Neushale ne lulamatu anyi?

MMISHAMISHA bungi kayi idi mifue makelela? Kakuena muntu udi mumanye to, ne bumue anu bakese patupu ke badi baditatshisha bua kumanya muanda eu, bualu kudi nyunyi mikuabu mipite bungi. Kadi Yehowa yeye udi uditatshisha bua bualu buayi. Yezu wakambila bayidi bende bua nyunyi eyi idi imueneka bu idi kayiyi ne mushinga ne: “Mushamusha nansha umue kawena mua kupona panshi Tatu wenu kayi [mumanye].” Wakamba kabidi ne: “Lekelayi kutshina. Nuenu nudi bapite mishamisha tshisumbu ku mushinga.”​—Matayo 10:29, 31, MMM.

Kunyima, bayidi bende bakumvua bimpe menemene mushindu uvua Yehowa ubangata ne mushinga. Umue wa kudibu, mupostolo Yone yeye wakafunda ne: ‘Mu muanda eu dinanga dia Nzambi diakamueneshibua bua bualu buetu, bualu bua Nzambi wakatuma Muanende umuepele pa buloba bua tuetu tuikale ne muoyo bua bualu buende.’ (1 Yone 4:9) Yehowa kêna anu mutupeshe mulambu wakutupikula nawu patupu, kadi udi ujadikila musadidi wende yonso ne: ‘Tshiena nkulekela, nansha kakese, tshiena nkushiya tshianana.’​—Ebelu 13:5.

Bulelela, dinanga didi Yehowa uleja bantu bende kadiena mua kushintuluka to. Kadi lukonko ludi lujuka ne: ‘Tudiku balamate Yehowa bikole katuyi mua kumulekela anyi?’

Malu adi Satana ukeba kunyanga nawu lulamatu luetu

Pakatangija Yehowa ntema ya Satana ku lulamatu lua Yobo, Satana wakamuebeja ne: ‘Yobo udi utshina Nzambi patupu anyi?’ (Yobo 1:9) Wakamba mu mipinganyi ne: lulamatu lua bantu kudi Nzambi ludi lulondeshila ku ‘tshidilu mua kubapetesha.’ Bu bualu ebu buikale bulelela, lulamatu lua muena Kristo kayi yonso luvua mua kuteketa, buobu anu bamutebe ne tshintu tshidi mua kumulobesha.

Pa bidi bitangila Yobo, ku ntuadijilu Satana wakamba ne: lulamatu lua Yobo kudi Nzambi luvua mua kunyanguka bu yeye mujimije bintu biende bivuaye mutambe kunanga bikole. (Yobo 1:10, 11) Pakamuenekabi ne: bualu ebu buvua bua dishima, Satana wakamba kabidi ne: “Muntu udi mua kufila bionso bidiye nabio bua kusungidila muoyo wende.” (Yobo 2:4, MMM) Nansha mudi mêyi a Satana aa mua kuikala malelela bua bamue bantu, Yobo yeye wakabenga ne muoyo wende mujima bua kulekela lulamatu luende. Muyuki wa malu akenzeka udi ujadika muanda au. (Yobo 27:5; 42:10-17) Udi pebe ne lulamatu lua buena elu anyi? Peshi udi mua kulekela Satana unyanga lulamatu luebe? Wele meji bua nsombelu udi ukutangila wewe nkayebe patudi tukonkonona amue malu malelela adi atangila muena Kristo yonso muaba eu.

Mupostolo Paulo uvua mumanye ne: lulamatu lua bena Kristo balelela ludi mua kuikala lukole menemene. Wakafunda ne: ‘Ndi ngitabujibua ne: kakuena lufu, kakuena muoyo, kakuena malu atshidiku, kakuena malu atshilualua, kakuena tshintu tshionso tshikuabu tshifukibua tshidi ne bukole bua kutupandulula ku dinanga dia Nzambi didi mu Kristo Yezu Mukalenge wetu.’ (Lomo 8:38, 39) Tudi mua kuikala ne dishindika dia muomumue anu tuetu bikale banange Yehowa bikole. Dinanga dia mushindu’eu ntshisuikidi  tshikole tshidi nansha lufu kaluyi mua kuenzela bualu.

