kadi tudi bamanye bimpe ne: bantu badi dijinga ne diambuluisha. Kabena bamanye diumvuija dia malu adi enzeka lelu pa buloba nansha. Badi dijinga ne busambi ne ditekemena. Mmudimu kayi menemene utudi ne bua kuenza bua kuambuluisha bantu netu?

Tudi ne mudimu udi Nzambi mutupeshe wa kuambila bantu lumu luimpe lua Bukalenge budiye mujadike mu diulu. (Matayo 24:14) Bidi bikengela bua bantu bamanye ne: Bukalenge ebu bua mu diulu ke tshintu tshimuepele tshidibu mua kutekemena. Kadi bantu kabatu bitaba mukenji wetu misangu yonso nansha. Mu imue miaba, mbakandike mudimu wetu ne bana betu badi bamona kasuba. Nansha nanku, katuena tulekela to. Tudi badisuike bua kushala batabale ne kutungunuka ne kuya kumpala beyemene Yehowa ne mutshima mujima, bikale ne dikima, tuamba lumu luimpe katuyi tulekela.​—Bienzedi 5:42.

Bakakula bua dipangadika dikole edi mu bisangilu bia pa buabi bivua bienzeke mu ngondo wa dikumi wa tshidimu tshia 2001. Mu Disambombo dia 6 a ngondo wa dikumi, tshisangilu tshia ku tshidimu tshia bena mu Watch Tower Bible and Tract Society of Pennsylvania tshiakenzeka mu Jersey City (New Jersey), mu Nzubu wa Mpuilu wa Bantemu ba Yehowa mu États-Unis. * Dituku diakalonda, bisangilu bikuabu biakenzeka miaba mikuabu inayi, bisatu mu États-Unis ne tshimue mu Canada. *

Mu mêyi a ntuadijilu a mulombodi wa tshisangilu, Samuel Herd wa mu Kasumbu Kaludiki ka Bantemu ba Yehowa, wakatela Musambu 92:1, 4 ne kuambaye ne: “Tudi ne bua kudileja bena dianyisha.” Bushuwa, bakafila luapolo itanu ya mu matunga mashilangane ileja malu atudi ne bua kuikadila bena dianyisha.

Luapolo idi ifuma eku ne eku

Muanetu Alfred Kwakye wakula bua luapolo lua didiunda dia mudimu wa diyisha mu ditunga dia Ghana, divuabu babikila kumpala ne: Côte-de-l’Or. Bavua bakandike mudimu wetu mu ditunga edi bidimu bia bungi. Bantu bavua batukonka ne: “Bua tshinyi mbanukandike? Nudi benze tshinyi?”  Muanetu Kwakye wakamba ne: nkonko eyi ivua ifila mushindu wa kuyisha. Mu tshidimu tshia 1991 pakajika dikandika, mu Ghana muvua Bantemu ba Yehowa 34 421. Mu ngondo wa muanda-mukulu 2001, Bantemu bonso basanga bavua 68 152, bileja didiunda dia bantu 98 pa lukama. Badi munkatshi mua dibaka Nzubu wa Mpuilu wa miaba ya disomba 10 000 mu ditunga edi. Bidi bimueneka patoke ne: bana betu ba mu nyuma ba mu Ghana badi benza bionso bidi bikengedibua ne budikadidi bua ntendelelu budibu nabu.

Nansha mudiku ndululu mu malu a tshididi, bana betu ba mu ditunga dia Irlande badi anu bayisha ne tshisumi, ne badi babanemeka bua dibenga kubuelakana diabu mu malu a tshididi. Mulombodi wa Komite wa Filiale wa mu Irlande, Muanetu Peter Andrews, wakamba ne: mu ditunga edi mudi bisumbu 115 ne bijengu 6. Muanetu Andrews wakalonda muyuki wa Liam, muana wa balume wa bidimu dikumi udi uyisha mu kalasa kabu kayi utshina. Liam wakabanyina balongi babu 25 ne mulongeshi wabu mikanda ya Miyuki ya mu Mukanda wa Nzambi. Liam uvua musue kutambula, kadi muanetu mukuabu kumuebeja bikalaye kavua umona ne: utshivua muana bikole. Liam wakamuandamuna ne: “Dinanga dianyi dia Yehowa ke didi ne bualu, ki mbidimu to. Batismo wanyi nealeje mushindu undi munange Yehowa bikole.” Tshipatshila tshia Liam ntshia kushala misionere.

