Udi mukumbanyine lulamatu nnganyi?

“Ditunga dietu: . . . Didi anu dilenga misangu yonso; nansha diodi dibi anyi dimpe, didi anu ditunga dietu.”​—Stephen Decatur, mulombodi wa tshiluilu tshia pa mâyi tshia mu États-Unis, 1779-1820.

BANTU ba bungi batu bangata dilamata ditunga diabu kakuyi dielakana anu bu bualu bua kumpalampala menemene budibu ne tshia bua kuenza. Bakuabu badi mua kuambulula mêyi a Stephen Decatur mushindu’eu: ‘Tshitendelelu tshianyi, tshidi anu tshilenga misangu yonso; nansha tshiotshi tshimpe anyi tshibi, tshidi anu tshitendelelu tshianyi.’

Bulelela, bantu batu misangu mivule bashala balamate ditunga anyi ntendelelu wa muaba udibu babalelele, kadi dipangadika didi ditangila utudi ne bua kushala balamate didi ne mushinga wa bungi menemene, ke bualu kayi ki ndia kuangata mu mpukapuka nansha. Kadi, kuelesha malu adi muntu mulamate katshia ku buana buende mpata kudi kulomba dikima ne misangu ya bungi kutu kujula bilumbu.

Diteta dia lulamatu

Mamu mukuabu uvua mukolele mu ditunga dia Zambie udi wamba ne: “Mvua munange malu a Nzambi bikole kubangila anu ku buana buanyi. Katshia  ku buana bavua batulongeshe bua kuya dituku dionso mu nzubu wa masambila, bua kunemekela matuku a mafesto a ekeleziya ne bua kubuela pa tshibidilu mu nzubu wa nzambi wetu. Tshitendelelu tshietu ne mushindu utuvua tutendelela bivua bisambakanangane ne bibidilu bietu, ne malu a mu musoko wetu ne a dîku dietu.”

Nansha nanku, pakavuaye pa kukumbaja bidimu 20, wakabanga kulonga Bible ne Bantemu ba Yehowa ne kunyima kua matuku makese yeye kupangadika bua kumbuka mu tshitendelelu tshivuaye. Bualu ebu buvua dipanga dia lulamatu anyi?

Zlatko uvua mukolele mu ditunga dia Bosnie, ne munkatshi mua tshikondo kampanda wakaluangana mvita mu bimvundu bivua bijuke mu ditunga diabu. Yeye pende wakatuadija kulonga Bible ne Bantemu ba Yehowa. Mpindieu udi ubenga bua kuambula bingoma bua kuluangana mvita. Mmupange lulamatu anyi?

Mandamuna ebe a nkonko eyi adi alondeshila mushindu uudi wewe umona malu. Mamu utudi batele kulu eku udi wamba ne: “Mu musoko wetu, dishintulula tshitendelelu bavua badiangata bu bualu buvua bufuisha muntu bundu buvuabu kabayi mua kumufuila luse to; bavua badiangata bu dipanga dia lulamatu, ditungila dîku ne musoko wabu tshitungu.” Bia muomumue, basalayi bavua balunda ba Zlatko kumpala bavua bamona bantu bonso bavua babenga bua kuluangana mvita ku luseke luabu bu bena tshitungu. Kadi muntu mukaji au ne Zlatko badi bamona ne: lulamatu lubandile (lulamatu ludibu baleja Nzambi) ke ludi lubasaka bua kushintuluka nunku. Ne kupita bionso, mmunyi mudi Nzambi umona aba badi basue kushala bamulamate?

