“Ndi munuleje tshilejilu”

‘Musangu wa kumana kulepa unuakadi kuikala bayishi.’​—EBELU 5:12.

1. Bua tshinyi mêyi adi mu Ebelu 5:12 adi ne bua kusaka muena Kristo bua kumvua bu bidi bimutonda?

 PAUDI ubala mêyi mafundisha ku nyuma wa Nzambi adi mu mvese wa tshiena-bualu etshi, udiku umvua bienze bu bidi bikutonda anyi? Bikalabi nanku, umanye ne: kuena nkayebe to. Bu mutudi balongi ba Kristo, tudi bamanye bimpe ne: tudi ne bua kuikala balongeshi. (Matayo 28:19, 20) Tudi bamanye ne: bikondo bitudi bidi bilomba mitalu bua kulongesha bantu. Tudi bamanye kabidi ne: dilongesha dietu didi mua kubapetesha mushindu wa kupeta muoyo anyi lufu! (1 Timote 4:16) Nunku muntu yonso wa kutudi adikonke ne: ‘Ndiku mulongeshi muimpe menemene anyi? Mmunyi mundi mua kulengeja ndongeshilu wanyi?’

2, 3. (a) Mmushindu kayi uvua mulongeshi mukuabu mumvuije nshindamenu wa ndongeshilu muimpe? (b) Ntshilejilu kayi tshidi Yezu mutuleje pa bidi bitangila dilongesha?

² Tuetu tuditatshisha nunku kutuena mua kuteketa mu maboko to. Tuetu bikale tumona kulongesha anu bu muanda udi ulomba amue mamanya a pa buawu malonga mu tulasa, dikeba dia kulengeja ndongeshilu wetu nedikale mua kutubungamija. Kadi bua kulongesha bimpe kabiena bikengela kuikala anu ne mamanya a pa buawu to, kadi bidi bikengela kuikala ne tshikuabu tshintu kampanda tshia mushinga mukole. Tangila tshivua mulongeshi mukuabu mupiluke mufunde mu mukanda uvua wakula bua bualu ebu: “Kulongesha kakuena kulomba kuikala anu ne mamanya anyi ngikadilu, ngenzelu peshi malu kampanda masunguluke to. . . . Bua kulongesha tshia kumpala bidi bikengela kuikala ne dinanga..” Bushuwa, uvua wakula bua mulongeshi wa malu a panu. Kadi mêyi ende adi mua kutangila kabidi ndongeshilu wetu tuetu bena Kristo. Mmushindu kayi?

³ Yezu Kristo ke mulongeshi udi muikale Tshilejilu tshietu, wakambila bayidi bende ne: “Ndi munuleje tshilejilu.” (Yone 13:15, MMM) Uvua wakula bua tshilejilu tshiende tshia dileja budipuekeshi, kadi tshilejilu tshiakatuleja Yezu tshidi tshitangila kabidi mudimu munene wakenzaye pavuaye pa buloba: mudimu wa dilongesha bantu lumu luimpe lua Bukalenge bua Nzambi. (Luka 4:43) Mpindieu, wewe musue kutela muaku umue bua kumvuija mudimu wa Yezu, pamu’apa neusungule muaku “dinanga,” ki mmuomu anyi? (Kolosai 1:15; 1 Yone 4:8) Dinanga divua Yezu munange Yehowa Tatuende wa mu diulu ke tshintu tshia kumpala tshivua ne mushinga wa bungi. (Yone 14:31) Kadi mu ndongeshilu wende, Yezu wakaleja dinanga mu mishindu mikuabu ibidi. Uvua munange bulelela buvuaye ulongesha, ne uvua munange bantu bavuaye ulongesha. Tukonkononayi bimpe menemene malu abidi aa a tshilejilu tshidiye mutuleje.

Dinanga dia kashidi bua bulelela bua Nzambi

4. Mmunyi muvua Yezu mulonge mua kunanga malongesha a Yehowa?

⁴ Mushindu udi mulongeshi wangata malu adiye ulongesha udi ne bukole bua bungi pa ndongeshilu wende. Dilengulula malu aa didi pamu’apa mua kumueneka ne kutampakena balongi bende. Yezu kavua ulengulula bulelela bua mushinga mukole buvuaye ulongesha pa bidi bitangila Yehowa ne Bukalenge  Buende to. Yezu uvua munange malu aa bikole. Bu muvuaye mulongi wakayila mua kunanga malu aa. Munkatshi mua bidimu bivulavulayi bia patshivuaye mu diulu, Muana umuepele mulela eu uvua mulongi wa tshisumi. Yeshaya 50:4, 5 udi wamba mêyi aa adi mamuakanyine ne: ‘Mukalenge Yehowa wakumpa ludimi lua badi bayila bua meme kumanya mua kukuatshisha muntu [udi] mupungile ne dîyi. Ku dinda ku dinda udi utabala, udi utelejija ditshi dianyi bua kumvua bianyi bu mudi bayidi bumvua. Mukalenge Yehowa wakujikula matshi anyi, ne tshiakamutombokela, tshiakamukoma nyima.’