Tuetu bikale ne malanda a mushindu’eu ne Nzambi, katuakudiebeja nansha kakese ne: ‘Nentungunuke ne kusadila Yehowa mu bidimu bikese bidi kumpala eku anyi?’ Dielakana dia nunku didi mua kuleja ne: lulamatu luetu kudi Yehowa ludi lulondeshila anu tshidi mua kutuenzekela mu matuku etu a muoyo. Lulamatu lulelela ludi muntu mua kuikala nalu kabena mua kuluenzela tshintu kudi malu adi apitakana pambelu nansha. Ludi lulondeshila tshitudi munda muetu. (2 Kolinto 4:16-18) Tuetu banange Yehowa ne mutshima wetu mujima, katuakumufuisha bundu nansha kakese to.​—Matayo 22:37; 1 Kolinto 13:8.

Kadi tudi ne bua kuikala bamanye ne: Satana udi misangu yonso ukeba anu bua kunyanga lulamatu luetu. Udi mua kututeta bua tuetu kulonda bijingajinga bia mubidi, bua kulonda bibidilu bibi bidi bantu batusaka bua kuikala nabi, anyi udi mua kuenza bua lutatu kampanda lutufikishe ku dilekela bulelela. Bena panu badi kule ne Nzambi ke bena mâyi banene ba Satana mu mvita eyi, nansha mudi dipanga bupuangana dietu dikale dimupepejila mudimu. (Lomo 7:19, 20; 1 Yone 2:16) Nansha nanku, tudi ne malu a bungi adi mua kutuambuluisha mu mvita eyi, bumue bua ku malu mimpe aa budi se: katuena bapange ngenyi ya Satana to.​—2 Kolinto 2:11.

Nngenyi kayi idi nayi Satana? Paulo wakayibikila mu mukanda wende uvuaye mutumine bena Efeso ne: “mateyi.” * (Efeso 6:11) Satana udi ututeya ne budimu bua kumona mua kunyanga lulamatu luetu. Diakalenga, tudi ne mushindu wa tuetu kumanya mateyi a budimu aa, bualu mbafunde ngenzelu ya Diabolo mu Dîyi dia Nzambi bua kutudimuija. Malu akenza Satana bua kunyanga lulamatu lua Yezu ne lua Yobo adi atuleja imue mishindu idiye ukeba kunyanga lulamatu luetu lua bena Kristo.

Satana kavua mua kunyanga lulamatu lua Yezu to

Ku ntuadijilu kua mudimu wa Yezu, Satana wakapeta dikamakama dia kuteta Muana wa Nzambi pakamuambilaye bua akudimune dibue dilue diampa. Mbuteyi kayipu! Yezu uvua muenze matuku 40 kayi mudie to, nanku nzala ivua ne bua kuikala mimuotole bikole. (Luka 4:2, 3) Satana wakambila Yezu bua akumbaje diakamue dijinga diende dia ku tshilelelu mu mushindu uvua ubengangana ne disua dia Yehowa. Bia muomumue lelu, malu adi bena panu batangalaja adi akankamija bantu bua kukumbaja majinga abu kakuyi njingakanyi to, kabayi belaku meji ku bipeta bidi mua kulua kumueneka panyima to. Lubila luabu lutu se: ‘Wewe udi mutshiakanyine mpindieu’ anyi ne: ‘Enza anu muudi musue.’

Bu Yezu mujikije nzala mikole ivuaye nayi kayi wela meji bua bipeta bivua bualu abu mua kupatula, Satana uvua mua kuikala mukokeshe bua kumufikisha ku dijimija lulamatu luende. Yezu wakatangila bualu abu ne dîsu dia mu nyuma, e kumuandamunaye ne dishindika dionso ne: “Mbafunde ne: muntu kena ne muoyo anu [bua] mampa nkayawo.”​—Luka 4:4, MMM; Matayo 4:4.

