‘Luayi kundi, meme nennupe dikisha’

Divulangana dinenanenayi didi dilomba mudimu muvule wa lukasa

YEZU KRISTO wakamba ne: ‘Luayi kundi, meme nennupe dikisha.’ (Matayo 11:28) Aa mmêyi bulengapu kayi nunku adi Mfumu wa tshisumbu tshia bena Kristo utubikila nawu! (Efeso 5:23) Patudi tukonkonona mêyi aa bimpe, tudi tufika ku dianyisha mpokolo wa busambi wa mushinga mukole, ke dibuela ne bana betu balume ne bakaji ba mu nyuma mu bisangilu bietu tuetu bena Kristo. Tudi tuitaba petu mêyi akamba mufundi wa Misambu a ne: “Monayi mudibio bilenga, mudibio disanka, bua kusomba bonso pamue, bu bana ba muntu.”​—Musambu 133:1, MMM.

Bulelela, kakuena balunda balenga bu batudi tupeta mu bisangilu bietu bia tshitendelelu, ne malu a mu nyuma adi apitamu adi afila anu ditalala ne disanka. Ke bualu kayi nsonga kampanda muena Kristo wakamba ne: “Dituku dijima dintu ngenza mu kalasa ditu dinzengeja bikole. Kadi bisangilu bitu biobi anu bu muaba wa tshitalela mu tshipela, muaba undi mpetuluila bukole bua kumona mua kupitshisha bimpe dituku didi dilonda mu kalasa.” Nsonga mukuabu wa mu Nigéria wakamba ne: “Ndi mulue kumona se: kushemeja bulunda ne bantu badi banange Yehowa kudi kungambuluisha bua kushala mumulamate.”

Nzubu wa Bukalenge wa Bantemu ba Yehowa udi ne mudimu munene muaba wonso udiye wa kupetesha bantu kaba bua bisangilu bua ntendelelu mulelela. Mu miaba mivule, batu benzela bisangilu ku Nzubu wa Bukalenge misangu nansha ibidi ku lumingu, ke patudi tukankamija bantu badi balonga Bible bua kutuadijabu kubuela mu bisangilu ebi kakuyi dijingakana bua kupetabu diambuluisha dia kudi balunda ba busambi badimu.​—Ebelu 10:24, 25.

 Dijinga dikole dikengela mitalu

Kadi tumanye ne: Bantemu ba Yehowa ki mbonso badi ne Nzubu ya Bukalenge mimpe to. Divulangana dinenanenayi dia bungi bua bamanyishi ba Bukalenge ba buloba bujima ndijudije dijinga dikole didi dikengela mudimu wa mitalu. Kutshidi kukengela binunu ne binunu bia Nzubu ya Bukalenge nangananga mu matunga adi kaayi ne mabanji a bungi.​—Yeshaya 54:2; 60:22.

Tuangatabi tshilejilu: Mu tshimenga tshikulu tshia République démocratique du Congo muvua Nzubu ya Bukalenge anu dikumi bua bisumbu 290. Mu ditunga edi muvua dijinga dikole dia Nzubu ya Bukalenge mivule. Mu Angola, bisumbu bivule bidi bienzela bisangilu pambelu tshianana, bualu mudi anu Nzubu ya Bukalenge mibala ku minu patupu. Dijinga dia muomumue edi didi kabidi mu matunga makuabu a bungi.

Kadi kubangila mu 1999, mbenze bukole bua kufila diambuluisha mu mudimu wa luibaku lua Nzubu ya Bukalenge mu matunga adi kaayi ne bubanji buvumvuke. Bua midimu ya luibaku kuenzekayi bimpe mu matunga aa, Bantemu (ba mu matunga makuabu) bamanyi ba midimu eyi mbadifile ku budisuile bua kuya kelesha bana babu diboko. Mudimu wabu mukole, pamue ne diambuluisha dia muoyo umue ne didifila dia bana betu badisuile badi basombele mu matunga aa, mbipatule bipeta bidi bisankisha bikole. Pashishe, padibu balongesha Bantemu ba miaba ayi midimu eyi, bidi bibambuluisha. Bionso ebi bidi biambuluisha bua kukumbaja dijinga dia kuibaka Nzubu ya Bukalenge, muntu ne muntu mu ditunga diabu.