Lulamatu lua bushuwa mmushindu wa kuleja dinanga

Mukalenge Davidi wakambila Yehowa Nzambi ne: “Wewe udi uleja bulamate kudi bena bulamate.” (2 Samuele 22:26, Mukanda wa Mvidi Mukulu [Katolike, MMM]) Muaku wa tshiena-Ebelu udibu bakudimune ne: “bulamate” muaba eu udi ufila lungenyi lua bulenga budi budilamatshila ne dinanga ku tshintu kampanda too ne pakumbana tshipatshila tshiabu pa bidi bitangila tshintu atshi. Muikale ne lungenyi bu lua mamu udi wamusha muana dibela, Yehowa udi ulamata ne dinanga bantu badi bamulamate. Yehowa wakamba bua basadidi bende ba lulamatu mu Isalele wa kale ne: ‘Mukaji udi mua kupua muanende utshidi wamua mabele muoyo, bua yeye kafuidi muana wa balume wakulelaye luse anyi? Bulelela, bantu aba mene badi mua kupua muoyo, kadi meme tshiena nkupua wewe muoyo.’ (Yeshaya 49:15) Bantu badi basue kuteka dilamata Nzambi pa muaba wa kumpala mu nsombelu wabu Nzambi udi ubajadikila ne: neabalame ne dinanga dionso.

Lulamatu kudi Yehowa ndushindamene pa dinanga. Ludi lusaka muntu bua kunanga malu adi Yehowa munange ne bua kukina adi Yehowa mukine. (Musambu 97:10) Bu mudi ngikadilu munene wa Yehowa muikale dinanga, lulamatu kudi Nzambi ludi luambuluisha bua kubenga kuenzela bakuabu malu adi kaayi aleja dinanga. (1 Yone 4:8) Nunku bikala lulamatu kudi Nzambi lusaka muntu bua kushintulula ntendelelu, kabiena biumvuija ne: katshiena kabidi munange dîku diabu to.

Lulamatu kudi Nzambi nngikadilu udi wambuluisha

Muntu mukaji utukavua batele ku ntuadijilu eku udi umvuija mushindu’eu malu avuaye wenza: “Ku dilonga dianyi dia Bible, ngakafika ku dimanya Yehowa bu Nzambi mulelela, ne ngakafika ku didia nende malanda. Yehowa mmushilangane ne nzambi yonso imvua ntendelela kumpala; yeye udi ne dinanga, buakane, meji ne bukole bikumbanangane bimpe menemene. Bu mudi Yehowa ulomba bua kumulamata anu yeye nkayende, ke bualu kayi bivua bikengela meme kulekela nzambi mikuabu eyi.

“Baledi banyi bavua bangambila njila ne njila ne: mvua mubanyingalaje ne mubafuishe bundu bikole. Bualu ebu buakantatshisha bikole bualu mvua musue bikole bua baledi banyi banganyishe. Kadi pavua dimanya dianyi dia bulelela bua mu Bible dienda divula ku kakese ku kakese, tshimvua ne bua kusungula tshiakalua tshitoke bimpe kumpala kuanyi. Tshivua mua kuela Yehowa nyima to.

“Kusungula bua kulamata Yehowa pamutu pa kulonda bilele bia ntendelelu kakuena kumvuija ne: nanku tshiena kabidi mulamate bena dîku dianyi nansha. Ndi ndienzeja bua kubaleja ku mêyi ne ku bienzedi bianyi ne: ndi mumanye tshidibu bakeba. Kadi meme tshiyi ne lulamatu kudi Yehowa, ndi mufuanyike kupangisha bena mu dîku  dianyi bua kufika ku dimumanya, ne bualu abu budi mua kuikala dipanga lulamatu dia bushuwa.”

Bia muomumue, muntu kêna ulua muena tshitungu padi lulamatu luende kudi Nzambi lumulomba bua kubenga kubuelakana mu malu a tshididi anyi kuambula bingoma bua kuluisha bakuabu to. Eu ke mushindu udi Zlatko umvuija malu ende ne: “Nansha mungakakola muena Kristo wa ku dîna patupu, ngakasela mukaji uvua kayi muena Kristo. Pakatuadija mvita, bena ku nseke yonso ibidi bavua baluangana mvita abu bavua bakeba bua mbalamate. Bakangenzeja bua kusungula luseke lumvua ne bua kuluila mvita. Ngakaluangana bidimu bisatu ne tshitupa. Ndekelu wa bionso, meme ne mukajanyi tuakanyema tuetu kuya mu ditunga dia Croatie, mutuakapetangana ne Bantemu ba Yehowa.