Mu 1968, mu ditunga dia Venezuela muvua bambi ba lumu luimpe 5 400. Muanetu Stefan Johansson, mulombodi wa Komite wa Filiale wakaleja ne: kadi mpindieu mbapite pa 88 000. Ne bidi bimueneka ne: nekuikale didiunda kumpala eku bualu bantu bapite pa 296 000 bavua babuele mu Tshivulukilu mu 2001. Mu ngondo wa dikumi ne muibidi 1999, mvula mikole ya bipupu yakakebesha bitotshi biakashipa bantu bafike ku 50 000, ne munkatshi muabu muvua Bantemu. Nzubu wa Bukalenge mukuabu uvua mûle ne bitotshi kushale anu metre atanu bua kufikabi mu tshisasa. Pakamba muntu mukuabu bua tuetu kulekela nzubu au, bana betu bakamuambila ne: “Nansha kakese! Eu n’Nzubu wetu wa Bukalenge, katuena mua kumulekela mpindieu nansha.” Bobu e kutuadija kuenza mudimu, kupatulabu mishiki ne mishiki ya bitotshi ne mabue ne bintu bikuabu. Bakalongolola nzubu eu, bana betu badi bamba ne: mpindieu mmuimpe kupita muvuaye kumpala kua mvula ayi!

Muanetu Denton Hopkinson, mulombodi wa Komite wa Filiale wa mu Philippine wakamba ne: mu ditunga edi mudi miakulu minene ne mikese 87. Mu tshidimu tshia mudimu tshishale, bavua bapatule Bible mujima wa Les Saintes Écritures​—Traduction du monde nouveau mu miakulu minene isatu ya ditunga edi: Cebuano, Iloko ne Tagalog. Muanetu Hopkinson wakalonda bualu bua muana mukuabu wa balume wa bidimu tshitema  uvua mubale mukanda wa Lumu luimpe luanusankisha, mupatula kudi Bantemu ba Yehowa. Wakapeta mikanda mikuabu ku biro bia filiale, yeye kuyibala kabidi, kadi bena dîku diende kabavua basue to. Kunyima kua bidimu bia bungi pavuaye ulonga tulasa tua manga, wakafundila biro bia filiale ne kulombaye dilonga dia Bible. Wakatambula mu 1996 ne kutuadijaye diakamue mudimu wa ku dîba ne ku dîba. Udi mpindieu wenza mudimu ku Betele ne mukajende.

Muanetu Ronald Parkin, mulombodi wa Komite wa Filiale wa mu ditunga dia Porto Rico wakumvuija ne: ‘ditunga dia Porto Rico didi dituma Bantemu ku-ba-bende.’ Mu tshidiila etshi mudi bamanyishi batue ku 25 000, ne mbenze bidimu bia bungi kabayi bavula to. Bua tshinyi? Bushuwa, badi batshinka ne: Porto Rico udi “utuma” bamanyishi batue ku 1 000 mu États-Unis ku tshidimu tshionso, ba bungi ba bungi ba kudibu badi bamuangala bua kuya kukeba makuta. Muanetu Parkin wakalonda bua dipangadika dia tshikuma divua kabadi kangate bua Luis, Ntemu wa Yehowa wa bidimu 17 uvua ne disama dia kansere ka mu mashi (Leucémie). Bu muvua Luis ubenga bua kumuelabu mashi, bakafunda tshilumbu tshiende ku kabadi. Nzuji wakajinga bua kuyukila nende mpala ne mpala, ke yeye kuya kumumona mu lupitadi. Luis wakamukonka ne: “Bua tshinyi bu meme mubunde tshilumbu tshinene, uvua mua kundumbuluisha bu muntu mukole, kadi pandi musue kutumikila dîyi dia Nzambi, udi ungangata bu muana mutekete?” Nzuji eu wakatuishibua se: Luis uvua muana uvua ne lungenyi lua bantu bakole ne mukumbane bua kudiangatshila mapangadika.

