‘Nulekelelangane mibi yenu’

UDI wela meji ne: Nzambi utu mukubuikidile mibi yebe anyi? Mu ditunga dia États-Unis, mbimueneke ne: bantu bakulumpe ba bungi badi bitabuja nanku. Mulongeshi Loren Toussaint, uvua mulombole dielangana nkonko mu iniversite kampanda (Institut de recherches sociales de l’université de Michigan) wakaleja ne: munkatshi mua bena Amerike 1 423 bavuabu bele nkonko, bantu 80 pa 100 bikale ne bidimu 45 ne pa mutu bavua bambe ne: Nzambi mmumane kubabuikidila mibi yabu.

Kadi bidi bikemesha bualu munkatshi mua aba bavua bandamuna ku nkonko ayi, bantu 57 pa 100 bakamba ne: bavua babuikidile pabu bantu bakuabu mibi. Dilonga edi didi dituvuluija mêyi a Yezu a mu Muyuki wa pa Mukuna aa: “Panudi nufuila bantu bakuabu luse, bua malu mabi adibu banuenzela, Tatu wenu udi mu diulu neanufuile penu luse. Kadi panuikala kanuyi nufuila bantu bakuabu luse, bua malu mabi adibu banuenzela, Tatu wenu kabidi kena unufuila luse bua mibi yenu to.” (Matayo 6:14, 15, MMV) Eyowa, ditubuikidila dia mpekatu yetu kudi Nzambi ndisuikakaja, mu tshitupa kampanda, ku didiakaja dietu tuetu bine bua kubuikidila bakuabu yabu mibi.

Mupostolo Paulo wakavuluija bena Kristo ba mu Kolosai dîyi dinene edi. Wakabaleja ne: ‘Nulejangane lutulu, nulekelelangane mibi yenu, bikala muntu ne mukuabu tshilumbu; bu muakanubuikidila Mukalenge mibi yenu, nuenu nuenze muomumue.’ (Kolosai 3:13) Bulelela, kabitu anu bipepele bua kuenza nunku to. Tshilejilu, padi muntu ukuamba mêyi mabi anyi ukuamba mêyi adi atapangana ku muoyo, bidi mua kukukolela bua kumufuila luse.

Tshidibi, bipeta bimpe bidi bifumina ku difuilangana luse bidi bia bungi. David Williams (Mulongeshi wa dilongesha dia miyuki ya nsombelu wa bantu ta sosioloji wa mu iniversite mukuabu) wakakula pa bidi bitangila makebulula ende ne: “Tudi basangane diumvuangana dia pa buadi pankatshi pa difuilangana luse ne bukole bua mu lungenyi kudi bantu bakadi bashindame ne bakulakaje ba mu Amerike.” Mbiumvuangane ne mêyi a Mukalenge wa meji Solomo wakafunda kukadi bidimu 3 000 ne: “Mutshima mupole udi muoyo wa mubidi.” (Nsumuinu 14:30) Bu mudi difuilangana luse ditufikisha ku malanda mimpe ne Nzambi ne bantu netu, kudiakaja bua kufuila bakuetu luse ne muoyo mujima kudi ne mushinga menemene.​—Matayo 18:35.