“Ku diambuluisha dia dilonga dietu dia Bible tuakafika ku dijingulula ne: Yehowa ke muntu wa kumpala utudi ne bua kulamata ne mmusue bua tuetu kunanga bantu netu nansha buobu ba ntendelelu kayi anyi dikoba kayi. Mpindieu meme ne mukajanyi tudi mu buobumue mu ntendelelu wetu wa Yehowa, ne ndi mulonge ne: tshiena mua kuikala ne lulamatu kudi Nzambi eku nduisha muntu nanyi.”

Lulamatu lulengeja kudi dimanya dijalame

Bu mudi Yehowa muikale Mufuki wetu, lulamatu kudiye ludi lulua kumpala kua bintu bikuabu bionso bidi bilomba bua kubilamata. (Buakabuluibua 4:11) Nunku, bua lulamatu luetu kudi Nzambi kubengalu kulua ngikadilu wa patupu wa bitabataba bidi mua kushipeshangana, badi ne bua kuikala balulengeje kudi dimanya dijalame. Bible udi utuambila ne: ‘Nuvuijibue bapiabapia mu nyuma [udi wenzeja] meji enu. Nudivuadike [bumuntu bupiabupia] buakafukibua [bilondeshile disua dia Nzambi mu lulamatu lulelela].’ (Efeso 4:23, 24) Muntu muende lumu wakafunda mêyi aa ku bukole bua nyuma wa Nzambi wakapeta dikima dia kukonkonona malu avuaye mulamate katshia ku buana buende. Dikonkonona diende dia malu aa diakamufikisha ku dishintuluka diakamuambuluisha bikole.

Bushuwa, anu bu muvuabi bua Shaula, lulamatu lua bantu ba bungi mu tshikondo tshietu etshi ludi mu diteta. Shaula uvua mukole ne bilele bia bankambua bende, ne wakalua muena lulamatu wa kalanda-musenga wa tshitendelelu tshia baledi bende. Lulamatu luvuaye nalu ku malu a ntendelelu wende luakamusaka mene bua kukengesha ne tshikisu bantu bavua kabayi balonda ntendelelu wende. Shaula uvua mumanyike bua dibuela mu nzubu ya bena Kristo ne dibapulumuna uya nabu bua kubakisa anyi mene bua kubashipa.​—Bienzedi 22:3-5; Filipoi 3:4-6.

Kadi pakapeta Shaula dimanya dijalame dia mu Bible, wakenza tshivua bena diende bavule bamona bu bualu buvua kabuyi mua kuenzeka to. Wakashintulula tshitendelelu. Shaula, eu wakalua kumanyika bu mupostolo Paulo, wakasungula bua kulamata Nzambi pamutu pa bilele bia bantu. Lulamatu kudi Nzambi lushindamene pa dimanya dijalame luakasaka Shaula bua kuitaba malu a bakuabu, bua kuikala ne dinanga ne bua kuikala ukankamija malu mimpe, pamutu pa kuikala ushipangana anyi kuikala muena bitabataba muvuaye kumpala.

Bua tshinyi kuikala muena lulamatu?

