‘Luayi kundi, meme nennupe dikisha’

‘Tuenzelayi bantu bonso bimpe’

KUYISHA ne kulongesha kua lumu luimpe lua Bukalenge bua Nzambi ke kuvua mudimu wa kumpala wa Yezu. (Mâko 1:14; Luka 8:1) Bu mudi balongi balelela ba Kristo bajinga kumuidikija, badi bamona mudimu wa dilongesha mukenji udi mu Bible wa Bukalenge bua Nzambi muikale mudimu munene ne wa kumpala mu nsombelu wabu. (Luka 6:40) Bantemu ba Yehowa badi basanka bikole padibu bamona mushindu udi mukenji wa Bukalenge upetesha bantu badi bawitaba dikisha dia kashidi anu bu muakenzawu tshikondo tshivua Yezu pa buloba.​—Matayo 11:28-30.

Pa kumbusha dilongesha dia Dîyi dia Nzambi, Yezu wakenza kabidi midimu mikuabu mimpe, bu mudi ya kuondapa bavua basama ne kudisha bavua ne nzala. (Matayo 14:14-21) Bia muomumue, padi Bantemu ba Yehowa bakuata mudimu wabu wa dilongesha Bible, batu benza kabidi malu makuabu atu ambuluisha bantu badi mu dikenga. Bulelela, Mukanda wa Nzambi udi ulongolola bena Kristo “bua midimu yonso mimpe” ne ubakankamija bua kuenzela “bantu bonso bimpe.”​—2 Timote 3:16, 17; Galatia 6:10.

“Bana betu bakalua”

Mu ngondo wa tshitema wa tshidimu tshia 1999, tshikumina tshitambe bukole tshivua tshizakaje ditunga dia Taïwan bibi bitambe. Panyima pa ngondo mikese, mvula ya katshi ku dînu ne dikuluka dia mabue a neige a kulu kua mikuna (avalanches) biakakebesha tshimue tshia ku bipupu bitambe bubi bitu bifikile bena mu Venezuela. Matuku ashadi aa, mâyi avua muule mapasalale mu ditunga dia Mozambique. Pakenzeka bipupu bionso bisatu ebi, Bantemu ba Yehowa bakafika miaba eyi ne lukasa luonso ne biakudia, mâyi, manga, bilamba, ntenta ne bintu bia mudimu wa tshikuku bua kuambuluisha aba bavua mu dikenga. Bena budisuile bavua bamanye mudimu wa manga bakasa tuzubu tua biondapilu tua tshimpitshimpi bua kuondapa bavua ne bisama, ne bua bavua bashale kabayi ne nzubu, bena budisuile ba mu mudimu wa luibaku bakabashila nzubu mipiamipia.

Bana betu bavua mu dikenga abu bakanyisha bikole bua dikuatshisha edi diakapetabu pa dîba diakanyine. Malyori muena nzubu uvuabu bavingutule kudi mabue a neige avua mafumine kulu kua mikuna mu Venezuela udi wamba ne: “Patuvua bashikile katuyi kabidi ne ditekemena nansha dimue, bana betu bakalua.” Pakibakilabu Malyori ne ba mu dîku diende nzubu mupiamupia kudi bana betu bena budisuile abu, wakakatshila wamba ne: “Katuakukokesha  bua kuela Yehowa tuasakidila mukumbane bua bionso bidiye mutuenzele ebi to!” Kabidi pavua bana betu bavua mâyi makengeshe mu Mozambique bapete nsapi bua kubuelabu mu nzubu yabu mipiamipia ivuabu babibakile, bobu bonso bakakutula diakamue musambu wa Bukalenge udi ne tshiena-bualu tshia ne: “Yehowa udi tshisokomenu tshietu.” *

Diambuluisha dia bavua mu dikenga divua dipetesha kabidi bana betu bena budisuile dikisha. Marcelo uvua muambuluishe mu mudimu wa bumunganga mu kamponyi ka bavua mâyi mamuangeje mu Mozambique udi uleja ne: “Mvua ne disanka dia kuambuluisha bana betu aba bavua dikenga dipite bukole dikuate.” Huang (muena budisuile wa mu Taïwan) wakamba ne: “Bivua disanka dinene bua kukuatshisha bana betu bavua mu dikenga ne biakudia ne ntenta. Bivua bikolesha menemene ditabuja dietu.”