5, 6. (a) Mbualu kayi buakamona Yezu pakatambulaye, ne bualu abu buakamuenzela tshinyi? (b) Ndishilangana kayi ditudi tumona pankatshi pa Satana ne Yezu pa bidi bitangila dienza mudimu ne Dîyi dia Nzambi?

⁵ Pavua Yezu wenda ukola bu muntu pa buloba, wakatungunuka ne kunanga meji. (Luka 2:52) Pashishe mu tshikondo tshiakatambulaye, wakamona bualu bua pa buabu. Luka 3:21 udi wamba ne: “Diulu diakabululuka.” Bidi bimueneka ne: mpindieu Yezu wakavuluka muoyo uvuaye nawu mu diulu kumpala kua kuluaye pa buloba. Pashishe wakenza matuku 40 mu tshipela, kayi udia kayi unua. Uvua ne bua kuikala musanke bikole pavuaye welangana meji bua bitupa bivule bia malu avua Yehowa mumulongeshe mu diulu. Kadi kunyima kua matuku makese, dinanga diende dia bulelela bua Nzambi divua ne bua kupeta diteta.

⁶ Pavua Yezu mupungile ne muikale ne nzala, Satana wakamuteta. Ndishilangana kayipu ditudi tumona pankatshi pa bana babidi ba Nzambi aba! Buonso buabu bakatela mêyi a mu Mifundu ya tshiena-Ebelu, kadi ne lungenyi lushilangane bikole. Satana wakakonyangaja Dîyi dia Nzambi ne kavua udinemeka to, wakadiangata bua kukumbaja nadi bipatshila biende bibi. Bushuwa, ntomboji eu uvua upetula bulelela bua Nzambi. Kadi Yezu yeye uvua utela mêyi a mu Mukanda wa Nzambi ne dinanga dilelela, wela Dîyi dia Nzambi mu diandamuna dionso divuaye ufila. Yezu ukavua ne muoyo kuonso aku kumpala kua mêyi au kufundibua ku diambuluisha dia nyuma wa Nzambi, kadi nansha nanku uvua uanemeka bikole. Avua bulelela bua mushinga mukole bufume kudi Tatuende wa mu diulu! Yezu wakambila Satana ne: mêyi aa mafume kudi Yehowa avua ne mushinga wa bungi kupita biakudia. (Matayo 4:1-11) Bushuwa, Yezu uvua munange bulelela buonso buvua Yehowa mumulongeshe. Kadi mmunyi muvuaye muleje dinanga adi pavuaye ulongesha?

Uvua munange bulelela buvuaye ulongesha

7. Bua tshinyi Yezu wakabenga bua kudienzela ende malongesha?

⁷ Dinanga divua nadi Yezu bua bulelela buvuaye ulongesha divua dimueneka patoke misangu yonso. Bua kuamba bulelela, uvua mua kuikala mudienzele ende malongesha bipepele. Uvua ne dimanya ne meji bia bungi menemene. (Kolosai 2:3) Kadi, wakavuluija misangu ne misangu bateleji bende ne: malu onso avuaye ulongesha kaavua afumina kudiye to, kadi avua afumina kudi Tatuende wa mu diulu. (Yone 7:16; 8:28; 12:49; 14:10) Uvua munange bulelela bua Nzambi bikole menemene, kayi mua kupingaja meji ende yeye nkayende pa muaba wabu to.