Ke mudibu bafile dikuatshisha dilelela nunku, dia mushindu mupepele wa kuibaka Nzubu ya Bukalenge, bua kuyibaka bilondeshile ngibakilu ne bia kuibaka nabi bidi biumvuangana ne bitu bantu benza nabi mudimu muaba udibu basombele. Tshipatshila ki ntshia kukumbaja anu dijinga dinenanenayi dia kupeta Nzubu ya Bukalenge ya bungi, kadi ntshia kukeba kabidi mushindu wa kuikalabu bayitshiunga bimpe bilondeshile ngenzelu wa bantu ne miaba idibu basombele.​—2 Kolinto 8:14, 15.

Bipeta bidi bikolesha mu maboko

Mudimu mukole wa dibaka dia miaba ya tshitendelelu eu mmupatule tshipeta kayi? Ku mbangilu kua 2001, luapolo luakafumina mu Malawi ne: “Mudimu udi muenzeke mu ditunga edi mmuanda wa dikema. Mu ngondo ibidi idi ilua, netujikije Nzubu ya Bukalenge mikuabu.” (Foto wa 1 ne 2) Mu Togo, bena budisuile mbibake Nzubu ya Bukalenge miakanyine ya bungi mu ngondo yashadi eyi. (Foto 3) Mudimu muimpe wa bena budisuile udi kabidi wambuluisha bua kupeta Nzubu ya Bukalenge mu Mexique, mu Brésil, ne mu makuabu matunga.

Bisumbu bidi bileja ne: padi Nzubu wa Bukalenge wibakibua, bantu ba muaba udi nzubu au badi bajingulula ne: Bantemu ba Yehowa mbalue luonso muaba au. Bidi bimueneka ne: kumpala kua Bantemu ba Yehowa kupetabu muaba muimpe mukumbane wa tshitendelelu, bantu bavule bavua babenga  bua kudisangisha nabu. Tshisumbu tshia Nafisi tshia mu Malawi tshidi tshileja ne: “Mpindieu utudi bapete Nzubu wa Bukalenge mukumbane, mbiendeshishe mudimu wa diyisha bimpe bitambe. Nunku, mpindieu mbipepele bua kutuadija kulonga Bible ne bantu.”

Bena mu tshisumbu tshia Krake tshia mu Bénin bavua batshimone kale ne mêyi a dibapuekesha nau milongo bua pavuabu ne Nzubu wa Bukalenge muikale bu wa tshiena musoko pa kumufuanyikija ne bitanda bia bimue bitendelelu. (Foto 4) Mpindieu tshisumbu etshi ntshipete Nzubu wa Bukalenge mupiamupia muimpe udi ufila lumu ne uleja mpala wa tshitendelelu tshilelela mu mushindu mukumbanyine. (Foto 5) Tshisumbu etshi tshivua ne bamanyishi ba Bukalenge 34 ne bantu batue ku 73 bavua babuela mu bisangilu bia Dia lumingu dionso; kadi bantu bakalua dia dibanjija Nzubu wa  Bukalenge bavua 651. Bavule ba kudibu bavua bantu ba mu tshimenga bavua ne disanka dionso bakatshila pavuabu bamone Bantemu bibake nzubu eu mu matuku makese patupu. Pakamona bena filiale wa Zimbabwe bipeta bia mudimu eu, bakafunda ne: “Mu ngondo umue wa dibaka dia Nzubu wa Bukalenge mupiamupia, bungi bua bantu badi babuela mu bisangilu butu pa tshibidilu buvula misangu ibidi.”​—Foto 6 ne wa 7.

Bulelela, Nzubu ya Bukalenge mipiamipia yonso eyi bungi nunku idi yambuluisha bena Kristo bakadi badilambule ne bantu bakuabu badi basue bua bikale ne miaba idibu mua kupetela dikisha anyi busambi bua mu nyuma. Pakabanga tshisumbu tshikuabu tshia mu Ukraine kusangila mu Nzubu watshi wa Bukalenge mupiamupia, Ntemu kampanda uvuamu wakamba ne: “Tudi ne disanka dia bungi. Tudi badimuene ne etu abidi mudi Yehowa wambuluisha bantu bende.

