Nnganyi wapanduka palua dituku dia Yehowa?

‘Dituku nedilue didi diosha bu kapia ka mu tshikutu.’​—MALAKI 4:1.

1. Mmunyi mudi Malaki umvuija nshikidilu wa bukua-panu ebu bubi?

 NYUMA wa Nzambi wakasaka muprofete Malaki bua kufunda milayi ya malu adi akuatshisha buôwa ikala ne bua kuenzeka mu matuku makese adi kumpala eku. Malu aa nealenge muntu yonso pa buloba. Malaki 4:1 udi umanyisha ne: ‘Monayi, dituku nedilue didi diosha bu kapia ka mu tshikutu, ne bonso badi badisue ne benji ba malu mabi bonso nebikale bu bisonsa; ne dituku adi didi dilua nedibashidishe, kadiena dibashila nansha muji nansha ditamba.’ Bukua-panu ebu bubi nebubutuke butubutu, bualu nebikale anu bu miji ya mutshi idibu babutule bua mutshi au kausampidi kabidi to.

2. Mmunyi mudi imue mvese yumvuija dituku dia Yehowa?

² Udi mua kukonka ne: ‘“Ndituku” kayi edi didi muprofete Malaki umanyisha?’ Ndituku diodimue didibu bambe mu Yeshaya 13:9, ne: ‘Monayi, dituku dia Yehowa dilualua, dikengesha bantu, dikala dia tshikisu ne dia tshiji tshikole, ndia kuvuija buloba bu tshipela tshia patupu, ndia kubutula bantu babi.’ Sefanya 1:15 udi ufila diumvuija edi: ‘Dituku adi ndituku dia njiya, ndituku dia ntatu ne kanyinganyinga, ndituku dia kunyanguka ne kubutuka, ndituku dia mîdima ne mufitu, ndituku dia matutu ne mîdima mikole.’

“Dikenga dinene”

3. “Dituku dia Yehowa” ntshinyi?

³ Mu dikumbana dinene dia mulayi wa Yelemiya wa “dituku dia Yehowa” ndupolo lua tshikondo tshikala “dikenga dinene” mua kuenzeka. Yezu wakamanyisha ne: “Bualu mu matuku awu nemuikale dikenga dinene didi kadiyi dianji kufika katshia ku ntuadijilu wa buloba too ne mpindiewu. Kashidi, dikenga dia mushindu ewu kadiakufika kabidi.” (Matayo 24:21, MMM) Elabi meji bua ntatu ikadi bantu bamone, nangananga kubangila mu 1914. (Matayo 24:7-12) Mvita Mibidi ya Buloba bujima nkayayi  yakashipa bantu bapite pa miliyo 50! Pabi malu enzeka mu tshikondo tshia “dikenga dinene” neikale mipite aa kule ne kule. Dikenga dinene edi, didi muomumue ne dituku dia Yehowa, nedijike ne Armagedone, nedifikishe matuku a nshikidilu wa tshikondo etshi tshibi ku ndekelu kuawu.​—2 Timote 3:1-5, 13; Buakabuluibua 7:14; 16:14, 16.

4. Pafika dituku dia Yehowa ku ndekelu, ntshinyi tshikala tshimane kuenzeka?

⁴ Ku ndekelu kua dituku dia Yehowa adi, bukua-panu bua Satana ne bantu badi babulamate nebabutudibue. Kumpala nebabutule bitendelelu bia dishima. Pashishe Yehowa neabutule ndongoluelu ya Satana ya malu a bungenda-mushinga ne a tshididi. (Buakabuluibua 17:12-14; 19:17, 18) Yehezekele udi umanyisha ne: ‘Nebimanshe bintu biabu bia argent mu misesu, ne tshiamu tshiabu tshia or netshikale kudibu bu tshintu tshidi ne manyanu. Biamu biabu bia argent ne bia or kabiena bimanye mua kubapandisha mu dituku dia tshiji tshikole tshia Yehowa.’ (Yehezekele 7:19) Sefanya 1:14 udi wamba bua dituku adi ne: ‘Dituku dinene dia Yehowa didi pabuipi; didi pabuipi ne didi didiendesha lukasa!’ Bilondeshile tshidi Bible wamba bua dituku dia Yehowa, tudi ne bua kuikala badisuike bua kuenza malu mumvuangane ne malu makane adi Nzambi utulomba.