Pashishe Satana wakashintulula mayele ende. Diabolo wakakonyangaja ngumvuilu wa Mifundu ivua Yezu mutele, ne kumuambilaye bua kutumpika ku musonga wa ntempelo bua kudiela panshi. Satana wakamuambila ne: ‘Muanjelu neakulame.’ Yezu kavua ne meji a kulomba Tatuende bua amukube mu tshishima bua kudilejaye nansha. Yezu wakamuandamuna ne: “Kutetshi Mukalenge [Yehowa Nzambi] webe.”​—Matayo 4:5-7, MMM; Luka 4:9-12.

 Diyele dia ndekelu diakangata Satana dîba adi divua dia buludiludi menemene. Wakakeba bua buobu kumvuangana ne Yezu pakakebaye bua kumupesha bia panu bionso ne butumbi buabi, kadi anu pavua Yezu umukukuila kasangu nansha kamue patupu. Ebi bivua pabuipi ne bintu bionso bivua Satana mua kusua kupesha muntu. Kadi mmunyi muvua Yezu mua kukukuila muluishi munene wa Tatuende? Kavua mua kuenza bualu bua mushindu’au to! Wakamuandamuna ne: ‘Kukuila Mukalenge Nzambi webe, umuenzele yeye nkayende mudimu.’​—Matayo 4:8-11; Luka 4:5-8.

Yeye mumane kupangila misangu isatu eyi, Satana ‘wakashiya Yezu too ne tshikondo tshikuabu.’ (Luka 4:13) Ebi bidi bileja ne: dîba dionso Satana uvua anu ukeba muaba wa kutetshila lulamatu lua Yezu. Tshikondo tshikuabu tshiakakumbana kunyima kua bidimu bitue ku bibidi ne tshitupa pakabanga Yezu kulongolola meji a bayidi bende bua lufu luende lukavua lusemene pabuipi. Mupostolo Petelo wakamuambila ne: “[Nzambi] akulame Mfumu, abio kabiena mua kukuenzekela to!”​—Matayo 16:21, 22, MMM.

Mubelu eu mufila ne meji mimpe kadi muikale mubi uvuaku mua kuikala musankishe Yezu, nansha muvuawu ufumina kudi muyidi wende anyi? Yezu wakajingulula diakamue ne: mêyi au avua aleja meji a Satana, kadi ki nga Yehowa to. Ke Kristo kuandamunaye ne muoyo mujima ne: “Umbuka Satana; udi ukeba kundenduisha, bualu meji ebe ki nga kudi [Nzambi] to, nga kudi bantu!”​—Matayo 16:23, MMM.

Bu muvua Yezu munange Yehowa bikole, Satana kavua ne mushindu wa kunyanga lulamatu luende to. Kakuvua tshintu tshivua Diabolo mua kufila, anyi diteta dikole mushindu kayi divua mua kutekesha lulamatu luvua nalu Yezu kudi Tatuende wa mu diulu to. Netuikaleku petu ne dipangadika dia muomumue pikala ntatu mua kututatshisha bua kulama lulamatu luetu anyi? Tshilejilu tshia Yobo netshituambuluishe bua kumvua bimpe ntatu mikole itudi mua kupeta.

Lulamatu mu makenga

Anu muakamona Yobo, makenga adi mua kutukuata dîba dionso tshianana. Yobo uvua musombe bimpe ne mukajende ne bana bende dikumi, ne uvua wangata malu a mu nyuma ne mushinga. (Yobo 1:5) Kadi Yobo kavua mene mumanye ne: kuvua dikokangana bua tshilumbu tshia lulamatu luende mu diulu to, ne Satana uvua mupangadike bua kunyanga lulamatu luende nansha.

Mu katupa kakese patupu, Yobo kujimijaye bubanji buende buonso. (Yobo 1:14-17) Nansha nanku, Yobo wakakandamena diteta edi ne lulamatu bualu kavuaku muanji kueyemena mfranga nansha bia munyi. Yobo wakavuluka tshikondo tshivuaye mubanji, wamba ne: ‘Bingikala muvuije or bu ditekemena dianyi, bingikala musanke bualu bua bubanji buanyi buakadi bunene, bualu ebu kabidi buakadi kuikala [tshilema], bualu bua ngakadi kubenga Nzambi wa mu diulu.’​—Yobo 31:24, 25, 28.

