“Malu manene a Nzambi” adi atukankamija

‘Tudi tumvua bantu aba bamba mianda minene ya Nzambi mu [miakulu] yetu.’​—BIENZEDI 2:11.

1, 2. Mbualu kayi bua dikema buakenzeka mu Yelushalema mu Pentekoste wa mu 33 B.B.?

 DIMUE dituku mu dinda ku ndekelu kua muvu wa printemps, mu tshidimu tshia 33 mu bikondo bietu ebi, bualu bua dikema buakenzekela tshisumbu tshia bayidi ba Yezu Kristo balume ne bakaji bavua basangile mu nzubu kampanda mu Yelushalema. ‘Tshiona tshiakafuma lubilu mulu bu tshipepele tshikole tshipita, tshiakuuja mu nzubu muonso muakadibu bashikame tente. Ndimi mipanduluke yakamueneka kudibu, yakadi bu kapia. Buonso buabu bakadi bûle tente ne nyuma muimpe, bakabanga kuakula [miakulu] mikuabu.’​—Bienzedi 2:2-4, 15.

² Bantu musumba munene bavua bunguile kumpala kua nzubu au. Munkatshi muabu muvua bena Yuda bavua baledibue ku ba-bende, “bakadi bananukila kutendelela Nzambi,” bavua balue mu Yelushalema mu difesto dia Pentekoste. Bakakema bualu yonso wa kudibu uvua mumvue bayidi bakula bua “mianda minene ya Nzambi” mu miakulu yabu. Mmunyi muvuabi mua kuenzeka nanku bualu aba bonso bavua bakula miakulu eyi bavua bena mu Galela?​—Bienzedi 2:5-8, 11.

3. Mmukenji kayi uvua mupostolo Petelo mumanyishe musumba wa bantu mu Pentekoste?

³ Umue wa ku bena mu Galela abu uvua mupostolo Petelo. Wakumvuija ne: kukavua kupite mbingu mikese patupu katshia bashipa Yezu Kristo kudi bantu babi. Kadi Nzambi uvua mubishe Muanende eu ku lufu. Pashishe, Yezu wakamuenekela ba bungi ba ku bayidi bende, kumuenekelaye ne  Petelo ne bakuabu bavuapu dîba adi. Yezu uvua mubande mu diulu kukavua matuku dikumi patupu. Yeye ke uvua mutumine bayidi bende nyuma muimpe. Muanda eu uvuaku ne diumvuija kampanda bua aba bavua basekelela tshibilu etshi tshia Pentekoste anyi? Eyowa. Lufu lua Yezu luakabunzuluila njila wa kubabuikidilabu mpekatu yabu ne wa kupeta ‘dipa dia nyuma muimpe’ bikalabu bavua bamuitabuje. (Bienzedi 2:22-24, 32, 33, 38) Nunku ntshinyi tshiakenza bantu bavua muaba au bua “mianda minene ya Nzambi” yakumvuabu? Kadi mmunyi mudi muyuki eu mua kutuambuluisha bua kukonkonona mudimu wetu utudi tuenzela Yehowa?

Bakadiumvua babasake bua kuenza bualu kampanda!

4. Mmulayi kayi wa Yoele wakakumbana mu dituku dia Pentekoste wa mu 33 B.B.?

⁴ Pakapeta bayidi aba bavua mu Yelushalema nyuma muimpe, bakabanga diakamue kumanyisha bantu lumu luimpe lua lupandu, kutuadijabu anu ne musumba wa bantu bavua basangile mu dinda adi. Diyisha diabu diakakumbaja mulayi wa pa buawu, mufunda kukavua bidimu nkama muanda-mukulu kudi Yoele muana wa Petuele ne: ‘Nengitshikijile bantu bonso nyuma wanyi; bana benu ba balume ne bana benu ba bakaji nebambe malu adi kaayi manji kulua, bakulumpe benu nebalote bilota, bansongalume benu nebamone bikena-kumona. Nengitshikijile nyuma wanyi kabidi pambidi pa bapika balume ne bapika bakaji mu matuku au, diambedi dituku adi dinene dia Yehowa didi dikuatshisha bantu buôwa kadiyi dianji kulua.’​—Yoele 1:1; 2:28, 29, 31; Bienzedi 2:17, 18, 20.

