Bulema kabuena ne muaba udibu bushiye

BAKABAKULA Christian (wa mu dimue ditunga dia mu Afrike) kudi basalayi, kubangabu kumuenzeja ku bukole bua kubuelaye ku busalayi; kadi bua kuondo kende ka muoyo kalongesha kudi Bible, wakabenga. Ke basalayi abu kuyabu nende mu kamue kamponya kabu, kumuelabu mututu wa matuku anayi, pashishe umue wa ku basalayi abu kumuasa tshingoma ku mukolo. Christian wakadienzeja kubuelaye mu lupitadi, kadi nansha nanku bakakosela mukolo wende muinshi mua tshinu. Mu ditunga dikuabu kabidi dia mu Afrike, nansha bana batekete mbashale pabu ne bidimba bikosa mushindu eu kudi basalayi bavua baluisha mbulamatadi. Kubangila anu mu ditunga dia Cambodge too ne ku mikuna ya Balkans, kuangatshila kabidi mu Afghanistan kueyeka mu Angola, bingoma bia mine bidibu bajike mu maloba mbitungunuke ne dikosa bana ne bantu bakole bidimba kabiyi bibafua luse.

Kabidi bulema bukuabu mbulela kudi njiwu kampanda ne masama bu mudi disama dia diabeta. Nansha padiku bintu bia mulungu [mu kapepe] muaba udi bantu basombele, bulema budi mua kumueneka kabidi. Tshilejilu, bantu ba bungi ba tshitupa tshimue tshia mu tshimenga kampanda tshia ku Mputu wa kudi dîba dipatukila mbalele bana bavule kabayi ne kalum’a diboko ka ku dia balume nansha. Badi anu ne katumpampa ka diboko kakese tshianana muinshi mua lukengibue. Mbimueneke ne: bulema ebu mbua mu mashi a baledi babu adi manyanga kudi bintu kampanda bia mulungu bia muaba au. Bakuabu bantu pabu bungi kabuyi kubala badi ne bidimba biabu bionso bijima kadi bikale bitekete bua tuneke anyi bua disama dikuabu. Bulelela, bulema kabuena ne muaba udibu bushiye to.

Nansha bulema buobu bufumine ku tshinyi, budi mua kuvuambula muntu bikole. Bakakosa Junior kalum’a mukolo ka ku dia bakaji pakavuaye ne bidimu 20. Wakamba ne: “Mvua ne tunyinganyinga tukole. Ngakadila bikole pamvua mvuluka ne: tshivua kabidi mua kupeta mukolo wanyi to. Tshivua mumanye tshia kuenza to. Mutu wakantayika.” Kadi panyima pa matuku, Junior wakashintulula lungenyi luende bikole menemene. Wakabanga kulonga Bible e kumanyaye malu akalua kumuambuluisha bua kutantamena lutatu luende ne kumupetesha kabidi ditekemena dia dikema dia masanka atuapeta pa buloba apa matuku atshilualua. Biwikale ne bulema, udi wanyisha bua kupeta pebe ditekemena edi anyi?

Bikalabi nanku, suaku ubale tshiena-bualu tshidi tshilonda. Tudi tukulomba bua ubale ne mvese idimu ayi mu Bible webe bua udimuene wewe nkayebe tshidi Mufuki mulongoluele badi balonga disua diende ne bakaja nsombelu wabu bilondeshile disua edi.