“Nudi bamanye bua tshinyi ndi nnupingajila makuta enu aa anyi?”

NANA (mamu mukuabu uvua udikoleshila bana bende ba balume basatu, uvua musombele mu tshimenga tshia Kaspi [mu ditunga dia Georgie]) wakafunda ne: “Eyi! ndi ne dijinga dia makuta dikole be!” Dinda dikuabu, tshilota tshiende tshia kupeta makuta kukumbanatshi. Kuangulaye lari 300 (mfranga ya mu Georgie) pabuipi ne nzubu wa bampulushi. Muntu nansha umue kavua muaba au to. Makuta au avua a bungi be. Pabi, Nana kavuaku nansha muanji kumona dibeji dietu dia lari 100 edi mu bidimu bitanu bia katshia bangata lari bu makuta a ditunga dia Georgie. Ba-ngenda ba mu ditunga kabavua mua kupeta makuta bungi ebu nansha panyima pa bamane kuenza mudimu bidimu bia bungi.

Nana kudikonkaye ne: ‘Makuta aa neangenzele tshinyi meme mujimije ditabuja dianyi, ditshina dianyi dia Nzambi ne munyange nsombelu wanyi wa mu nyuma?’ Nana uvua ne ngikadilu ya bena Kristo eyi nansha pavuabu bamukengesha bikole ne bamututa bua ditabuja diende.

Pavuaye uya mutangile ku nzubu wa bampulushi, Nana wakamona bampulushi batanu bakeba tshintu kampanda bu bakufuilaku. Yeye kumona ne: badi bakeba makuta, ke kusemena kudibu ne kuebejaye ne: “Nudi bajimije tshintu anyi?”

Buobu e kuamba ne: “Makuta.”

“Makuta bungi kayi?”

“Lari nkama isatu!”

Nana kubambilaye ne: “Ndi muangule makuta enu.” Ke yeye kubebeja ne: “Nudi bamanye bua tshinyi ndi nnupingajila makuta enu aa anyi?” Kabavua bamanye bua tshinyi to.

Yeye kutungunuka ne: “Bualu ndi Ntemu wa Yehowa. Bu meme tshiyi muikale Ntemu, tshivua mua kunupingajila makuta enu aa to.”

Mfumu wa bampulushi, muena makuta avua majimine kupeshaye Nana lari 20 bua kuleja dianyisha bua bululame buende.

Bualu abu kutangalakabu mu provense wa Kaspi yonso. Dituku diakalonda, muntu mukaji mukombi wa biro uvua ufumina ku nzubu wa bampulushi kuambilaye Nana ne: “[Mfumuanyi wa mudimu] utu ne tshibidilu tshia kulama mikanda yenu mu biro biende. Kadi bua mpindieu neayanyishe bikole kupita ne kumpala.” Munene mukuabu wa bampulushi kuambaye ukema ne: “Bu bantu bonso bikale Bantemu ba Yehowa, uvua ne bua kubunda tshibawu nganyi?”