Bamanyishi ba Bukalenge badi balonda

Wakapetela bulelela muaba udi muntu kayi mua kuela meji ne: udi mua kubupetelamu

DIJINGA dia Nzambi ndia se: “bantu bonso basungidibue, bafike ku dimanya dia malu malelela.” (1 Timote 2:3, 4) Bua kukumbaja bualu ebu, Bantemu ba Yehowa mbapatule ne mbabanye miliyo mivule ya Bible ne mikanda ya kumulonga nayi. Mikanda eyi ikadi miambuluishe bamue bantu badi banange malu mimpe bua kulonga bulelela mu mushindu kawuyi nansha muelela meji to. Pa muanda eu, bamanyishi ba Bukalenge ba mu tshimenga tshia Freetown (mu ditunga dia Sierra Leone) badi balonda muanda udi ulonda eu.

Osman uvua muana muibidi wa mu dîku dia bana tshitema. Bu muvuaye mukolele mu dîku dia batendeledi, uvua uya kutendelela ne tatuende pa tshibidilu. Kadi malu avuabu babalongesha mu tshitendelelu tshiabu pa bidi bitangila inferno avua amutonda bikole. Kavua witaba menemene bua se: Nzambi wetu wa luse eu uvua mua kuikala ukengesha bantu babi pa kubuosha mu mudilu nansha. Malu onso akambilabu Osman bua kumufikisha ku diumvua bimpe dilongesha dia inferno wa kapia kaakatalaja mutshima wende to.

Dituku dikuabu pavua Osman ukadi ne bidimu 20, wakamona mukanda wa tshizubu tshia ble muoshike tshitupa mu tshintu tshitubu bela bintu bia butshiafu. Bu muvuaye munange mikanda bikole, wakawangula, kuukupula ne kumona ne: tshiena-bualu tshiawu tshivua ne: Bulelela budi bufikisha ku muoyo wa kashidi. *

Osman wakadikonka ne: ‘Mbulelela kayi ebu?’ Bu muvua mukanda eu musankishe Osman bikole, wakaya nau kumbelu ne kuubala diakamue wonso mujima. Ndinsakapu kayi diakapetaye pakamanyeye ne: dîna dia Nzambi n’Yehowa! (Musambu 83:18) Osman wakamanya kabidi ne: ngikadilu munene wa Nzambi ndinanga, ne Nzambi kêna munange nansha dilongesha dia se: badi bakengesha bantu mu muaba kampanda wa kadilu. (Yelemiya 32:35; 1 Yone 4:8) Ndekelu wa bionso, Osman wakabala ne: mu katupa kakese emu, Yehowa nease mparadizu pa buloba muikala bantu mua kusombela tshiendelele. (Musambu 37:29; Buakabuluibua 21:3, 4) Ebu mbulelela bua mushinga mukole bua kudi Nzambi muena luse ne dinanga, ki mmuomu anyi? Ne mutshima muule ne dianyisha, Osman wakela Yehowa tuasakidila bua muvuaye mumuambuluishe bua kupetela bulelela muaba uvuaye kayi nansha muelele meji ne: uvua mua kubupetelamu.

Matuku makese panyima, bamue balunda bende bakamuleja muaba uvua Nzubu wa Bukalenge wa Bantemu ba Yehowa, yeye kuyaku e kubuela mu bisangilu bua musangu wa kumpala. E kulombaye umue wa ku Bantemu bavuamu bua ikala umulongesha Bible. Nansha muvua bena dîku diabu bamuluisha bikole, Osman wakatungunuka ne kukola mu nyuma ne kufika ku ditambula. (Matayo 10:36) Lelu wa ndaya eu, ukadi mukulu mu tshisumbu tshiabu. Kabienaku bikemesha bua kumona ne: bipeta bilenga bionso ebi mbifumine patupu anu ku diangula dia mukanda wa malu a mu Bible mu tshintu tshia kuelela butshiafu anyi?

[Mêyi adi kuinshi]