5. Mmu ngumvuilu kayi muvua bena Kristo ba mu bidimu lukama bia kumpala bambe malu avua kaayi manji kulua? (Bala diumvuija didi kuinshi kua dibeji)

⁵ Mêyi aa avuaku umvuija ne: Nzambi uvua ne bua kuvuija bantu bonso ba mu tshipungu atshi baprofete, balume ne bakaji, bu muvua Davidi, Yoele ne Debola, ne uvua ne bua kubangata bua kumanyishabu malu avua kaayi manji kulua anyi? Tòo. ‘Bana ba balume ne bana ba bakaji, bapika balume ne bapika bakaji’ bena Kristo bavua ne bua kuamba malu avua kaayi manji kulua mu ngumvuilu wa se: nyuma wa Yehowa uvua ne bua kubasaka bua kumanyisha “mianda minene” ivua Yehowa muenze ne itshivuaye ne bua kuenza. Nunku bavua ne bua kuikala bambi ba mêyi a Mutambe Bunene. * Kadi ntshinyi tshiakenza musumba wa bantu aba?​—Ebelu 1:1, 2.

6. Pakumvua musumba wa bantu muyuki wa Petelo, ba bungi ba kudibu bakadiumvua babasake bua kuenza tshinyi?

⁶ Kunyima kua bantu aba musumba bamane kuteleja malu akumvuija Petelo, ba bungi ba kudibu bakadiumvua babasake bua kuenza bualu kampanda. “Bakanyisha meyi a Petelo,” buobu e “kubatijibua, dituku adi, bantu bu binunu bisatu bakadisangisha ku tshisumbu tshia bena kuitabuja.” (Bienzedi 2:41, Muanda Mulenga Lelu) Bu muvuabu bena Yuda ne bantu ba bisamba bia bende bavua bitabuje Buena-Yuda, bakavua ne dimanya dia malu manene a mu Mukanda wa Nzambi. Dimanya adi disangisha ne ditabuja dia malu avuabu bumvue kudi Petelo biakabapesha mushindu wa kutambula ‘mu dîna dia Tatu ne mu dia Muana ne mu dia nyuma muimpe.’ (Matayo 28:19) Kunyima kua batismo wabu, ‘bakananukila kuikala mu dilongesha dia bapostolo.’ Bakatuadija kabidi kumanyisha bantu bakuabu malongesha a  ntendelelu mupiamupia uvuabu bapete. Bushuwa, ‘Ku dituku ku dituku bakadi bananukila kudisangisha mu ntempelo, ne mutshima umue, bakadi batumbisha Nzambi, bakadi ne diakalengele kudi bantu bonso.’ Bua mudimu wabu wa buambi eu, ‘[Yehowa] wakadi usangisha kudibu bakuabu bakadi basungidibua.’ (Bienzedi 2:42, 46, 47) Bisumbu bia bena Kristo biakenzeka ne lukasa mu matunga a bungi avua bena kuitabuja bapiabapia aba basombele. Kakuyi mpata, didiunda edi diakenzeka kabidi bua lukunukunu luvuabu nalu mu diyisha dia “lumu luimpe” pakapinganabu kuabu.​—Kolosai 1:23.

Dîyi dia Nzambi didi ne bukole

7. (a) Ntshinyi tshidi tshikoka bantu ba bisamba bionso mu bulongolodi bua Yehowa lelu? (b) Mmalu kayi adi akuleja ne: nekuikale didiunda dia mu nyuma mu budimi bua buloba bujima ne bua muaba uudi musombele? (Bala diumvuija kuinshi kua dibeji.)

