Didimona mu nsombelu muimpe mpindieu ne dipeta nsombelu muimpe wa kashidi

BUA tshinyi nsombelu muimpe utu misangu mivule mukole bua kumupeta, peshi yeye musue kupeteka, muikale anu wa matuku mabala ku minu? Tudi mua kuikala tudielela bingenyingenyi bia nsombelu muimpe wa bintu bitudi tuetu tutekemena bua kupeta pamutu pa bintu bitudi mua kukokesha bua kupeta anyi? Kudielela bingenyingenyi bia mushindu’eu kudi bu kulotakana malu adi kaayi mua kuenzeka.

Bingenyingenyi bidi bisaka muntu bua kupua malu malelela a mu nsombelu ne ntatu yawu muoyo bua kuipatshila anu nsombelu mulengele wa disanka, kayi umona tshintu tshikuabu tshidi mua kumunyangila malu adi mu bingenyingenyi biende ebi to. Kadi misangu mivule, ntatu ya mu nsombelu mulelela itu itulukilangana mu tshimpitshimpi, ijimija muntu bingenyingenyi bionso bivuaye nabi bia kuikala mu nsombelu wa diakalengele, ipingaja meji ende ku malu malelela a mu nsombelu.

Tuanji tukonkononabi mushindu umue utu bantu bakeba nsombelu muimpe: dikeba dia muaba wa kusombela. Tshilejilu, tshimenga tshinene tshidi mua kumueneka bu tshidi mua kupetesha bantu diakalenga, kubapetesha disanka divule, mafutu manene ku midimu, ne nzubu milenga mitambe ya kusombela. Bushuwa, bualu ebu budi mua kumueneka bu dipeta dia nsombelu muimpe uvua muntu mukebe mutantshi mule. Kadi lungenyi elu ndua meji anyi?

Mu bimenga binene ke muaba muimpe menemene wa kusombela anyi?

Mu matunga mapele, bua kulobesha bantu mu bimenga binene, batu bendesha lumu (anyi benza piblisite ya) malu adi pamuapa mua kubajula lukuka lukole lua bintu bidibu badifuanyikijila bua kupeta. Kumpanyi idi yenza mudimu eu kayitu nangananga ikujingila nsombelu muimpe nansha, kadi tshituyi ikeba yoyi mmushindu udiyi mua kupana bintu biayi. Itu ibenga kuleja ntatu idi nayi bantu mu nsombelu mulelela, ileja anu bantu bikale ne diakalenga ne nsombelu muimpe. Nunku, bidi bilua kumueneka ne: bua kuikala ne nsombelu muimpe, bidi bikengela kuikala ne bintu bidibu bendeshila ngumu ebi ne kuya kasombela mu bimenga binene.

Mona tshilejilu tshidi tshilonda etshi. Banene ba mbulamatadi ba mu tshimenga kampanda tshia ku Ouest kua Afrike bakasa bilatalata bikale ne mazola aleja ne: kunua kua mfuanka ki nkushilangane ne kuosha makuta adi muntu upeta ku tshisululu tshiende to. Bavua benze nanku bua kudimuija bena mu tshimenga etshi bua kuepuka dinua dia makanya. Bua kudisombuela, benji ne basumbishi ba mfuanka bakasa pabu bilatalata bilongolola ne meji onso bikale ne bimfuanyi bilengele bia banu ba makanya bikale ne disanka. Kabidi, kumpanyi mukuabu wa malu a mfuanka wakavuadika bena mudimu bende bilamba bimpe bia iniforme ne tufulu tulengele bua kuenda kuabanyinabu bansonga mfuanka mu njila, babambila bua “kumulabula.” Bavule ba ku bansonga abu bavua bafumine ku misoko, ke bualu kayi bakamulabula, bualu kabavua  banji kumanya mayele a benji ba piblisite to. Bakalua bapuitshi ba mfuanka ba kalanda musenga. Bansonga aba bavua balue mu tshimenga tshinene etshi bua kukeba mushindu wa kukuatshisha nawu mêku abu peshi bua kuikalabu bena kantu ku bianza. Kadi, bakuosha makuta a bungi avuabu mua kuikala badiambuluishe nawu.

Dileja dia mudi bantu bikale mu nsombelu wa diakalenga mu bimenga binene kaditu bualu budi bufumina anu kudi bangenda nkayabu to. Budi mua kupatukila mukana mua bantu bavua balue mu tshimenga tshinene badi kabayi basanka bua kupingana ku misoko yabu. Bu mudibu kabayi basue bua babamone bu bapangile mua kusomba mu tshimenga, badi baditumbisha mudibu bapetamu bubanji ne bintu bivuabu bipatshila. Kadi wewe mulondolole nsombelu udibu nende mpindieu bimpebimpe, neumone se: ki mmulengele kupita uvuabu nende kale ku musoko to; badi baluangana pabu bua kupeta makuta anu bu bena mu tshimenga atshi bakuabu bonso.

