Tuidikijayi Mulongeshi Munene

‘Yayi kudi bantu ba bisamba bionso ne nubavuije balongi banyi; nubalongeshe mua kutumikila malu onso angakadi munuambile.’​—MATAYO 28:19, 20, Muanda Mulenga Lelu.

1, 2. (a) Mmunyi mutudi bonso balongeshi mu ngumvuilu kampanda? (b) Pa bidi bitangila dilongesha, mbujitu kayi bua pa buabu budi nabu bena Kristo balelela?

 UTU mulongeshi anyi? Eyowa, mu ngumvuilu kampanda, tuetu bonso tudi balongeshi. Dîba dionso diudi uludika muena luendu udi mupambuke njila, diudi uleja muena mudimu nebe mushindu wa kuenza mudimu kampanda, anyi diudi uleja muana mushindu wa kusuika nshinga ya bisabata, udi ulongesha. Kuambuluisha bakuabu mu malu aa kudi kufila disanka ndambu, ki mmuomu anyi?

² Pa bidi bitangila dilongesha, bena Kristo balelela badi ne bujitu bua pa buabu. Mbatupeshe mudimu wa ‘kuvuija bantu balongi ne kubalongesha.’ (Matayo 28:19, 20, MML) Tutu ne diakalenga dia kulongesha kabidi munda mua tshisumbu. Mbateke balume badi bakumbaje malu malomba bua kuikalabu “balami [ne] balongeshi,” ne tshipatshila tshia kukolesha tshisumbu. (Efeso 4:11-13, MMM) Mu midimu yabu ya ku dituku ne ku dituku, bantu bakaji bapie mu nyuma badi ne bua kuikala “bayishi ba malu adi mimpe” kudi bakaji batekete. (Tito 2:3-5) Badi batubela tuetu bonso bua kukankamija bena Kristo netu, ne tudi tulonda mubelu eu patudi tukolesha bakuabu ne malu a mu Bible. (1 Tesalonike 5:11) Ndiakalenga kayipu dia kuikala mulongeshi wa Dîyi dia Nzambi, ne dia kumanyisha bantu malu a mu nyuma a mushinga adi mua kubapetesha masanka a kashidi!

3. Mmunyi mutudi mua kulengeja ndongeshilu wetu?

³ Kadi mmunyi mutudi mua kulengeja ndongeshilu wetu? Tshia kumpala: patudi tuidikija Mulongeshi Munene Yezu. Bamue badi mua kuebeja ne: ‘Kadi mmunyi mutudi mua kuidikija Yezu, yeye uvua muntu mupuangane?’ Bushuwa, katuena mua kulua balongeshi bapuangane to. Kadi nansha tuetu bikale ne dimanya dia mushindu kayi, tudi mua kuenza muetu muonso bua kuidikija mushindu uvua Yezu ulongesha. Tumonayi mutudi mua kuidikija inayi ya ku mishindu ya kulongesha nayi anyi ndongeshilu yende: mêyi mapepele, nkonko mimpe, dieleshangana meji bimpe ne mifuanu miakanyine.

Tulongeshe ne mêyi mapepele

4, 5. (a) Bua tshinyi mêyi mapepele ke tshimanyinu tshia bulelela bua mu Bible? (b) Bua kulongesha ne mêyi mapepele, bua tshinyi mbia mushinga bua tuetu kudimukila miaku itudi tuangata?

⁴ Malongesha a nshindamenu adi mu Dîyi dia Nzambi ki mmakondakane to. Yezu wakalomba mu disambila ne: ‘Tatu wanyi, ndi nkusakidila bualu bua wewe wakusokoka bena meji ne bena [lungenyi] malu aa, wakuasokolola kudi bana bakese.’ (Matayo 11:25) Yehowa mmusokoluele bena bupuekele badi basue kushintuluka malu adiye mulongolole bua kuenza. (1 Kolinto 1:26-28) Nunku, mêyi mapepele ke tshimanyinu tshinene tshia bulelela bua mu Bible.