Pakajika luapolo ya mu matunga a kule, Harold Corkern, mulombodi wa Komite wa Filiale wa mu États-Unis, wakela bana betu banayi bakadi basadile Yehowa kukadi bidimu bia bungi nkonko. Arthur Bonno ukadi muenze bidimu 51 mu mudimu wa ku dîba ne ku dîba ne udi mpindieu mu Komite wa Filiale mu ditunga dia Équateur. Angelo Catanzaro mmuenze bidimu 59 mu mudimu wa ku dîba ne ku dîba, ne bia bungi mmubienze bu mutangidi muena ngendu. Richard Abrahamson wakajikija mu Tshilongelu tshia Gilada mu 1953, ne wakapeta diakalenga dia kulombola mudimu wa buambi mu ditunga dia Danemark munkatshi mua bidimu 26 kumpala kua kupinganaye ku Betele wa ku Brooklyn. Ne ku ndekelu, bonso bakasanka bikole bua kuteleja Muanetu Carey Barber, udi mpindieu ne bidimu 96. Muanetu Barber wakatambula mu 1921, mmuenze bidimu 78 mu mudimu wa ku dîba ne ku dîba ne udi mu Kasumbu Kaludiki katshia mu 1978.

Miyuki ya tshikuma

Mu tshisangilu tshia ku tshidimu etshi muakenzeka kabidi miyuki ivua ne malu adi elesha meji. Muanetu Robert Wallen wakenza muyuki uvua ne tshiena-bualu etshi: “Bantu bua kuikalabu ne Dîna Diende.” Tudi bantu badi ne dîna dia Nzambi, ne tudi mu matunga mapite pa 230. Yehowa mmutupeshe ‘ditekemena [dia] matuku atshidi kumpala.’ (Yelemiya 29:11) Tudi ne bua kutungunuka ne kumanyisha Bukalenge bua Nzambi miaba yonso, tuambila bantu mukenji wa busambi ne disulakana. (Yeshaya 61:1) Muanetu Wallen wakajikija muyuki wende wamba ne: “Dituku dionso tutungunukayi ne kukumbanyina dîna didibu batubikila dia Bantemu ba Yehowa.”​—Yeshaya 43:10.

Tshitupa tshia ndekelu tshivua tshia muyuki mukosolola mu bitupa bisatu muenza kudi bana betu ba mu Kasumbu Kaludiki. Uvua ne tshiena-bualu tshia se: “Etshi ke tshikondo tshia kushala batabale, kutantamana ne kulua bakole.”​—1 Kolinto 16:13.

Muanetu Stephen Lett wakatuadija ne muyuki uvua ne tshiena-bualu tshia ne: “Shalayi batabale mu dîba dia ndekelu edi.” Muanetu Lett wakumvuija ne: tulu ndipa dia kudi Nzambi. Tudi tutupeshilula bukole. Kadi tulu tua mu nyuma tuotu ki ntuimpe to. (1 Tesalonike 5:6) Kadi mmunyi mutudi mua kushala batabale mu nyuma? Muanetu Lett wakaleja malu manene asatu adi mua kutuambuluisha: (1) Tuikale ne bia bungi bia kuenza mu mudimu wa Mukalenge. (1 Kolinto 15:58) (2) Tuikale bamanye majinga etu a mu nyuma. (Matayo 5:3) (3) Tutumikile mibelu ya mu Bible idibu bakupesha bua tuetu kumona mua kuenza malu ne meji.​—Nsumuinu 13:20.