Patudi tulekela mêyi a Nzambi alengeja lulamatu luetu tudi tupeta masanka a bungi. Tshilejilu, mu tshidimu tshia 1999 luapolo lukuabu lufumine ku Bulongolodi bua Malonga a malu a Dîku mu ditunga dia Australie luakamba ne: munkatshi mua  malu manene adi ambuluisha bua mabaka kushalawu kashidi ne kuikalawu mu disanka mudi “dieyemenangana ne lulamatu . . . [ne] dinanga malu a mu nyuma.” Luapolo lumuelumue alu luakaleja ne: “mabaka adi mashindame ne adi mikale ne disanka” adi ambuluisha balume ne bakaji bua kuikala ne disanka, bua kuikala ne makanda mimpe a mubidi ne bua kushala ne muoyo matuku a bungi, ne mabaka a nunku adi ambuluisha bana bua kuikala ne nsombelu wa disanka.

Lelu udi malu mikale atenkakana eu, lulamatu ludi bu muonji udi ku buatu udibu basuike muowedi udi uluangana bua kafu mu mâyi. Bikala “muowedi” eu kayi ne lulamatu, neadimone bamutankakaja eku ne eku kudi mavuala ne tshipepele. Kadi bikala lulamatu luende luye kua tshianana, mbienze anu bu se: muonji udibu bamusuika bua kumupandisha mmusuika ku buatu budi buenda budina pabu. Anu bu Shaula, udi mua kudimona benda bamupulumuna mu njila wamufikisha ku kabutu. Kadi, lulamatu kudi Yehowa ludi lushindamene pa dimanya dijalame ludi bu muonji udi upandisha udi utuambuluisha bua kushala bashindame ne udi utufikisha ku lupandu.​—Efeso 4:13-15.

Yehowa udi ulaya bantu badi bamulamate ne: ‘Yehowa udi unanga kulumbulula kuakane, kêna ulekela [bena lulamatu] bende. Bantu bakane nebalamibue tshiendelele.’ (Musambu 37:28) Mu katupa kîpi emu, bantu bonso badi ne lulamatu kudi Yehowa nebabueje mu buloba bukudimuna mparadizu, muabapikulaye ku tunyinganyinga ne ku ntatu ne nebasanke mu malanda a kashidi kakutshiyi matapuluka a ntendelelu ne a malu a tshididi.​—Buakabuluibua 7:9, 14; 21:3, 4.

Nansha lelu kabidi, bantu miliyo mivule pa buloba bujima mbafike ku dijingulula ne: disanka dilelela didi difumina anu ku dikala ne lulamatu kudi Yehowa. Bua tshinyi kubenga kuitaba bua Bantemu ba Yehowa bakuambuluishe ne bulelela bua mu Bible, bua wewe kukonkonona malu audi mumanye pa bidi bitangila lulamatu? Bible udi utuambila ne: ‘Nuditete munda muenu ne nudi ne ditabuja anyi; nudijadike bienu.’​—2 Kolinto 13:5.

Bidi bilomba dikima bua kukonkonona malongesha etu ne bua kumanya tshitudi baalamatshile. Bidi bikengela bua tuetu kuenza nanku bua kupeta masanka, ne malu atuapeta au neatusemeje pabuipi ne Yehowa Nzambi. Muntu mukaji utudi batele ku ntuadijilu eku udi umvuija tshidi bantu ba bungi bumvua padiye wamba ne: “Ndi mulonge ne: kushala balamate Yehowa ne mikenji yende kudi kutuambuluisha bua kuikala ne nkatshinkatshi mu malanda etu ne bena mu mêku etu ne bua kulua bantu ba tshitembu mu musoko wetu. Nansha mateta mikale makole mushindu kayi, tuetu bashale balamate anu Yehowa, yeye pende neashale mutulamate.”

[Bimfuanyi mu dibeji 6]

Dimanya dijalame diakasaka Shaula bua kushintulula tshivuaye mulamate

[Tshimfuanyi mu dibeji 7]

Bua tshinyi kubenga kukonkonona malu audi mulamate ku diambuluisha dia bulelela bua mu Bible?

[Mêyi a dianyisha bua bimfuanyi mu dibeji 4]

Churchill, kuulu ku dia bakaji: U.S. National Archives foto; Joseph Göbbels, ku dia balume: Library of Congress