5. Ntshinyi tshidi bantu badi batshina Yehowa bapeta?

⁵ Kunyima kua Malaki mumane kuleja tshikala dituku dia Yehowa ne bua kuenzela bukua-panu bua Satana, Malaki 4:2 udi utela mêyi a Yehowa a se: ‘Dîba dia buakane nedinubandile nuenu badi banemeka dîna dianyi, mibidi yenu neyondapibue mu nkenka yadi. Nuenu nenulopoke, nenunaye bu bana ba ngombe palopokabu mu tshikumbi.’ ‘Dîba dia buakane’ n’Yezu Kristo. Yeye udi “butoke [bua mu nyuma] bua bena panu.” (Yone 8:12, MMM) Yezu udi ubanda ne luondapu, tshia kumpala luondapu lua mu nyuma lutudi tumona lelu, ne pashishe luondapu lua ku mubidi mu bukua-panu bupiabupia. Anu mudi Yehowa wamba, bantu buondapabu ‘nebanaye bu bana ba ngombe palopokabu mu tshikumbi.’

6. Ntshibilu kayi tshia ditshimuna tshienza basadidi ba Yehowa?

⁶ Kadi netuambe tshinyi bua badi babenga kuenza malu adi Yehowa ulomba? Malaki 4:3 udi wamba ne: ‘Yehowa wa misumba udi wamba ne: [Nuenu basadidi ba Nzambi] nenudiate bantu babi, bualu bua nebikale bu dimfuenkenya muinshi mua makasa enu mu dituku dindi ngenza malu au.’ Bantu badi batendelela Nzambi kabakuikala munkatshi mua babutula bukua-panu bua Satana to. Kadi, badi ‘badiata bantu babi’ mu tshimfuanyi padibu babuela mu tshibilu tshia ditshimuna tshialonda dituku dia Yehowa. Tshibilu tshinene tshiakenzeka kunyima kua dibutuka dia biluilu bia Palô mu Mbuu Mukunze. (Ekesode 15:1-21) Kunyima kua dibutuka dia Satana ne bukua-panu buende mu dikenga dinene, pamu’apa nekuenzeke tshibilu tshia ditshimuna. Bena lulamatu ba Yehowa bapanda mu dituku dia Yehowa nebele mbila ne: ‘Tuikale ne disanka, tusanke mu lupandu luende.’ (Yeshaya 25:9) Ndisanka bunenapu kayi dikaleku pabingishabu bumfumu bua Yehowa ne pakezulabu buloba bua bantu bena ditalala kusombabu puopu!

Bukua-buena-Kristo budi buidikija Isalele

7, 8. Umvuija nsombelu wa mu nyuma wa Isalele mu tshikondo tshia Malaki.

⁷ Bantu badi Yehowa wanyisha ngaba badi bamusadila, ne mbashilangane ne aba badi kabayi bamusadila to. Ke mushindu uvua malu pakafunda Malaki mukanda wende eu. Mu 537 B.B., bakapingaja bashadile bena Isalele mu buloba buabu kunyima kua bamane kuenza bidimu 70 mu bupika mu Babulona. Kadi, munkatshi mua bidimu lukama biakalonda, bantu aba bavuabu bapingaje mu buloba buabu bakabanga kulekela ntendelelu wa Yehowa ne kubangabu kuenza malu mabi. Bantu ba bungi bavua bapetula dîna dia Yehowa; bakabenga kutumikila mikenji yende miakane; bakanyanga ntempelo wende pavuabu balua ne nyama mifue mêsu, mitshibuke ne ivua isama bua kufila milambu; ne bavua babenga bakaji ba mu bunsongalume buabu.