Muanetu Theodore Jaracz wakenza muyuki wa mikukuku uvua ne tshiena-bualu tshia se: “Nutantamane mu diteka.” Muanetu Jaracz wakela lukonko bilondeshile Buakabuluibua 3:10 ne: “‘Dîba dia diteta’ ntshinyi?” Diteta edi didi dilua mu ‘dituku dia Mukalenge’ ditudi mpindieu eu. (Buakabuluibua 1:10) Diteta didi ditangila tshilumbu tshinene etshi: tudi ku luseke lua Bukalenge budi Nzambi mujadike anyi lua bukua-panu bubi bua Satana? Too ne pajika dîba dia diteta edi, netuikale  anu mua kupeta ntatu anyi makenga. Netushale balamate Yehowa ne bulongolodi buende anyi? Muanetu Jaracz wakamba ne: ‘Muntu ne muntu yonso wa kutudi neikale mua kuleja lulamatu elu.’

Ku ndekelu, muanetu John Barr wakenza muyuki uvua ne tshiena-bualu ne: “Nulue bakole bu bantu ba mu nyuma.” Wakamba bilondeshile Luka 13:23-25 ne: tudi ne bua kudienzeja bikole bua ‘kubuela ku mushiku wa mbelu mubumbakane.’ Bantu ba bungi badi bapangila bualu kabena badifila bua kukola mu nyuma to. Bua tuetu kulua bena Kristo bakole mu nyuma, tudi ne bua kulonga mua kutumikila mêyi a mu Bible mu malu onso a mu nsombelu wetu. Muanetu Barr wakafila mubelu eu: “Ndi mujadike ne: nudi nuitaba bua se: etshi ke tshikondo tshia (1) kuteka Yehowa kumpala kua malu onso; (2) kulua bakole; ne (3) kudienzeja bua kuenza disua dia Yehowa. Tuetu benze malu aa, netupete mushindu wa kubuela ku mushiku wa mbelu mubumbakane udi ufikisha ku muoyo udi kauyi ne ndekelu.”

Pakavua tshisangilu tshia ku tshidimu etshi tshitangile ku ndekelu, kuvua lukonko lumue luvua lushale kaluyi ne diandamuna to, luvua ne: Mmvese kayi udi muikale mvese wa tshidimu tshia mudimu tshia 2002? Bakandamuna lukonko elu dituku diakalonda.

Tshisangilu tshikuabu

Mioyo ivua anu kulu kulu mu Dia lumingu mu dinda pakatuadija tshisangilu tshikuabu. Tshiakabanga ne tshikepeshilu tshia dilonga dia Tshibumba tshia Nsentedi tshia lumingu alu, ne panyima kulejabu amue malu manene a mu tshisangilu tshia ku tshidimu. Pashishe, bantu bonso bavua ne disanka dia kuteleja muyuki uvua wakula bua mvese wa tshidimu tshia 2002: ‘Luayi kundi, meme nennupe dikisha.’ (Matayo 11:28) Muyuki au uvua muimanyine pa biena-bualu bia dilonga biakapatuka mu Tshibumba tshia Nsentedi tshia dia 15 Tshisua-munene 2001.

Kunyima kua muyuki au, bamue bana betu bavua baye ku Mpungilu ya distrike ya “Balongeshi ba Dîyi dia Nzambi” mu ditunga dia France ne dia Italie mu ngondo wa muanda-mukulu 2001 bakaleja malu avua mabasankishe. * Ku ndekelu, bakenza miyuki ibidi ya ndekelu ivua mikale ne malu manene a tshisangilu tshia dituku adi kudi bana betu bavua bafume ku Betele wa ku Brooklyn.