Nangananga mu bimenga binene ke mutu bantu bapiabapia bakebi ba nsombelu muimpe bapona mu mateyi a bantu bena meji mabi. Mbua tshinyi? Nangananga bualu kabatu ne balunda ba pa muoyo to, kabidi badi kule ne bena mu mêku abu. Nunku, kabena ne wa kubabela udi mua kubambuluisha bua kuepuka mateyi a nsombelu wa lukuka lua bintu wa bantu bavule ba mu bimenga to.

Josué kakapona mu buteyi bua dinua dia makanya nansha. Wakalua kumona se: nsombelu wa mu tshimenga atshi uvua mumupite makanda. Kadi tshiende tshiakapetaye mu tshimenga etshi tshivua anu lukuka lua bintu binene bivuaye kayi mua kupeta. Wakamona ne: kavua mupete nsombelu muimpe wa bushuwa mu tshimenga amu to; ne kamuvua mumukumbanyine to. Kubangaye kudimona muntu tshianana, mushadile, ne mupuyile; ndekelu wa bionso kudipuekeshaye e kupingana ku musoko.

Uvua utshina se: badi mua kuya kamuseka. Kadi, ba mu dîku diabu ne balunda bende balelela bakamuakidila ne muoyo mujima. Musangelu wakamulejabu kudi ba mu dîku diabu, balunda ne bamanyangana nabu ba mu musoko, ne dinanga dia balunda bende ba mu tshisumbu tshia bena Kristo biakamuambuluisha bua kudimona ne lukasa luonso mu nsombelu mutambe buimpe kupita wa mu tshimenga tshinene mudi bantu kabayi bapeta malu manene adibu bipatshila. Wakakema pakamonaye muvua mudimu mukole wa madimi wakenzaye ne tatuende mubapeteshe yeye ne dîku diabu makuta a bungi kupita avuaye mua kupeta mu tshimenga.

Tshilumbu tshilelela tshia makuta

Makuta adi mua kukupetesha nsombelu muimpe anyi? Liz wa mu ditunga dia Canada udi wamba ne: “Pantshivua nsongakaji, mvua ngela meji ne: makuta adi apeteshangana ditalala.” Wakanangangana ne mulume uvua ne dikuta divumvuke. Abidi asatu bobu kuselangana. Liz wakadimona ne nsombelu muimpe anyi? Udi wamba kabidi ne: “Patuakaselangana, tuvua ne nzubu mulengele ne vuatire ibidi, kabidi tuvuaku ne dikuta dikumbane bua kusumba tshionso tshituvua natshi dijinga, kuenza ngendu, ne kujikija lutetuku. Nansha nanku, mvua anu ne tunyinganyinga tua malu a makuta.” Bua tshinyi? Udi umvuija ne: “Tuvua tujimija makuta be. Bidi bimueneka ne: paudi ne makuta a bungi, kuena udimona ne nsombelu muimpe menemene to. Makuta kaakatujikijila tunyinganyinga anyi dikenga nansha.”

Biwikala udimona ne: kuena ne makuta makumbane adi mua kukupetesha nsombelu muimpe, diebeja ne: ‘Ntshilumbu kayi tshidi muaba eu menemene? Tshindi mupangile mmakuta anyi, peshi mmeji a mushindu wa kukuata mudimu ne makuta bimpe?’ Padi Liz uvuluka nsombelu wabu pa kale, udi wamba ne: “Mpindieu ngashishi kumvua ne: ntatu ivua mu dîku dietu pantshivua muana ivua ifumina ku dikuata dia mudimu bibi ne makuta. Tuvua tuangata bintu mabanza, nunku tuvua anu bapika ba mabanza misangu yonso. Bualu ebu buvua butukebela dikenga.”