⁸ Ke bualu kayi Yehowa wakabambila ne: ‘Nensemene pabuipi nenu bua kulumbulula bilumbu bienu; nengikale mumonyi udi utuisha batempeshi ba mbuku ne bena masandi lubilu,  bantu badi baditshipa ne mitshipu ya mashimi, badi bakengesha muena mudimu padibu bamufuta difutu diende ne mukaji wa mu lufuila ne muan’a nshiya, bantu badi bakengesha muntu wa tshisamba tshia bende ne badi kabayi bantshina mene. Bua meme Yehowa, tshitu ngakudimuka.’ (Malaki 3:5, 6) Kadi Yehowa wakalomba bonso bavua mua kulekela bienzedi biabu bibi ne: ‘Pinganayi kundi ne meme nempingane kunudi.’​—Malaki 3:7.

9. Mmushindu kayi uvua milayi ya Malaki mipete dikumbana diayi dia kumpala?

⁹ Mêyi aa akakumbana kabidi mu bidimu lukama bia kumpala. Bashadile ba bena Yuda bakasadila Yehowa ne kubuelabu mu “tshisamba” tshipiatshipia tshia bena Kristo bela manyi, muakaluabu kubuela kunyima kudi bantu ba bisamba bia bende. Kadi bena Isalele ba bungi ba ku mubidi bakabenga Yezu. Ke bualu kayi wakambila tshisamba tshia Isalele ne: ‘Nzubu wenu udi mushale munda mutupu.’ (Matayo 23:38; 1 Kolinto 16:22) Mu 70 B.B., anu mukavua Malaki 4:1 mumanyishe, ‘dituku didi diosha bu kapia ka mu tshikutu’ diakakuata Isalele wa ku mubidi. Yelushalema ne ntempelo uvuamu biakabutuka, ne badi bamba ne: bantu bapite pa muliyo mujima bakafua nzala, pavua baluangana bafuilakena bumfumu, ne mu mvita ivua biluilu bia bena Lomo biela. Kadi dikenga adi kadiakakuata bantu bavua basadila Yehowa to.​—Mâko 13:14-20.

10. Mmushindu kayi udi bantu bonso ne balombodi ba bitendelelu bidikija Isalele wa mu bidimu lukama bia kumpala?

¹⁰ Bukua-bantu, nangananga Bukua-buena-Kristo mbuidikije tshisamba tshia Isalele tshia mu bidimu lukama bia kumpala. Balombodi ne bantu mu bonso ba mu Bukua-buena-Kristo mbanange malongesha a mu bitendelelu biabu kumpala kua malu malelela a Nzambi avua Yezu mulongeshe. Nangananga balombodi ba bitendelelu ke badi ne tshibawu. Badi babenga kutela dîna dia Yehowa, badi badiumbusha mene mu Bible yabu. Badi bapetula Yehowa ne malongesha adi kaayi mu Mukanda wa Nzambi, bu mudi malongesha a bisamba bia bende a makenga a kashidi mu inferno wa kadilu, Busatu Bunsantu, dibenga kufua dia anyima ne didimenena dia bintu. Nunku badi biba Yehowa butumbi budi bumuakanyine, anu muakenza bakuidi ba mu tshikondo tshia Malaki.

11. Mmunyi mudi bitendelelu bia panu bileja udibi bikuatshila mudimu bulelela?

¹¹ Mu 1914 (tshikondo tshiakatuadija matuku a ku nshikidilu), bitendelelu bia panu, bilombola kudi bantu bavua badiamba muvuabu bena Kristo biakaleja uvuabi bikuatshila mudimu bulelela. Munkatshi mua mvita yonso ibidi ya buloba bujima, biakasaka benamu bua kuya kuluangana mvita bua makokangana avua pankatshi pa matunga, nansha pavuabi bikengela kushipa  mene bantu ba mu bitendelelu biabu. Dîyi dia Nzambi didi dileja patoke aba badi batumikila Yehowa ne badi kabayi bamutumikila: ‘Mu muanda eu bana ba Nzambi ne bana ba Diabolo badi bajinguluka; muntu yonso udi kayi wenza malu makane kêna wa Nzambi; ne yeye udi kayi unanga muanabu kabidi. Bua edi ndîyi dinuakumvua ku tshibangidilu bua tuetu tunangangane; ke mbua kuikala bu [Kayine], wakadi wa mubi, wakashipa muanabu.’​—1 Yone 3:10-12.