⁷ Netuambe tshinyi bua aba badi ne dijinga dia kulua basadidi ba Nzambi lelu? Buobu pabu badi ne bua kulonga Dîyi dia Nzambi bimpe menemene. Padibu badilonga, badi bafika ku dimanya ne: Yehowa n’Nzambi “wa luse ne dinanga, kena ukuata tshiji lubilu, udi mûle tente ne luse lujalame ne bushuwa.” (Ekesode 34:6; Bienzedi 13:48) Badi bafika ku dimanya bua mulambu udi Yehowa mufile ku diambuluisha dia Yezu Kristo, muena mashi akitshikila adi mua kubalengeja ku mpekatu yonso. (1 Yone 1:7) Badi bapeta dianyisha padibu bamanya dipangadika dia Nzambi dia se: “dibika dia bafue nedikaleku, ne dia bakane ne dia babi.” (Bienzedi 24:15) Dinanga bua Muenji wa “mianda minene” eyi didi diula mu mitshima yabu, ne badi badiumvua babasake bua kuyisha malu malelela aa a mushinga mukole. Nunku badi badilambula kudi Nzambi bua kumuenzela mudimu ne batambula, ne badi batungunuka ne ‘kudiundadiunda mu kumanya kuabu kua Nzambi.’ *​—Kolosai 1:10; 2 Kolinto 5:14.

8-10. (a) Mmunyi mudi bualu bua mukaji muena Kristo kampanda buleja ne: Dîyi dia Nzambi “didi ne bukole”? (b) Ntshinyi tshidi bualu ebu bukulongeshe pa bidi bitangila Yehowa ne malu adiye wenzela basadidi bende? (Ekesode 4:12)

⁸ Dimanya didi basadidi ba Nzambi bapeta padibu balonga Bible ki ndia pa mutu pa mutu to. Dimanya edi didi dikankamija mutshima wabu, dishintulula ngelelu wabu wa meji ne dishala munda muabu. (Ebelu 4:12) Tshilejilu, bakangata mukaji mukuabu diende Camille ku mudimu bua kuikalaye ulama bakulakaje. Umue wa ku bakulakaje bavuaye ulama diende uvua Martha, uvua yeye Ntemu wa Yehowa. Bu muvua Martha muikale ne lungenyi lumunyunguluke bikole, bivua bilomba bua kumutshiunga dîba dionso. Bavua bamuvuluija bua kudia, nansha ne bua kumina mene biakudia. Kadi anu mutuamona mpindieu, kuvua tshintu tshimue tshivua katshiyi tshikupuke mu lungenyi luende to.

⁹ Dimue dituku, Martha wakamona Camille udila bua malu ende makuabu avua mamutonde. Martha wakela Camille maboko ku nshingu ne kumulombaye bua kulongaye nende Bible. Kadi muntu muikale muvua Martha amu uvuaku mua kulombola dilonga dia Bible anyi? Eyowa! Nansha muvuaye mupue malu a bungi muoyo, Martha uvua anu muvuluke Nzambi wende munene; uvua muvuluke kabidi malu malelela a mushinga mukole avuaye mulonge mu Bible. Pavuabu balonga, Martha uvua wambila Camille bua kubalaye tshikoso tshionso, bua kutangila mvese idibu batelamu, bua kubala lukonko luvua kuinshi kua dibeji ne bua kuluandamuna. Dilonga edi diakatungunuka munkatshi mua matuku ndambu, ne nansha muvua Martha muikale usama, Camille wakapeta dimanya dia mu Bible dia bungi. Martha wakajingulula ne: bivua bikengela bua Camille atuadije kudisangisha ne bantu bakuabu badi basadila Nzambi. Bua nanku, wakabanyina mulongi wende Camille eu nkanzu ne mukolo umue wa bisabata bua kuikalaye muvuale bimpe pavuaye ne bua kuya kubuela mu bisangilu ku Nzubu wa Bukalenge bua musangu wa kumpala.

¹⁰ Dinanga ne tshilejilu ne muoyo umue wa Martha biakalenga Camille ku mutshima. Ke kufikaye ku diamba ne: malu a mu Bible avua Martha udienzeja bua kumulongesha avua a mushinga wa bungi be, bualu Martha uvua mupue malu onso  muoyo pa kumbusha avuaye mulonge mu Mukanda wa Nzambi. Kunyima, pakatumabu Camille mu nzubu mukuabu wa dilamina bakulakaje, wakamona ne: atshi tshivua tshikondo tshia yeye kuangata dipangadika. Bua musangu wa kumpala, wakabuela mu Nzubu wa Bukalenge, muvuale nkanzu ne bisabata bivua Martha mumupeshe abi, ne kulombaye bua batuadije kumulongesha Bible. Camille wakadiunda bimpe mu nyuma ne kutambulaye.

