Bakafua bonso

“Mayi kubabuikila, kudinabu mu dijimba bu dibue.”

MOSE ne bena Isalele bakuabu bakamba mêyi aa mu musambu wakimbabu bua dipanduka diabu mu Mbuu Mukunze ne bua dibutuka dia baluishi babu bena Ejipitu bavua babalondakaja, mbuena kuamba ne: Palô ne biluilu biende bia masalayi.​—Ekesode 15:4, 5, MMM.

Muntu yonso uvua mua kumona muanda wa dikema au uvua ne bua kupeta dilongesha dia se: kakuena muntu nansha umue udi mua kutontolola bukokeshi bua Yehowa anyi kubuluisha ne yeye kushala ne muoyo to. Kadi kunyima kua ngondo mikese tshianana, bena Isalele bende lumu: Kola, Datana, Abilama ne bantu 250 bavua babatue mu nyima, bakatontolola bukokeshi buvua Nzambi mupeshe Mose ne Alona.​—Nomba 16:1-3.

Yehowa wakambila Mose bua ambile bena Isalele bumbuke ku ntenta ya bantomboji abu. Datana ne Abilama pamue ne bena mu nzubu yabu bakabenga kushintuluka. Pashishe Mose wakamanyisha ne: Yehowa nkayende uvua ne bua kuleja bena Isalele ne: bantu abu “bakalengulula Yehowa.” Anu muaba au Yehowa kubulula buloba muinshi mua makasa abu. ‘Buobu ne bantu bonso bakalamata kudibu bakaya mu Muaba wa Bafue pakadibu ne muoyo; ne buloba buakabuikila mukana muabu ku mutu kuabu.’ Kadi bua Kola ne bantomboji bakuabu? ‘Kapia kakapatuka kudi Yehowa, kakosha balume nkama ibidi ne makumi atanu bakadi bafila musenga wa manananshi.’​—Nomba 16:23-35; 26:10.

Palô ne biluilu biende ne bantomboji abu ba mu tshipela bakafua bonso bualu bakabenga bua kuitaba bukokeshi bua Yehowa ne disua diende mu malu a bantu bende. Ke bualu kayi bidi bikengela bua bantu bonso badi bakeba bua Yehowa abakube mu matuku a malu makole aa bamanye mua kutumikila Yehowa bu “Mutambe Bunene” ne “Wa Bukole Buonso.” Buobu benze nunku, badi mua kubakolesha bimpe ku muoyo kudi mêyi a Yehowa adi alonda aa: ‘Bantu tshinunu badi mua kupona ku luseke luebe, ne bantu binunu dikumi badi mua kupona ku luseke lua tshianza tshiebe tshia balume; kadi bualu ebu kabuena bufika pabuipi nebe. Neumone difutu dia bantu babi anu ne mêsu ebe, neutangile mudibu babafuta. Bualu bua wewe [wakamba ne:] Yehowa udi tshinyemenu tshianyi, ne wakuvuija Nzambi Mutambe Bunene wa mulu muaba webe wa kushikamamu.’​—Musambu 91:1, 7-9.