⁵ Paudi ulombola dilonga dia Bible peshi upinganyina bantu bavua basankidile bulelela, mmunyi muudi mua kubalongesha ne mêyi mapepele? Ntshinyi tshitudi balongele kudi Mulongeshi Munene? Bua kulenga mitshima ya bateleji bende (munkatshi muabu muvua ‘bantu patupu’ ba bungi), Yezu uvua wakula malu matokesha avuabu mua kumvua. (Bienzedi 4:13) Nunku bua tuetu kulongesha ne mêyi mapepele, bualu bua kumpala butudi ne bua kuenza mbua kudimukila miaku itudi tuangata. Katuena ne bua kuangata miaku anyi biambilu bikole bua kusaka bakuabu bua kuitababu bulelela bua mu Dîyi dia Nzambi nansha. “Miaku ya budiambi” ya nunku idi mua  kutshingisha bantu, nangananga badi balonge kalasa kakese anyi badi kabayi ne dimanya dia bungi. (1 Kolinto 2:1, 2, MMM) Tshilejilu tshia Yezu tshidi tshileja ne: miaku mipepele misungula bimpe idi mua kutuambuluisha bua kumanyisha bulelela ne bukole bua bungi.

6. Mmunyi mutudi mua kuepuka dilokeshila mulongi wa Bible malu mapite bungi?

⁶ Bua kulongesha ne mêyi mapepele, tudi ne bua kuepuka dilokeshila mulongi wa Bible malu mapite bungi. Yezu uvua anu muvuluke mikalu ya bayidi bende. (Yone 16:12) Tuetu petu tudi ne bua kuikala bavuluke mikalu ya muntu utudi tulonga nende. Tshilejilu, patudi tulonga ne muntu mu mukanda wa Dimanya didi difikisha ku muoyo wa kashidi, kabiena bitukengela kumvuija kalu ne kalu konso to. * Kabidi, ki mbimpe kulonga lubilu-lubilu ne muntu, bienze bu se: tshidi ne mushinga nkujikija nshapita bungi kampanda. Kadi mbia meji bua kulekela majinga ne mamanya a mulongi bijadika lubilu lunudi ne bua kuya nalu panudi nulonga. Tshipatshila tshietu ntshia kuambuluisha mulongi bua alue muyidi wa Kristo ne mutendeledi wa Yehowa. Tudi ne bua kuenza matuku bungi buonso budi bukengedibua bua kuambuluisha mulongi bua umvue bimpe malu adiye ulonga. Nunku bulelela budi mua kulenga mutshima wende ne kumusaka bua kushintuluka.​—Lomo 12:2.

7. Mmibelu kayi idi mua kutuambuluisha bua kulongesha ne mêyi mapepele patudi tuenza miyuki mu tshisumbu?

⁷ Patudi tuenza miyuki mu tshisumbu, nangananga padi bantu bapiabapia bikale munkatshi mua bateleji, mmunyi mutudi mua kuamba malu adi ‘umvuika’ bipepele? (1 Kolinto 14:9, MMM) Tangila mibelu isatu idi mua kukuambuluisha. Wa kumpala: umvuija miaku yonso idi kayiyi mimanyike iudi mua kuikala nayi. Dimanya dietu dia Dîyi dia Nzambi nditumanyishe miaku kampanda misunguluke. Tuetu batele miaku bu mudi “mupika wa lulamatu ne wa budimu,” “mikoko mikuabo” ne “Babulona Munene,” bidi mua kutukengela bua kubiumvuija ne mêyi mapepele adi afila diumvuija ditoke. Muibidi: epuka miaku mipitepite bungi. Miaku mipite bungi, mishindumuna minekesha, idi mua kupangisha bateleji bua kukulonda. Bua malu audi wamba kuikalawu matoke, udi ne bua kumbusha miaku ne biambilu bidi kabiyi ne mushinga. Muisatu: kukebi bua kumvuija malu mapite bungi to. Dikebulula malu mu mikanda didi mua kukufikisha ku dipeta mumvuija mimpe a bungi. Kadi mbitambe buimpe bua kukosolola muyuki mu malu manene makese, kuangata anu malu adi ambuluisha bua kumvuija malu manene au ne kushala anu ne malu audi mua kuamba mu dîba difunda.