Dikumbaja dia mulayi

12, 13. Mmilayi kayi idi basadidi ba Nzambi bakumbaje mu tshikondo tshietu etshi?

¹² Ku ndekelu kua Mvita Mibidi ya Buloba bujima mu 1918, basadidi ba Yehowa bakamona bimpe ne: Yehowa uvua mupishe Bukua-buena-Kristo ne bitendelelu bikuabu bionso bia dishima. Kubangila anu mu tshikondo atshi, bakela bantu ba mitshima ivua ijingulula malu makane lubila ne: ‘Bantu banyi, nulopoke munkatshi muende, bua nuenu kanuikadi ne buobumue nende mu malu mabi ende, bua kanuangatshi makenga ende, bualu bua malu ende mabi akalungakana too ne mu diulu, ne Nzambi wakuvuluka bienzedi biende bibi.’ (Buakabuluibua 18:4, 5) Bantu bavua basue kusadila Yehowa bakabanga kulekela malu a bitendelelu bia dishima ne kutuadijabu kuyisha lumu luimpe lua Bukalenge pa buloba bujima mudimu udi ne bua kujika kumpala kua nshikidilu wa bukua-panu bubi ebu.​—Matayo 24:14.

¹³ Biakenzeka nunku bua kukumbaja mulayi udi mu Malaki 4:5, muakamba Yehowa ne: ‘Monayi, nennutumine Eliya muprofete diambedi dituku dia Yehowa kadiyi dianji kulua, dituku adi dinene ne didi dikuatshisha bantu buôwa.’ Mulayi eu wakakumbanyina musangu wa kumpala mudimu wa Yone Mubatiji, uvua muikale tshimfuanyi tshia Eliya. Yone wakenza mudimu mufuane wa Eliya pavuaye utambuisha bena Yuda bavua banyingalala bua mpekatu ivuabu benze ishipa tshipungidi tshia Mikenji. Tshivua ne mushinga menemene ntshia se: Yone uvua mudianjidi wa Masiya. Kadi, mudimu wa Yone uvua anu dikumbana dia kumpala dia mulayi wa Malaki. Pavua Yezu wamba ne: Yone uvua Eliya muibidi, wakaleja ne: kuvua ne bua kuenzeka mudimu wa “Eliya” mu matuku atshivua alua.​—Matayo 17:11, 12.

14. Mmudimu kayi wa mushinga udi ne bua kuenzeka kumpala kua kubutulabu bukua-panu ebu bubi?

¹⁴ Mulayi wa Malaki wakaleja ne: mudimu eu munene wa Eliya uvua ne bua kuenzeka kumpala kua “dituku adi dinene [dia Yehowa] didi dikuatshisha bantu buowa.” Dituku adi didi dijika ne mvita ya dituku dinene dia Nzambi Wa-Bukole-Buonso didi dienda disemena ne lukasa: ku Armagedone. Malu aa adi aleja ne: nshikidilu wa bukua-panu ebu bubi ne ntuadijilu wa Bukalenga bua Nzambi bua Bidimu Tshinunu bualombola Yezu Kristo nebilue kunyima kua mudimu mufuanangane ne wakenza Eliya. Bilondeshile mulayi eu, kumpala kua Yehowa kubutula bukua-panu ebu bubi, bena mu kasumbu ka Eliya wa lelu, (katua munyima kudi bena Kristo miliyo mivule badi ne ditekemena dia kupeta muoyo pa buloba), badi bakumbaja ne disanka dionso mudimu wa kujadika ntendelelu mulelela, batumbisha dîna dia Yehowa, ne balongesha bantu badi bu mikoko malu malelela a mu Bible.