Muyuki wa kumpala uvua ne tshiena-bualu tshia ne: “Tueyemenayi Yehowa ne dikima mu matuku makole aa.” Ngamba-malu wakakula bua malu manene asatu aa: (1) Kueyemena Yehowa ne dikima kutu misangu yonso ne mushinga bua basadidi ba Nzambi. Mu Bible mudi bilejilu bia bantu ba bungi bakaleja dikima ne ditabuja kumpala kua buluishi. (Ebelu 11:1–12:3) (2) Yehowa udi utupesha bijadiki bikole bidi bitusaka bua kumueyemena. Bintu bidiye muenze ne Dîyi diende bidi bitujadikila se: utu wambuluisha basadidi bende ne kêna mua kubapua muoyo nansha. (Ebelu 6:10) (3) Dikima ne dieyemena mbintu bidi ne mushinga nangananga lelu’eu. Bantu ‘badi netu lukuna’ anu bu muakamba Yezu. (Matayo 24:9) Bua tuetu kumona mua kutantamena ntatu eyi, tudi ne bua kueyemena Dîyi dia Nzambi, kuikala bashindike ne: nyuma wende udi netu ne tudi ne bua kuikala ne dikima bua kutungunuka ne kumanyisha lumu luimpe. (4) Malu adi enzeka adi aleja ne: badi batuluisha kubangila anu ku mpindieu. Biakasama bantu bonso ku muoyo pakalonda ngamba-malu bua ntatu ivua bana betu bapete mu ditunga dia Arménie, France, Géorgie, Kazakhstan, Russie, ne dia Turkménistan. Bushuwa, etshi ke tshikondo tshia tuetu kuleja muoyo mukole ne kueyemena Yehowa!

Ngamba-malu wa ndekelu wakenza muyuki uvua ne tshiena-bualu tshia ne: “Tuyayi kumpala mu buobumue diatshimue ne bulongolodi bua Yehowa.” Muyuki eu wakakula bua malu a bungi avua malue anu pa dîba diawu menemene. (1) Diya kumpala dia bantu ba Yehowa badi badimona patoke kudi bantu ba bungi. Mudimu wetu wa kuyisha ne mpungilu yetu bidi bitumuenesha kumpala kua bantu. (2) Yehowa mmuenze bulongolodi budi mu buobumue. Mu tshidimu  tshia 29 B.B., bakela Yezu manyi a nyuma muimpe bua yeye “kusangisha bintu bionso,” mbuena kuamba ne: bantu badi ne ditekemena dia kuya mu diulu ne aba badi ne ditekemena dia kupeta muoyo wa kashidi pa buloba, mu dîku dia Nzambi didi mu buobumue. (Efeso 1:8-10) (3) Mpungilu ntshijadiki tshitambe bunene tshia se: tudi mu buobumue pa buloba bujima. Ke tshiakamueneka patoke mu mpungilu ya pa buayi ivua mienzeke mu France ne mu Italie mu ngondo wa muanda-mukulu wa tshidimu tshishale. (4) Bakangata dipangadika divua dilenga ku muoyo mu France ne mu Italie. Ngamba-malu wakakula bua amue malu makese a mu dipangadika edi divua dilenga ku muoyo. Mêyi onso a dipangadika edi adi kuinshi eku.

Bua kujikija muyuki wa ndekelu, ngamba-malu muenyi wakabala dimanyisha divua dilenga ku muoyo dia kudi Kasumbu Kaludiki. Divua diamba mu tshikoso ne: “Etshi ke tshikondo tshia kushala batabale, bua kumona mushidu udi malu enda enzeka pa buloba bujima. . . . Tudi basue kunuleja mudi Kasumbu Kaludiki kanujingila diakalenga nuenu ne bana betu bakuabu bonso badi basadila Nzambi. Tudi tulomba bua anuambuluishe bikole mu dienza dia disua diende ne muoyo mujima.” Basadidi ba Yehowa ba miaba yonso mbadisuike bua kushala batabale mu tshikondo etshi tshikole ne bua kutungunuka ne kuya kumpala ne dikima dionso diatshimue ne bulongolodi bua Yehowa budi mu buobumue.

[Mêyi adi kuinshi]

[Kazubu/​Bimfuanyi mu mabeji 29-31]

Dipangadika

Mu ngondo wa muanda-mukulu 2001, Mpungilu ya pa buayi ya “Balongeshi ba Dîyi dia Nzambi” yakenzeka mu ditunga dia France ne dia Italie. Mu mpungilu eyi bakangata dipangadika divua dilenga ku muoyo. Bidi bilonda ebi mmêyi a dipangadika adi.

