Nkonko ya babadi

Mbikumbanyine bua muena Kristo kubuelaye mu tshitanda tshia nzambi mudibu benzela muyuki wa kujika nawu muntu peshi wa dibaka anyi?

Tudi ne bua kuepuka dibuelakana kayi dionso dietu mu malu a mu tshitendelelu tshia dishima bualu kuenza nanku kakutu kusankisha Yehowa nansha. (2 Kolinto 6:14-17; Buakabuluibua 18:4) Muyuki wa kujika nawu muntu muenza mu ekeleziya kampanda udi mua kuikala utua nyama ku mikolo malongesha adi kaayi a mu Bible, bu mudi dia ne: anyima katu ufua ne dia difutu dia kuya mu diulu bua benji ba malu mimpe. Muyuki wa nunku udi mua kuikala ne bimue bilele bu mudi: kufunda nkuruse peshi kupunguluja masambila adi nsaserdose utuma. Badi mua kuenza kabidi masambila ne bimue bilele bia ntendelelu bidi bibengangane ne malongesha a mu Bible dituku dia muyuki wa dibaka muenzela mu tshitanda tshia nzambi anyi mukuabu muaba. Bua muena Kristo mulelela, bidi mua kumukolela bua kubenga kubuelakana mu bilele kampanda bia ntendelelu wa dishima bidi bantu mua kuenza yeye muikale munkatshi muabu. Mmunyipu mudibi kabiyi bia meji bua kudilekelela ku malu a mushindu eu bafuane tualua kuenza!

Ntshinyi tshienza muena Kristo udi udimona bamuenzeja ku bukole bua kuikalapu dîba didibu benza muyuki wa dijika nawu muntu anyi wa dibaka mu tshitanda kampanda tshia nzambi? Tshilejilu, mulume udi kayi muena Kristo udi mua kuenzeja mukajende udi muena Kristo bua kuikalabu nende dituku adi. Mukajende udi mua kuya kumufila muaba au ne kushalapu anu bu mubandidi patupu anyi? Pa kutangila tshidi dijinga dia bayende, pamu’apa mukaji udi mua kuitaba bua kuya nende, muikale ne dipangadika dikole dia kubenga kubuelakana mu bilele bia ntendelelu. Ku lukuabu luseke, udi mua kuangata dipangadika dia kubenga bua kuya, wela meji ne: imue misangu bienzeke muaba au bidi mua kumufikisha ku dishipa mikenji ya Nzambi. Yeye nkayende ke udi ne bua kudiangatshila dipangadika dia tshidiye ne bua kuenza. Udi mua kujinga bua kulonda anu tshidi mu muoyo wende, bua kuondo kende ka muoyo kuikalaku katoke.​—1 Timote 1:19.

Mu mishindu yonso, bidi mua kuikala bua bimpe biende bua yeye kumvuija bayende mudi kuondo kende ka muoyo kamukandika bua kubuelakana mu bilele bionso bia malu a ntendelelu anyi kuimba misambu idibu batuma nansha mene kuinyika mutu padibu basambila. Padi bayende utangila bidiye umumvuija ebi, udi mua kumona ne: imue misangu dikalapu dia mukajende muaba au didi mua kujudija amue malu ikala kaayi mua kumusankisha nansha. Mulume eu, bua dinanga didiye nadi bua mukajende udi mua kuitaba bua kudiyila, bua kuleja kanemu bua malu adi mukajende witabuja anyi bua kuepuka nsombelu kampanda idi mua kumutonda ku muoyo. Kadi biasuminyinaye, apu mukaji udi mua kuitaba bua kuya kumufila ne kuikala muaba au anu bu mubandidi patupu.

Tshikuabu tshitudi katuyi mua kulengulula, ntshidi bena Kristo netu mua kuela meji padibu batumona mu tshitanda kampanda tshia nzambi mikuabu. Bidi mua kutatshisha kuondo kabu ka muoyo anyi? Dibenga diabu bua kutendelela mpingu didi mua kuteketa anyi? Mupostolo Paulo wakafila mubelu ne: ‘bua nuenu numanye mua kujadika malu adi makane; ne bua nuenu nuikale ne mitshima mitoke, kanuyi balenduishi ba bakuabo, tô ne palua dituku dia Kristo.’​—Filipoi 1:10.

Kabidi, bu bikale malu aa atangila mulela wa pabuipi menemene, bena mu dîku abu badi mua kumutatshisha bikole bia menemene. Mu mishindu yonso, muena Kristo udi ne bua kukonkonona bimpe bionso bidi muanda eu utangila. Imue misangu muena Kristo mukaji anyi mulume udi mua kufika ku diamba ne: kakuena lutatu nansha lumue luajuka bua dibuela dianyi mu tshitanda tshia nzambi mudibu benzela muyuki wa dijika nawu mufue anyi wa dibaka bualu tshiena ngenza bidibu benzamu to. Kadi nansha nanku, mu nsombelu mikuabu, tshintu tshia kutamba kuangata ne mushinga nkuondo ka muoyo ka muntu nkayende anyi ka bakuabu pamutu pa kutangila masanka adiye mua kupeta bua dibuela diende mu tshibilu tshia nunku. Nansha mu nsombelu wa mushindu kayi, mbimpe muena Kristo ikale mushindika se: dipangadika diende kadiakumupangisha bua kuikala ne kuondo ka muoyo katoke kumpala kua Nzambi ne kua bantu nansha.