[Kazubu/​Bimfuanyi mu mabeji 10, 11]

Diambuluisha dia kalolo dia mushinga mukole

Bantemu ba Yehowa badi ne disanka divule padibu bamona mudimu wa dikumbaja dijinga dinene dia kupeta Nzubu ya Bukalenge mipiamipia wenda uya kumpala ne lukasa pa buloba bujima. Divula dia bungi bua batendeledi ba Yehowa mu matunga kabukabu didi dilomba bua kuibaka Nzubu ya Bukalenge mipiamipia mivule mu matuku adi kumpala eku. Patudi tutshinka, tudi mua kuamba ne: mu tshidimu tshia mudimu tshia 2001 kuvua kuenzeke bisumbu bipiabipia 32 ku lumingu luonso! Bisumbu ebi bidi dijinga ne miaba ya bisangilu bua kutendelela.

Kadi lukonko ludi mua kujuka ne: ‘Mmunyi mutudi tukokesha bua kupeta makuta a kuenza nawu midimu eyi ya dibaka Nzubu ya Bukalenge mipiamipia, nangananga mu matunga mudi bana betu kabayi ne mpetu ya nsongo?’ Diandamuna didi se: nku diambuluisha dia dikuatshisha dia Nzambi ne muoyo wa kalolo wa bantu.

Mu diumvuangana ne dilaya diende, Yehowa udi witshikijila basadidi bende nyuma wende muimpe, ubambuluisha bua ‘buobu benzele bakuabu bimpe, bikale ne bubanji bua bienzedi bimpe; [bena kalolo], badilongolole bua kupangana bintu.’ (1 Timote 6:18) Nyuma wa Nzambi udi usaka Bantemu ba Yehowa bua kuambuluisha bua mudimu wa diyisha dia Bukalenge wenzeke mu mishindu yonso, badi bafila dîba diabu, makanda abu ne mamona makuabu mu midimu ya bena Kristo.

Lungenyi lua difila mapa ne muoyo wa kalolo ludi lusaka Bantemu ne bantu bakuabu badi bafila makuta bua kutuma mudimu wa Bukalenge kumpala ne kuenzeja mudimu wa luibaku eu. Pa kumbusha diambuluisha ne mfranga itu bisumbu bitula pa tshibidilu, badi bafila mapa bua kuenzeja mudimu wa luibaku miaba mikuabu.

Mu tshisumbu tshionso mutu tushete tudi ne miaku mifunda ne: “Mapa bua mudimu wa pa buloba bujima​—Matayo 24:14.” Mu tushete amu ke mudi bantu mua kuela mapa abu a budisuile padibu bajinga. (2 Bakelenge 12:9) Mapa onso, nansha wowu makese anyi a bungi, badi baanyisha. (Mâko 12:42-44) Mfranga eyi badi bayitula bua malu kabukabu bilondeshile majinga adiku, nansha bua kuibaka Nzubu ya Bukalenge. Kabena bangata mfranga eyi bua kufuta bamfumu ba midimu to, bualu mu Bantemu ba Yehowa kamutu bamfumu aba to.

Mfranga eyi idibu bafila bua mudimu wa buloba bujima itu ikumbaja tshidibu bayifidila anyi? Bidi nanku menemene. Biro bidi bilombola mudimu wa Bantemu mu ditunga dia Liberia (ditunga dinsunsula ne mvita) bidi bileja ne: Bantemu ba bungi ba mu ditunga edi mbalofua ne badi batata bikole bua kupeta mfranga. Mmunyi mudi bantu ba Yehowa ba mu ditunga edi mua kupeta miaba miakane ya kudisangishila bua kutendelela? Biro ebi bidi biandamuna ne: “Mapa a kalolo a bana betu ba mu matunga makuabu neambuluishe bua kuenzeja mudimu eu. Edi ndilongolola dia malu dia meji ne dia dinanga menemene!”

Bana betu ba mu ditunga edi badi bafila pabu mapa nansha mudibu ne dimona dishadile. Luapolo lua biro bia mu ditunga dia mu Afrike dia Sierra Leone ludi luleja ne: “Bana betu ba mu dietu ditunga edi badi pabu bakuatshisha ne badi ne disanka dia kufila diabu diambuluisha peshi mapa onso a mfranga adibu mua kukokesha bua mudimu wa dibaka Nzubu ya Bukalenge.”

Ku ndekelu, mudimu wa luibaku eu udi utumbisha Yehowa. Bana betu ba mu Liberia badi bamba ne disanka dionso ne: “Dibaka dia miaba miakane ya ntendelelu mu ditunga edi dijima nedileje bantu ne: ntendelelu mulelela udi mu ditunga edi bua kushalamu kashidi, ne luibaku elu ludi lutumbisha ne lunemesha dîna dinene dia Nzambi wetu.”