Lelu, bidi mua kutufikila petu bua kujimija musangu umue bintu pabuipi ne bionso bitudi nabi. Bakiba Ntemu wa Yehowa mukuabu ngenda-mushinga mfranga mipite bungi, kumushiyabu anu bianza bitupu. Udi wamba ne: “Mvua muambe kupeta disama dia mioyo. Bushuwa, ndi ngela meji ne: mvua mua kuikala mudipete bu kabiyi bua malanda andi mudie ne Nzambi. Nansha nanku, bualu ebu buakamvuluija ne: tshivua muteke malu a mu nyuma pa muaba wa kumpala mu nsombelu wanyi to. Dikeba dia mfranga divua disua kupita malu makuabu onso.” Kadi kubangila anu dîba adi Ntemu eu mmukepeshe midimu yende ya bungenda bikole, ne utu wangata bumpanda-njila buambuluishi pa tshibidilu, wenza mêba 50 anyi mapite apu ku ngondo yonso mu mudimu wa diyisha. Kadi ntatu mikuabu idi mene mua kuikala itatshisha kupita ne dijimija dia bubanji.

Yobo kavua muanji nansha kumvua bimpe ngumu ya dijimina dia bubanji buende pakamuambilabu ne: bana bende dikumi bavua bafue. Wakatungunuka ne kuamba ne: “Dina dia Yehowa ditumbishibue.” (Yobo 1:18-21) Tudiku petu mua kulama lulamatu luetu bu tuetu mua kujimija bena mu dîku dietu ba bungi musangu umue anyi? Muanetu Francisco (mukulu mu ditunga dia Espagne) wakajimija bana bende babidi mu njiwu mikole ya bise. Disambila Yehowa ne divudija mudimu wende wa buambi biakamukolesha.

Nansha kunyima kua lufu lua dibungama lua bana bende, lutatu lukole lua Yobo kaluvua luanji kujika to. Satana wakamutua disama dikole dibiadibi. Dîba adi ke diakapeta Yobo mubelu mubi wa  mukajende. Wakamuambila ne: “Diula Nzambi ne fuaku biebe!” Yobo kakateleja mubelu wende to, ne ‘kakamba bualu bubi ku mishiku yende nansha.’ (Yobo 2:9, 10) Lulamatu luende kaluvua lushindamene pa malu avuabu bamukankamija nawu kudi bena mu dîku diende to, kadi luvua lushindamene pa malanda ende a nsungasunga ne Yehowa.

Muanetu wa bakaji Flora, muena bayende ne muanende muanabute bavua balekele bulelela kukadi bidimu bipite pa dikumi, udi umvua tunyinganyinga tuvua Yobo ne bua kuikala mumvue. Muanetu Flora udi wamba ne: “Paudi ujimija musangu umue dikuatshisha dia bena mu dîku diebe, bidi bisama ku muoyo bikole menemene. Kadi mvua mumanye ne: tshivua mua kupeta disanka pambelu pa bulongolodi bua Yehowa to. Ke bualu kayi ngakashala mushindame ne meme kuteka Yehowa pa muaba wa kumpala eku ndienzeja bua kutungunuka ne kuikala mukaji ne mamu muimpe. Mvua nsambila dîba dionso, ne Yehowa uvua unkolesha. Nansha mudi bayanyi mutungunuke ne kubenga bulelela, ndi ne disanka bualu ndi mumanye mua kueyemena Yehowa ne muoyo mujima.”

Buteyi bukuabu buvua Satana ukeba kunyanga nabu lulamatu lua Yobo buvua butangila balunda bende basatu. (Yobo 2:11-13) Bivua ne bua kuikala bimubungamije bikole pakabangabu kumutobolola. Bu yeye muitabe bivuabu bamba, uvua mua kupangila mua kushala mueyemene Yehowa Nzambi. Mibelu yabu ivua mua kumutekesha mu mikolo ne kunyanga lulamatu luende, nanku diyele dia Satana adi divua mua kuikala dikumbane.

