Utu wanyisha dinanga dia Nzambi anyi?

UMUE musangu Yobo wakumvuija nsombelu wa dipanga bupuangane wa bantu mu miaku eyi: ‘Muntu udi muledibue kudi mukaji udi ne matuku makese a muoyo wende ne udi mûle tente ne ntatu. Udi umena bu tshilongo ne udi ufubidila, udi upita lubilu bu mundidimbi ne kena ushalaku.’ (Yobo 14:1, 2) Amu muvua Yobo mubimone pende, muoyo mmuwule tente ne ntatu ne tunyinganyinga. Kutuku muanji kumona pebe bia nunku anyi?

Kadi, nansha mutudi tupeta ntatu ne malu makole, ditekemena dishindame didiku, ditekemena didi dishindamena pa luse ne dinanga bia Nzambi. Tshia kumpala, Tatu wetu udi mu diulu muena muoyo wa luse mmufile mulambu wa tshia-bupikudi bua kupikula bukua-bantu ku bilema biabu, tuamba ne: kubapikula ku mpekatu. Bilondeshile Yone 3:16, 17, Yezu Kristo wakamba ne: ‘Nzambi wakatamba kusua ba pa buloba, yeye wakabapa Muanende umu’epele mulela bua muntu yonso wamuitabuja kafu biende, kadi ikale ne muoyo wa tshiendelele. Nzambi kakatuma Muanende pa buloba bua kulumbuluisha ba pa buloba, kadi bua ba pa buloba basungidibue kudiye.’

Tangila kabidi lungenyi luimpe ludi nalu Nzambi bua bantu badi kabayi bapuangane. Mupostolo Paulo wakamba ne: ‘Yeye kabidi wakafuka bisamba bionso bia bantu, bafume mu muntu umue, bua kuikalabo pa buloba buonso; wakatapulula bikondo biabo bidianjile kulongolola diambedi, ne mikalu ya miaba yabo yashikamabo. Wakenza nunku bua bakebe Nzambi, benda babubuta bua kumumonabo, kadi yeye kena netu kule kudi muntu ne muntu.’ (Bienzedi 17:26, 27) Anji elabi meji tshidibi mua kuikala biumvuija! Nansha mutudi bantu bapange bupuangane, tudi mua kudia bulunda bua sungasunga ne Mufuki wetu wa dinanga, Yehowa Nzambi.

Nunku, ne dishindika dionso tudi mua kutangila ku matuku adi kumpala, bamanye ne: Nzambi udi ututabalela ne mmulongolole malu ne dinanga bua diakalenga dietu dia tshiendelele. (1 Petelo 5:7; 2 Petelo 3:13) Nunku, bua bualu ebu, tudi tumvua bitusaka bua kulonga makuabu malu a bungi adi atangila Nzambi wetu wa dinanga mu Dîyi diende, Bible.