Badi basanka bua mudibu balonge mua kubala!

MU BIMUE bitupa bia Bidila bia Salomon, bantu batue ku 80 pa lukama badi Bantemu ba Yehowa mpindieu bavua batate bikole bua dibenga kumanya mua kubala. Dipanga kumanya mua kubala edi kadivua anu dibapangishe bua kuandamuna ne kuenza midimu mu bisangilu bia tshisumbu ku lumingu luonso to, kadi divua dibatatshishe kabidi bikole nansha ne bua kulongesha bantu bakuabu bulelela budi butangila Bukalenge. Kudiku mushindu wa bantu bakulumpe batu kabayi banji kukuata katshi ka mukanda nansha musangu umue kumanyabu mua kubala anyi?

Mbalongeshe bantu ne broshire wa Difila ku dibala ne difunda (mupatula kudi Bantemu ba Yehowa) mu tulasa tua kubala ne kufunda mu bisumbu pabuipi ne bionso bia Bantemu ba Yehowa mu Bidila bia Salomon. Malu menzeke adi alonda aa adi aleja mushindu udibu bambuluishe bantu ba bungi menemene bua kufika ku dimanya mua kubala ne kufunda mu tulasa etu. Bualu bua mushinga wa bungi mbua se: kumanya mua kubala eku nkubambuluishe bua kumanyisha bantu malu adi atangila ditabuja diabu.​—1 Petelo 3:15.

Muanetu wa bakaji mukuabu misionere uvuabu batume mu tshimue tshisumbu tshivua ne bamanyishi bapite pa lukama wakamona ne: mu dilonga dia Tshibumba tshia Nsentedi dia ku lumingu luonso, anu bantu bakese patupu ke bavua ne bibejibeji bia Tshibumba tshia Nsentedi ne anu bantu babala ku minu patupu ke bavua bafila mandamuna. Bua tshinyi bivua nanku? Tshilumbu tshivua se: kabavua bamanye kubala to. Pakamanyishabu mu tshisumbu bua se: bavua balongolole bua kuenza kalasa bua kulongesha bantu mua kubala ne kufunda, misionere eu wakitaba bua kuikala mulongeshi. Ku ntuadijilu, anu bantu bakese ke bavua balua, kadi panyima pa matuku bantu bapite pa 40 ba bidimu bishilashilangane bakabanga kubuelamu.

Mbipeta kayi biakapatuka? Misionere eu udi wamba ne: “Matuku makese panyima pa kalasa aka kamane kubanga, ngakaya mu tshisalu pa dîba isambombo wa dinda bua kusumba biakudia bia ku nzubu wa ba-misionere. Pangakafikamu meme kumona bamue balongi balume ne bakaji, too ne bana batekete menemene, bapana misa ya koko ne  bisekiseki. Bua tshinyi? Bavua basue kupeta makuta makumbane bua kusumba bike ne tuye tua kufundila mu kalasa! Kabidi, dibuela mu kalasa aka diakasaka muntu yonso bua kuikala ne tshiende tshibejibeji tshia Tshibumba tshia Nsentedi.” Misionere eu udi wamba kabidi ne: “Mpindieu mu dilonga dia Tshibumba tshia Nsentedi mu tshisumbu, ne bana ne bakulumpe bonso badi bandamuna ne bisangilu bietu mbilue bia musangelu.” Misionere eu wakasanka bikole pavua balongi banayi ba mu kalasa aka balombe bua kutuadija kupatuka mu mudimu wa buambi, bualu bakamba ne: kabatshivua “kabidi ne buôwa to.”

Malu mimpe adi tulasa etu tupeteshe balongi ki mmimanyine anu pa dimanya mua kubala ne kufunda to. Tshilejilu, mukaji (uvua kayi muena Kristo) wa muanetu mukuabu udi Ntemu wa Yehowa uvua utatshisha tshisumbu bikole. Uvua wasa bantu mabue pavuabu bamuyobola nansha kakese ne uvua mene ubunda bakaji bakuabu ne tshitupa tshia mutshi. Pavuaye ubuela mu bisangilu bia bena Kristo mu mpukapuka ne bayende, uvua umumvuila mukawu wa bungi, ke bayende kufika too ne ku dibanga kuvuala makalashi mafike bua mukajende kamubandi kabidi ne: uvua utangila bakaji bakuabu.

Nansha nanku, matuku makese kunyima kua kalasa kamane kubanga, mamu eu wakalua mu bitulu ne kulombaye ne: “Ndiku panyi mua kubuela mu kalasa anyi?” Buobu kumuitabila. Kubangila anu dîba adi katu muanji kupumbisha mu kalasa anyi mu bisangilu bia tshisumbu. Wakadifila bikole mu malongesha ende a dibala ne wakalubuluka kuya kumpala mu mushindu wa dikema, biobi kumupesha disanka dia bungi be. Pashishe wakalomba wamba se: “Ndiku mua kubanga kulonga Bible anyi?” Bayende wakatuadija kulonga nende ne disanka dia bungi, ne udi utungunuka ne kukolesha dimanya diende dia kubala ne kufunda ne dimanya dia malu a mu Bible.

Bua muntu wa bidimu 50 utu katshia kayi muanji kukuata katshi ka mukanda, kukuata anu bike wetu eu ne kufunda maleta kudi mua kuikala lutatu lukole lua dikema. Bamue batu bapatuka ne mabuba ku minu bualu batu bakuata kidiyo ne dibeji bikole menemene patubu babanga kulonga mu kalasa aka. Panyima pa mbingu mivule ya diluangana mua kukuata ne kulama kidiyo bimpe ku minu, bamue balongi badi bamba ne mimuemue ku mishiku ne: “Mpindieu ndi ngendesha tshianza bipepele pa dibeji!” Balongeshi badi basanka padibu bamona mudi balongi babu baya kumpala. Mulongeshi umue wakamba ne: “Kulongesha mu kalasa aka mbualu bua disanka dia bungi, ne dianyisha dia muoyo mujima didi nadi balongi bua kalasa aka kadi Yehowa mulongolole ditu misangu mivule dimuenekela ku bikashi bitubu batuta ku ndekelu kua kalasa.”

Bantu aba badi Bantemu mpindieu badi basanka pamue ne ba-misionere. Bua tshinyi? Bualu badi mpindieu mua kutumbisha Yehowa ne dimanya didibu bapete dia kubala ne kufunda.

[Bimfuanyi mu mabeji 8, 9]

Bana ne bakulumpe badi ne dianyisha bua tulasa tua dilonga mua kubala ne kufunda