Nkonko ya babadi

Ndîba kayi didibi biakanyine bua mukaji muena Kristo kuvualaye tshitambala ku mutu bua malu a mu nyuma?

Mupostolo Paulo wakafunda ne: ‘Mukaji yonso udi utendelela anyi udi wambila bakuabu dîyi dia Nzambi ne mutu wende kawuyi mubuikila, udi upuekesha butumbi bua mutu wende.’ Bua tshinyi? Mbua dîyi didi ditangila tshilumbu tshia bukokeshi didi mu Bible dia ne: ‘Mutu wa mukaji udi mulume.’ Pa tshibidilu kusambila anyi kuyisha mu tshisumbu tshia bena Kristo mbujitu bua muntu mulume. Nunku padi mukaji muena Kristo wenza malu adi atangila ntendelelu avuabu mua kuenza nangananga kudi bayende anyi muntu mulume mutambule, dîba adi udi ne bua kuvuala tshitambala ku mutu.​—1 Kolinto 11:3-10.

Bikondo bidi mukaji muena Kristo ne bua kuvuala tshitambala ku mutu bidi mua kumueneka mu dibaka diende. Tshilejilu, padi bena mu dîku basangila bua kulonga Bible anyi bua kudia biakudia, pa tshibidilu mulume ke udi ne bua kubalongesha ne kusambila bua dîku dionso. Kadi bayende yeye kayi muena Kristo, bujitu ebu budi mua kulua pambidi pa mukajende. Nunku padiye usambila ne dîyi dikole ulomba buende yeye ne bua bakuabu peshi padiye ulonga Bible ne bana bende bayende muikalepu, mukaji muena Kristo udi ne bua kuvuala tshitambala ku mutu. Bayende yeye kayipu, kabiena bikengela bua mukaji eu kuvualaye tshitambala to, bualu Nzambi mmumuanyishile bua kulongesha bana bende.​—Nsumuinu 1:8; 6:20.

Kadi tshia kuenza ntshinyi bikala mu dîku muikale muana wa balume musadidi wa Yehowa Nzambi, mudilambule ne mumane kutambula? Bu mudi muana eu muikale muena mu tshisumbu tshia  bena Kristo, bana betu ba balume badi mu tshisumbu ke badi ne bua kumulongesha. (1 Timote 2:12) Tatuende yeye muikale muena Kristo, yeye ke udi ne bua kulongesha muana eu. Kadi tatu yeye kayipu, nanku dîba adi mamu udi ne bua kuvuala tshitambala ku mutu bikalaye ulonga Bible ne muanende wa balume ukadi mutambule pamue ne bana bakuabu. Dipangadika dia kulomba muanende wa balume mutambule bua kusambilaye bua dilonga edi anyi bua biakudia didi anu kudiye. Kadi padi mukaji muena Kristo eu wela meji ne: muanende wa balume eu ki mmuanji kukumbana bimpe to, nanku yeye nkayende udi mua kupangadika bua kudienzela disambila. Yeye mupangadike bua kusambila dîba dia nanku, udi ne bua kuvuala tshitambala ku mutu.

Padibu benza amue malu a tshisumbu, pamu’apa kabiena bikengela anu bua bakaji bena Kristo kuvualabu tshitambala ku mutu to. Tshilejilu, mu tshisangilu tshia mudimu wa buambi munkatshi mua lumingu mudi mua kuikala anu bana betu ba bakaji bena Kristo, kamuyi balume batambule to. Kudi mua kuikala bikondo bikuabu bidi balume batambule kabayi mu tshisangilu kampanda tshia tshisumbu. Biobi bikengela bua muanetu wa bakaji kuenzaye malu atubu benza pa tshibidilu kudi muanetu wa balume mu tshisangilu tshilongolola tshia tshisumbu anyi mu tshisangilu tshia mudimu wa buambi, udi ne bua kuvuala tshitambala ku mutu kuende.