“BU MUTUDI BANTEMU BA YEHOWA, tuetu buonso badi babuele mu Mpungilu eu wa ‘Balongeshi ba Dîyi dia Nzambi’ tudi bapete dilongesha didi ne mushinga mutambe bunene. Mpokolo wa dilongesha edi mmumanyike bimpe. Dilongesha edi kadiena difumina kudi bantu nansha. Didi difumina kudi Muntu uvua muprofete wa kale Yeshaya mubikile ne: “Muyishi [Munene].” (Yeshaya 30:20) Tangilayi bualu budi Yehowa utuvuluija mu Yeshaya 48:17: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu.’ Mmushindu kayi udiye ukumbaja muanda eu? Mushindu wa kumpala nku ndiambuluisha dia Bible, mukanda udibu batambe kukudimuna mu miakulu ya bungi ne udi mutangalake bikole pa buloba, mudibu batuambila patoke ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne [dikuatshisha].’​—2 Timote 3:16.

“Lelu bantu badi ne dijinga dikole dia kupeta dilongesha edi didi dikuatshisha. Bua tshinyi tudi tuamba nunku? Patudi tutangila mudi malu enda ashintuluka ne enda akola pa buloba ebu, ntshinyi tshidi bantu ba meji bamba? Badi bamba ne: Nansha mudi bantu miliyo ne miliyo balonge tulasa tua panu, kakuena dimanya dia malu a mushinga mulelela ne bantu ki mbamanye mua kusunguluja tshidi tshimpe ne tshidi tshibi to. (Yeshaya 5:20, 21) Bantu bungi tshianana kabena ne dimanya dia Bible ne dia malu adimu to. Nansha mudi biamu bidi bena meji benze bitupesha mushindu wa kumanya malu a bungi ku diambuluisha dia ordinatere, mmuaba kayi utudi mua kupeta mandamuna a nkonko ya mushinga bu mudi eyi: Muoyo udi ne tshipatshila kayi? Mianda idi yenzeka mu tshikondo tshietu etshi idi yumvuija tshinyi? Kudiku ditekemena dishindame bua matuku adi kumpala anyi? Dimue dituku bantu badiakusombaku mu ditalala ne mu bupole anyi? Lelu mu miaba idibu balamina mikanda mudi mikanda bungi tshianana idi yakula bua kalu ne kalu kuonso kadi katangila bantu. Kadi, bantu badi batungunuka anu ne kuenzulula bilema bimuebimue bivuabu benze kale. Dibunda dia bilumbu didi anu dienda divula  bikole. Masama avuabu bela meji kale ne: mbaajikije adi enda apingana, ne eku makuabu pawu bu mudi SIDA enda atangalaka bu meshi. Nsombelu wa mu dîku udi wenda unyanguka mu mushindu udi ukemesha. Bantu badi anu batungunuka ne kunyanga lupepe ne mâyi ne bintu bikuabu bidi pa buloba. Malu a tshikisu (terorisme) ne bingoma bia mbutula bidi bipangisha bantu bua kusomba mu ditalala ne mu bupole. Nshinga idi kayiyi ne mandamuna idi anu yende ivula. Mmudimu kayi muakane utudi mua kuenza bua kuambuluisha bantu netu mu matuku makole aa? Kudiku malongesha adi umvuija tshiledi tshia makenga a bantu ne adi aleja mushindu wa kuikala ne nsombelu mulenga ne afila ditekemena dilelela bua matuku atshilualua anyi?

“Mudimu wetu udi Mukanda wa Nzambi uleja ngua ‘kuya, kuvuija ba bisamba bionso bayidi, kubayisha mua kuenza malu onso akamba Kristo.’ (Matayo 28:19, 20) Kristo wakafila mudimu eu kunyima kua lufu ne dibika diende, pakapetaye bukokeshi buonso mu diulu ne pa buloba. Mmudimu udi mupite mikuabu yonso idi nayi bantu. Bilondeshile Nzambi, mudimu wetu udi muimanyine pa majinga a mu nyuma a bantu badi ne nzala ya buakane ke udi ne bua kulua pa muaba wa kumpala. Tudi ne bijadiki bimpe bia mu Mukanda wa Nzambi bidi bitusaka bua kuangata mudimu eu ne mushinga wa bungi.