8. Mmunyi muakaleja Yezu tshilejilu tshia dieyemena Dîyi dia Nzambi ku ntuadijilu kua mudimu wende?

⁸ Pakabanga Yezu kuenza mudimu wa kuyisha, wakaleja diakamue tshilejilu tshia kulonda. Tangila kumpalampala mushindu wakambilaye bantu ba Nzambi ne: uvua Masiya uvuabu balaye. Wakimana patupu kumpala kua bisumbu bia bantu, kudiamba muvuaye Kristo, ne pashishe kuenza bishima binene bua kubajadikila bualu abu anyi? Tòo. Wakaya mu nsunagoga, muaba uvua bantu ba Nzambi ne tshibidilu tshia kubala Mukanda wa Nzambi. Wakabalamu ne dîyi dikole mulayi wa Yeshaya 61:1, 2 ne kumvuijaye ne: bulelela buvua butangila mulayi au buvua bumukumbanyine yeye. (Luka 4:16-22) Bishima biende bivule biakambuluisha bua kujadika ne: Yehowa uvua umukuatshisha. Nansha nanku, uvua misangu yonso weyemena Dîyi dia Nzambi pavuaye ulongesha.

9. Mmunyi muakaleja Yezu dinanga diende dia lulamatu bua Dîyi dia Nzambi kumpala kua Bafalese?

⁹ Pavuabu bamuela mpata kudi baluishi bende bena bitendelelu bikuabu, kavua ukokangana nabu ku mêyi bua kubaleja muvuaye mubapite ku dimanya, nansha muvuaye mene mua kubaleja dimanya edi mu milandu ya nanku. Kadi wakalekela Dîyi dia Nzambi diodi nkayadi dibatuisha. Tshilejilu, vuluka dîba divua Bafalese babande bayidi ba Yezu ne: bavua bashipe mukenji wa Nsabatu bualu bavua batule ndambu wa miepu ya blé mu budimi kampanda ne kuyabu benda bayidia pavuabu bapitshilamu. Yezu wakandamuna ne: ‘Kanuakubala bualu buakenza Davidi, pakadiye ne nzala,  ne bakuabu bakadi nende anyi?’ (Matayo 12:1-5) Bushuwa, bantu aba bavua badimona bakane bavua mua kuikala babale muyuki eu mufundisha ku nyuma wa Nzambi udi mu 1 Samuele 21:1-6. Bikalabu bavua baubale, kabavua bajingulule dilongesha dinene divuamu to. Kadi Yezu kavua anu mubale patupu muyuki eu to. Ukavua muelangane meji bua diumvuija diawu ne muitabe malongesha avua mua kupatukilamu. Uvua munange malongesha avua Yehowa mumupeshe ku diambuluisha dia mêyi au a mu Mukanda wa Nzambi. Ke bualu kayi wakangata muyuki eu ne tshilejilu tshia mu Mikenji ya Mose bua kuleja ne: Mikenji ayi kayivua mishile to. Bia muomumue, dinanga dia lulamatu dia Yezu diakamusaka bua kubingisha Dîyi dia Nzambi kumpala kua malu avua balombodi ba bitendelelu bakeba bua kukonyangaja nawu Dîyi dia Nzambi bua kudisankisha anyi bua kujibakaja Dîyi edi ne bilele bia bantu.

10. Mmunyi muvua Yezu mukumbaje milayi ivua itangila buimpe bua ndongeshilu wende?

¹⁰ Dinanga divua nadi Yezu bua bulelela buvuaye ulongesha kadivua mua kumusaka bua kulongesha muenze bu muntu mukuate patupu malu ku muoyo, ualongesha mu mushindu uvua utondesha bantu anyi muikale ne mashika nansha. Milayi mifundisha ne diambuluisha dia nyuma wa Nzambi ikavua mileje bua Masiya ne: uvua ne bua kuakula ne “miaku milenga,” ne kabidi uvua ne bua kuamba ‘mêyi malengele.’ (Musambu 45:2, Mukanda wa Mvidi Mukulu [Mishonyi, MMV]; Genese 49:21) Yezu wakakumbaja milayi eyi pakenzaye bua malu avuaye umanyisha ikale asankisha bantu ne abapesha bukole, ubamanyishawu ne “miaku milenga” pavuaye ulongesha bulelela buvuaye munange bikole. (Luka 4:22, MMM) Kakuyi mpata, musangelu wende uvua umueneka pa mpala pende, ne mêsu ende avua akenka aleja muvuaye mutambe kunanga bulelela buvuaye ulongesha. Ndisanka kayipu divua bantu mua kuikala nadi bua kumuteleja, ne ntshilejilu buimpe kayipu tshidiye mutuleje bua tuetu kulonda patudi tuambila bakuabu malu atudi balonge!

