Padibi bikengela kunyema

LELU’EU bantu batu basue kudileja mudibu ne dikima peshi muoyo mukole bua kutuilangana ne mateta. Batu misangu ya bungi bangata muntu udi unyema bualu kampanda bu udi kayi ne bukole anyi bu mutebelele. Badi mene nansha mua kubanga kumuseka.

Kadi Bible udi uleja patoke ne: kudi bikondo bidi kunyema kuikale muanda wa meji udi uleja dikima. Bua kujadika bualu ebu, bangabanga ne Yezu Kristo kutuma bayidi bende mu mudimu wa buambi, wakabambila ne: ‘Panukengeshabu mu musoko eu, nunyemene ku mukuabu.’ (Matayo 10:23) Bushuwa, bayidi ba Yezu bavua ne bua kukeba bua kunyema bantu bavua babakengesha. Kabavua ne bua kuluangana mvita, bakeba bua kukudimuisha bantu mitshima ku bukole nansha. Bavua bamanyisha mukenji wa ditalala. (Matayo 10:11-14; Bienzedi 10:34-37) Nunku pamutu pa bena Kristo kufikabu tshiji, bavua ne bua kunyema, kumbuka muaba uvua bantu babayobola. Nunku bavua bashala ne kuondo ka muoyo kimpe ne balame kabidi malanda abu a mushinga mukole ne Yehowa.​—2 Kolinto 4:1, 2.

Bible udi uleja tshilejilu tshibengangane ne etshi mu mukanda wa Nsumuinu. Udi wakulamu bua nsongalume kampanda, pamutu pa yeye kunyema diteta, wakalonda mukaji wa ndumba ‘bu mudi ngombe uya ku tshishipelu.’ Ntshinyi tshiakamuenzekela? Dikenga diakamukuata bualu wakapona mu ditetshibua divua ne bua kujimija muoyo wende mene.​—Nsumuinu 7:5-8, 21-23.

Ntshinyi tshiudi mua kuenza wewe muikale kumpala kua diteta dia kuenda masandi anyi njiwu mikuabu idi mua kumueneka? Dîyi dia Nzambi didi dileja ne: bualu budi mua kuikala buimpe bua wewe kuenza nkunyema, kumbuka diakamue muaba au.​—Nsumuinu 4:14, 15; 1 Kolinto 6:18; 2 Timote 2:22.