“Bualu ebu budi butulomba bua kuteka mudimu eu pa muaba wa kumpala mu nsombelu wetu. Bu mudi Nzambi utuambuluisha ne utubenesha, mudimu eu newenzeke, nansha mudiku malu a bungi adi mua kutubueja mu ditanaji, bipumbishi ne buluishi bua bena bitendelelu ne bena tshididi, bakeba bua kupangisha didiunda dia mudimu eu wa dilongesha udi wenzeka pa buloba. Tudi bajadike ne batuishibue se: mudimu eu neutungunuke ne kuya kumpala bikole menemene. Bua tshinyi tudi ne bua kuikala ne dishindika dia nunku? Bualu Mukalenge Yezu Kristo wakalaya ne: neikale netu mu mudimu eu udi Nzambi mutupeshe too ne ku nshikidilu kua tshikondo etshi.

“Tukadi mu minite ya ndekelu ya ntatu ya bukua-bantu. Tudi ne bua kukumbaja mudimu wetu utudi tuenza mpindieu kumpala kua nshikidilu kuluaye. Bua muanda eu tuetu Bantemu ba Yehowa tudi tupangadika ne:

“Tshia kumpala: Bu mutudi bena mudimu ba Nzambi badi badilambule kudiye, tudi badisuike bua kuteka malu a Bukalenge pa muaba wa kumpala mu nsombelu wetu ne kutungunuka ne kukola mu nyuma. Bua tuetu kukumbaja bualu ebu, tudi tusambila biumvuangane ne mêyi a Musambu 143:10 a se: “Unyishe mua kuenza bu mudi disua diebe, bualu bua wewe udi Nzambi wanyi.” Ebi bidi bitulomba bua kuikala balongi ba tshisumi, tudienzeja bua kubala Bible dituku dionso, kudifila mu didilongela ne mu dikebulula malu mu mikanda. Bua kudiunda kuetu kumuenekaku kudi bantu bonso, netudienzeje muetu muonso bua kudilongolola ne kupetela masanka a bungi ku malu adi Yehowa utulongesha mu bisangilu bia tshisumbu, mu mpuilu ya bijengu, mpungilu ya distrike, ya bena mu ditunga dijima ne ya bantu bafume mu matunga makuabu.​—1 Timote 4:15; Ebelu 10:23-25.

“Tshibidi: Bua kumona mua kulongeshibua kudi Nzambi, netudie anu ku mêsa ende ne netuteleje didimuija dia Bible dia kudimukila malongesha a ba-demon adi apambulangana. (1 Kolinto 10:21; 1 Timote 4:1) Netuikale ne budimu bua pa buabu bua kuepuka bintu bidi mua kutuenzela bibi, bu mudi mafi a mu bitendelelu, ngenyi ya patupu, malu a tshiendenda adi akuatshisha bundu, dibala anyi dibandila bintu bidi biakula bua masandi (pornografi), manaya mabi, ne tshintu tshionso tshidi katshiyi mu diumvuangana ne ‘malongesha malenga.’ (Lomo 1:26, 27; 1 Kolinto 3:20; 1 Timote 6:3, MMM; 2 Timote 1:13) Bua kanemu katudi naku kudi ‘mapa mikale bantu,’ adi mikale bakulu badi bamanye mua kulongesha malu adi mimpe, netunemeke mudimu mukole udibu benza ne netueleshangane nabu diboko ne muoyo mujima mu dibingisha mikenji mimpe ne miakane ya mu nyuma idi mu Bible idi itangila bikadilu bilenga.​—Efeso 4:7, 8, 11, 12; 1 Tesalonike 5:12, 13; Tito 1:9.

“Tshisatu: Tuetu baledi bena Kristo, netudienzeje ne muoyo mujima bua kulongesha bana betu ki nganu ne mêyi a mukana nkayawu, kadi ne tshilejilu tshietu kabidi. Dijinga dietu dia kumpala ndia kubambuluisha kubangila anu ku buana buabu bua ‘[balonge] Mukanda wa Nzambi, udi mumanye mua kubavuija bena meji too ne ku lupandu.’ (2 Timote 3:15) Netushale bavuluke ne: dibakolesha mu dilongesha ne mibelu bia Yehowa nedibapeshe  mushindu mulenga wa kumona mudi dilaya dia Nzambi dikumbana, dia se: ‘nebikale ne dikasa dimpe ne nebikale ne muoyo musangu mule pa buloba.’​—Efeso 6:1-4.