Diela nkonko bimpe

8, 9. Mmunyi mutudi mua kusungula lukonko ludi lukumbanangane ne dijinga dia kumanya bivule dia utudi tuyukila nende? Fila bilejilu.

⁸ Vuluka ne: Yezu uvua mupiluke mu diela nkonko bua kusaka bayidi bende bua baleje tshivua mu lungenyi luabu ne bua kubasonsola ne kubalongesha mua kuela meji bimpe. Nkonko yende yakamuambuluisha bua kulenga mitshima yabu bimpe. (Matayo 16:13, 15; Yone 11:26) Mmunyi mutudi mua kuela petu nkonko bimpe bu Yezu?

⁹ Patudi tuyisha ku nzubu ne ku nzubu, tudi mua kuela nkonko bua kujula muntu dijinga dia kumanya bivule, tulongolola mushindu wa tuetu kuakula bua Bukalenge bua Nzambi. Mmunyi mutudi mua kusungula lukonko ludi lukumbanangane ne majinga a muntu utudi tuyukila nende? Tuikale ne lubatshi. Patudi tufika pabuipi ne nzubu kampanda, tutangile bua kumona bintu bidi kumpenga. Bintu bitu bana banaya nabi bidiku mu lubanza, bileja ne: mu dîku adi mudi bana anyi? Bikalabimu, tudi mua kukonka muena nzubu ne: ‘Ukadiku mudiebeje mushindu wikala nsombelu pa buloba pikala bana bebe balue bantu bakole anyi?’ (Musambu 37:10, 11) Kudi bikuvu bia bungi  ku tshiibi tshia kumpala kua lupangu peshi bintu bidi bipangisha bivi mua kuiba mu lupangu alu anyi? Tudi mua kukonka muena nzubu ne: ‘Udiku wela meji ne: dîba nedilue dikala bantu bu wewe ne meme mua kuikala mu bukubi kumbelu ne mu njila anyi?’ (Mika 4:3, 4) Kudiku tshintu tshidi tshileja ne: mu dîku adi mudi mubedi anyi? Tudi mua kuebeja ne: ‘Kuadiakuikalaku tshikondo tshikala muntu yonso ne makanda a mubidi anyi?’ (Yeshaya 33:24) Tudi mua kupeta mibelu mivule mu mukanda wa Comment raisonner à partir des Écritures. *

10. Mmunyi mutudi mua kuela nkonko bua ‘kupatula’ ngenyi ne meji adi mu mutshima wa mulongi wa Bible, kadi ntshinyi tshitudi ne bua kuvuluka?

¹⁰ Mmunyi mutudi mua kuela nkonko bimpe patudi tulonga Bible ne bantu? Katuena mua kumanya malu adi mu mitshima ya bantu bu muvua Yezu uamanya to. Kadi nkonko miela ne meji onso ne bujinguludi idi mua kutuambuluisha bua ‘kupatula’ ngenyi ne meji adi mu mutshima wa mulongi. (Nsumuinu 20:5) Tshilejilu, tufuanyikije ne: tudi tulonga nshapita wa: “Bua tshinyi nsombelu wa buena Nzambi udi utuala diakalenga,” mu mukanda wa Dimanya. Nshapita eu udi umvuija mushindu udi Nzambi wangata mashimi, tshiendenda ne malu makuabu mabi. Mulongi udi mua kuandamuna bimpe nkonko idi mu mukanda eu, kadi udiku witaba malu adiye ulonga anyi? Tudi mua kumuebeja ne: ‘Buebe wewe, mbia meji mudi Yehowa wangata malu aa mushindu’eu anyi?’ ‘Mmunyi muudi mua kutumikila mêyi a mu Bible aa mu nsombelu webe?’ Kadi ikala muvuluke bua kuikala ne kanemu, wangate mulongi ne bunême. Katuakukeba bua kuela mulongi wa Bible nkonko idi mua kumufuisha bundu anyi kumupuekesha milongo nansha.​—Nsumuinu 12:18.

