‘Luayi kundi, meme nennupe dikisha’

Bansonga badi bu lumuma ludi lufila bukole

YEZU KRISTO wakakula malu avua atangila nansha ne bayidi bende batshitshivua bapuekele pakambaye ne: ‘Luanyi kundi, meme nennupe dikisha.’ (Matayo 11:28) Pakabanga bantu kulua ne bana kudiye, bayidi bende bakakeba bua kubakandika. Kadi Yezu wakabambila ne: ‘Nuitabuje bua bana bakese kulua kundi, kanubakandi.’ Yezu e ‘kubambula mu maboko ende, [kubabeneshaye].’ (Mâko 10:14-16) Bushuwa, Yezu uvua wangata bana ne mushinga wa bungi.

Bible udi wakula bua bansongalume ne bansongakaji, bana ba bitende ne bana bakese bakashiya bilejilu bimpe mu disadila Nzambi. Mukanda wa Misambu udi wakula bua “bansongalume” badi ne dikuatshisha bu dia mamata a lumuma. Udi kabidi wakula bua “bansongalume” ne “bansongakaji” ne: badi batumbisha dîna dia Yehowa.​—Musambu 110:3; 148:12, 13.

Muaba udi bansonga mua kulubulukila

Mbiakanyine bua kufuanyikija bansonga ne lumuma, bualu lumuma lutu lumvuija dibodiama dia bintu ne mabenesha mavule. (Genese 27:28) Lumuma lutu ne tshitalela ne lutu lukolesha. Mu tshikondo etshi tshidi Kristo mumane kuangata Bukalenge, bansonga bena Kristo bungi tshianana badi badifila ne tshisumi ku budisuile. Anu bu mamata a lumuma adi afila bukole, bansonga balume ne bakaji ba bungi badi basadila Nzambi ne disanka ne kabidi badi bambuluisha batendeledi nabu.​—Musambu 71:17.

Bansonga bena Kristo kabena anu bakolesha bakuabu patupu to; kadi nansha bobu bine badi bapeta pabu bukole mu mudimu wabu. Bulongolodi bua Nzambi mmuaba udibu mua kulubulukila bimpe. Bu mudi bansonga balume ne bakaji aba ne bikadilu bimpe, badi mu malanda mashême ne Nzambi. (Musambu 119:9) Mu tshisumbu, badi kabidi benza midimu milenga ne bapeta balunda bimpe; ne malu aa adi avuija nsombelu mulenga ne wa disanka.

‘Luondapu ne dikankamika’

Bansonga bena Kristo badiku badimona bu “mume” peshi mamata a lumuma anyi? Angata tshilejilu tshia Tania, nsongakaji udi wenza midimu ya mu tshisumbu ne tshisumi tshivule ne wenza ne disanka dionso mêba mapite pa 70 mu mudimu wa diyisha ku ngondo yonso. Mmunyi mudiye udiumvua? Udi wamba ne: “Ndi ndiumvua mukankamane ne muikale ne disanka. Kuikala ne Yehowa ne bulongolodi buende bua pa buloba mu matuku anyi a muoyo kudi bu ‘[luondapu] ne dikankamika’ kundi.”​—Nsumuinu 3:8.

Ariel, nsongakaji mukuabu udi wenza mudimu wa ku dîba ne ku dîba, udi ne dianyisha bua biakudia bia mu nyuma bidiye upeta mu tshisumbu. Udi wamba ne: “Pandi nya mu bisangilu bietu bia bena Kristo, mu mpungilu ne mu mpuilu, ne ndilamu biakudia bivule ku mêsa a Yehowa a mu nyuma, bidi binkankamika bikole mu nyuma. Ndi ngumvua makumbu pandi mmanya ne: ndi ne benzejanganyi nanyi ba mudimu mu buloba bujima.” Ariel udi wamba kabidi bua mpokolo mutambe bunene  wa dikankamika edi ne: “Bidi bimpesha bukole bua bungi bua kuikala bulunda ne Yehowa, nangananga pandi ngumvua bakula anyi mmona makenga makuate buôwa adi bena panu bakebele bantu.”​—Yakobo 2:23.