11. Bua tshinyi mamanya avua ambuluisha Yezu bua kuikala mulongeshi kaavua manjiku kumusaka bua kuditambisha?

¹¹ Dimanya divule dia bulelela bua Nzambi divua nadi Yezu ne ngakuilu wende mulenga biakamusakaku bua kudibandisha anyi? Ke tshitu misangu mivule tshienzekela bantu badi balongesha. Kadi ikala mumanye ne: Yezu uvua ne meji avua aleja ne: uvua utshina Nzambi. Meji a mushindu’eu kaena asaka bantu bua kuikalabu ne lutambishi to, bualu ‘meji adi kudi bantu bapuekele.’ (Nsumuinu 11:2) Kudi bualu bukuabu buvua buenze bua Yezu kubenga kuikala ne lutambishi.

Yezu uvua munange bantu bavuaye ulongesha

12. Mmushindu kayi wakaleja Yezu ne: kavua musue bua bayidi bende bikale bamumona ubatshingisha?

¹² Dinanga dikole divua Yezu munange bantu divua ditamba kumuenekela mu ndongeshilu wende. Ndongeshilu wende kavua utshingisha bantu to, uvua mushilangane ne wa bantu bena lutambishi. (Muambi 8:9) Kunyima kua Petelo mumane kumona tshimue tshia ku bishima bia Yezu, wakakema bikole ne kuponaye panshi ku makasa a Yezu. Kadi Yezu kavua musue bua bayidi bende bikale bamutshina mushindu uvua kauyi muakanyine to. Wakambila Petelo mu buimpe ne: “Kutshinyi” ne pashishe kumuambilaye bua mudimu mulenga wa divuija bantu bayidi uvuaye ne bua kuenza pende. (Luka 5:8-10) Yezu uvua musue bua dinanga divuabu nadi bua bulelela bua mushinga mukole budi butangila Nzambi kuikaladi disaka bayidi bende ku dienza malu, pamutu pa ditshina dia mulongeshi wabu.

13, 14. Mmu mishindu kayi muvua Yezu mumvuile bantu luse?

¹³ Dinanga divua nadi Yezu kudi bantu bavuaye ulongesha diakamuenekela kabidi ku luse luvuaye ubumvuila. ‘Pakatangilaye bisumbu bia bantu, wakadi  nabu luse, bualu bua buobu bakadi batata, bakadi bamuangalake bu mikoko idi kayiyi ne mulami.’ (Matayo 9:36) Uvua ubumvuila luse bua nsombelu wa lutatu uvuabu nende ne muoyo wende wakamusaka bua kubambuluisha.

¹⁴ Tangila muakaleja Yezu luse dimue dituku. Pavua mukaji mukuabu uvua upatuka mashi mulue pabuipi nende munkatshi mua tshisumbu tshia bantu ne kulengaye ku luzembe lua tshilamba tshiende, disama dia mukaji eu diakajika mu tshishima. Yezu wakumvua bukole bupatuke mu mubidi wende, kadi kavua mumone muntu uvua muondapibue to. Yeye kusuminyinaye anu bua kumona mukaji au. Bua tshinyi? Kabivua bua kumukanyina bua muvuaye mushipe Mikenji anyi mêyi a bafundi ne Bafalese (bu muvuaye mua kuikala utshina) to. Kadi wakamuambila ne: ‘Muananyi, ditabuja diebe diakukusungila; uye biebe talala, wikale musangale ku disama diebe [dikole].’ (Mâko 5:25-34) Tangila muakalejaye luse mu mêyi aa. Yezu kakamba anu patupu ne: “Umvue bimpe.” Kadi wakamba ne: ‘Wikale musangale ku disama diebe dikole.’ Muaba eu Mâko udi utela muaku udi mua kumvuija ne: “lukodi,” bu mudi mfimbu utubu bakuma nende muntu bua kumukengesha. Nunku Yezu wakaleja muvuaye mumanye bimpe ne: disama dia mukaji eu divua dimukengeshe bikole, pamu’apa dimukengesha bikole mu mubidi ne mu lungenyi. Wakamumvuila luse.

15, 16. Mmalu kayi akenzeka mu mudimu wa Yezu adi aleja ne: uvua utangila anu ngikadilu mimpe ivua nayi bantu?