Mbabakankamije bua kutumikila mêyi a Yehowa

11. Pa kumbusha dikala ne lukunukunu mu mudimu wa buambi, mmunyi mutudi mua kuleja ne: mukenji wa Bukalenge mmutukankamije?

¹¹ Lelu, kudi Bantemu ba Yehowa bapite pa miliyo isambombo mijima badi bayisha ‘lumu luimpe lua Bukalenge’ pa buloba bujima anu bu Martha ne kabidi bu mudi Camille mpindieu. (Matayo 24:14; 28:19, 20) Anu bu bena Kristo ba mu bidimu lukama bia kumpala, “mianda minene ya Nzambi” mmibakankamije bikole. Badi ne dianyisha bua mudibu bayisha dîna dia Yehowa ne bua mudiye mubitshikijile nyuma muimpe wende. Ke bualu kayi badi benza muabu muonso bua ‘kuenda mu bienzedi bidi biakanangane ne Mukalenge [Yehowa] ku dimusankisha dionso,’ batumikila mêyi ende mu malu onso a mu nsombelu wabu. Munkatshi mua malu adibu batumikila aa mudi dinemeka tshidi Dîyi dia Nzambi diamba bua mvuadilu ne ndengejilu wa mubidi.​—Kolosai 1:10a; Tito 2:10.

12. Mmubelu kayi musunguluke udi utangila mvuadilu ne ndengejilu wa mubidi udi mu 1 Timote 2:9, 10?

¹² Bushuwa, Yehowa mmufile mêyi adi atangila mmuenekelu wetu. Mupostolo Paulo wakaleja amue a ku malu adi Nzambi utulomba mu muanda eu. Wakamba ne: “Ndi njinga kabidi bua bakaji bavuale bilamba mvuadilu muakane, ne didipuekesha ne [meji mimpe], kabadilengeji ne nsuki miluka bipia, anyi bilenga bienza ne biamu bia or, anyi mabue anyi bivualu bia mushinga mukole, kadi badilengeje ne bienzedi bimpe, bu mudibi bikumbanyina bakaji badi badiamba ne: Tudi  tunemeka [Nzambi].” * Ntshinyi tshidi mêyi aa atulongesha?​—1 Timote 2:9, 10, MML.

13. (a) ‘Kuvuala bilamba mvuadilu muakane’ mmuomu ne tshinyi? (b) Bua tshinyi tudi mua kuamba ne: mêyi adi Yehowa muele ki mmapite bukole bua kualonda?

¹³ Mêyi a Paulo adi aleja ne: bena Kristo badi ne bua ‘kuvuala bilamba mvuadilu muakane.’ Kabena ne bua kuikala bavuale buvualavi nansha. Muntu yonso, nansha yeye mupele, udi mua kukumbaja mêyi aa makanyine yeye muakaje bilamba biende bimpe, musukule bimpe bua bikale bia kupatuka nabi pa bantu. Tshilejilu, tshidimu tshionso Bantemu ba mu dimue ditunga dia mu Amerike wa ku Sud batu benda ku makasa kilometre mivule munkatshi mua ditu ne pashishe benza mêba makuabu mavule mu buatu bua kumona mua kuya kubuela mu mpungilu wa distrike. Pa tshibidilu batu badishinda mu mâyi peshi bilamba biabu bitu bikuatshika ku mitshi ne bipandika mu luendu elu. Nunku patubu bafika muaba udi mpungilu ne bua kuenzekela, misangu mivule batu bamueneka baluate buluatavi. Padibu bafika anu nunku, batu batuadija kuasa mbota ne balongolola shene ya ku bilamba, basukula ne bakoma bilamba bikalabu mua kuvuala mu mpungilu. Badi bangata dibabikila bua kulua kudia ku mêsa a Yehowa ne mushinga wa bungi, ne mbasue kuvuala bilamba bikumbanyine.

14. (a) Kuvuala bilamba ne “didipuekesha ne meji mimpe” mmumue ne tshinyi? (b) Kuikala ne mvuadilu udi uleja ne: “tudi tunemeka Nzambi” kudi kumvuija tshinyi buetu tuetu?

