Mpungilu ya mu 2003 ya bantu bafumina mu matunga a bungi

MU Disambombo, dia matuku 6 ngondo wa 10 mu 2001, tshisangilu tshia ku tshidimu tshia bena mu Watch Tower Bible and Tract Society of Pennsylvania tshiakenzekela mu tshimenga tshia Jersey City, mu New Jersey, ku États-Unis. Kunyima kua tshisangilu etshi, bena mu Watch Tower ne benyi bavuabu babikile bakalonda programe mukuabu wa pa buende. Dituku diakalonda, mu bisangilu bikuabu biakenzabu mu bimenga bia mu Canada ne mu États-Unis, bena mu Kasumbu Kaludiki ka Bantemu ba Yehowa bakamanyisha bualu budi bulonda ebu kunyima kua muyuki wa nkomenu:

“Patudi bashale bindile matuku atshilualua, bidi bia mushinga wa bungi bua muntu wa Nzambi yonso kapu muoyo didisangisha dietu. Mupostolo Paulo uvua muambe bua kubuela mu bisangilu ne kuikala tukankamijangana, tuenza nanku bualu dituku dinene dia Yehowa didi dikuatshisha bantu buôwa didi dienda disemena pabuipi. (Ebelu 10:24, 25) Mu diumvuangana ne dîyi dia mu Mifundu edi, tudi basue kuenza mpungilu mu bitupa bionso bia pa buloba mu tshidimu tshialua [tshia 2002]. Pashishe, mu tshia 2003, pasua Yehowa, tudi mua kuenza mpungilu ya pa buayi ya bantu bafumina mu matunga a bungi mu imue miaba. Mpindieu ke tshikondo tshia kushala batabale, tshikondo tshia kujingulula bimpe mushindu udi mianda ya pa buloba yenda iya.”

Nansha mudiku dinyanguka dia malu ne ndululu bienda bivulangana padi ndongoluelu wa malu eu wenda uya mutangile ku ndekelu kuende, mudimu udi bantu ba Nzambi benza wowu udi ne bua kuya anu kumpala. Lumu luimpe lua Bukalenge ne mukenji wa didimuijangana nawu wa mu Bible badi ne bua kubimanyisha ditunga dionso, tshisamba tshionso, muakulu ne bantu bonso, kubambila bua ‘batshine Nzambi, bamutumbishe bualu dîba dia dilumbuluisha diende diakulua.’ (Buakabuluibua 14:6, 7) Nenku, bu mudibi bimusankisha ne bilondeshile disua dia Tatu wetu wa mu diulu, tudi balongolole bua kuenza mpungilu ya bantu bafumina mu matunga a bungi mu miaba kabukabu bua tshidimu tshia 2003.

Ku ntuadijilu, netuanji kuteta mu bimue bimenga bia ku Nord kua Amerike ne pashishe ku Mputu. Lua ku ndekelu kua tshidimu tshia 2003, netulongolole bua batumibue kuyabu kubuela mu mpungilu mu bimenga bia mu Asia; ne bangabanga ne tshidimu atshi kujikatshi, bakuabu nebaye mu Afrike, ku Amerike wa ku Sud, ne mu bidiila bia mu mbuu wa Pasifike. Netulombe imue filiale bua itume ndambu wa bantu miaba kampanda misunguluke yenzekela mpungilu eyi, kadi nansha nanku, kakuakuikala mushindu wa kupesha muntu ne muntu diende dibikila nansha. Kadi, nebikale bimpe bua kuikala ne batumibue bungi bukumbane bikale baleja mpala ya matunga mashilashilangane muaba wonso wenzekela mpungilu.

Bisumbu bia Bantemu ba Yehowa nebipete matuku makese kumpala eku dimanyisha pa bidi bitangila bisangilu ebi. Bua bidi bitangila dituku ne miaba idi batumibue aba ne bua kuya kubuela mu mpungilu, filiale yabu neyibamanyishe malu aa. Nanku, kabiena ne mushinga bua kuebeja anyi kututumina mikanda bua malu aa mpindieu to.

Anu Bantemu bakadi bamane kudilambula ne batambule ba ngikadilu ya tshitembu badi mua kuleja buena-muntu kudi bana betu ba miaba ayi ke basungulabu bua kuya mu mpungilu eyi. Bana betu ba miaba eyi badi pabu ne bua kuleja dinanga ne kuakidila bilenga batumibue abu. (Ebelu 13:1, 2) Bionso ebi nebibafikishe ku “dikoleshangana ku muoyo.” (Lomo 1:11, 12, MML) Netutumine filiale yalombabu bua kutuma baleji-mpala mu mpungilu mu ditunga kampanda anyi matunga kansanga makuabu malu atudi balongolole bua mianda eyi.

Mu 2003 mpungilu ya distrike ya matuku asatu neyenzekele mu matunga a bungi anu bu pa tshibidilu. Patudi tudisangisha, tuetu bonso netupete mushindu wa ‘kumvua, kuyila lungenyi, ne kusambibua.’ (Dutelonome 31:12; 1 Kolinto 14:31) Ebi nebipeteshe bantu ba Nzambi bonso mushindu wa ‘kulabula, kumvua ne: Yehowa udi muakane.’ (Musambu 34:8) Mu mpungilu yonso ya bantu bafumina mu matunga a bungi ne mu ya distrike ya bungi, ba-misionere nebikalemu ne bamue ba kudibu nebakule.

Mu tshidimu tshia 2002 etshi, netubuele mu Mpungilu ya Distrike ya “Bamanyishi ba Bukalenge ba tshisumi,” yatukankamija bua kuyisha bikole. Patudi tuenza mpungilu eu, netushale ne mioyo miteka ku bidi Yehowa mutulongololuele bua tshidimu tshialua. Bionso ebi nebituambuluishe bua ‘kushala batabale, ne kuikala badilongolole’ dîba dionso mu bikondo ebi bikole.​—Matayo 24:42-44, MML.