Tudi ne bua kumanya tshidi Nzambi

KUTUKU umvua disanka divule paudi utangila mulu butuku kamuyi biuluulu, umona diulu diuwule tente ne mitoto anyi? Dipembu dimpe dia bilongo bilengele bia mekala kadituku dikusankisha anyi? Kabituku bikuenza disanka paudi umvua miadi ya tunyunyi ne disalakana dia mabeji a mitshi dîba didi kapepa kimpe katuta anyi? Kadi tuambe tshinyi bua bulengele bua mishipa minene ya balene ne bifukibua bikuabu bia mu mâyi manene? Pashishe tudi tumona bantu balela ne kondo ka muoyo ne buongo buikale ne malu mavule adi akemesha. Mmunyi muudi mua kumvuija mushindu udi bintu bionso bia dikema bidiku lelu ebi bifike ku dikalaku?

Bamue badi bamba ne: bintu ebi bionso mbidifikile panu apa nkayabi mu mpukapuka. Kadi bikalabi nanku, bua tshinyi bantu badi bitabuja Nzambi? Mmunyi mudi bintu bishilashilangane bia patupu mua kusambakana mu mpukapuka bua kulua bifukibua bidi dijinga ne malu a Nzambi nunku?

“Kutendelela mbualu budi bantu baledibue nabu munda muabu buikale bujame mu mitu yabu bikole ne bumueneka kudi bantu ba mishindu yonso, babanji ne bapele, badi bamanye mukanda ne badi baupange.” Tshiambilu etshi tshivua diumvuija dia mu tshikoso dia makebulula akapatula Mulongeshi Alister Hardy mu mukanda wende wa The Spiritual Nature of Man. Makebulula menza matuku mashale aa pa tshilumbu tshia buongo mmafikishe bamue bamanyi ba malu a tujilu tua mutu ku diamba ne: bantu “mbalongolola mu mubidi wabu” ne bukokeshi bua kutendelela. Mukanda mukuabu udi uleja ne: “Dikebakeba dia diumvuija . . . mu bitendelelu mbualu budi buenzeka mu bantu ba nshidimukilu yonso ne ba bidimu bionso kubangila anu ku ntuadijilu wa bantu.”​—Is God the Only Reality?

Mona tshiakamba muntu mukuabu mumanyi wa mukanda kukadi mpindieu bidimu bitue ku 2 000. Wakafunda ne: ‘Bualu bua nzubu yonso udi muibakibue kudi mukuabu, kadi wakibaka bintu bionso Nzambi.’ (Ebelu 3:4) Bua bualu ebu, mvese wa kumpala wa ntuadijilu mu Bible udi ujadika ne: “Kale ku tshibangidilu Nzambi wakafuka diulu ne buloba.”​—Genese 1:1.

Kadi Nzambi nnganyi? Bantu badi bandamuna lukonko elu mu mishindu mishilashilangane. Pakebejabu nsonga mukuabu wa mu Japon, diende Yoshi, bua kumanya tshidi Nzambi, wakandamuna ne: “Tshiena mujadike to. Meme ndi muena Bouddha, ne kabiena ne mushinga bua meme kumanya ne: Nzambi nnganyi to.” Kadi Yoshi uvua witaba ne: bantu ba bungi badi bangata Bouddha bu nzambi. Nick (ngenda-mushinga munene wa bidimu 60 ne pamutu) udi yeye witaba se: Nzambi udiku ne udi umumona bu bukole kampanda budi ku mutu kua makole onso. Pakalombabu Nick bua umvuije tshivuaye mumanye pa bidi bitangila Nzambi, wakashala mupuwe mutantshi mule e kushisha kuandamuna ne: “Alu ndukonko lupite bukole mulunda wanyi. Tshindi meme mua kuamba ntshia se: Nzambi udiku.”

 Bamue bantu “badi batendelela ne benzela bintu bidi [Nzambi] mufuke mudimu, pamutu pa kutendelela ne kuenzela [Nzambi] udi mubifuke mudimu.” (Lomo 1:25, Muanda Mulenga Lelu) Bantu miliyo mivule batu batendelela bankambua bamane kufua, bamba ne: Nzambi udi kule be, nanku mbikole bua kumutendelela. Bua bena mu ntendelelu wa Hindu, kutu nzambi milume ne mikaji ya bungi. Nzambi kabukabu bu mudi Zeuse ne Hermese nnzambi ivuabu batendelela mu matuku a bapostolo ba Yezu Kristo. (Bienzedi 14:11, 12) Bitendelelu bivule bia Bukua-buena-Kristo bidi bilongesha se: Nzambi udi Busatu Bunsantu, buenza ne Nzambi Tatu, Nzambi Muana, ne Nzambi Spiritu Munsantu.

Bulelela, Bible udi ujadika ne: ‘Kudi nzambi ya bungi ne bakalenge ba bungi.’ Kadi udi ulua kuamba kabidi ne: “Kadi ku mesu kuetu Nzambi umue udiku, Tatu mene; bintu bionso biakafuma kudiye.” (1 Kolinto 8:5, 6) Bushuwa, Nzambi mulelela udiku anu umuepele. Kadi Nzambi muine mulelela eu nnganyi? Utu bishi? Bidi ne mushinga bua tuetu kumanya mandamuna a nkonko eyi. Yezu yeye muine wakambila Nzambi eu mu disambila ne: ‘Eu udi muoyo wa tshiendelele, bua bobu bakumanye wewe, Nzambi umuepele mulelela, ne yeye uwakatuma, Yezu Kristo mene.’ (Yone 17:3) Eyowa, kudi malu adi atusaka bua kuitaba ne: bua tuetu kufika ku dipeta diakalenga dia tshiendelele, tudi ne bua kuanji kumanya bulelela pa bidi bitangila Nzambi.

[Tshimfuanyi mu dibeji 3]

Ntshinyi tshidi dikalaku dia bintu ebi dileja?

[Mêyi a dianyisha]

Mushipa wa balene: Courtesy of Tourism Queensland

 [Mêyi a dianyisha bua tshimfuanyi mu dibeji 2]

TSHIZUBU: Index Stock Photography © 2002