Utuku ubala mushinga wadi anyi?

YEZU KRISTO wakapesha bayidi bende ditekemena dia kupeta muoyo wa tshiendelele, kadi wakabambila kabidi bua kuanji kubala mushinga wa dikala muena Kristo. Wakabalejila bualu ebu mu mufuanu pakabelaye lukonko ne: ‘Mmukuabu wenu kayi, biasuaye kuibaka tshibumba tshia tushola, kayi mushikame diambedi mubale mushinga watshi ne: ndi ne bia kutshijikija nabi anyi?’ (Luka 14:28) Mmushinga kayi uvua Yezu wamba?

Bena Kristo bonso batu bapeta ntatu, imue mikole ya menemene. (Musambu 34:19; Matayo 10:36) Bua nanku mbimpe tuikale badilongolole biakane mu lungenyi ne mu nyuma bua katulu kupapuka padi ntatu anyi malu makuabu atufikila. Tudi ne bua kuikala tukadi babale mushinga eu wa dikala muyidi wa Kristo mu ntatu mikole ya nunku, bamanye ne: ditupikula ku mpekatu ne ku lufu ndifutu didi dipite tshintu kayi tshionso tshidi bukua-panu ebu mua kutupesha. Bushuwa, kakuena bualu budi Nzambi ulekela butufikila, nansha lufu mene, buikala mua kutuenzela bibi kashidi bituikala batungunuke ne kumusadila.​—2 Kolinto 4:16-18; Filipoi 3:8.

Mmunyi mudi ditabuja dietu mua kulua dikole? Ditabuja dietu didi dienda dikola dishindama misangu yonso itudi tuangata dipangadika diakane, tushala balamate ku mêyi a bena Kristo, anyi tuenza bualu budi bupetangana ne disua dia Nzambi, nangananga patudi mu nsombelu udi utusaka bua kuenza bualu bua tshianana. Patudi tupeta dibenesha dia kudi Yehowa bua lulamatu luetu, ditabuja dietu didi dikola dilue dishindame. Mushindu’au ke utudi tulonda tshilejilu tshia Yezu, tshia balongi bende ne tshia balume ne bakaji bonso ba ditabuja ‘bakabala [bimpe] mushinga’ wa disadila Nzambi munkatshi mua bikondo bia kale bivua ne malu kabukabu.​—Mâko 1:16-20; Ebelu 11:4, 7, 17, 24, 25, 32-38.