¹⁵ Yezu wakaleja kabidi dinanga divuaye nadi kudi bantu pavuaye utangila ngikadilu mimpe ivuabu nayi. Tangila tshiakenzeka pakapetanganaye ne Natanaele, eu wakalua mupostolo pashishe. ‘Yezu [wakamona] Natanaele ulua kudiye, wakamuamba ne: Tangilayi, yeye udi muena Isalele bulelela, udi kayi ne [mashimi].’ Mu tshishima, Yezu uvua mutangile mu mutshima wa Natanaele, kumanyaye malu a bungi avua amutangila. Bushuwa, Natanaele kavua muntu mupuangane to. Uvua ne biende bilema anu mudi yonso wa kutudi muikale nabi. Kadi pakumvuaye bakula bua Yezu, Natanaele wakamba mêyi avua umvuika bu kaayi mimpe ne: “Tshintu tshimpe tshidi tshimanye mua kufuma mu Nazaleta anyi?” (Yone 1:45-51) Bushuwa, ku malu onso avuaye mua kuamba pa bidi bitangila Natanaele, Yezu wakasungula bua kuimanyina pa bualu buvua buimpe: bulelela bua muntu eu.

¹⁶ Bia muomumue, pavua mfumu wa basalayi mukuabu, uvua pamu’apa muikale muena Lomo mulue kulomba Yezu bua kuondapa mupika wende uvua usama, Yezu uvua mumanye bimpe ne: musalayi au uvua ne bilema. Kumanda wa basalayi wa mu tshikondo atshi uvua mua kuikala muenze malu a bungi a tshikisu kale bu mudi diela dia mashi a bantu panshi ne ditendelela nzambi ya dishima. Nansha nanku Yezu wakashindamena pa bualu kampanda buimpe: ditabuja dia dikema dia muntu au. (Matayo 8:5-13) Pashishe, pakayikilaye ne muenji wa malu mabi uvuabu bapopele ku mutshi ku luseke luende, Yezu kakatandisha muntu au bua malu ende mabi avuaye muenze ku kale to, kadi wakamukolesha ku muoyo ne ditekemena bua matuku atshivua alua. (Luka 23:43) Yezu uvua mumanye bimpe ne: diangata bakuabu bibi ne dibatobolola divua mua kubatekesha mu mikolo. Kakuena mpata bua se: didienzeja diende bua kumona ngikadilu mimpe ivua nayi bakuabu diakapesha bantu ba bungi muoyo wa kutamba kuenza malu mimpe.

Uvua musue kusadila bantu

17, 18. Pakitaba Yezu bua kulua pa buloba, mmunyi muakalejaye budisuile bua kusadila bakuabu?

¹⁷ Bualu bukuabu bunene budi buleja dinanga divua nadi Yezu kudi bantu bakalongeshaye buvua disua diende bua kubasadila. Patshivuaye mu diulu, Muana wa Nzambi uvua munange bantu misangu yonso. (Nsumuinu 8:30, 31) Bu muvuaye ‘Dîyi’ anyi mumanyishi wa mêyi wa Yehowa, uvua mua kuikala muenze malu a bungi pamue ne  bantu. (Yone 1:1) Kadi, bumue bua ku malu avuaye muvuile pa buloba bua kulongeshaye bantu buludiludi mbua se: ‘wakadiumushila bimanyinu bia butumbi buende, pakangataye mubidi wa mupika,’ kushiyaye muanzu mubandile uvuaye nawu mu diulu. (Filipoi 2:7; 2 Kolinto 8:9) Pavuaye pa buloba, Yezu kavua windila bua bantu bamusadile to. Kadi wakamba ne: ‘Muana wa muntu kakuluila bua bantu bamukuatshile mudimu, wakuluila bua kubakuatshila mudimu ne bua kufila muoyo wende bua kupikula nawu bantu ba bungi.’ (Matayo 20:28) Yezu wakakumbaja mêyi aa bimpe menemene.

¹⁸ Yezu wakasadila bavuaye ulongesha ne budipuekeshi buonso, kudifilaye ne muoyo mujima bua bualu buabu. Wakendakana mu Buloba Bulaya bujima ku makasa, kuenzaye nkama ne nkama ya kilometre wenda wamba Dîyi dia Nzambi, ne tshipatshila tshia kuyisha bantu ba bungi menemene. Yezu uvua mushilangane ne Bafalese ne bafundi bena lutambishi, bualu yeye wakashala anu muena budipuekeshi ne wa kukuatshila bualu. Bantu ba mishindu yonso: banene, basalayi, banzuji, bakaji, bana, bapele, babedi, nansha aba bavuabu babenge mu bantu, bavua badiyila kudiye kabayi ne buôwa to. Nansha muvuaye mupuangane, Yezu uvua muntu wa mashi ne mâyi, upungila ne umvua nzala. Kadi nansha pavuaye mupungile anyi muikale ne dijinga dia kuikisha anyi ukeba muaba uvua kauyi diyoyo wa kuenzela masambila, uvua uteka majinga a bakuabu kumpala kua ende.​—Mâko 1:35-39.

