Nkonko ya babadi

Bidi bikengela kuina muntu mujima mu mâyi padiye musue kutambula kadi muikale ne bulema bunene anyi usama bikole, bifuane kuvuija dimuina mu mâyi bualu bukole anyi?

Muaku “kubatiza” mmuangatshila ku muaku wa pa muanda wa mu tshiena-Gelika bapto udi umvuija “kuina.” (Yone 13:26) Mu Bible, “kubatiza” mmuomumue ne: “kuina mu mâyi.” Pa bidi bitangila batismo wa muntu mutungula wa mu Atshiopa wakatambuishabu kudi Filipo, Bible udi wamba ne: “Bubidi buabu bakaya mu mâyi, Filipo ne muntu mutungula bakapueka bonso babidi mu mâyi, Filipo wakamubatiza [anyi wakamuina mu mâyi].” (Bienzedi 8:38) Nunku padibu babatiza muntu, badi bamuina mu mâyi.​—Matayo 3:16; Mâko 1:10.

Yezu wakambila bayidi bende ne: ‘Yayi bienu, nuvuije ba bisamba bionso bayidi, nubabatize.’ (Matayo 28:19, 20) Ke bualu kayi Bantemu ba Yehowa batu balongolola bua kutambuisha bantu mu majiba (nansha menzela kumbelu), mu misulu anyi miaba mikuabu idi mâyi makumbane bua kuina muntu mujima. Bu mudi batismo wa dina muntu yonso mujima mu mâyi muikale bualu budi Bible ulomba, bantu kabena ne bukenji bua kukandika muntu bua kabamutambuishi to. Nunku muntu udi ne bua kutambula nansha padibi bikengela kuenza malu atuye kayi wenza pa tshibidilu bua nsombelu udiye nende. Tshilejilu, batismo wa mu malongo a mu biowedi bia mâyi bia batoke utu wambuluisha bua bakulakaje anyi bantu badi ne masama a pa buawu. Badi mua kuelamu mâyi a luya, kutekamu bimpebimpe eu udibu batambuisha, ne diakamue padi mubidi wende umvuangana ne mâyi aa, badi bamubatiza.

Bakadi batambuishe nansha bantu batu ne bulema bunene. Tshilejilu, bantu batubu bapande mujilu wa mu nshingu utu lupepe lua mueyelu lupitshila, bibashiye ne disoso pa muminu, peshi bantu batu beyela ku diambuluisha dia tshiamu bakadi babatambuishe pabu. Bushuwa, bua batismo yonso eyi bidi bikengela kulongolola malu bimpe menemene. Mbia meji bua kuikala ne doktere anyi munganga mupiluke ku tshibelu pikalaye kuoku. Kadi bobu batabalela badi basama mu mushindu wa pa buawu anyi badianjile kulongolola amue malu, kudi mua kupeteka mushindu wa kubatambuisha. Bua nanku bidi bikengela kudienzeja bua kutambuisha muntu mu mâyi bikalaye ujinga bualu ebu ne muoyo mujima ne bikalaye witaba njiwu idi mua kumueneka.