11. Mmu mishindu kayi mudi bangamba-malu ba patoke mua kuela nkonko bimpe?

¹¹ Bangamba-malu ba patoke badi pabu ne bua kuikala bela nkonko bimpe. Nkonko ya bungambi (nkonko itudi katuyi tuindila bua bateleji bandamune ne dîyi dikole) idi mua kuambuluisha bateleji bua kuela meji. Imue misangu Yezu uvua wela nkonko ya mushindu’eu. (Matayo 11:7-9) Kabidi, kunyima kua mêyi ende a ntuadijilu, ngamba-malu udi mua kuela nkonko bua kuleja malu manene ikalaye mua kumvuija. Udi mua kuamba ne: “Mu muyuki wetu wa lelu, netupete mandamuna a nkonko idi ilonda eyi . . .” Pashishe, ku ndekelu kua muyuki wende, udi mua kujula kabidi nkonko ayi bua kuambulula malu manene.

12. Fila tshilejilu bua kuleja mudi bakulu bena Kristo mua kuela nkonko bua kuambuluisha muena Kristo nabu bua apete bukole mu Dîyi dia Nzambi.

¹² Mu mudimu wabu wa bulami, bakulu bena Kristo badi mua kuela nkonko bua kuambuluisha “bena butekete” bua bapete bukole mu Dîyi dia Yehowa. (1 Tesalonike 5:14) Tshilejilu, bua kuambuluisha muntu udi mubungame, mukulu udi mua kumubadisha Musambu wa 34:18. Udi wamba ne: ‘Yehowa udi pabuipi ne bantu badi ne mitshima itamba kunyingalala, udi usungila badi ne mitshima ya majia.’ Bua kujadika ne: muntu eu udi mutekete mu mikolo mmumanye mudi mêyi aa amukumbanyina, mukulu udi mua kumuebeja ne: ‘Yehowa udi pabuipi ne nganyi? Utuku udiumvua imue misangu “ne mutshima utamba kunyingalala” ne “mutshima wa majia” anyi? Bikala Yehowa muikale pabuipi ne bantu aba, anu mudi Bible wamba, kabienaku biumvuija ne: udi pabuipi nebe anyi?’ Dikolesha muntu ku muoyo ne dinanga mushindu’eu didi mua kukankamika eu udi mubungame.​—Yeshaya 57:15.

Dieleshishangana meji bimpe

13, 14. (a) Mmunyi mutudi mua kueleshisha muntu meji padiye wamba ne: kêna witabuja Nzambi udiye kayi mua kumona? (b) Bua tshinyi katuena ne bua kutekemena bua se: bantu bonso nebatuishibue?

¹³ Mu mudimu wetu wa diyisha, tudi basue  kulenga mitshima ya bantu mu dibeleshisha meji bimpe bua kubafikisha ku ditaba. (Bienzedi 19:8; 28:23, 24) Bidi biumvuija ne: tudi ne bua kulonga mua kuela lungenyi mu mushindu mukole menemene bua kumona mua kutuisha bantu bakuabu pa bidi bitangila bulelela bua mu Dîyi dia Nzambi anyi? Kabiena nanku to. Dieleshishangana meji bimpe kadiena ne bua kuikala dikondakane to. Bijadiki bia meji bifila mu mushindu mupepele bitu misangu mivule bipatula bipeta bimpe. Angata tshilejilu tshimue.