19. Mmunyi muvua Yezu muleje bayidi bende tshilejilu tshia kuenzelangana malu ne budipuekeshi, ne lutulu ne bulenga?

¹⁹ Yezu uvua kabidi musue kusadila bayidi bende. Wakabasadila pakabalongeshaye ne bulenga ne lutulu luonso. Pavuabu ne lujoko lua kumvua amue malongesha a mushinga, kavua usunuka, ufika munda anyi ubatandisha nansha. Uvua utungunuka ne kukeba mishindu mikuabu ya kubumvuija tshivuaye musue kubambila. Tshilejilu, elabi meji bua bungi bua misangu ivua bayidi bende bakokangane bua kumanya uvua mutambe bakuabu munkatshi muabu. Misangu ne misangu, too ne butuku bua muladilu wa lufu luende, Yezu wakabalongesha mu mishindu mikuabu bua kuenzelanganabu malu ne budipuekeshi buonso. Pa bidi bitangila budipuekeshi ne malu makuabu onso, Yezu wakamba bimpe ne: “Ndi munuleje tshilejilu.”​—Yone 13:5-15, MMM; Matayo 20:25; Mâko 9:34-37.

20. Nndongeshilu kayi uvua muvuije Yezu mushilangane ne Bafalese, ne bua tshinyi ndongeshilu au uvua muimpe?

²⁰ Tangila ne: Yezu kakambila anu bayidi bende patupu bualu buvua buikale tshilejilu, kadi ‘wakabaleja tshilejilu.’ Wakabalongesha ku tshilejilu. Kavua wakula nabu muenze bu shefu ubasamina, udimona yeye kayi mukumbane bua kuenza malu avuaye ubambila buobu bua kuenza to. Bafalese ke bavua benza nanku. Yezu wakamba bualu buabu ne: “Badi bamba kabayi benza.” (Matayo 23:3, MMM) Yezu wakaleja balongi bende ne budipuekeshi buonso tshivua malongesha ende umvuija menemene pavuaye uatumikila yeye muine. Ke bualu kayi pakabelaye bayidi bende bua kubenga kukutakaja nsombelu wabu ne bintu bipitebipite bungi patupu, kabivua bibakengela bua kubuka tshivuaye musue kumvuija to. Bavua badimuenena buobu nkayabu bulelela bua mêyi ende aa: ‘Mibuabua idi ne mena ayi, nyunyi ya mulu idi ne masua ayi; kadi Muana wa muntu kêna ne pa kuladika mutu wende.’ (Matayo 8:20) Yezu wakenzela bayidi bende mudimu pa kubaleja ne budipuekeshi buonso tshilejilu tshia kulonda.

21. Ntshinyi tshituamona mu tshiena-bualu tshidi tshilonda?

²¹ Kakuyi mpata, Yezu uvua Mulongeshi mutambe bunene wa katshia ne katshia! Dinanga divuaye nadi bua malu avuaye ulongesha ne bua bantu bavuaye ulongesha divua dimueneka patoke ku mêsu kua bantu bavua basue kulonga bulelela bakamumona ne bakamuteleja. Didi kabidi dimueneka patoke lelu ku mêsu kua aba ba kutudi badi balonga tshilejilu tshiakalejaye. Kadi mmunyi mutudi mua kulonda tshilejilu tshipuangane tshia Kristo? Tshiena-bualu tshidi tshilonda netshiandamune lukonko elu.

Newandamune munyi?

• Ntshinyi tshidi tshikale nshindamenu wa ndongeshilu muimpe, ne nnganyi wakaleja bualu ebu?

• Mmu mishindu kayi muvua Yezu muleje dinanga bua bulelela buvuaye ulongesha?

• Mmunyi muakaleja Yezu ne: uvua munange bantu bavuaye ulongesha?

• Mbilejilu kayi bidi bileja budisuile bua budipuekeshi buvua nabu Yezu bua kusadila bavuaye ulongesha?

[Nkonko ya dilonga]

[Tshimfuanyi mu dibeji 12]

Mmunyi muakaleja Yezu ne: uvua munange malongesha adi mu Dîyi dia Nzambi?