Kadi lelu eu, Liz ne bayende badi badimona bikale ne nsombelu mutambe buimpe nansha mudibu kabayi ne makuta a bungi. Pakalongabu bulelela bua mu Dîyi dia Nzambi, bakalekela kuteya matshi abu ku mamanyisha a malu a mfranga adi alobeshangana, kubangabu kuteleja meji a kudi Nzambi adi kabidi ne mêyi adi amba ne: ‘Kadi muntu yonso udi ungumvuila neashikame  talalaa, neikale polaa kayi ne ditshina dia dikenga dibi.’ (Nsumuinu 1:33) Bavua basue bua nsombelu wabu kuikalaye ne mushinga mupite wa muntu udi ne makuta a bungi ku banke. Mpindieu udibu ba-misionere mu ditunga dia kule, Liz ne bayende badi bayisha ne babanji ne bapele bonso ne: Yehowa Nzambi neapeshe bantu nsombelu muimpe mu katupa kîpi emu pa buloba bujima. Mudimu eu udi ufila disanka divule ne nsombelu mushindame bidi bifumina ku bipatshila bia mushinga mukole ne bikadilu bia tshitembu, kadi ki nku dipeta dia mfranga nansha.

Ikala mumanye bulelela bua mushinga ebu: Kuikala mubanji ku mêsu kua Nzambi kudi ne mushinga mupite wa kuikala ne mabanji a pa buloba. Mu Mukanda wa Nzambi mujima, ki mbatambe kutumbishamu bualu bua dipeta dia mabanji a pa buloba to, kadi mbatambe kuakula bua kuikala ne Yehowa mu malanda mimpe atudi mua kulama patudi tutungunuka ne kuenza disua Diende ne ditabuja dionso. Yezu Kristo mmutukankamije bua kuikala ‘babanji ku mêsu kua Nzambi’ ne kudibutshila bintu “mu tshibutshilu tshia mu diulu.”​—Luka 12:21, 33.

Ntshinyi tshidi mianzu ipetesha muntu?

Biwumvua meji akudinga se: bua kupeta nsombelu muimpe mbimpe kuikala ne mianzu minene,  udikonke ne: ‘Mbanganyi badi ne mianzu badi bapete bushuwa nsombelu muimpe mutambe? Mmianzu kayi mene indi ne bua kupeta bua kuikala ne nsombelu muimpe?’ Mudimu udi ne bipeta bimpe udi mua kukupetesha nsombelu uudi mua kuela meji ne: mmuimpe, pawu mufuane kukuela mâyi ku makasa, anyi mene kukukulula panshi.

Malu malelela akadi menzeke adi aleja se: kuikala ne lumu luimpe ku mêsu kua Nzambi kudi kupeteshangana nsombelu mutambe buimpe kupita kuikala ne lumu ku mêsu kua bantu. Anu Yehowa ke udi mua kupesha bantu muoyo wa kashidi. Abi bidi biumvuija ne: kakufunda dîna dietu mu mukanda kampanda wa mêna a bantu banene to, kadi neadifunde mu mukanda wa muoyo wa Nzambi.​—Ekesode 32:32; Buakabuluibua 3:5.

Wewe muteke malu autu ujingajinga ku luseke, nsombelu uudi nende mpindieu udi mushindu kayi, ne ntshinyi tshiudi mu bulelela mua kutekemena bua matuku adi kumpala? Kakuena muntu utu ne bionso nansha. Muanetu mukuabu muena Kristo wa meji wakamba ne: “Ngakafika ku dijingulula ne: mu nsombelu, mbikole bua kuikala ne bintu bionso, kadi mbimpe kusungula biudi mua kukokesha.” Anji imanaku katupa muaba eu ne ubale muanda udi mu kazubu ka “Bualu bulonda mu ditunga dia Bénin.”

Mpindieu andamunabi nkonko eyi: Ntshipatshila kayi tshinene tshindi natshi mu nsombelu wanyi? Njila kayi mululame buludiludi undi ne bua kulonda bua kutshikumbaja? Ndi mua kuikala mulonde njila mule wa njiwu, ne mukodiakane, paku kuikale njila muimpe wa kulonda bua kupeta tshindi natshi dijinga menemene ne tshindi mua kupeta mu bulelela anyi?

Pakajikija Yezu kufila mubelu bua kuleja mudi mushinga wa bintu bia panu mushadile ku udi nawu malu a mu nyuma, wakamba bua kuikala ne dîsu didi ‘dimona tshintu [tshimue] bimpe,’ peshi ‘dîsu dimpe.’ (Matayo 6:22; [MMM]) Wakumvuija se: malu manene adi ne mushinga mu nsombelu ngikadilu mimpe ya mu nyuma ne bipatshila bidi bitangila dîna dia Nzambi ne Bukalenge buende. (Matayo 6:9, 10) Bintu bikuabu bidi ne mushinga mukese, tuambe mene ne: bidi dîsu kadiyi ne bua kutamba kualakana.