¹⁴ Ntshinyi tshitudi mua kuandamuna padi muntu wamba ne: kêna witabuja Nzambi udiye kayi mua kumona to? Tudi mua kumueleshisha meji ne mukenji wa ku tshifukilu wa tshiledi tshia bualu ne tshipeta tshiabu. Patudi tumona tshipeta tshia bualu kampanda, tudi tuitaba ne: kudi ne bua kuikala tshiledi tshiabu. Tudi mua kuamba ne: ‘Wewe muye muaba kampanda muditole ne musangane nzubu muibaka bimpe balamamu biakudia (tshipeta), newitabe musangu umue ne: muntu kampanda (tshiledi) mmuibake nzubu au ne muujamu biakudia. Bia muomumue, patudi tumona bintu bidiku ne biakudia bivule bidi pa buloba (tshipeta), kabienaku bia meji bua kuitaba ne: Muntu kampanda (tshiledi) mmubienze anyi?’ Bible udi ufila tshijadiki tshipepele pa muanda eu wamba ne: “Bushuwa, nzubu wonso mmuibaka kudi muntu kampanda, kadi muibaki wa bionso udi [Nzambi].” (Ebelu 3:4, MMM) Kadi nansha tuetu beleshishangane meji bimpe mushindu kayi, bantu bonso kabakutuishibua to. Bible udi utuvuluija ne: anu bantu badi “badilongolole bimpe” ke bikala mua kuitabuja.​—Bienzedi 13:48, NW; 2 Tesalonike 3:2.

15. Nngelelu wa meji kayi utudi mua kulonda bua kuleja ngikadilu ne njila ya Yehowa, ne mbilejilu kayi bibidi bidi bileja mutudi mua kulonda ngelelu wa meji eu?

¹⁵ Patudi tulongesha mu buambi anyi mu tshisumbu, tudi mua kueleshisha bantu meji bimpe bua kuleja ngikadilu ne njila ya Yehowa. Bidi nangananga bimpe bua kueleshishangana meji ne lukonko lua ‘[mmunyipu muatamba]’ lua buena luvua Yezu wela imue misangu. (Luka 11:13; 12:24) Dieleshishangana meji dia nunku didi mua kulenga mutshima wa muntu bikole diodi dikale dishindamene pa dileja dishilangana dia malu. Tshilejilu, bua kuleja mudi dilongesha dia inferno wa kadilu kadiyi dia meji, tudi mua kuamba ne: ‘Kakuena tatu wa dinanga nansha umue udi mua kuela tshianza tshia muanende mu mudilu bua kumunyoka. Mmunyipu mudi lungenyi lua inferno wa kadilu mua kutamba kubipa ku mêsu kua Tatu wetu wa mu diulu muena dinanga!’ (Yelemiya 7:31) Bua kulongesha ne: Yehowa udi ulama yonso wa ku basadidi bende, tudi mua kuamba ne: ‘Bikala Yehowa mumanye dîna dia wonso wa ku mitoto miliyare ne miliyare, mmunyipu mudiye ne bua kutamba kutulama tuetu bantu badi bamunange ne bavuaye musumbe ku mashi a mushinga mukole a Muanende!’ (Yeshaya 40:26; Bienzedi 20:28) Ngelelu wa meji wa bukole wa nunku udi mua kutuambuluisha bua kulenga mitshima ya bakuabu.

Mifuanu miakanyine

16. Bua tshinyi mifuanu idi ne mushinga patudi tulongesha?

¹⁶ Mifuanu mimpe nngelelu wa meji udi mua kuambuluisha bua dilongesha dietu dilengelele bantu. Bua tshinyi mifuanu idi ne mushinga patudi tulongesha? Mulongeshi mukuabu wakamba ne: “Kumanya mua kuela meji kakuyi dimona bimfuanyi bia malu atudi tuelela meji mu lungenyi mbumue bua ku malu adi matambe kukolela bantu bua kuenza.” Mifuanu idi ishiya bimfuanyi bidi ne diumvuija kampanda mu lungenyi luetu, idi ituambuluisha bua kumvua bimpe menemene ngenyi mipiamipia. Yezu kavua ne wa kumuelekeja nende pa bidi bitangila diela mifuanu to. (Mâko 4:33, 34) Tumonayi mushindu utudi mua kulonda petu ndongeshilu eu.