¹⁴ Pashishe Paulo wakaleja ne: tudi ne bua kuvuala bilamba ne “didipuekesha ne [meji mimpe].” Mbuena kuamba ne: mvuadilu wetu kêna ne bua kuikala wa kudileja nende, munekeshe, ujula bantu majinga mabi, ushiya mubidi patoke peshi muele kalele mu dilonda dia miodele idiku lelu nansha. Tudi kabidi ne bua kuikala ne mvuadilu udi uleja ne: “tudi tunemeka Nzambi.” Ke muaba udi ulomba bua kuela meji eu, ki mmuomu anyi? Ki ntshilumbu tshia kuvuala patupu bimpe patudi mu bisangilu bia tshisumbu ne pashishe kudilengulula mu muanda eu patudi mu bikondo bikuabu to. Mvuadilu wetu udi ne bua kuikala misangu yonso uleja ne: tudi bantu badi batendelela Nzambi, ne mvuadilu wetu udi ne bua kuleja kabidi lungenyi luimpe bualu tudi bena Kristo ne basadidi ba Nzambi mêba onso. Nanku muaba eu bidi bileja se: bilamba bitudi tuenza nabi mudimu ne bitudi tuya nabi mu kalasa bidi ne bua kuikala biakanyine midimu itudi tuenza. Nansha nanku, mvuadilu wetu udi ne bua kuikala muakanyine ne wa kanemu. Mvuadilu wetu yeye uleja misangu yonso ne: tudi bantu badi bitabuje Nzambi, katuakudikanda bua kuyisha mu mpukapuka bualu tudi tumvua bibi bua mushindu utudi bavuale nansha.​—1 Petelo 3:15.

‘Kanusu malu a pa buloba’

15, 16. (a) Bua tshinyi mbia mushinga bua tuetu kuepuka didikija bena panu mu malu a mvuadilu ne ndengejilu wa mubidi? (1 Yone 5:19) (b) Mbualu kayi bukuabu bua meji butudi ne bua kuepukila miodele ya bilamba ne ndengejilu wa mubidi?

¹⁵ Mubelu udi mu 1 Yone 2:15, 16 udi utuambuluisha kabidi pa bidi bitangila mvuadilu ne ndengejilu wa mubidi. Tudi tubala ne: ‘Kanusu malu a ba pa buloba, anyi bintu bia pa buloba. Biasua muntu  malu a ba pa buloba, dinanga dia Tatu kadiena munda muende. Bualu bua malu onso a pa buloba, lukuka lua mubidi, ne lukuka lua mêsu, ne kudisua kua muoyo, kaena mafume kudi Tatu, kadi adi mafume ku buloba.’

¹⁶ Mmunyipu mudi mubelu eu mmuakanyine! Bu mutudi mu tshikondo tshidi bantu batamba kusakangana ku malu mabi, katulekedi bena panu batusunguila bilamba bitudi ne bua kuvuala. Miodele ya bilamba ne ya ndengejilu wa mubidi mminyanguke bikole mu bidimu bidi panshi ebi. Nansha mvuadilu udibu nende kudi bangenda-mushinga ne bena mudimu kêna anu ufila tshilejilu tshia kueyemena tshia mvuadilu udi muakanyine bena Kristo to. Ebu mbualu bukuabu budi butusaka bua kuikala bamanye misangu yonso mushinga wa kubenga ‘kudifuanyikija ku malu a mu tshikondo etshi’ bituikala basue kutumikila mêyi adi Nzambi muele ne bituikala basue ‘kutumbisha diyisha dia Nzambi, Musungidi wetu, mu malu onso.’​—Lomo 12:2; Tito 2:10.

17. (a) Nnkonko kayi itudi ne bua kudiela patudi tusumba tshilamba peshi tusungula modele kampanda? (b) Bua tshinyi bamfumu ba mêku badi ne bua kuikala batangila mvuadilu wa muntu ne muntu wa mu mêku abu?