Pamutu pa nanku Yobo wakamba ushindika ne: ‘Too ne pangafua bianyi tshiena ngitabuja bua [lulamatu anyi] mutshima wanyi mutoke umuke kundi.’ (Yobo 27:5) Kakamba ne: ‘Tshiena ne bua kunulekela nuenu bantu aba nunyange lulamatu luanyi to!’ Yobo uvua mumanye ne: lulamatu luende luvua tshilumbu tshivua tshimutangila yeye ne dinanga divuaye uleja Yehowa.

Buteyi bua katshia ku kale

Satana utshidi ukuata mudimu ne mibelu peshi mêyi mabi a balunda ne bena Kristo netu. Malu adi atekesha mu mikolo adi afumina munda mua tshisumbu mbipepele bua kutekeshawu dieyemena dietu kupita ditukengesha didi difumina pambelu pa tshisumbu. Mukulu mukuabu muena Kristo wakaluangana mvita patshivuaye musalayi mu tshiluilu kampanda wakaleja dishilangana divua pankatshi pa mvita ayi ne kanyinganyinga kakapetaye bua mêyi ne malu mabi a bamue bena Kristo nende. Wakamba bua mêyi ne malu a bamue bena Kristo nende ne: “Mbualu butambe bukole butu kabuyi buanji kumfikila katshia.”

Mmumue ne: bilema bia bena Kristo netu bidi mua kutubungamija bikole, tufika ne ku dibenga kuakuishangana ne bamue anyi mene tulekela kubuela mu bisangilu bia bena Kristo. Tudi mua kubanga kumona ne: tshidi ne mushinga menemene tshidi anu dijikija kanyinganyinga katudi naku. Kadi nebikale bia dibungama dia bungi bua kuikala ne lumonu luipi lua mushindu’eu ne kulekela malu adi bakuabu benza anyi bamba atekesha malanda etu ne Yehowa adi mikale tshintu tshietu tshia mushinga mutambe bunene. Tuetu balekele bualu bua mushindu’eu butuenzekela, tudi tukuatshika mu bumue bua ku mateyi a Satana a katshia ku kale aa.

Ntshia bushuwa bua se: tudi tukeba bua mu tshisumbu tshia bena Kristo muikale bikadilu bilenga menemene. Kadi tuetu bikale tukeba bua bena Kristo netu (batshidi bapange bupuangane) benze bipitshidile, netuidibue mâyi ku makasa tshianana. Kadi Yehowa udi yeye ulomba basadidi bende malu adi makanyine. Tuetu bidikije tshilejilu tshiende, nebituambuluishe bua kubabuikidila bilema biabu. (Efeso 4:2, 32) Mupostolo Paulo wakafila mubelu eu: ‘Nuikale ne tshiji kadi kanuenji bualu bubi; dîba kadibueledi tshiji tshienu; kanushidi Diabolo muaba mu mitshima yenu.’​—Efeso 4:26, 27.

Anu mudi Bible uleja patoke, Satana udi wangata mateyi bungi tshianana bua kumona mua kupeta mushindu udiye mua kunyanga lulamatu lua bena Kristo. Amue a ku mateyi ende atu alobesha mubidi wa butekete eu, makuabu pawu atu mikale biledi bia ntatu. Malu atudi bamone aa adi mua kukuambuluisha bua kumanya bua tshinyi udi ne bua kuikala mudilongolole misangu yonso. Bu muudi munange Nzambi bikole mu mutshima webe, ikala mupangadike bua kuleja ne: Diabolo mmuena mashimi, ne usankishe mutshima wa Yehowa. (Nsumuinu 27:11; Yone 8:44) Vuluka ne: lulamatu lua bena Kristo balelela ki ntshintu tshia kulekela to nansha ntatu ya mushindu kayi yoyi mitukuate.

[Mêyi adi kuinshi]