Nkonko ya babadi

Mifundu idi yamba tshinyi pa mushindu wa kukolesha bana padi muledi umue muikale Ntemu mukuabu kayi Ntemu?

Kudi mêyi manene abidi a mu Bible adi aleja mudi muledi udi Ntemu mua kukolesha bana padi muena dibaka nende kayi Ntemu. Dimue dîyi ndiodi edi: ‘Butudi nabu mbua kutumikila mêyi a Nzambi kumpala kua mêyi a bantu.’ (Bienzedi 5:29) Dikuabu ndiodi edi: ‘Mulume udi ku mutu kua mukaji bu mudi Kristo ku mutu kua ekeleziya.’ (Efeso 5:23) Dîyi dia mu Efeso edi ndia kulonda nansha padi mulume kayi Ntemu to. (1 Petelo 3:1) Kadi mmunyi mudi muledi udi Ntemu mua kulonda mêyi abidi aa ne nkatshinkatshi padiye ulongesha bana?

Pikala mulume muikale Ntemu, yeye ke udi ne bujitu bua kupesha dîku biakudia bia mu nyuma ne bia ku mubidi. (1 Timote 5:8) Nansha mudi mamu udi kayi Ntemu mua kushala mutantshi mule ne bana ku nzubu, tatu udi Ntemu udi ne tshia kulongesha bana malu a mu nyuma ne kuya nabu mu bisangilu (muaba udibu mua kulonga malu a bikadilu bilenga ne kupeta balunda bimpe).

Kadi nebikale munyi pikala mukaji udi kayi Ntemu wamba wosha munu muiku ne: mmusue kuya ne bana mu tshitendelelu tshituye yeye uya anyi mmusue kubalongesha malu a mu nzambi muabu? Mikenji ya ditunga idi mua kumupesha bukenji ebu. Tshidibi, mushindu udi tatu ulonga ne bana udi mua kuenza ne: malu a mu tshitanda tshia mamuabu abasankishe anyi kaabasankishi. Kadi padi bana bakola, nkoleshilu wa malu a mu nyuma wa tatuabu udi mua kubasaka bua kulonda bulelela bua mu Dîyi dia Nzambi. Tatu udi mua kumvua disanka be padi bana ba nunku balonda dikasa diende!

Padi mamu muikale Ntemu, udi ne bua kunemeka bumfumu bua bayende eku muikale uditatshisha bua diakalenga dia tshiendelele dia bana bende. (1 Kolinto 11:3) Misangu mivule balume badi kabayi Bantemu kabatu babengela bakaji babu bua kulongesha bana malu a mu nyuma ne a bikadilu bilenga atubu kabidi balongesha mu bisangilu bietu bia Bantemu. Mukaji udi mua kuambuluisha bayende eu udi kayi Ntemu bua amone mudi malu adi muana upeta mu bulongolodi bua Yehowa mikale ne mushinga. Udi mua kuleja ne budimu mudibi ne mushinga bua kulongesha bana malu a bikadilu bilenga adi mu Bible (bualu bantu kabatshitu ne bikadilu bilenga ebi to).

Kadi, bumue bayende udi mua kubenga ne muoyo mujima, wamba ne: bana badi ne bua kumulonda, ubangata uya nabu mu tshitendelelu tshiende ne ubalongesha malu a muomu. Peshi tatu eu udi mua kubenga ne muoyo umue malu a bitendelelu bionso ne kubenga bua kulongeshabu bana bende malu a Nzambi. Bu mudiye mfumu wa dîku, yeye ke udi ne bukenji bangabanga bua kuangata mapangadika. *

Padi mukaji udi Ntemu unemeka bumfumu bua bayende, udi ne tshia kuvuluka ngikadilu wa Petelo ne Yone. Bakamba ne: “Katuena mua kulekela kumanyisha bitudi bamone ne bumvue.” (Bienzedi 4:19, 20, MMM) Mamu udi uditatshisha bua dikala bimpe mu nyuma dia bana bende, neapete anu mushindu wa kubaludika  bilenga. Udi ne bujitu ku mêsu kua Nzambi bua kulongesha bantu bakuabu malu adiye mumanye ne: mmalelela, mu bantu badiye ne bua kulongesha abu mudi ne bua kuikala kabidi bana bende. (Nsumuinu 1:8; Matayo 28:19, 20) Kadi mamu muena Kristo udi mua kupita munyi ne tshilumbu tshikole etshi?

Tuangatabi tshilejilu tshia ditabuja Nzambi. Mamu udi Ntemu udi mua kupanga mushindu wa kulonga Bible ne bana bu mudibi bikengela bualu bayende kêna witaba to. Nanku neabenge kuambila bana nansha ka-bualu pa malu a Yehowa anyi? Tòo. Mêyi ende ne bienzedi biende bidi mua kuikala bileja patoke mudiye witabuja ne: Mufuki udiku. Kakuyi mpata, bana bende badi mua kuikala ne nkonko pa bidi bitangila Mufuki. Kêna ne tshia kumvua bibi anyi kudikanda bua kuambila bantu (kusangisha ne bana bende) malu adi atangila Mufuki to. Nansha mudiye kayi mua kupeta mushindu wa kulonga Bible ne bana peshi kuya nabu mu bisangilu matuku onso, udi mua kubamanyisha malu a Yehowa.​—Dutelonome 6:7.

Paulo udi wamba pa bidi bitangila muena dibaka Ntemu udi ne muena dibaka nende kayi Ntemu anyi muena kuitabuja ne: ‘Mulume udi kayi muena ditabuja udi mujidila mu mukaji wende, ne mukaji udi kayi muena ditabuja udi mujidila mu mulume wende udi muena ditabuja; bikala bualu ebu kabuyi nunku, bana benu batshidi babipa; kadi katataka badi ba tshijila.’ (1 Kolinto 7:14) Yehowa udi umona dibaka bu dia tshijila bua muenamu udi muena kuitabuja; ne udi umona bana ba mu dibaka edi bu ba tshijila. Ntemu mukaji udi ne bua kuenza muende muonso bua bana bumvue bulelela, ulekela bikuabu bionso bidi bishala mu bianza bia Yehowa.

Padi bana bakola, nebikale ne bua kuangata dipangadika bilondeshile malu avuabu balongele kudi baledi babu. Bana badi mene mua kupangadija bua kulonda mêyi a Yezu aa: “Muntu udi unanga tatuende nansha mamuende bipite mudiye munnange meme, kena mungakanyine.” (Matayo 10:37, MMV) Bible udi wambila kabidi bana ne: “Nuenu bana, nutumikile baledi benu bualu bua Mfumu.” (Efeso 6:1, MMM) Bansonga bavule bakasungula bua ‘kutumikila mêyi a Nzambi kumpala’ kua mêyi a tatuabu anyi mamuabu uvua kayi Ntemu, nansha muvuaye ubakengesha. Ndisankapu kayi didi nadi muledi udi Ntemu padiye umona bana bangata dipandika dia kuenzela Yehowa mudimu nansha babaluisha!

[Mêyi adi kuinshi]