Udi muvuluke anyi?

Dibala dia nimero ya ndekelu ya Tshibumba tshia Nsentedi divuaku dikusankishe anyi? Nanku anji tangilabi ni udi mua kuandamuna nkonko idi ilonda eyi:

• Diditeka pa muaba wa bakuabu ntshinyi, ne bua tshinyi bena Kristo badi ne bua kuikala baditeka pa muaba wa bakuabu?

Nkuikala ne muoyo mutekete ku makenga a bakuabu, bu mudi kumvua dikenga didi nadi muntu mukuabu mu mutshima wetu. Mbabele bena Kristo bua kuikala ‘kusambangana, kunangangana bu bana [ba muntu], ne kuikala ne mutshima wa luse.’ (1 Petelo 3:8) Yehowa mmutushile tshilejilu tshimpe tshia mushindu wa kuditeka pa muaba wa bakuabu. (Musambu 103:14; Zekâya 2:8) Bua tuetu kufika ku dijingulula bimpe majinga ne makenga adi bakuabu nawu, mbimpe kuteleja, kubambisha, ne kufuanyikija.​—15/4, dibeji dia 24-26.

• Bua kupeta disanka dilelela, bua tshinyi mbimpe bua luondapu lua mu nyuma kulualu kumpala kua dijikija dia ndekelu dia bulema bua mubidi?

Bantu ba bungi badi ne makanda a mubidi kabatu ne disanka to, batu ne ntatu mibapite mutu. Kadi, bena Kristo bavule badi ne bulema lelu’eu badi ne disanka dia bungi bua mushindu udibu basadila Yehowa. Bantu badi mpindieu bapeta luondapu lua mu nyuma nebikale ne diakalenga dia kumona muajika bulema bua mubidi mu buloba bupiabupia.​—1/5, dibeji 6-7.

• Bua tshinyi Ebelu 12:16 udi uteka Esau mu mulongo wa bendi ba masandi?

Bible udi uleja se: meji a Esau avua anu a kupeta diakamue masanka a lukasa lukasa ne kupepeja bintu bia tshijila. Muntu yeye mulekele lelu meji a mushindu’eu abuela mu mutshima wende, adi mua kumufikisha ku mpekatu munene, bu mudi mpekatu wa masandi.​—1/5, dibeji 10-11.

• Tertullien uvua nganyi, ne mmutumbe bua bualu kayi?

Uvua mufundi wa mikanda ne mulongeshi wa malu a ntendelelu wa mu lukama luibidi ne luisatu lua bidimu B.B. Mmumanyike bua dipatula dia mikanda mivule idi ibingisha Buena-Kristo bua ku dîna. Pavuaye ubingisha Buena-Kristo mu mikanda eyi, wakabuejamu malongesha ne ngenyi ya bena nkindi bivua bifike ku dipatuisha malongesha a dishima, bu mudi dia Busatu Bunsantu.​—15/5, dibeji dia 29-31.

• Bua tshinyi ngikadilu idi bantu bapiane mu mashi nkayayi ki ng’idi ibafikisha ku masama, ku bikadilu kampanda anyi ku lufu?

Bena meji mbafike ku diamba ne: kudi anu katupa kampanda ka mu selile kadi kasambuluja ngikadilu mipiana mu mashi kadi kafikisha muntu ku masama kabukabu, ne bamue badi bitaba ne: bienzedi bietu mbilombola kudi tutupa tua selile tudi tusambuluja ngikadilu itudi bapiane. Kadi, Bible udi utumvuija ntuadijilu wa bantu ne mushindu uvua mpekatu ne dipanga bupuangane bibange kubakengesha. Nansha mudi tutupa tua selile tudi tusambuluja ngikadilu idi bantu bapiane mu mashi mua kubafikisha ku dikala ne bumuntu kampanda, dipanga dietu dia bupuangane ne muaba udibu basombele mbintu binene bidi pabi ne bukole pa bumuntu buabu.​—1/6, dibeji dia 9-11.