¹⁷ Kumpala kua kuangata dipangadika dia kusumba tshilamba, mbimpe kudiebeja ne: ‘Bua tshinyi modele eu udi unsankisha? Ng’utubu bamona nawu munayi wa manaya kampanda muende lumu bikole anyi? Batu nawu kudi ba bandi peshi bantu badi basue lungenyi lua budikadidi ne lua buntomboji anyi?’ Tukebayi kabidi bua kukenketa tshilamba tshine atshi bimpe menemene. Bikalatshi nkanzu anyi triko, udi bule kayi? Mbamukose mushindu kayi? Tshilamba etshi tshidi tshileja bupuekele anyi, ntshiakanyine ne tshileja kanemu anyi, peshi ntshilamate pambidi, tshijulangana majinga mabi ta ntshilekelela patupu pambibi? Diebeje ne: ‘Meme muvuale tshilamba etshi nendenduishe bantu anyi?’ (2 Kolinto 6:3, 4) Bua tshinyi katuena ne bua kulengulula muanda eu? Bualu Bible udi wamba ne: ‘[Nansha] Kristo kakadisankisha.’ (Lomo 15:3) Bena Kristo bamfumu ba mêku badi ne bua kuikala batangila mvuadilu wa bena mu mêku abu. Bua kanemu kadibu naku kudi Nzambi wa butumbi udibu batendelela, bamfumu ba mêku kabena ne bua kuelakana bua kupesha bena mu mêku abu mibelu mikole ne ya dinanga padibi bikengedibua.​—Yakobo 3:13.

18. Ntshinyi tshidi tshikusaka bua kuikala ne ntema ya bungi bua mvuadilu ne ndengejilu webe wa mubidi?

¹⁸ Mukenji utudi tumanyisha udi ufumina kudi Yehowa, udi muikale mene tshilejilu tshitumbuke tshia bunême ne bunsantu. (Yeshaya 6:3) Bible udi utulomba bua kumuidikija ‘bu bana bende bananga.’ (Efeso 5:1) Mvuadilu ne ndengejilu wetu wa mubidi bidi mua kuangatshisha Tatu wetu wa mu diulu bimpe anyi bibi. Bushuwa, tudi basue kusankisha mutshima wende!​—Nsumuinu 27:11.

19. Mmasanka kayi atudi tupeta patudi tumanyisha bantu bakuabu “mianda minene ya Nzambi”?

¹⁹ Ntshinyi tshiudi mumvue bua “mianda minene ya Nzambi” iudi mulonge? Bulelela, tudi ne diakalenga dia bungi bua mutudi balonge bulelela! Yehowa mmutubuikidile mpekatu yetu bualu tudi bitabuje mashi akitshikija Yezu Kristo. (Bienzedi 2:38) Ke bualu kayi tudi ne dikima dia kuakula kumpala kua Nzambi. Katuena tutshina lufu bu mudi bantu badi kabayi ne ditekemena balutshina nansha. Kadi tudi ne dishindika dia Yezu edi dia se: dimue dituku ‘bonso badi mu nkita [nebumvue] dîyi diende, nebajuke.’ (Yone 5:28, 29) Yehowa mmutuenzele bimpe padiye mutuleje malu onso aa; mmutuitshikijile kabidi nyuma wende. Nunku, dianyisha bua mapa malenga onso aa didi ne bua kutusaka bua kunemeka mêyi ende malenga ne bua kumutumbisha ne lukunukunu, tumanyisha bantu bakuabu “mianda [yende] minene” eyi.

[Mêyi adi kuinshi]

Newandamune munyi?

• ‘Mmianda minene’ kayi yakumvua bantu mu Pentekoste wa mu 33 B.B., ne ntshinyi tshiakenzabu?

• Mmushindu kayi udi muntu ulua muyidi wa Yezu Kristo, ne kuikala muyidi kudi kulomba tshinyi?

• Bua tshinyi mbia mushinga bua tuetu kubenga kulengulula mvuadilu ne ndengejilu wetu wa mubidi?

• Mmalu kayi atudi ne bua kukonkonona patudi tupangadika bua kumanya bikala tshilamba anyi modele kampanda muakane?

[Nkonko ya dilonga]

[Tshimfuanyi mu dibeji 15]

Petelo wakamanyisha ne: Yezu uvua mubike ku lufu

[Bimfuanyi mu dibeji 17]

Mvuadilu webe udiku wangatshisha Nzambi uudi utendelela bimpe anyi?

[Bimfuanyi mu dibeji 18]

Baledi bena Kristo badi ne bua kuikala batangila mvuadilu wa bena mu dîku diabu