“Tshinayi: Patudi tupeta tunyinganyinga bua ntatu mikole, tshia kumpalampala ‘netumanyishe Nzambi bua milombu yetu,’ bikale ne dishindika dia se: ‘ditalala dia Nzambi didi ditamba dijingulula dionso dia bantu’ neditukube. (Filipoi 4:6, 7) Netupete dikisha bualu tudi bambule tshikokedi tshia Kristo. Bu mutudi bamanye bimpe ne: Nzambi udi utulama, katuakuelakana bua kumupuila tunyinganyinga tuetu to.​—Matayo 11:28-30; 1 Petelo 5:6, 7.

“Tshitanu: Bua kuleja Yehowa dianyisha dietu bua diakalenga ditudi nadi dia kuikala balongeshi ba Dîyi diende, netudienzeje kabidi muetu muonso bua ‘kuludikila bantu njila mululame mu dîyi dia Nzambi’ ne ‘kukumbaja mudimu wetu wa Nzambi.’ (2 Timote 2:15; 4:5) Bu mutudi bamanye bimpe bionso bidi bikengedibua, dijinga dietu dinene ndia kukeba bantu badi bakanyine ne bua kukolesha ntete itukadi bakune. Netulengeje kabidi ndongeshilu wetu pa kulombola bimpe malonga a Bible a bungi. Muanda eu neutufikishe bimpe ku dikumbaja disua dia Nzambi dia se: “bantu bonso basungidibue, bafike ku dimanya dia malu malelela.”​—1 Timote 2:3, 4.

“Tshisambombo: Mu bidimu bionso lukama biashadi ebi ne mu bitudi babange ebi, mbakengeshe ne baluishe Bantemu ba Yehowa mu mishindu kabukabu. Kadi Yehowa udi netu. (Lomo 8:31) Dîyi diende ditu kadiyi mua kushima didi ditujadikila ne: ‘tshielelu tshia mvita tshidibu batula bua kutuluisha natshi’ ne tshipatshila tshia kupangisha anyi kuendesha mudimu wa diyisha ne dilongesha Bukalenge bitekete peshi tshia kuwimanyika katshiakukuata nansha bia munyi. (Yeshaya 54:17) Katuena mua kulekela bua kumanyisha bulelela nansha tuetu mu tshikondo tshiakane anyi tshidi katshiyi tshiakane. Dipangadika dietu ndia kukumbaja mudimu wa diyisha ne wa dilongesha ne mitalu yonso. (2 Timote 4:1, 2) Tshipatshila tshietu ntshia kumanyisha bantu ba bisamba bionso lumu luimpe lua Bukalenge bua Nzambi. Nunku nebatungunuke ne kulonga malu a mushindu wa kupeta muoyo wa kashidi mu bukua-panu bupiabupia buakane. Bu mutudi balongeshi ba Dîyi dia Nzambi badi mu buobumue, dipangadika dietu ndia kutungunuka ne kulonda tshilejilu tshia Mulongeshi Munene, Yezu Kristo ne kuikala ne ngikadilu ya Nzambi ivuaye nayi. Netuenze bionso ebi bua kunemeka ne kutumbisha Yehowa Nzambi udi Muyishi wetu Munene ne Mutufuki.

“Bantu bonso bavua badisangishe mu mpungilu eu badi bitabe bua tuangate dipangadika edi bambe ne: EYOWA!”

Pakambilabu bantu 160 000 bavua mu mpungilu isatu ya mu France ne bantu 289 000 bavua mu mpungilu tshitema ya mu Italie bualu ebu bua ndekelu, bantu bonso ba miakulu mivule bavuamu bakandamuna ne dîyi dikole bu dikubakuba ne: “Eyowa.”