Programe wa bena budisuile udi upatula bipeta bimpe

Mudimu wa budisuile mmupeteshe kabidi makumi a binunu a bena buloko dikisha dia mu nyuma. Mushindu kayi? Mu bidimu bidi panshi ebi, Bantemu ba Yehowa mbabanyine bantu bapite pa 30 000 bavua mu nzubu ya maloko mitue ku 4 000 mu ditunga dia États-Unis nkayamu mikanda ya kulonga nayi Bible. Kabidi bua miaba idiku mushindu, Bantemu batu babuela bobu bine mu nzubu ya maloko bua kulonga Bible ne badimu ne kubuejamu bisangilu bia bena Kristo. Malu aa atuku ambuluisha bena buloko anyi?

Bamue bena buloko badi balonga Bible mbabange kuyisha bena buloko nabu malongesha a munda mua Dîyi dia Nzambi adi abapetesha dikisha. Ke bualu kayi mpindieu mu nzubu ya maloko mivule ya pa buloba bujima mudi tusumbu tua bena buloko badi batendelela Yehowa pamue. Mu 2001, muena buloko mukuabu wa mu Oregon (États-Unis) uvua muleje ne: “Kasumbu ketu kadi kenda kadiunda. Tudi bamanyishi ba Bukalenge 7 ne tudi tulonga Bible ne bantu 38. Bantu bapite pa 25 batu babuela mu tshisangilu tshia muyuki wa patoke ne tshia Dilonga dia Tshibumba tshia Nsentedi, ne tuvua bantu 39 mu Tshivulukilu [tshia lufu lua Kristo]. Bantu bakuabu basatu nebatambule matuku makese aa!”

Bulenga ne masanka bia mudimu eu

Bamfumu ba maloko mbafike ku dimona ne: mudimu wa bena budisuile eu udi upatula bipeta bimpe. Kadi tshidi tshitamba kukemesha bamfumu ba maloko aba mmasanka a matuku a bungi adi programe wa bena budisuile eu upatula. Luapolo kampanda ludi luleja ne: “Mu bidimu dikumi bidibu benza mudimu eu, kakuena muntu udi mupatuke mu buloko uvua mutambuilamu ne mulue Ntemu wa Yehowa udibu bakuate kabidi bamuele mu buloko to, pa kumbusha bantu 50 anyi 60 pa lukama ba mu bisumbu bikuabu badibu belulula kabidi mu buloko.” Bua bipeta bimpe bivua Bantemu bena budisuile aba bapatule, muambi mukuabu uvua ulongesha malu a Nzambi mu buloko kampanda bua mu Idaho (États-Unis) wakamba mu mukanda uvuaye mutumine biro binene bia Bantemu ba Yehowa bidi bilombola mudimu wabu pa buloba bujima ne: “Nansha mundi tshiyi meme muine ngitaba malongesha a tshitendelelu tshienu, bulongolodi buenu budi bunkemesha be.”

Kuambuluisha badi mu buloko kudi kabidi kupetesha ba wetu bena budisuile aba masanka. Panyima pa dilombola dia bisangilu ne kasumbu ka bena buloko bavua bimbe musambu umue wa Bukalenge bua musangu wabu wa kumpala, muena budisuile mukuabu wakafunda ne: “Bivua bikankamija bikole bua kumona bantu 28 bimba netu misambu pamue bua kutumbisha Yehowa. Kabidi bavua bayimba ne dîyi dikole! Ndiakalengapu kayi nunku dia kubuela mu tshisangilu tshia mushindu eu!” Muena budisuile kampanda utu ukumbula maloko a mu Arizona (États-Unis) wakamba ne: “Ndibeneshapu kayi dia dikema nunku dia kuenza mudimu eu wa pa buawu!”

Bantemu bena budisuile ba buloba bujima badi bitaba bipepele mêyi a Yezu akambaye a ne: ‘Kupa kudi kutamba kuangata kusankisha muntu.’ (Bienzedi 20:35) Badi kabidi bajadika se: kutumikila kua mubelu wa Bible wa kuenzela bantu bonso bimpe kudi kupetesha muntu dikisha bushuwa.​—Nsumuinu 11:25.

[Mêyi adi kuinshi]

[Tshimfuanyi mu dibeji 8]

Venezuela

[Tshimfuanyi mu dibeji 8]

Taïwan

[Tshimfuanyi mu dibeji 8]

Mozambique