Biamu bia foto bivule bia lelu bitu bidikuatshila nkayabi bintu bionso bidi kule ne bidi pabuipi. Utu pebe nanku anyi? Bintu pabuipi ne bionso bitu dîsu diebe dimona bitu anu bia kuipatshila, mmumue ne: bitu anu ne mushinga, bia kujinga ne bimueneka mu meji ebe bipepele bua kubipeta anyi? Bikalabi nanku nansha kakese, udi bipepele menemene mua kupangila Bukalenge budi tshipatshila tshinene tshia bena Kristo bua bungi bua bintu biudi wipatshila, tshintu ne tshintu tshikukokela mu watshi njila. Yezu wakafila mubelu wa nsongo eu: ‘Kadi diambedi kebayi bukalenge bua [Nzambi] ne buakane buende, nunku nebanupe bintu ebi bionso.’​—Matayo 6:33.

Nsombelu muimpe mpindieu ne bua kashidi

Tudi pamuapa mua kudijingila tuetu bonso ne bantu batudi banange malu malenga. Kadi bu mutudi bapange bupuangane, basombe pa buloba bupange bupuangane, ne bikale ne matuku makese a muoyo, bidi bitupangisha mua kumanya bintu bitudi mu bulelela bakumbane mua kutekemena bua kubipeta. Kukadi bidimu binunu ne binunu, katshia umue wa ku bafundi ba Bible wamba ne: ‘Ngakatangila kabidi muinshi mua dîba ne: bena lubilu lukole kabena bapita bakuabu mu kulumbila lubilu misangu yonso, nansha bena bukitu kabena bapitapita bakuabu bukole mu mvita; bena meji kabatu bapeta biakudia bionso; bena lungenyi kabatu bapeta bubanji buonso; badi ne ngenzelu muimpe kabatu bapeta diakalengele dionso; kadi buonso buabu badi ne bikondo bidi malu abatulukila.’​—Muambi 9:11.

 Imue misangu tutu tulua kudina mu midimu mikole ya ku dituku ne ku dituku katuyi kabidi nansha tuvuluka bualu bua mushinga bua kudikonkonona bua kumanya tshitudi ne tshitudi natshi dijinga bulelela bua tuetu kudimona mu nsombelu muimpe mukumbane. Mêyi a meji a kale adi amba ne: ‘Wananga biuma kêna usankishibua ku biuma; wananga bubanji kêna ukuta bubanji; ebu mbualu bua patupu kabidi. Tulu tua muena mudimu tudi tuimpe biadiaye bintu bikese anyi bia bungi; kadi [bubanji bua] muntu mubanji kabuena bumuladika tulu.’ (Muambi 5:10, 12) Nunku, nkuepi kuutu wewe upetela nsombelu muimpe?

Biwikala mu nsombelu udi mufuanangane ne wa Josué uvua ujinga bivuaye kayi mua kupeta, kuenaku mua kushintulula meji ebe anyi? Bantu badi bakunange bulelela nebakukuatshishe anu muakenzelabu Josué kudi ba mu dîku diabu ne balunda bende ba mu tshisumbu tshia bena Kristo. Udi mua kupeta nsombelu mutambe buimpe ku musoko pamue ne bantu badi bakunange kupita mu tshimenga mudi bantu badi mua kujinga anu bua kukudia biebe bintu.

Biwikala mumane kupeta bintu bivule bu muvua Liz ne bayende, kuenaku mua kuakaja nsombelu webe bua kufila dîba diebe ne makanda a bungi mu mudimu wa diambuluisha bantu, bapele ne babanji, bua kumanyabu malu a Bukalenge budi buikale mushindu muakane wa kupeta nsombelu muimpe mulelela anyi?

Biwikala wipatshila mianzu ne miaba minene mu nsombelu anyi ku mudimu, mbimpe udikonke mu bulelela bua kumanya tshidi tshikusaka bua kuyipatshila nunku. Bulelela, wewe muikale ne bintu kampanda bia mushinga, bidi mua kukuvudijila disanka mu nsombelu. Kadi, udi mua kushala muteke Bukalenge (budi mushindu mulelela wa kufika ku nsombelu muimpe wa kashidi) bu tshipatshila tshiebe tshinene anyi? Vuluka mêyi akamba Yezu aa: ‘Kupa kudi kutamba kuangata kusankisha muntu.’ (Bienzedi 20:35) Wewe mudifile mu midimu mishilashilangane ya mu tshisumbu tshia bena Kristo, neupete nsombelu muimpe mutambe.