17. Mmalu kayi anayi adi enza bua mufuanu wikale muimpe?

¹⁷ Ntshinyi tshidi tshivuija mufuanu muimpe? Tshia kumpala: udi ne bua kukumbanyina bateleji betu, udi ne bua kuikala ne malu adi bateleji betu mua kumanya bipepele. Tudi tuvuluka ne: Yezu uvua wangata mivule ya ku mifuanu yende mu malu a mu nsombelu wa ku dituku dionso wa bantu bavua bamuteleja. Tshibidi: mufuanu udi ne bua kukumbanangana ne tshitudi tuamba. Bikala malu atudi tufuanyikija wowu kaayi akumbanangana menemene, mufuanu udi mua kupambuisha bateleji betu. Tshisatu: mufuanu kawena ne bua kuikala mukutakaja ne malu a bungi menemene adi kaayi ne mushinga to. Vuluka ne: Yezu uvua ufila anu mumvuija avua ne mushinga. Tshinayi: patudi tuela mufuanu, tudi ne bua kuikala bajadike ne: dilongesha ditudi tufilamu nditoke.  Tshianana, bamue badi mua kupanga mua kumanya mushindu wa kutumikila dilongesha didimu.

18. Mmunyi mutudi mua kupeta mifuanu miakanyine?

¹⁸ Mmunyi mutudi mua kupeta mifuanu idi miakanyine? Kabiena bitukengela kunana meji bua kupeta miyuki mile ne mikondakane to. Mifuanu mîpi idi mua kupatula bipeta bimpe be. Keba bua kupeta bilejilu bia bualu buudi wamba. Tshilejilu, tufuanyikijabi ne: tudi tuakula bua luse lua Nzambi, ne tudi basue kuela mufuanu wa muanda udibu baleja mu Bienzedi 3:19, mudibu bamba ne: Yehowa udi ‘ujimija’ anyi ukupula bilema bietu. Mêyi aa nkayawu nngakuilu wa mu tshimfuanyi mulenga; kadi ntshilejilu kayi tshilelela tshitudi mua kufila bua kumvuija lungenyi elu, bu mudi tshia kalamba ka dikupula naku peshi goma? Tudi mua kuamba ne: ‘Padi Yehowa utubuikidila mpekatu yetu, udi uyikupula bienze bu muntu uyikupula ne kalamba (anyi goma).’ Mbitekete bua kumvua diumvuija dia mufuanu mupepele wa mushindu’eu.

19, 20. (a) Mmuaba kayi utudi mua kupeta mifuanu mimpe? (b) Mbimue bilejilu kayi bia mifuanu mimpe idibu bapatule mu mikanda yetu? (Tangila kabidi malu adi mu kazubu.)

¹⁹ Nkuepi kuudi mua kupeta mifuanu miakanyine ne bilejilu bia malu malelela? Bikeba mu malu a mu nsombelu webe anyi mu malu kabukabu akadi bena Kristo nebe bapete. Udi mua kupetela mifuanu mu malu makuabu a bungi, bu mudi mu bintu bidi ne muoyo ne bidi kabiyi ne muoyo, bintu bia mu nzubu peshi mu muanda kampanda udi muenzeke mu musoko udi bantu bamanye bimpe. Bua kupeta mifuanu mimpe, bidi bikengela kuikala ne lubatshi, ‘kutangila [bimpe menemene]’ malu adi enzeka dituku dionso muaba utudi. (Bienzedi 17:22, 23) Mukanda mukuabu udi wakula bua bungamba-malu bua patoke udi umvuija ne: “Ngamba-malu udi utangila ne lubatshi malu a mu nsombelu wa bantu ne midimu yabu kabukabu, wakula ne bantu ba mishindu yonso, ukonkonona malu bimpebimpe ne wela nkonko too ne padiye uumvua, neapete malu mapite bungi a kufidila mifuanu ikala mua kumuambuluisha dîba dikalaye nawu dijinga.”

²⁰ Kudi bintu bikuabu bimpe bidi mua kutupetesha mifuanu mimpe: Tshibumba tshia Nsentedi, Réveillez-vous!, ne mikanda mikuabu mipatula kudi Bantemu ba Yehowa. Udi mua kumanya malu a bungi wewe mutangile mushindu udibu bafile mifuanu mu mikanda eyi. * Angata tshilejilu tshia mufuanu udi mu tshikoso tshia 11 tshia nshapita wa 17 mu mukanda wa Dimanya. Udi ufuanyikija dishilangana dia ngikadilu ya bumuntu mu tshisumbu ne dishilangana dia mashinyi adi ayila mu njila umue nenu. Bua tshinyi mufuanu eu mmuimpe? Tangila ne: mmushindamene pa malu atu enzeka dituku dionso, udi upetangana bikole ne bualu budibu bumvuija, ne dilongesha didimu nditoke. Tudi mua kuangata mifuanu idi mu mikanda yetu patudi tulongesha, pamu’apa tudi mua kuyakajangana ne majinga a mulongi wa Bible anyi kuyela mu muyuki kampanda.