• Mmunyi mudi tshipese tshia dibeji dia papirise tshivuabu bapete mu Oxyrhynchos mu Ejipitu tshikale tshitokesha bualu bua dîna dia Nzambi?

Tshipese etshi tshidi ne mêyi a mu Yobo 42:11, 12 a mu Bible wa Septante mu tshiena-Gelika tshidi ne maleta anayi a mu tshiena-Ebelu a dîna dia Nzambi mabikila ne: Tetragrame. Etshi ntshijadiki tshikuabu tshia se: dîna dia Nzambi mu tshiena-Ebelu divua mu Bible wa Septante uvuabu batamba kutela kudi bafundi ba Mifundu Minsantu ya bena Kristo ya tshiena-Gelika.​—1/6, dibeji dia 30.

• Manaya a mvita ya tshikisu ne lufu ivuabu baluangana mu Ampire wa bena Lomo mmafuanangane ne manaya kayi a matuku etu aa atu bantu basue kubandila?

Filme wakalejabu matuku mashale aa mu Tshipalu tshia manaya tshia ku Lomo (Colisée) mu ditunga dia Italie wakaleja malu adi mafuanangane ne adiku lelu mu manaya bu mudi a mvita ya ngombe, a mvita ya batutshianganyi ba mbata bapiluke, a ditembangana dia mbilu ku mashinyi ne ku ntukutuku, ne mvita itu bantu basue kubandila mu manaya makuabu a lelu. Bena Kristo ba kumpala bavua balonda dîyi divuabu bamanye bimpe dia se: Yehowa ki mmunange tshikisu peshi bena tshikisu to, nunku bena Kristo ba lelu kabena pabu ne bua kunanga tshikisu nansha. (Musambu 11:5)​—15/6, dibeji dia 29.

• Bu mutudi tudienzeja bua kulua balongeshi bimpe, ntshinyi tshidi tshilejilu tshia Ezela mua kutulongesha?

Ezela 7:10 udi uleja malu anayi avua Ezela muenze, malu atudi petu mua kudienzeja bua kuidikija. Mvese eu udi wamba ne: ‘Ezela [1] [wakalongolola] mutshima wende [2] bua [kukonkonona] mikenji ya Yehowa ne [3] bua kuyenza ne [4] bua kuyishaye bena Isalele mikenji ne [buakane anyi] mêyi majalame.’​—1/7, dibeji dia 20.

• Mmu bitupa kayi bibidi bia mudimu wetu mudibi biakanyine bua mukaji muena Kristo kuvualaye tshitambala ku mutu?

Tshia kumpala, nku nzubu. Padiye uvuala tshitambala ku mutu udi uleja mudiye witaba ne: bujitu bua kuenza disambila ne kulongesha malu a mu Bible budi pa makaya a bayende. Tshibidi, mmu midimu ya mu tshisumbu mudiye uleja ne: udi witaba mudi Mukanda wa Nzambi mupeshe bena Kristo balume nkayabu bukokeshi bua kulongesha ne kulombola. (1 Kolinto 11:3-10)​—15/7, dibeji dia 26-27.

• Bua tshinyi bena Kristo mbajadike ne: yoga ki ndibidija dia mubidi patupu, kadi ntshintu tshia njiwu?

Tshipatshila tshia dinaya dia yoga ntshia kufikisha muntu ku dikala tshintu tshimue ne spiritu kampanda udi mutambe bantu. Yoga kêna upetangana ne bulombodi bua Nzambi to, bualu tshilele etshi tshidi tshilomba muntu bua kuimanyika diakamue diela dia meji. (Lomo 12:1, 2) Yoga udi mua kuteka muntu mu njiwu ya kufika ku dibuelakana mu malu a nyuma mibi ne malu a mîdima. (Dutelonome 18:10, 11)​—1/8, dibeji dia 20-22.