Tshikondo tshia kusokolola malu masokoka

Kulama amue malu masokoka kudi mua kufila ditalala muaba uvua mua kuikala matandu. Kadi kudiku tshikondo tshia kusokolola malu masokoka anyi? Tangila tshidi muprofete Amosa wamba bua Nzambi wende: ‘Yehowa Nzambi kêna wenza bualu, bikalaye kayi muanji kubusokoluela bantu bende baprofete diambedi.’ (Amosa 3:7) Mêyi aa adi atulongesha bualu kampanda pa bidi bitangila dilama malu masokoka. Yehowa udi mua kulama amue malu masokoka munkatshi mua tshikondo kampanda ne ku ndekelu udi mua kuasokoluela bamue bantu. Mmunyi mutudi mua kuidikija Yehowa mu muanda eu?

Ku misangu, balami badibu bateke mu tshisumbu tshia bena Kristo batu bamona mudibi ne mushinga bua kubenga kusokolola amue malu. (Bienzedi 20:28) Tshilejilu, bua diakalenga dia tshisumbu, badi mua kupangadija bua kubenga kusokolola amue malu adibu balongolole anyi dishintuluka dia midimu mu tshisumbu too ne pakumbana tshikondo kampanda tshisunguluke.

Biobi bikale nanku, bidi bikengela kumvuija bimpe aba bonso badi bualu ebu butangila bikalabi biakane bua kubusokolola, dîba ne mushindu wa kubusokolola. Kumanya tshikondo tshia kusokolola bualu kampanda patoke kudi mua kubambuluisha bua kubenga kubusokolola.​—Nsumuinu 25:9.