Kuitabi bua bakudinge to!

DIDINGANGANA ndituadije kale. Umue wa ku miyuki ya ntuadijilu itubu bafunde uvua wa dishimangana. Muanda eu wakenzeka pavua Satana mushime Eva mu budimi bua Edene.​—Genese 3:13; 1 Timote 2:14.

Nansha muvua didingangana kadiyi dianji kutangalaka bikole pa buloba, lelu nditangalaka kuya ne penyi. Padi Bible wakula bua bikondo bietu ebi udi udimuija bantu ne: “Kadi bantu babi ne badingi ba bakuabo nebadiundadiunde mu malu mabi abo matuku onso, badingangana, badingibua.”​—2 Timote 3:13.

Badi bashima bantu bua tubingila kabukabu. Bena mashimi ne bantu badi balayangana bintu bia dishima anyi ba-eskro badi badingangana bua kupeta makuta kudi badibu badinga. Bamue bena tshididi badi bashima badi babasungula ne tshipatshila tshia kushala nansha bia munyi mu nkuasa yabu. Bantu batu badidinga nansha buobu nkayabu. Pamutu pa kukeba malu malelela nansha wowu kaayi abasankisha, badi badituisha nkayabu mudiku kakuyi bualu bubi budi mua kubenzekela nansha buobu benze bienzedi bibi bu mudi: dinua dia makanya, dia bintu bu mudi diamba ne tshiendenda.

Kudi kabidi dishimangana mu malu a ntendelelu. Balombondi ba bitendelelu ba mu matuku a Yezu bavua badinga bantu. Yezu wakabamba ne: ‘Badi balombodi bafofo. Bialombola mufofo munga mufofo, bubidi buabu nebapone mu tshina.’ (Matayo 15:14) Kabidi, bantu batu badidinga nkayabu mu malu a ntendelelu. Nsumuinu 14:12 udi wamba ne: “Bumue njila udi muntu umona bu mululame, ke udi umufikisha ku lufu.”​—MMV.

Anu muvuabu mu tshikondo tshia Yezu, kabiena bitukemesha bua mudibu badinga ba bungi lelu mu malu a ntendelelu! Mupostolo Paulo wakamba bua Satana bu udi ‘ufofomija mêsu a meji a badi kabayi bitabuja, bua dikenka dia lumu luimpe lua butumbi bua Kristo, udi tshifuanyikiji tshia Nzambi, kaditemi kudibu.’​—2 Kolinto 4:4.

Bena malaya ba mashimi anyi ba-eskro aba buobo batudinge, tudi tujimija makuta patupu. Muena tshididi yeye mutushime, tudi mua kujimija ndambu wa budikadidi buetu. Kadi Satana yeye mutudinge bua tuetu kulekela bulelela budi butangila Yezu Kristo, tudi tujimija muoyo wa tshiendelele! Nanku katuitabi bua kabatudingi. Konkonona Bible bimpe, bualu yeye ke udi utuambila bulelela mu malu a ntendelelu ne muntu nansha umue kêna mua kumuelesha mpata. Netujimije bia bungi tuetu katuyi benze nanku.​—Yone 17:3.