Yehowa udi ubenesha basadidi bende

15. Mmunyi mudi Yehowa uvuluka basadidi bende?

¹⁵ Yehowa udi ubenesha bantu badi bamusadila. Malaki 3:16 udi wamba ne: ‘Bakadi [batshina] Yehowa bakasombeshangana, ne Yehowa wakabateleja matshi, wakabumvuila, ne mukanda wa tshivulukidi wakafundibua kumpala kuende bua kuanyisha bantu aba bakadi batshina Nzambi ne bakadi banemeka dîna diende.’ Kubangila anu ku Abele, Yehowa mmuenze anu bu udi ufunda mêna mu mukanda, a bantu bikalaye mua kuvuluka bua kubapesha muoyo wa tshiendelele. Yehowa udi wambila bantu aba ne: ‘Luayi ne tshia dikumi tshionso mu nzubu wa kubutshila bintu, bua biakudia bikale mu nzubu muanyi; Yehowa wa misumba udi wamba ne: Nuntete mpindieu ne muanda eu, numone bingikala tshiyi mununzuluile bibi bia mu diulu, munulokeshile masanka, kanuyi nukengela bintu bikuabu kabidi.’​—Malaki 3:10.

16, 17. Mmunyi mudi Yehowa mubeneshe bantu bende ne mudimu wabu?

¹⁶ Bushuwa, Yehowa mmubeneshe bantu badi bamusadila. Mmushindu kayi? Tshilejilu  mmubapeshe dimanya divule dia kujingulula malu adiye mupangadike bua kuenza. (Nsumuinu 4:18; Danyele 12:10) Mmubabeneshe kabidi padiye mubapeshe bipeta bimpe bidi bikemesha mu mudimu wabu wa buambi. Bantu ba bungi badi bajinga malu malelela mbalue kudisangisha nabu pamue mu ntendelelu mulelela, ne buobu buonso badi benza “musumba munene wa bantu . . . ba bisamba bionso, ba bisa bionso, matunga ne miakulu yonso. Ne [badi] bela lubila lukole bamba ne: ‘Lupandu luetu ludi lufuma kudi [Nzambi] wetu udi musombe mu nkuasa wa bukalenge, ne kudi Muana wa Mukoko.’” (Buakabuluibua 7:9, 10, MMM) Musumba munene eu mmumueneke mu mushindu wa dikema, ne bantu badi basadila Yehowa ne tshisumi mpindieu mbapite pa miliyo isambombo mu bisumbu bipite pa 93 000 pa buloba bujima!

¹⁷ Mabenesha a Yehowa adi amueneka kabidi mu mushindu wa se: Bantemu ba Yehowa badi bapatula mikanda ya malu a mu Bible idibu batambe kuabanya pa buloba bujima. Patudi tuakula apa, ku ngondo yonso badi bapatula miliyo 90 ya tshibejibeji tshia Tshibumba tshia Nsentedi ne tshia Réveillez-vous!, Tshibumba tshia Nsentedi tshidi tshipatuka mu miakulu 144, ne Réveillez-vous! mu miakulu 87. Mukanda wa kulonga nawu Bible wa Bulelela budi bufikisha ku muoyo wa kashidi (mupatula mu 1968), bavua bawabanye miliyo mipite pa 107 mu miakulu 117. Bakabanya mukanda wa Udi mua kuikala ne muoyo wa kashidi pa buloba bukudimuna mparadizu (mupatula mu 1982) miliyo mipite pa 81 mu miakulu 131. Mukanda wa Dimanya didi difikisha ku muoyo wa kashidi (mupatula mu 1995) mbaupatule wowu miliyo mipite pa 85 mu miakulu 154. Broshire wa Ntshinyi tshidi Nzambi utulomba? (mupatula mu 1996) mbamuabanye mpindieu miliyo 150 mu miakulu 244.