Bakaji bena Kristo badi ne bua kuvuala tshitambala ku mutu padibu bakudimuna miyuki ya mu Bible ne dîyi dikole anyi padibu bayikudimuna mu muakulu wa tumama peshi padibu babala bikoso bia mu mukanda kampanda udibu balonga mu tshisangilu tshia tshisumbu anyi? Tòo. Bana betu ba bakaji badi benza midimu eyi kabena balombola anyi balongesha to. Bia muomumue, ki mbilombibue bua bana betu ba bakaji kuvualabu tshitambala padibu benza manaya a bilejilu, padibu balonda malu mamona peshi padibu benza miyuki mu Kalasa ka Mudimu wa Teokrasi to.

Nansha mudi dilongesha munda mua tshisumbu dikale mudimu wa balume bakadi batambule, balume ne bakaji bonso buabu badi ne bujitu bua kuyisha ne kulongesha pambelu pa tshisumbu. (Matayo 24:14; 28:19, 20) Nunku padi mukaji muena Kristo uyikila Dîyi dia Nzambi ne bantu ba tshianana muaba au muikale Ntemu wa Yehowa muntu mulume, kabiakukengela anu bua yeye kuvuala tshitambala to.

Kadi mbishilangane padiye ulombola dilonga dia Bible dilongolola ku nzubu kampanda, ne muanetu wa balume mudilambule ne mutambule muikalepu. Edi ndilongesha dimana kulongolola ditu muntu udi ulongesha muikale ulombola. Mu nsombelu ya mushindu’eu, dilonga didi dilua tshitupa tshikuabu tshia tshisumbu. Muanetu wa bakaji Ntemu mutambule yeye muikale ulombola dilonga edi ne Ntemu muntu mulume muikalepu, muanetu wa bakaji eu udi ne bua kuvuala tshitambala ku mutu. Kadi muanetu wa balume mudilambule ne ukadi mutambule ke udi ne bua kuenza disambila. Muanetu wa bakaji kêna mua kusambila muanetu wa balume mudilambule ukadi mutambule muikalepu to, anu kuoku kuikale bualu bua pa buabu, tshilejilu bikala muanetu wa balume eu katshiyi ne mushindu wa kuakula.

Imue misangu muanetu wa bakaji muena Kristo udi mua kuya bua kulombola dilonga dia Bible, baye kumufila kudi muanetu mukuabu wa balume mumanyishi wa Bukalenge udi kayi muanji kutambula. Muanetu wa bakaji eu yeye musue, udi mua kumulomba bua alombole dilonga edi. Kadi bu mudi mumanyishi udi kayi muanji kutambula eu kayi mua kuimanyina muanetu wa bakaji mutambule mu disambila kudi Yehowa, nebikale bimpe bua muanetu wa bakaji eu kusambilaye bua kulonga. Padiye ulombola dilonga anyi padiye usambila mu nsombelu eyi, muanetu wa bakaji eu udi ne bua kubuikila ku mutu kuende. Nansha mudi mumanyishi muntu mulume eu kayi muanji kutambula, bantu badi kabayi Bantemu mbamanye ne: mmuena mu tshisumbu bualu udi wenza mudimu wa buambi.

Mupostolo Paulo wakafunda ne: ‘Budi mukaji nabu mbua kuikala ne tshimanyinu tshia bukokeshi ku mutu kuende, bualu bua banjelu.’ Bushuwa, bana betu ba bakaji bena Kristo badi ne diakalenga dia kuikala bilejilu bimpe kudi miliyo ne miliyo ya banjelu badi batungunuka ne kukokela Yehowa ne lulamatu luonso. Nunku mbiakane bua bakaji badi batshina Nzambi kuangata divuala dia tshitambala ku mutu ne kanemu kakanyine padiku bualu budi bulomba bua kutshivuala.

[Bimfuanyi mu dibeji 26]

Divuala tshitambala ku mutu ntshimanyinu tshidi tshileja dinemeka bukokeshi