Tshidi kasongo nyunyi katulongesha

NANSHA ‘tusongo nyunyi tua mu diulu, tudi tumanye bikondo biatu, kadi bantu banyi kabena bamanye mikenji ya Yehowa.’ (Yelemiya 8:7) Mêyi aa ke avua muprofete Yelemiya mumanyishe nawu dinyoka divua Yehowa ne bua kupesha bena Yuda bantomboji, bavua balekele Yehowa Nzambi wabu ne batuadije kutendelela nzambi ya bisamba bia bende. (Yelemiya 7:18, 31) Bua tshinyi Yelemiya wakasungula nyunyi wa kasongo nyunyi bu tshintu tshia kulongesha natshi bena Yuda bapange lulamatu abu?

Bena Isalele bavua ne tshibidilu tshia kumona nyunyi wa kasongo nyunyi, nangananga wa mubidi mutoke, pavuaye wenda usamba mu matunga a mu bikondo bitshivuabu bafunda Bible. Dîna dia mu tshiena-Ebelu dia nyunyi eu wa mikolo minene mile utu wenda utumpika mmuaku wa ku bakaji udi umvuija ne: “muena lulamatu; udi ne luse lujalame.” Dîna edi ndiyakanyine, bualu, kabiyi mutu nyunyi mikuabu yonso, nyunyi ya tusongo nyunyi mitoke milume ne mikaji itu ishala milamatangane milume ne mikaji too ne ku lufu. Kunyima kua yoyi mimane kupitshisha muvu wa Hiver mu bitupa bia luya, nyunyi ya tusongo nyunyi ya bungi itu misangu mivule ipingana ku tshidimu tshionso anu mu disua dimuedimue divuayi kumpala.

Ngikadilu udi nende nyunyi ya tusongo nyunyi udi uleja ngikadilu wa lulamatu mu malu makuabu a pa buawu. Nyunyi eyi milume ne mikaji itu yonso iladila mayi ne idisha bana bayi. Mukanda mukuabu udi umvuija ne: “Nyunyi ya tusongo nyunyi ikadi mitoye bana itu ishala milamatangane mu mushindu wa dikema. Nyunyi wa kasongo nyunyi mulume mukuabu wa mu ditunga dia Allemagne wakapitshila mu nshinga ya nzembu mikole ne kufuaye ku nzembu. Nyunyi wa kasongo nyunyi mukaji wakashala muladile mayi nkayende matuku 3 majima, ne munkatshi mua matuku au wakapatuka mu disua anu musangu umue bua minite mikese bua kuya kukeba tshiakudia. . . . Musangu mukuabu, pakashipabu nyunyi wa kasongo nyunyi mukaji, mulume wakakolesha bana.”​—Our Magnificent Wildlife.

Bushuwa, padi nyunyi wa kasongo nyunyi ushala mulamatangane ne mukaji anyi mulume munkatshi mua matuku ende onso a muoyo ne padi nyunyi eu ulama bana bende bimpe, udi ukumbaja tshidi dîna diende diumvuija: “muena lulamatu.” Nunku, nyunyi ya tusongo nyunyi yakambuluisha bua kupesha bena Isalele ba tshitshiu bapange lulamatu dilongesha dia bukole.

Bua bantu ba bungi lelu, lulamatu lukadi tshintu tshikulukulu, badi balumona luimpe kadi kabena baluangata ne mushinga to. Divulangana dia mabaka adi afua, dilekelangana, didia mfranga ya bende, ne dia mishindu mikuabu ya mashimi didi dileja ne: bantu kabatshiena bangata lulamatu ne mushinga to. Kadi Bible udi yeye uleja ne: lulamatu ludi lushindamene pa dinanga ne malu malenga ludi ne mushinga wa bungi. Udi ubela bena Kristo bua ‘badivuadike [bumuntu bupiabupia] buakafukibua mu tshifuanyikiji tshia Nzambi ne buakane ne [lulamatu lulelela].’ (Efeso 4:24) Bushuwa, bumuntu bupiabupia budi butuambuluisha bua kuikala ne lulamatu, tudi mua kupetela kabidi dilongesha didi ditangila lulamatu kudi nyunyi eu wa kasongo nyunyi.