21. Mmasanka kayi adi afumina ku dikala mulongeshi muimpe wa Dîyi dia Nzambi?

²¹ Kuikala mulongeshi muimpe kudi kupetesha masanka mavule. Patudi tulongesha, tudi tupesha bakuabu dimanya; tudi tuambuluisha bakuabu ne tshitupa tshia bitudi nabi. Difila dia mushindu’eu didi dipetesha disanka, bualu Bible udi wamba ne: “Disanka dia kupa ndipite dia kupeta.” (Bienzedi 20:35, MMM) Bua balongeshi ba Dîyi dia Nzambi, disanka adi ndia kumanya ne: tudi tupesha bantu tshintu tshia mushinga wa bushuwa udi ushala kashidi: bulelela budi butangila Yehowa. Tudi kabidi mua kupeta disanka didi difumina ku dimanya ne: tudi tuidikija Mulongeshi Munene Yezu Kristo.

[Mêyi adi kuinshi]

Udi muvuluke anyi?

• Mmunyi mutudi mua kulongesha ne mêyi mapepele patudi tulombola dilonga dia Bible? patudi tuenza muyuki mu tshisumbu?

• Mmunyi mutudi mua kuikala tuela nkonko bimpe patudi tuyisha ku nzubu ne ku nzubu?

• Mmunyi mutudi mua kueleshishangana meji bimpe bua kuleja ngikadilu ne njila ya Yehowa?

• Mmuaba kayi utudi mua kupeta mifuanu miakanyine?

[Nkonko ya dilonga]

 [Kazubu/​Tshimfuanyi mu dibeji 23]

Udi muvuluke mifuanu eyi anyi?

Bidi bilonda ebi mmifuanu mikese mimpe. Bua tshinyi kubenga kutangila mu mukanda anyi mu Tshibumba tshia Nsentedi tshidibu bafile bua kumona muvua mufuanu au muambuluishe bua kumvuija bualu buvuabu baleja?

• Anu bu bedi ba tutungu anyi bena manaya a diselemuka pa mabue a mashika, bua kuenza dibaka dimpe bidi nangananga bikengela kupeta muntu muimpe wa kuselangana nende.​—Tshibumba tshia Nsentedi tshia dia 15 Lumungulu 2001, dibeji dia 16.

• Kulonga mua kuleja dinanga nkufuanangane bikole ne kulonga muakulu mupiamupia.​—Tshibumba tshia Nsentedi tshia dia 15 Luishi 1999, dibeji dia 18, 22-23.

• Spiritisme udi kudi ba-demon bu mudi tshilobeshi bua bilembi. Utu ulobesha muntu udiye usua kukuata.​—Dimanya didi difikisha ku muoyo wa kashidi, dibeji dia 111.

• Tudi mua kufuanyikija mushindu udi Yezu mulue kusungila ndelanganyi ya Adama ne mubanji kampanda wa muoyo muimpe udi ulua, ufuta dibanza dia kumpanyi kansanga (diangata kudi mulombodi muena mutshima) ne unzulula tshiakabidi midimu ya kumpanyi eu, ne nunku wambuluisha bena mudimu bavule.​—Tshibumba tshia Nsentedi tshia dia 15 Luishi 1999, dibeji dia 16.

[Bimfuanyi mu dibeji 20]

Bena Kristo balelela mbalongeshi ba Dîyi dia Nzambi

[Tshimfuanyi mu dibeji 21]

Bakulu badi mua kuikala bela nkonko bua kuambuluisha bena Kristo nabu bua bapete bukole mu Dîyi dia Nzambi