Mushindu uvua muana muambuluishe tatuende

NSONGALUME mukuabu wa mu ditunga dia Angleterre wa bidimu bitue ku 30 ne pamutu, diende James, utu ne disama dia mpala ne dia lungenyi. Kukadi bidimu bia bungi biakatuadijaye kubuela mu bisangilu bia Bantemu ba Yehowa yeye ne mamuende ne yayende. Kadi, tatuende kavua muanji kulejaku ne: uvua dijinga menemene ne malu abu a Nzambi au to. Dilolo kampanda panyima pa tshisangilu tshivuabu baleje tshia kuenza bua kubikila mulunda anyi mumanyangana nende mu Tshivulukilu tshia lufu lua Kristo, James wakaya lubilu mu nzubu wende wa bulalu. Mamuende kumulondaye mu nzubu ne buôwa buonso e kumusangana ukalakasangana mu bibejibeji bia kale bia Tshibumba tshia Nsentedi ne bia Réveillez-vous! James wakasungula tshibejibeji tshimue tshivua ne mêyi a mu kabeji ka dibikilangana naku mu Tshivulukilu mafunda mu dibeji diatshi dia ndekelu e kupatuka lubilu mutangile kudi tatuende. Wakafunkuna tshia kumpala tshimfuanyi tshivua pa tshibejibeji, pashishe kufunkunaye tatuende umuambila ne: “Wewe!” Tatuende ne mamuende kutangilanganabu bakema pakamonabu ne: James uvua wambila tatuende bua abuele mu Tshivulukilu. Tatuende wakitaba bua kuyamu.

Dilolo dia Tshivulukilu dikumbana, James kubuela muaba uvua tatuende uteka bilamba biende, kusungula mupanu e kuya nawu kudi tatuende umulejawu ne tshianza bua se: auvuale. Tatuende kumuandamuna ne: kavua mua kuya mu tshisangilu atshi to. Ke James ne mamuende kuasabu luendu nkayabu batangile ku Nzubu wa Bukalenge.

Kadi kunyima kua matuku, James wakabanga kubenga pavua mamuende ukeba bua kumulongolola bua kuyabu mu bisangilu bia tshisumbu, ujinga bua kuikala ushala ne tatuende kumbelu. Ke bualu kayi Dia lumingu kampanda mu dinda James wakabenga kabidi pavua mamuende ukeba bua kumulongolola bua kuyabu mu bisangilu. Kadi mamuende wakakema bikole pakakudimuka tatuende wa James e kumutangila umuambila ne: “James, meme muye mu bisangilu lelu eu neuye pebe anyi?” James wakasangala bikole. Kuelaye tatuende mu tshitupa wamba ne: “Eyowa!”, nunku bonso basatu kuasa luendu batangile ku Nzubu wa Bukalenge.

Kubangila anu dituku adi, tatuende wa James wakatungunuka ne kubuela mu bisangilu bionso bia Dia lumingu, matuku makese kuambaye ne: bua yeye kuyaye kumpala bimpe, uvua ne bua kuikala ubuela mu bisangilu bikuabu kabidi. (Ebelu 10:24, 25) Ke tshiakenzaye, ne kunyima kua ngondo ibidi, kutuadijaye kulonga Bible pa tshibidilu. Kakanengakana to, wakashintulula bikadilu biende ne mitalu yonso, ne panyima pa matuku makese, yeye kutuadija mudimu wa diyisha dia Bukalenge. Panyima pa dilonga dia Bible tshidimu tshijima, wakatambula mu mâyi bua kuleja patoke muvuaye mudilambule kudi Yehowa. Lelu eu ukadi musadidi wa mudimu mu tshisumbu tshiabu. Mpindieu buonso buabu badi basadila Yehowa mu buobumue mu dîku diabu.