Tetragrame mu Bible wa Septante
Tetragrame mu Bible wa Septante
DÎNA dia Nzambi: Yehowa, batu badifunda ne maleta anayi a mu tshiena-Ebelu: יהוה (YHWH). Maleta aa ke adibu babikila ne: Tetragrame. Munkatshi mua bidimu bia bungi bantu bavua bela meji ne: tetragrame kavua mu Bible wa Septante to. Ke bualu kayi bamue bavua bamba ne: pavua bafundi ba Mifundu ya tshiena-Gelika ya bena Kristo batele mêyi a Mifundu ya tshiena-Ebelu, kabavua bafunde dîna dia Nzambi mu mikanda yabu to.
Kukadi bidimu bu lukama anyi bipite apu, bintu bivule bidibu bangule biakaleja ne: Dîna dia Nzambi divua mu Bible wa Septante. Mukanda kampanda udi wamba ne: “Bu muvua bena Yuda bavua bakula tshiena-Gelika bikale ne dijinga dikole dia kulama bimpe menemene dîna dia tshijila dia Nzambi, bakakudimuna Bible wa tshiena-Ebelu mu tshiena-Gelika, kutentulabu bimpebimpe maleta a tetragrame aa ne buobu kuabueja munda mua mifundu ya tshiena-Gelika.”
Tshipese tshia dibeji dia papirise dileja ku dia bakaji eku ntshimue tshia ku bilejilu bivule bidi bishale. Tshipese etshi tshia dibeji dia papirise tshiangula mu Oxyrhynchos, mu ditunga dia Ejipitu, tshiakapeshabu nimero wa 3522, ntshia katshia mu bidimu lukama bia kumpala. * Tshidi bule bua santimetre 10,5 mu bule ne 7 mu butshiama, ne tshidi ne mêyi a mu Yobo 42:11, 12. Tetragrame utudi bele mu tshijengu muaba eu udi mu maleta a tshiena-Ebelu tshia kale. *
Nunku tudiku mua kuamba ne: dîna dia Nzambi divua mu mikanda ya ntuadijilu ya Mifundu ya tshiena-Gelika ya bena Kristo anyi? Mukebuludi wa malu a mu Bible George Howard udi wamba ne: “Bu muvua tetragrame mutshikale mu Bible ya kale ya mu tshiena-Gelika [ya Septante] ivuabu babala mu ekeleziya wa ku ntuadijilu, mbia meji bua kuitaba ne: pavua bafundi ba D[ipungila] D[ipiadipia] batela mêyi a mu Mukanda wa Nzambi, bavua balama tetragrame munda mua mifundu ya Bible.” Bidi bimueneka se: panyima pa matuku makese ke pakalua batentudi kupingaja mêna makuabu bu mudi Kyrios (Mukalenge) ne Theos (Nzambi) pa muaba wa dîna dia Nzambi.
[Mêyi adi kuinshi]
^ tshik. 4 Bua kupeta mumvuija a bungi adi atangila mabeji a papirise akangulabu mu Oxyrhynchos, bala Tshibumba tshia Nsentedi tshia dia 15 Luishi 1992, dibeji dia 26-28.
^ tshik. 4 Bua kupeta bilejilu bikuabu bia dîna dia Nzambi mu Bible ya mu tshiena-Gelika ya kale, bala mu Bible wa Les Saintes Écritures—Traduction du monde nouveau—avec notes et références, appendice 1C.
[Mêyi a dianyisha bua tshimfuanyi mu dibeji 30]
Ne dianyisha dia Egypt Exploration Society