18. Bua tshinyi tudi tutanta mu nyuma nansha mudibu batuluisha?

¹⁸ Mbapete ditanta dia mu nyuma edi nansha mudiku buluishi bukole bua munanunanu  bukebesha kudi bukua-panu bua Satana. Ebi bidi bijadika bulelela bua mêyi adi mu Yeshaya 54:17 (MMM) a se: “Tshiamu tshidibo bafula bua kukuluisha natshio katshiakutua. Muntu wakufunda ku tshilumbu, neumufuishe bundu. Ke tshidi tshienzekela basadidi ba [Yehowa]; ndi mbambuluisha bua kutshimunabu baluishi. Ke mudi [Yehowa] wamba nanku.” Bidi bikolesha basadidi ba Yehowa ku muoyo padibu bamanya ne: Malaki 3:17 udi ubakumbanyina buobu mu mushindu munene: ‘Buobu nebikale banyi, mu dituku dindi ngenza malu aa, nebikale bantu banyi nkayanyi meme.’

Tusadilayi Yehowa ne disanka

19. Mmunyi mudi bantu badi basadila Yehowa bashilangane ne badi kabayi bamusadila?

¹⁹ Dishilangana didi pankatshi pa basadidi ba lulamatu ba Yehowa ne bena mu bukua-panu bua Satana didi dienda dimueneka patoke padi bidimu bienda bipita. Malaki 3:18 wakamanyisha ne: ‘Nenujingulule [dishilangana] pankatshi pa bantu bimpe ne bantu babi, pankatshi pa badi bakuatshila Nzambi mudimu ne badi kabayi bamukuatshila mudimu.’ Bumue bua ku malu a bungi adi aleja dishilangana mbua se: bantu badi basadila Yehowa badi bamusadila ne disanka dia bungi. Bumue bua ku malu adi abasaka bua kuikala ne disanka edi nditekemena dilenga didibu nadi. Mbeyemene Yehowa ne muoyo mujima padiye wamba ne: ‘Monayi, ndi mfuka diulu dipiadipia ne buloba bupiabupia; malu a diambedi kaena avulukibua, ne malu aa kaena abuela mu mitshima kabidi. Kadi nuikale bienu ne disanka, nusanke tshiendelele.’​—Yeshaya 65:17, 18; Musambu 37:10, 11, 29; Buakabuluibua 21:4, 5.

20. Bua tshinyi tudi bantu ba disanka?

²⁰ Tudi tuitaba ne: dilaya dia Yehowa dia se: bantu bende bena lulamatu nebapande mu dituku diende dinene ne nebabuele mu bukua-panu buende bupiabupia. (Sefanya 2:3; Buakabuluibua 7:13, 14) Ne nansha mudi bamue mua kufua bua bukulakaje, masama, anyi njiwu kampanda kumpala kua bukua-panu bupiabupia ebu kuluabu, Yehowa udi utujadikila ne: neababishe ku lufu bua kuikalabu ne muoyo wa tshiendelele. (Yone 5:28, 29; Tito 1:2) Nunku nansha mutudi tuetu bonso ne ntatu ne makenga, patudi tuenda tusemena pabuipi ne dituku dia Yehowa edi, tudi ne bijadiki bikole bua tuetu kuikala bantu badi ne disanka dia bungi pa buloba.

Newandamune munyi?

• ‘Dituku dia Yehowa’ ntshinyi?

• Mmunyi mudi bitendelelu bia pa buloba bidikija Isalele wa kale?

• Mmilayi kayi idi basadidi ba Yehowa bakumbaja?

• Mmunyi mudi Yehowa mubeneshe bantu bende?

[Nkonko ya dilonga]

[Tshimfuanyi mu dibeji 21]

Yelushalema wa mu bidimu lukama bia kumpala ‘wakoshika bu kapia ka mu tshikutu’

[Bimfuanyi mu dibeji 23]

Yehowa udi ukumbaja majinga a bantu badi bamusadila

[Bimfuanyi mu dibeji 24]

Bua ditekemena diabu dilenga, basadidi ba Yehowa badi ne disanka dia bushuwa