Abishai (udi ne bidimu 20) udi muambi wa lumu luimpe wa ku dîba ne ku dîba ne musadidi wa mudimu mu tshisumbu tshiabu. Udi umvuija bualu buende mu mêyi aa: “Ndi ndiumvua mukankamane bualu ndi mumanye mua kupita ne malu a bungi adi bansonga bapeta lelu. Bulelela bua mu Bible mbungambuluishe bua kutungunuka ne kushindamena pa tshindi ne bua kuenza bua kusadila Yehowa ne anyima wanyi mujima.”

Patshivuaye tshitende, Antoine uvua muntu wa muoyo wa tshitupa. Dimue dituku wakakuma mulongi wabu nkuasa, ne wakatapa mukuabu mputa ne kreyon. Antoine kavua muntu uvua ukankamikakaku bakuabu to! Kadi malu a mu Bible akalongaye akashintulula ngikadilu wende. Mpindieu ukadiye ne bidimu 19 ne muikale musadidi wa mudimu ne muyishi wa ku dîba ne ku dîba mu tshisumbu, udi wamba ne: “Ndi nsakidila Yehowa bua mudiye munganyishile bua kumanya malu ende ne bua mudiye mungambuluishe bua kumanya mua kuikala ndikanda ne bua kushintulula ngikadilu wanyi. Mushindu’eu ke undi mufike ku diepuka bilumbu bia bungi.”

Bakuabu bantu batu bamona ngikadilu wa dikankamika bakuabu udi nende bansonga bena Kristo. Matteo nnsonga Ntemu wa mu ditunga dia Italie. Mulongeshi wabu wakangata dipangadika dia se: mulongi yonso uvua udidinga upatula dîyi dibole mukana muende uvua ne bua kufuta tshibawu tshia makuta makese. Kunyima kua matuku ndambu, bana balongi bakalomba bua mulongeshi wabu ashipe mukenji au, bamba ne: “Kakuena mushindu wa kubenga kuikala ne ngakuilu mubi to.” Matteo udi umvuija ne: “Kadi mulongeshi wetu wakamba ne: kabivua nanku to, ne wakafila tshilejilu tshianyi meme Ntemu wa Yehowa, unganyisha kumpala kua balongi bonso bua ngakuilu wanyi muimpe.”

Mu kalasa kakuabu (mu ditunga dia Thaïlande) muvua balongi ba mutu mukole ba dikema. Mulongeshi wa mu kalasa aka wakambila Racha (muikale ne bidimu 11) bua kupita kumpala ku tshibasa mu kalasa ne kumuelaye kalumbandi bua ngikadilu wende mulenga, wamba ne: “Bua tshinyi buonso buenu kanuena nulonda tshilejilu tshiende? Udi ulonga bimpe ne tshisumi ne udi ne ngikadilu muimpe.” Pashishe mulongeshi eu kuambila balongi ne: “Ndi mmona ne: nudi ne bua kulua Bantemu ba Yehowa anu bu Racha bua nuenu kufika ku dilengeja bikadilu bienu.”

Bidi bienza disanka bua kumona bansonga bena Kristo binunu ne binunu bamanya Yehowa bimpe ne benza disua diende. Bansonga ba bikadilu bimpe ba mushindu’eu badi baleja ne: badi ne meji a bantu bakole. Nzambi udi mua kubambuluisha bua kupeta diakalenga mu nsombelu wabu wa mpindieu ne neabenzele malu malenga mu bukua-panu bupiabupia butshilualua. (1 Timote 4:8) Mu nsombelu muatuke wa mu nyuma udiku pa buloba lelu, mudi bansonga ba bungi badi kabayi ne disanka ne babungame, kadi bansonga bena Kristo bobu badi bakankamika bakuabu.