Bantu badi beyemena Yehowa ne Bukalenge buende ne muoyo mujima badi mpindieu badiundadiunda mu nsombelu muimpe wa disanka ne mbatekemene bua kupeta nsombelu muimpe tshishiki mu matuku adi kumpala. Mufundi wa Misambu wakamba ne: ‘Ngakuteka Yehowa kumpala kuanyi misangu yonso; bualu bua yeye udi ku tshianza tshianyi tshia balume, tshiena nnyungishibua. Nunku mutshima wanyi udi usanka, ne nyuma wanyi udi usanka kabidi. Mubidi wanyi udi mushikame mupandishibue [peshi, musombe bimpe].’​—Misambu 16:8, 9.

[Kazubu/​Tshimfuanyi mu dibeji 6]

Bualu bulonda mu ditunga dia Bénin

Bualu ebu mbulonda misangu binunu ne binunu mu mishindu kabukabu. Matuku adi mashale aa, mukulumpe mukuabu wa mu musoko kampanda wa mu Bénin (ku Ouest kua Afrike) wakalondela bamue bana bualu ebu nunku eu:

Mulobi mukuabu uvua upingana pambelu mu buatu buende, e kusambakenaye ne mumanyi kampanda mupiluke wa malu a bungenda-mushinga mufumine mu ditunga dia ku ba bende, mulue kuenzela mudimu mu ditunga dipele edi. Ke mumanyi au kumuebeja tshivuaye upinganyina pambelu kumpala kua dîba nanku. Mulobi e kumuandamuna ne: uvua mua kushala mutantshi bua kutungunuka ne kuloba, kadi mishipa ikavuaye mukuate ivua mikumbane bua kudisha dîku diende.

Mumanyi au kumukonka ne: “Mpindieu, udi wenza tshinyi ne dîba dionso didi dishale edi?”

Mulobi kumuandamunaye ne: “Aa, se ndi ndobaku kakese. Nnaya ne bana banyi. Padi munya ukola, tuetu bonso kuanji kulalaku kakese bua kuikisha. Ku dilolo, tuetu kudia biakudia pamue. Pashishe, tupetangana ne balunda banyi bua kumvuaku ndambu wa mijiki, amu nanku.”

Mumanyi e kumukosa ku dîyi ne: “Tangila! meme uudi umona eu ndi mujikije iniversite, malu aa ke andi mulonge. Ndi musue kukuambuluisha. Mbimpe ushale muaba eu utungunuke ne kuloba mutantshi mule. Udi mua kupeta mishipa ya bungi wewe kulua pamuapa abidi abidi aa kusumba buatu bunene bupite ebu. Bualu wewe ne buatu bunene, udi mua kupeta bintu bivule; abidi mmale asatu mmîpi, wewe kusumba milongolongo ya mazuwa a mâyi a kuloba nawu.”

Mulobi kumuebejaye ne: “Pashishe nempete tshinyi?”

Mumanyi au e kumuandamuna ne: “Pashishe, pamutu pa wewe kuikala upana mishipa kudi basumbuludi, udi mua kutuadija kuyipanyisha kudi bena matanda manene anyi mene kujula webe kumpanyi wa dipatula dia mishipa mitalale anyi ya mu makopo. Neumbuke mu musoko wenu eu, wewe kuya kusombela mu Cotonou, anyi mu Paris peshi mu New York kakuyi lutatu, ulombuelaku midimu yebe yonso. Udi nansha mua kusombesha kumpanyi mikuabu tshitupa tshia mpetu yebe, mona wewe kuboyangana ne bubanji.”

Mulobi e kumuebeja ne: “Bionso abi bidi mua kungangata matuku bungi munyi?”

Mumanyi au ne: “Pamuapa nansha bidimu 15 anyi 20.”

Mulobi e kuamba kabidi ne: “Pashishe nempete tshinyi?”

Mumanyi kumuambila ne: “Dîba adi neumone mualengela nsombelu. Nunku neumone mua kuyaku mu dikisha. Udi mua kukuopoka mu muonji wa midimu ya buatshia buila ya mu bimenga, wewe kuyaku ku misoko ya kule.”

Ke mulobi kumuebeja ne: “Pashishe nempete tshinyi?”

“Dîba adi udi upeta mushindu wa kulobaku kakese, kunaya ne bana bebe, kulalaku kakese padiku munya mukole, kudia biakudia bia dilolo ne dîku diebe ne kusomba ne balunda bebe bua kutelejaku mijiki.”

[Bimfuanyi mu dibeji 7]

Kubanda mianzu kudi mua kupeteshangana nsombelu muimpe anyi?

[Bimfuanyi mu dibeji 8]

Bana benu bena Kristo badi bajinga mu bulelela buonso bua wikale ne nsombelu muimpe